Kajjitōk im Uwaak ko
“Ta eo ij aikuj kōm̧m̧ane n̄e juon unin kōnono lelōn̄tak ilo jikuuļ me ej ņae katak ko an ko̧jpeļ eo, āinwōt m̧an lo̧jien?”
Elōn̄ wāween ko n̄an uwaak—ak jaab—ej pedped wōt ioon jekjek eo. M̧oktata, ļōmņak kōn ta eo emaron̄ waļo̧k eļan̄n̄e kwoj kōm̧m̧ane ak jab ba jabdewōt. Eļan̄n̄e kwoj ikōn̄ im ro jet remaron̄ ļōmņak bwe kwoj errā kōn juon men eo kwojeļā ke ebōd, komaron̄ kōņaan in pukōt juon wāween eo epidodo n̄an kōm̧m̧an bwe ta eo kwoj jab rie en alikkar. Eļan̄n̄e kwoj ļōmņak ennaan ko am̧ renaaj wōt kōm̧m̧an iakwelel, innām komaron̄ pukōt bar juon iien n̄an kōnono. Mekarta, eļan̄n̄e kūlaaj eo am̧ ej kautiej doon im rūkaki eo ej kajjitōk kōn bōk koņaam̧ komaron̄ jar kōn im̧we innām kōmeļeļeik tōmak eo am̧.
Komaron̄ barāinwōt m̧aanjebpopo m̧okta ļo̧k jen iien eļan̄n̄e kwōjeļā kūlaaj eo am̧ enaaj ekōnono kōn jet unin kōnono. Ilo kakkobaba n̄an jeje ko rekwojarjar im kōnono ko kōn unin kōnono eo an kweilo̧k eo eļap, lale True to the Faith, Gospel Principles, ak For the Strength of Youth. komaron̄ barāinwōt kaminene kōmeļeļeiki unin kōnono eo ilo nokon in jota eo an baam̧le. N̄e kopojak, kōņaan ippān rūkaki eo am̧ ak ro ilo kūlaaj eo am̧.
Wāween am̧ uwaak aorōk in wōt ta eo kwoj ba. Jeļā kautiej im kajjieon̄ jab kōjerbal naan ko an Kabun̄ in. Ro ilo kūlaaj eo am̧ renaaj jab meļeļe kwe eļan̄n̄e, “Juron rikapilōk an Doulul eo an Jiron̄ ro ilo ward eo aō kar katakin eō bwe …”
Ta eo eaorōk tata ej n̄an am̧ jeļā ta eo kabun̄ in ej katakin im ta eo Jetōb Kwojarjar ej jiron̄ eok kake bwe koj jāmin po jān bōd ko komaron̄ ron̄ ak riiti ilo kūlaaj.
Kajim̧we Katak eo Ebōd
Jej uwaan Kabun̄ eo ej kōketak jerbal in mijenede me jej aolep kūr n̄an kwaļo̧k, kōn menin, jej jab maron̄ kōtļo̧k bwe katak eo ebōd ej ajeded. Ilo jekjek rot kein, jej aikuj kōnono n̄an maron̄ kajim̧we katak eo ebōd im jipan̄ armej meļeļe kōn wāween eo an jepļaaktok eo an ko̧jpeļ eo kōn unin kōnono eo.
David M., iiō 16, Kasaï-Occidental Province, Democratic Republic of Congo
Kwon jouj
Ij en̄jake ij aikuj kwaļo̧k aō ļōmņak ilo juon wāween ejouj im barāinwōt kwaļo̧k etke ij tōmaki. Ijjab ļōmņak ij aikuj kōm̧m̧an bwe ro jet ren kwaļo̧k ļōmņak ko aō, bōtaab bwe rej aikuj jeļā ia eo ij jutak ie ilo jet unin kōnono ko im meļeļe kōļmenļo̧kjeņ eo aō.
