M̧aanjebpopo n̄an Jerbal, Jerbal n̄an Kōbpopo
Anij eaar lewaj Priesthood eo an Aron kōnke Ewōr juon jerbal n̄an kom̧—kiiō im ilo ilju im jekļaj.
Pija ko jen Taia Morley
Jonathan ej juon jera eo eaar kobatok ilo Kabun̄ in emān iiō ko rem̧ootļo̧k. E ej make wōt membōr ilo Kabun̄ in ilo baam̧le eo an. Ālkin an kar bōk Priesthood eo an Aron, eaar jino jerbal n̄an ro jet āinwōt ej jan̄in kar kōm̧m̧ane m̧okta. Jonathan eaar jeļā n̄an jerbal, eaar aikuj in katak eļap. Eaar barāinwōt kōņaan in wānōk im lōke e eļap ļo̧k, bwe eaar katak ko̧jpeļ eo, kar jar, im pād ilo kweilo̧k ko an Jabōt im jemenere. Eaar lukkuun jerbal n̄an kōjparok kien ko im jon̄ok ko an Kabun̄. Eaar tiljek kakūrm̧ool eddo in priesthood ko an, ekoba erom juon rūkaki in loļo̧k eo eļap. An Jerbal n̄an Anij bok eo eaar jipan̄ e meļeļe eddo ko im katak n̄an kakūrm̧ooli.
Jerbal in jipan̄ an priesthood eo an Jonathan kar leļo̧k n̄an e kajoor ilo jetōb. Eaar jipan̄ kōjparok e jān aolep kareel ko renana. Eaar lukkuun eddōk ļo̧k ke eaar jerbal im kōppopo n̄an ilju im jekļaj eo an. Iiō eo ļo̧k, eaar erreo n̄an bōk Melkisedek Priesthood eo im menin letok eo an tampeļ eo. Ej kiiō jerbal e juon mijen ilo Brazil.
Priesthood eo an Aron emakijkij ņaetan “priesthood in m̧aanjebpopo.” Anij eaar lewaj n̄an eok Priesthood eo an Aron kōnke Ewōr juon jerbal n̄an eok—kiiō im ilo ilju im jekļaj. Am̧ tiljek ilo jipan̄ ilo Priesthood eo an Aron ej kōpooj eok n̄an iien ko rem̧m̧an reļļap ļo̧k n̄an jerbal ilo iiō ko rej itok. Āinwōt Jonathan, kwoj m̧aanjebpopo n̄an “bōk Melkisedek Priesthood, n̄an bōk kōjeram̧m̧an ko an tampeļ eo, n̄an jerbal e juon mijen elikio, n̄an erom juon ļeo pālele eiakwe im jemān, n̄an wōnm̧aan ļo̧k ilo jerbal in eatok n̄an Irooj” (True to the Faith: A Gospel Reference [2004], 4).
Komaron̄ jab jeļā aolep meļeļe ko an iien ko rem̧m̧an Jemedwōj Ilan̄ eaar likūt im̧aam̧, ak ij lōke eok bwe kwonaaj m̧aanjebpopo n̄an tōpari eļan̄n̄e kwoj keememej n̄an kōm̧m̧ane wāween in āinwōt rikabwijer Priesthood eo an Aron.
Ļoor Jisōs Kraist
Āinwōt juon rikabwijer priesthood eo, kwoj juon ribōk jikin Jisōs Kraist. Meļeļein bwe kar kajjitōk ippām̧ n̄an ļoor E im n̄an kōm̧m̧ane ta Enaaj kōņaan kōm̧m̧ane. Ta eo enaaj kar kōm̧m̧ane? Ilo aolep jekjek, Eaar wujlepļo̧k mour eo An n̄an jerbal im kōjeram̧m̧an ro jet. Barāinwōt kwe. Leļo̧k eok make ilo jerbal n̄an ro jet—im eddōk im kōkōm̧anm̧an ļo̧k bwe en ļapļo̧k ilo kwe n̄an leļo̧k! Keememej wāween an Jisōs kar eddōk ļo̧k ilo An kar jodikdik: Eaar “kalapļo̧k ilo An mālōtlōt im rūtto, im ilo jouj ippān armej im Anij” (Luk 2:52).
M̧ōttan ļoor Rilo̧mo̧o̧r eo ej erom mālōtlōt im ājmour ilo ānbwin ilo am̧ jodikdik. Menin ebōk am lukkuun jerbal im aolep iien kōm̧m̧ane ijo em̧m̧an tata (lale D&C 4:2). Kwoj bōk jouj ippān Anij ilo am kepaak ļo̧k E jen jar aolep iien, katak ko̧jpeļ, pokake, im jerbal in jipan̄. Kwoj bōk jouj ippān ro jet ilo am̧ jouj im kautiej n̄an baam̧le eo am̧ im juon m̧ōttā āinwōt Kraist n̄an aolep.
