2014
Kōj Jej Pein Irooj
Eprōļ 2014


Kōj Jej Pein Irooj

Pukōt ļo̧k rijeramōļ ro im kwaļo̧k n̄an ro rej en̄taan rej menin aikuj n̄an meļeļe eo n̄an erom juon rikaļoor an Jisōs Kraist.

Tōre ko ilo raan ko m̧okta jān iien eo ke Amedka eaar jorrāān kōn menin jeram̧m̧an, jiljino stake būreejtōn ro jān Salt Lake Valley kar koba ippān doon n̄an jerbale kōn jekjek eo ej nana ļo̧k ikkijeen jeramōl im kwōle eo eaar kaam̧jak n̄an kaddoik elōn̄ membōr ro an Kabun̄ eo.1 Men̄e jorrāān in jeram̧m̧an eaar jelet armej aolep jikin, Utah make eaar lukkuun in n̄ita.2

Ilo iien in, ritōl ro an Kabun̄ in ewōr wōt jejjo aer kein jipan̄ n̄an jipan̄ ro rej aikuj. Remaron̄ kar kōjerbal jortak in jitlo̧k ko, aaet, ak aikuj eaar wōnm̧aanļo̧k wōt kar lukkuun ļapļo̧k jen ke raar en̄jake m̧okta ļo̧k. Ium̧win tōl eo an Bisoprik eo Eļap, juon Deseret Employment Bureau eaar jutak ilo jino 1900s. Ak eaar jab lukkuun bwe n̄an lale aikuj eo eļap.

Ritōl rein jiljino an priesthood eo raar jeļā bwe eļan̄n̄e armej in stake ko aer raar maron̄ jipan̄, rekar jab maron̄ kōttar. Raar aikuj in bōk bun̄tōn eo emōkaj. Raar jino jen kōm̧m̧an bwe armej ren jerbal. Raar aiin em̧m̧aan ro im bōk er n̄an jikin kallib ko ijo remaron̄ kar totaki menin eddōk ko. Ilo oktan n̄an jerbal eo aer, rikallib ro rem̧ōņōņō kar jouj leļo̧k m̧ōn̄ā n̄an em̧m̧aan rein. Bwe ko kar būki n̄an juon joko im kar lito litak n̄an ro raar kwōle. Ilo an menin leļo̧k ko ļapļo̧k, Armej ro rekwojarjar raar jino kōm̧m̧an m̧ōn̄ā ilo kuwat n̄an kakkoņi. En̄in eaar jinoin būrookraam̧ eo an menin jipan̄ ilo raan kein.

Ralitōkn̄oul iiō tokālik, ritōl ro an Kabun̄ in raan kein ilo aolepān laļ in rej reilo̧k n̄an jarlepju ko aer im en̄jake ejja jibadbad in wōt n̄an pukōt ļo̧k ro ilo aikuj.

Ilo Oktoba 2011 kweilo̧k eo eļap, Būreejtōn Dieter F. Rikakpilōklōk eo Kein Karuo ilo Būreejtōnji eo Kein Kajuon, eaar ba: “Emakijkij ad kile aikuj ko ipeļaakid, kōjatdikdik bwe juon eo jān ettoļo̧k enaaj make jede tok n̄an jipan̄ kake aikuj ko. Bōlen jej kōttar ro retijem̧ļo̧k kōn jeļāļo̧kjeņ eo einjuon n̄an ņa mejļan jorrāān ko. N̄e jej kōm̧m̧ane menin, bōk jān eo ituriid jerbal in jipan̄ eo jemaron̄ kar leļo̧k, im jej bōk jān kōj make juon iien em̧m̧an n̄an jerbal. Ilo an ejjeļo̧k men ebōd ippān ritijem̧ļo̧k ro, jān kanooj lale: ejjamin bwe n̄an er n̄an ņa mejļan jorrāān ko aolep. Ijello̧kin, Irooj eaar likūt priesthood eo An im doulul ko an n̄an kōj ilo aolep laļ ko ijo Kabun̄ in ej jutak ie.”3