Sabrina S., iiō 16, Oregon, USA
Kwon Kautiej
Eaorōk n̄an kōm̧m̧an bwe ren ron̄jake kōj make, bōtaab ebarāinwōt kanooj aorōk n̄an kautiej ro tōmak ko an ro jet. Jab akwāāl. Akwāāl ej kōm̧m̧an kōjdat im ļōkapokpok. Eļan̄n̄e juon ļōmņak ej jarjar lōn̄tak ņae kabun̄ in ad, pād im aenōm̧m̧an wōt, im kautiej, im jab meļo̧kļo̧k in ron̄jake Jetōb eo. Ewōr men ko jej jab meļeļe ak Anij emeļeļe. Jej aikuj ron̄jake im katak jen Jetōb eo An.
Hannah M., iiō 18, Utah, USA
Kwaļo̧k ta eo Kabun̄ in ej Katakin
Ij kajjieon̄ uwaak kajjitōk kein n̄an jon̄an eo em̧m̧an tata jān maron̄ ko aō kōnke ro m̧ōtta im rūkaki ro aō rejjab jeļā, ijjelo̧kin ij jiron̄ et, ta eo tōmak ko an Kabun̄ in unin kōnono kein. Jen kōm̧m̧an āindein, renaaj maron̄ jeļā jipan̄ kein ilju im jekļaj, im kwonaaj jeram̧m̧an ilo jetōb. Keememej: “Āindein en romak ami meram im̧an mejān armej, bwe ren lo jerbal ko ami rem̧m̧an im nōbar Jememi i lan̄” (Matu 5:16).
Joshua M., iiō 16, Manchester, England
Jipan̄ Ro Jet Ļōmņak kōn Ta eo Ejim̧we
M̧ool ilo am̧ kwaļo̧k en̄jake ko am̧. Elōn̄ unin kōnono ko ilo jikuuļ, āinwōt m̧anm̧an loje, rekanooj ļap kōmaltato kaki, kōn menin jab jook in kōnono. Ej juon iien em̧m̧an n̄an kwaļo̧k ko̧jpeļ eo im jon̄ak ko jej tōmak ie. Eļan̄n̄e kwoj kwaļo̧k tōmak ko am̧, komaron̄ jipan̄ armej ļōmņak kōn ta eo ejim̧we.
Madison R., iiō 14, North Carolina
Keememej Wōn eo Kwoj Bōk Jikin
N̄e kwoj iion wāween kein, kajjieon̄ keememej bwe ro jet remaron̄ jab en̄jake āinwōt kwe kōn unin kōnono eo āinwōt kwe. Jab koļap ak kipel, bōtaab jab mijak n̄an bōbrae tōmak ko am̧. Keememej bwe kwoj bōk jikin Kraist.
Madeline K., iiō 16, Wyoming, USA
Jeļā kōttōpar ko an Kabun̄ in
Iaar pād ilo juon kooj ijo unin kōnono ko reakwelele raar emakijkij ekōnono kaki. Men eo m̧oktata n̄an kōm̧m̧ane ej n̄an kautiej tōmak ko an ro jet, ilo am̧ kōtmāne jān rijikuuļ ro m̧ōttan ilo kūlaaj eo. Eļan̄n̄e unin kōnono eo eidaptōk ippān Kabun̄ in, anemkwoj n̄an kwaļo̧k ļōmņak eo am̧. Kwoj jab aikuj kwaļo̧k etan Kabun̄ in ilo uwaak eo am̧. Ijo wōt ke, kanooj lale n̄an jeļā ia eo Kabun̄ in epād ie ilo men kein.
Joseph Z., iiō 18, Maryland, USA
Jab Akwāāl
Inaaj kar kōmeļeļeik ļōmņak eo aō, jurake pedped ko im katak ko an Kabun̄ in, kautiej ļōmņak ko an ro jet. In kar jab akwāāl, eo enaaj kadiwōj ļo̧k Jetōb eo, emaron̄ kar kareel ro jet ilo juon wāween em̧m̧an.
Daiana V., iiō 15, Buenos Aires, Argentina