Kae ʻOua Ke Tau Toe Feʻiloaki
Fetongi ʻa ʻEku Manavaheé ʻaki e Tuí
ʻOku nofo ʻa e tokotaha naʻá ne faʻú ʻi ʻIutā, USA.
Fēfē kapau he ʻikai ke u maʻu ha toe taha ke teiti mo ia peá u taʻe mali ai pē?
ʻI he taimi ne sio mai ai hoku kaungāmeʻa mamaé, naʻá ne ʻilo oku ʻi ai e meʻa ʻoku fehalaaki. Ne u talaange ʻi he leʻo vaivai, “Kuó ma ʻosi kimaua.” Ne u toki foki mai pē ki ʻapi hili ha pōtalanoa lōloa mo e tangata naʻá ma faʻa teití. Neongo naʻá ma loto mamahi he māvaé, ka ne ma felotoi ko e meʻa totonu ia maʻamauá.
Ka ʻi he ʻosi atu ha ngaahi uike, ne kamata ke u ongoʻi veiveiua. Fēfē kapau he ʻikai te u toe maʻu ha taha ke ma teiti peá u moʻunofoa ai pē au? Fēfē kapau kuó u fai ha fili hala koeʻuhí ko homa faikehekehé?
Naʻá ku ongoʻi taʻelata mo veiveiua mo fakakaukau pe ʻoku totonu ke u tā ki ai ʻo vakai pe ʻoku toe fie kaumeʻa mo au. Naʻá ku hangē ko e lea ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, “taʻe fiemālie he tuʻunga lolotongá pea fakaʻanaua atu ki ha kahaʻu faingataʻa.”1
ʻI ha efiafi ʻe taha hili ha ngaahi uike ʻema māvaé, naʻá ku lau fekauʻaki mo e Toetuʻu ʻa e Fakamoʻuí. ʻOku fakamatala ʻa e Kosipeli ʻa Luké ʻi hono ʻaho tolú hili e toka ʻa e Fakamoʻuí ʻi he fonualotó, naʻe ʻalu Hono kau muimui faivelengá ke tākai ʻaki ʻa Hono sinó ha lolo sipaisi. Ka ne nau fakatokangaʻi kuo tekaʻi atu ʻa e maka ʻo e fonualotó pea kuo pulia ʻa Hono sinó. Ne hā mai leva ha ongo ʻāngelo ʻo pehē, “ko e hā ʻoku mou kumi ai ʻa e moʻuí ʻi he potu ʻo e maté? ʻOku ʻikai ʻi heni ia, ka kuo tuʻu hake” (Luke 24:5–6).
Ne fakafokifā e haʻu ha ongo mālohi kiate au mei he fehuʻí ni. Naʻe ʻikai ke u teitei fakakaukau kimuʻa ki he ongo naʻe maʻu ʻe he kau ʻaʻahi ki he fonualoto ʻo Sīsuú, ʻi heʻenau kumi honau Fakamoʻuí ʻi he feituʻu hala. Naʻe ʻikai ke u fakakaukau ki he meʻa ne nau fehangahangai mo iá ke tui kuo liʻaki e Sīsū ʻa e haʻahaʻa ʻo e fonualotó pea kuo toetuʻu ʻi he nāunauʻia.
Naʻe lea ʻa e folofolá ʻi ha kiʻi valokiʻi lelei. Naʻá ku fakatokangaʻi, hangē ko e ngaahi kaungāmeʻa ʻo e Fakamoʻuí, naʻá ku kumi ʻi he feituʻu hala ha fakafiemālie. ʻI heʻeku fakakaukau ki he kuohilí mo e “holi ki he meʻa ʻo e ʻaneafí”2 Naʻe ʻikai ke fakafiemālie kiate au pe fakaʻaiʻai au ke fai ha ngāue lelei. Naʻá ku fakatokangaʻi ʻoku fie maʻu ke taʻofi ʻeku sio ki he ngaahi aʻusia fakamamahi ʻo e kuohilí. Naʻá ku fie maʻu ke fetongi ʻa ʻeku manavaheé ʻaki e tuí mo e falala ʻe lava ʻe he Fakamoʻuí ʻo fakatupu ha moʻui foʻou mei heʻeku ngaahi aʻusia he kuohilí.
ʻOku ou faʻa fakakaukau ki he folofola ko iá ʻi he taimi ʻoku ou fakahoko ai ha fili ʻoku ou fakatomala hono faí pe fakaʻānaua ki ha ngaahi momeniti ʻi he kuohilí. Koeʻuhí ko e Fakamoʻuí, ʻe lava ke tau kamata foʻou. Koeʻuhí ko e Fakamoʻuí, ʻe lava ke “tau sio ki mui ke tānaki ʻa e maama mei ha meʻa lelei kuo tau aʻusia, kae ʻikai ko hono efuefú,” ʻo ʻilo “ko e kuohilí ke ako mei ai, kae ʻikai ke moʻui ʻi ai.”3 ʻE lava ke tau sio ki he kahaʻú ʻi he tui, kaeʻoua ʻe mole taimi he fakakaukau ki he ngaahi fili hala ʻo e kuohilí.