Keememej bwe Jisōs aolep iien eaar kōm̧m̧ane ankilan Jemān. Kwoj ļoor Kraist n̄e kwoj pukōt ankilan Anij aolepān raan eo n̄an tōl jerbal eo am̧ im jerbal kōn im̧we ko an jetōb kwoj būki.
Kōm̧m̧ani Kain̄i ko an Priesthood
Kain̄i ko an priesthood rej menin aikuj n̄an aolep ajri ro nejin Anij im kōjeram̧m̧an jim̧or ļaddik ro Nejin im leddik ro Nejin barāinwōt. Jān iien eo kwoj erom juon tikōn, kwoj jipan̄ jerbal ilo juon kain̄i an priesthood ilo ajije kwojkwoj eo. Kwonaaj wōnm̧aanļo̧k n̄an kōm̧m̧ane kain̄i ko an priesthood eo ilo Priesthood eo an Aron tokālik ilo am̧ kōbpopo im kōjeram̧m̧an kwojkwoj eo, kōkpeptaij, im bōk koņaam̧ ilo ekkapit ko jet an rikabwijer Priesthood eo an Aron.
N̄an bōk koņaam̧ ilo kain̄i ko rekwojarjar, kwoj aikuj in erreo. Am erreo emaron̄ lewaj eļap kajoor in jetōb n̄an kain̄i ko kwoj kōm̧m̧ani. Kajjieon̄ erreo ilo aolep wāween n̄an kwaļo̧k jerbal ko rekwojarjar an kwojkwoj eo an Irooj (lale D&C 38:42). N̄e kwoj kōm̧mane, komaron̄ jutak im̧aan ward eo am̧ ak branch āinwōt juon ribōk jikin Jisōs Kraist em̧ool. Renaaj jeram̧m̧an jen ikdelel eo am̧ n̄an kōjparok bujen ko kwoj jipan̄ er kōkāāli.
Kwaļo̧k Aolep Iien
Āinwōt juon rikabwijer Priesthood eo an Aron, kwoj kwaļo̧k. Ilo aolep iien, pukōt iien ko rem̧m̧an n̄an kwaļo̧k n̄an baam̧le eo am, ro m̧ōttam̧, membōr in doulul eo am̧, im ro jet. Aolep men kwoj kōm̧m̧ani ilo priesthood eo ej jipan̄ kōm̧m̧an n̄an ro jet jim̧or ilo ānbwin im ilo jetōb. N̄an waanjon̄ok, n̄e kwoj jipan̄ bisop eo am̧ ak branch būreejtōn eo am̧ jen jerbal n̄an juon baam̧le kwoj loļo̧k, kwoj katak ewi wāween n̄an kile im kōjparok aikuj ko an ro jet. Kwonaaj barāinwōt kwaļo̧k n̄an ro jet ilo am pukōt ļo̧k n̄an kōkajoorļo̧k membōr in doulul eo am̧ im lo̧mo̧o̧ren eo ejaniknik, aini joortak ko n̄an jipan̄ rijeram̧ōl im riaikuj, kōm̧m̧ani jerbal ko n̄an rinan̄inmej im riwōtam̧we, katakin im kam̧ool kōn Kraist im ko̧jpeļ eo An, im kōmeraik ļo̧k eddodo ko an eo ebweer.
Kwoj kwaļo̧k āinwōt am katak katak ko ilo kweilo̧k eo an doulul eo am̧ im ilo nokon in jota eo an baam̧le eo am̧. Kwoj kwaļo̧k āinwōt am̧ karuwaineneik aolep n̄an itok n̄an Kraist (lale D&C 50:29)—ilo m̧weo ilo doulul eo, ilo jikuuļ eo, ippān mijenede ro rej jerbal aolep raan, im jabdewōt jikin kwoj pād ie.
Ilju im Jekļaj eo Am̧
Kōnono ippān ro jinem̧ im jemōm̧ ak rikapilōk ro kōn ta enaaj menin aikuj n̄an eok ilo eddo eo am ilju im jekļaj āinwōt juon rikabwijer Melkisedek Priesthood eo, mijenede, ļeo pālele, im jemān. Je ilo jikin eo em̧ōj kōpooje jet iaan eddo ko reļļap im ewi wāween am maron̄ m̧aanjebpopo n̄ani rainin ilo am̧ jerbal ilo Priesthood eo an Aron. Emaron̄ āinwōt eļap kiiō, ak keememej bwe iaļ eo em̧m̧an tata n̄an m̧aanjebpopo ej kōm̧m̧ane ta eo Jemedwōj Ilan̄ eaar kajjitōk ippam̧ rainin n̄an kōm̧m̧ane. Kwon maron̄ loe m̧ōņōņō ilo am̧ jerbal kiiō im m̧aanjebpopo n̄an ilju im jekļaj eo am̧ eaiboojoj.