Kūr in n̄an ritōl ro an Kabun̄ ijo jikier im membōr ro n̄an jerbal āinwōt kar im̧we jen Jetōb Kwojarjar eaar tōl elōn̄ ipeļaakin laļ in n̄an, āinwōt Būreejtōn Uchtdorf eaar ba, “ņa mejļan n̄an [er make].”4 Raar limtak pein nuknuk ko aer im pepe n̄an keememej ilo men otemjej rijeramōļ im riakuj ro, rinan̄inmej ro im riake ro (lale D&C 52:40). Limtak pein nuknuk ko aer im pojak n̄an jerbal.

Ecuador

Āinwōt an Bisop Johnny Morante ilo Guayaquil, Ecuador, reilo̧k n̄an membōr ro an ward eo an, būruwōn eddo ļo̧k. Elōn̄ baam̧le ko rej likjab n̄an bōk menin aikuj ko remenin aikuj an mour. Ekōņaan in jipan̄ er, kōn menin eaar bōk meļeļe ippān ritōl ro an ward eo im bōk menin n̄an Irooj.

Kōnke jerbal ko ilo jikin in ejjab bwe, eaar jino in jerbal ippān juon kumi in 11 sister ro, rōjan̄ er n̄an jibadōk kōttōpar eo n̄an kōm̧m̧an pejnej ko reddik. Sister rein raar kile bwe eaar wōr juon menin aikuj n̄an kein karreo ko an juon em rem̧m̧an ļo̧k, dik ļo̧k wōnāer, im raar ļōmņak eļan̄n̄e remaron̄ kar kōm̧m̧ani im wiakaki ilo jukjukinpād eo aer. Ak ewi wāween aer naaj katak n̄an kōm̧m̧ane kein karreo kein?

Ilo iien in, Bisop Morante eaar jino kile juon iaan sister ro ejjab jerbal ilo ward eo an eo eaar lukkuun jerbal āinwōt juon jikin uno ko roktak. Ke sister ro 11 raar kajjitōk eļan̄n̄e liin emaron̄ jipan̄, liin eaar laudin̄din̄ n̄an katakin er ekōjkan aer kōm̧m̧an, m̧weiuk ko rem̧m̧an tata.

Raar kōm̧m̧ane juon pejnej plan, kōkkaļļeik jikin ko ilo jukjukinpād eo me kajjojo sister remaron̄ jerbal ie, kālet kein karreo ko remaron̄ kōm̧m̧ani, im kōm̧m̧an im pijaik kilin pakij ko.

Ium̧win jejjo allōn̄ ko, raar ejaake juon jikin wia im kar bōktok wōrļo̧k in jāān ko n̄an kadik ļo̧k aer jeramōl im jipan̄ kakke n̄an aikuj ko an baam̧le ko aer.

Ke mānija ro an juon kompani in kōm̧m̧an uno kar jeļā kōn jikin wia in, raar jino itok limo kōn bwebwenato in an rikōm̧m̧an uno in ejjeļo̧k an jerbal. Āliktata raar intōrpiu e im kōjerbal e bwe en jeban jikin kōm̧m̧an uno ko aer make.

Russia

Ilo Rechnoy Ward ilo Moscow, Russia, Galina Goncharova, eo eaar jerbal āinwōt rikōm̧m̧an bwebwenato an ward, eaar jikeet ioon jet ice im kar bwilo̧ke pā ko pein. Liin eaar bōk ļo̧k e n̄an aujipitōļ, me pein kar kitim er kōn korak ko. Liin eaar jab maron̄ naajdik e make ak kanuknuk e make. Liin eaar jab maron̄ kuum̧i bōran ak uwaake taļboon eo.

