M̧ool ak Riab?

Jen David A. Edwards

Māākjiin ko an Kabun̄

Jet iien jeļā m̧ool eo jān bōd epen, bōtaab Jemedwōj Ilan̄ eaar letok n̄an kōj menin letok ko rekajoor n̄an jipan̄ kōj jeļā ikōtaan m̧ool eo an Anij im riab ko an Satan.

Eļan̄n̄e emōj am̧ kar bōk juon teej kōn m̧ool ak riab kajjitōk ko, kwojeļā jet iien epen n̄an kile juon bōd. Ejja āinwōt, ilo kajjitōk ko reļļap kōn tōmak, en̄jake, im mour aolep raan, ilo an kanooj aorōk n̄an maron̄ ba oktak ko ikōtaan ta eo em̧ool im ta eo ejjab aolep iien pidodo.

Mekarta, jej aikuj jab mijak āinwōt ro rej bōk teej eo rej jab pojak. Jemedwōj Ilan̄ eaar kōjeram̧m̧an kōj kōn elōn̄ menin letok ko n̄an jipan̄ kōj kile m̧ool ko An im riab ko an rikapo eo.

Kain Oktak ko an Riab Ko

M̧oktata, n̄an pijaik jibadbad eo, en̄in ej juon teej edik an m̧ool ak riab n̄an kwe:

Allōn̄ eo emaroro. riab
Neil Armstrong, Apollo 12 astronaut eo me eaar armej eo kein kajuon n̄an etetal ioon allōn̄, eaar ba bwe iien eo eaar juon “juon kālōn̄ ļo̧k eo eļap an armej.” riab
National Aeronautics im Space Administration (NASA) būrookraam̧ eo eaar jab maron̄ etal n̄an Mars ilo 1969 eo, kōn menin raar aikuj in etal n̄an allōn̄. riab
Kōto ko imejatoto, paijin ko, jorrāān ko jemaron̄ būki jen mejatoto eo, im kapan̄pan̄ ko jet renaaj kar kōm̧m̧an bwe en pen an armej jok ilo allōn̄, koba pija ko raar oktak im ennaan ko an rikam̧ool ro raar jab errā ilo jet meļeļe ko, kōn menin kien eo an U.S ej aikuj kōm̧m̧ane aolepān men eo. riab

Uwaak eo n̄an kajjojo kajjitōk ej Riab, im kajjitōk kein rej jutak kōn jet iaan pedped in riab ko kwonaaj āinwōt iooni.

Kajjitōk 1 ej juon jab m̧ool elam̧ waan, juon bōd ealikkar. Kajjitōk 2 ej juon m̧ool ejimettan, eo ekabokbok, kōnke ewōr juōn ak elōñ lok mol ko ie ippān riab ko (ekkar Appllo 11, ejab Apollo 12—kopo!). Kajitōk 3 ewōr ie juon riab ejum̧ae, ak juon jekjek me ruo wōt ļōmņak ko rej kwaļo̧k me rejjab lukkuun in ļōmņak ko wōt (NASA emaron̄ kar kālet n̄an jab etal n̄an jabdewōt jikin, n̄an waanjon̄ak). Kajjitōk 4 ej juon iakwelel “em̧m̧an”, eo ej kōjerbal eļap ļōmņak ko rem̧m̧an bōtaab emakijkij an kam̧ool ko bōd n̄an maron̄ tōl n̄an juon jem̧ļo̧k eo ebōd.

Riab ko Raan Kein

N̄e ej itok n̄an men ko me rej kareel ļōmņak ko am̧, tōmak ko, kālet ko, im m̧wil ko—men ko me ewōr kaje ko indeeo—ej jeram̧m̧an n̄an pukōt kain oktak ko an bōd ko, kōn an Setan, “ej jemen riab otemjej” (2 Nipai 9:9), enaaj kōjerbal jabdewōt jekjek emaron̄ n̄an kapo kōj. Errein rej jet iaan waanjon̄ak ko kōn ekōjkan an kōm̧m̧ani rainin, barāinwōt waanjon̄ak ko kōn ekōjkan ad maron̄ uwaak kōn m̧ool eo.

Alikkar An Jab M̧ool

Ļōmņak Riab:	Eo Ej Tōl (Riab Eļap):	M̧ool Eo:
Pija ettonoon ejjeļo̧k jorrāān ie im eban kōmetak jabdewōt.	Etal wōt im alooj pija nana.	Pija nana ej koba ippān ad lale m̧ōm̧ an kanniōk, emaron̄ in an̄ūrlep, kanooj kakkure kōj ilo jetōb, im emaron̄ kakkure jem̧jerā ko ad.