Ke membōr ro m̧ōttan jen ward eo raar jeļā ta eo eaar waļo̧k, raar m̧ōkaj aer uwaak. Rikabwijer priesthood ro raar leļo̧k n̄an e juon kōjeram̧m̧an im kar jerbal ippān sister ro an Doulul eo an Kōrā ro n̄an kōm̧m̧ane juon jikejuuļ n̄an lale sister in em̧m̧an im pād ilo aikuj ko an.

Vladimir Nechiporov, ritōl an mijen ilo ward eo, eaar ba, “Kōm̧ij keememej juon kōnono ilo kweilo̧k eo eļap kōn juon ekjab in Kraist eo eaar jako pā ko pein.5 Itulaļ ej ekjab eo juon armej eaar likūt juon dōkā eo ej jeje, ‘Kwoj pā ko peiū.’ Ium̧win jet wiik ko sister in em̧m̧an eaar jorrāān, membōr ro an Rechnoy Ward kar en̄jake tūriam̧o̧ n̄an bwebwenato in. Em̧ool kōm̧ ar erom pā ko pein.”

Philippines

Ke Lan̄ eo Washi eaar wōtlo̧k tok ioon Philippines ilo 2011, eaar kaibwij leplep jikin eo kōn juon dān eļap im kōn juon kōto. 41, 000 jim̧a mōko raar jorrāān, im elōn̄ ļo̧k jen 1,200 armej raar luuji mour ko aer.

M̧okta jen ibwijleplep eo, Max Saavedra, būreejtōn eo an Cagayan de Oro Philippines Stake, kar en̄jake im̧we n̄an kōm̧m̧ane juon tiim an stake n̄an jorrāān jen idin̄. Eaar ejaaki kamitii ko n̄an kakūrm̧ool elōn̄ jerbal ko—men otemjej jān kappok im lo̧mo̧o̧ren n̄an kein lale nan̄inmej ko reddik n̄an leļo̧k m̧ōn̄ā, im nuknuk.

Ke dān in ibwijleplep eo kad dikļo̧k n̄an juon jon̄ak em̧m̧an, ritōl ro an Kabun̄ im membōr ro raar itok itak. Raar bōk eddo n̄an ajmour an kajjojo membōr im bōk eddo in jorrāān eo. Juon membōr eaar jipan̄ kōn kein aō rōbba ko n̄an bōktok membōr n̄an jikin eo em̧m̧an. Imōn kweilo̧k ko raar peļļo̧k n̄an leļo̧k nuknuk n̄an aolep ro rej aikuj m̧ōn̄ā, būļan̄kōj ko, im juon jikin n̄an kōppād. Dān erreo eaar lukkuun menin aikuj, Būreejtōn Saavedra eaar kepaak juon pejnej eo ewōr waan ikkun, im raar bōk ļo̧k dān eo erreo n̄an imōn kweilo̧k rej kōm̧akūtļo̧k armej n̄ani. Membōr ro rekapāāl ilo taktō kar uwaak n̄an ro raar jidik ikkinejnej.

Ke membōr ro an Kabun̄ in raar jipan̄ jen, Būreejtōn Saavedra im tiim eo an kar loļo̧k jikin ko rej kōm̧akūtļo̧k armej n̄ani ilo bukwōn eo im leļo̧k jipan̄. Raar bōktok ippāer m̧ōn̄ā im kein jipan̄ ko jet. Elōn̄ iaan membōr ro, raar luuji m̧ōko m̧weer, mōkaj im jipan̄ ro jet ālkin lan̄ eo. Ke eaar bōjrak an wōt im eaar mōrā ioon bwidej, Mormon Helping Hands palinteer ro jān jilu stake ko raar etal im leto letak kein jerbal barāinwōt jipan̄ karreo.