M̧ool Ejimettan

Ļōmņak Riab:	Eo Ej Tōl (Riab Eļap):	M̧ool Eo:
Kajjojo armej ejej uwaan im emaron̄ mour āinwōt an kālet, kōn menin ekōjkan am̧ en̄jake kōn im kwaļo̧k eok make rej men ko raorōk tata ilo am̧ mour.	Kwojjab aikuj kōtļo̧k bwe Anij ak Kabun̄ in ej jiron̄ eok ekōjkan mour, kōn menin etal wōt im kōm̧m̧ane ta eo kwoj kōņaan eļan̄n̄e ej kōm̧m̧an bwe en em̧m̧an am̧ mour.	Kōj wōj kajjojo ej juon ajri ejej uwaan nejin Jemedwōj Ilan̄, eo ekōņaan bwe jen erom ro rem̧m̧an tata im erom āinwōt E. Pokake n̄an kien ko An ej jipan̄ kōj bōk lan̄lōn̄ eo eļaptata.

Riab Ejum̧ae (Ewōr wōt ruo Jokelet ko)

Ļōmņak Riab:	Eo Ej Tōl (Riab Eļap):	M̧ool Eo:
Kabuñ in kwaļo̧k ņae jet jekjek in mour; kōn menin, ejjab kautiej im dike armej—ejjab bōk im iakwe.	Kōnke Kabun̄ in ejjab kautiej im dike, ej bōk kōrraat, im kajirere, im kaje, kōn menin kwoj aikuj bōjrak iktōltōl ippān.	Jab bōk an jabdewōt wāween mour ejjab jon̄an wōt dike ak jab kautieje. Jemaroñ kwaļo̧k meanwōd, kauteej, im jouj ñan aolep—ekoba armej ro me wāween mour ko aer rej jum̧ae kien ko an Anij—ilo ad m̧ool wōt n̄an Anij im kein ko An.

Iakwelel “Em̧m̧an”

Ļōmņak Riab:	Eo Ej Tōl (Riab Eļap):	M̧ool Eo:
Jet men ko ilo Bok in Mormon rej kariab jān kein kam̧ool ko rainin an jaintiij ro, im bwebwenato ko kōn ekōjkan an kar ukook rej jab jokkuun wōt juon, kōn menin Joseph Smith eaar aikuj in kar kōm̧m̧ani make ak kapiki jān jabdewōt jikin.	Bok in Mormon ej jab m̧ool im Joseph Smith eaar jab juon rikanaan, kōn menin bōjrak koba ļo̧k ippān Kabun̄ eo.	Science ej kapen elōn̄ men ko ilo Bok in Mormon, im “kein kam̧ool” eo ņae kakkure. Ak kam̧ool eo eaorōk tata kake ej kam̧ool eo ilo an Jetōb ba n̄an eok bwe em̧ool im bwe Joseph Smith eaar juon rikanaan em̧ool.

Ekōjkan n̄an Jeļā M̧ool Eo

Kōn menin ia eo lale m̧ool eo edipio an m̧ool eo ej itok jān? Ekōjkan ad maron̄ lo ilo riab ko? Errein jet iaan menin letok ko rekajoor Jemedwōj Ilan̄ eaar litok n̄an kōj n̄an kōjeno̧lo̧k m̧ool eo jān bōd.

Meram eo an Kraist. “Meram eo an Kraist … im̧we aolep n̄an kōjakkun wōt kajjojo aolepān laļ in n̄an kōjenolo̧k m̧ool eo jān bōd; jim̧we jān jejjet jān bōd. Ej lujur kōļmenļo̧kjeņ eo am̧.”¹
Jetōb Kwojarjar eo. “Jetōb an m̧ool … enaaj tōl kom̧ n̄an lowaan m̧ool otemjej” (Jon 16:13).
Jeje ko rekwojarjar. “Anij ej kōjerbal jeje ko rekwojarjar n̄an kajim̧we ļōmņak ko rebōd, iminene ko rebōd, im jerawiwi kōn kakkure ko an rekabūrom̧ōjm̧ōj.”² Bok in Mormon eo ekanooj aorōk ilo menin, bwe ej “jelet rikōjdat ro an Kraist. Ej mijaļ katak ko rebōd im joļo̧k akwāāl. (Lale 2 Ni. 3:12.)”³
Rikanaan ro raan kein. “Eddo an [juon rikanaan] ej n̄an kwaļo̧k ankilan Anij im m̧ool in piktokin n̄an armej. … Juon rikanaan ej jum̧ae jerawiwi im kanaan kōn jekjek ko an.”⁴
Jeļāļo̧kjeņ. “Juon armej ekwojarjar … pukōt ekkatak jen katak, im jen barāinwōt tōmak. Jeļāļo̧kjeņ … ej kōm̧m̧an bwe juon en jeļā m̧ool eo jān bōd, eļaptata kōn ekkatak jeje ko rekwojarjar. (Lale D&C 88:118.)”⁵

Men̄e emaron̄ jab aolep iien ej pidodo n̄an uwaak M̧ool ak Riab n̄e jelm̧ae aolep ļōmņak ko roktak ilo laļ in, menin letok ko Jemedwōj Ilan̄ eaar lewaj n̄an eok remaron̄ jipan̄ eok anjo ioon teej eo.