Brazil

Ilowaan bukwōn in Sete Lagoas, Brazil, ej juon jikin jokwe n̄an kōrā ro ewōr mōjņo̧ ilo ānbwin ro mour ko aer raar joorrāān jen kakkure an uno ekkajoor. Kajjojo raan rej kakkōt n̄an mour. Eaar wōr juon aer um̧ in kōmet rej kōjerbal e n̄an kōmet enan̄in 30 ļoub in pilawe juon raan. Kōrā rein raar bōk jet jipan̄ jān juon armej jen humanitarian, eaar bwe pilawā ippāer n̄an naajdik er make. Ke ritōl ro an Kabun̄ in jān Sete Lagoas Brazil Stake raar jeļā kōn aikuj ko an kōrā rein, raar kōņaan in jipan̄.

Raar kōnono ippān kōrā rein kōn aikuj kein aer. Kōrā ro raar ba bwe eļan̄n̄e raar jab kōmet elōn̄ pilawe, remaron̄ kar jab maron̄ naajdik er make ak bōlen maron̄ kar wiakake jet ļoub ko im bōk jet jāān ko relukkuun in aikuji.

Ritōl ro an Kabun̄ in im membōr ro raar jerbal ippān jarin tariņae eo an police im juon jikuuļ ijo n̄an kōkōm̧anm̧an ļo̧k jekjek ko n̄an kōrā rein. Kōn jipan̄ eo an juon jāān in Church humanitarian im paļinteer ro jān Kabun̄ im jukjukinpād eo, raar maron̄ kalōk juon imōn kōm̧at ekāāl—juon eo eaar kōtļo̧k an kōrā ro kōm̧at 300 ļoub in pilawe aolep iien.

Kōn kein ijjino ko raar būki, kōrā rein ilo imōn kōmat pilawe eo kar maron̄ kōjerbal rijerbal eo kein kajuon—juon kōrā ilo imōn jokwe an kōrā ro routam̧we.

Jerbal eo an Menin Jipan̄

Āinļo̧k wōt ritōl ro an Kabun̄ in ro reim̧we n̄oul iiō ko rem̧ootļo̧k ro raar loe menin aikuj eo eļap ipeļaakier im m̧akoko in elļo̧k jene, ritōl ro an Kabun̄ in im membōr ro ipeļaakin laļ in rainin rej kōm̧m̧ane ejja wāween in ilo jikin ko aer make im ilo wāween ko aer make.

Ke Būreejtōn Uchtdorf eaar kōnono n̄an Kabun̄ in kōn kōjparok ro jet, eaar ba: “Wāween eo an Irooj ej jab n̄an jijet iturin dān eo im kōttar an dān ko eļļā m̧okta jen kijooni. Ej n̄an itok ippān doon, limtak e pein nuknuk ko ad, etal im jerbal, kalōk juon būriij ak juon tim̧a n̄an kijoone dān ko rej ad apan̄.”6

Pukōt ļo̧k rijeram̧ōl im kwaļo̧k n̄an ro rej en̄taan ej juon m̧ōttan eaorōk ej kōmeļeļeik meļeļe eo n̄an erom rikaļoor an Kraist. Ej jerbal eo me Jisōs Kraist Make eaar kōm̧m̧ane ke Eaar kwaļo̧k n̄an armej ro ilo raan ko An. “Jerbal in an kake ilo wāween eo an Irooj ej jab bar juon men ilo catalog eo an būrookraam̧ ko an Kabun̄ in,” Būreejtōn Uchtdorf eaar kili. “Ejjab maron̄ kowaane ak door iturejet. Ej ioļapļap in katak eo ad; ej ņoņoņmeej eo an tōmak in ad.”7

Kakeememej ko

  1. Emān iaan stake būreejtōn rein—Hugh B. Brown, Harold B. Lee, Henry D. Moyle, and Marion G. Romney—tokālik raar maron̄ kūr āinwōt Rijilōk ro, im aolep emān iaer tokālik raar jerbal ilo Būreejtōnji eo Kein Kajuon an Kabun̄ in. Harold B. Lee kar erom kein 11 Būreejtōn an Kabun̄ in.

  2. Ilo 1930, Utah eaar kein karuo ilōn̄ tata kōn wōran armej ro rej jab jerbal ilo United States. Lale Garth L. Mangum im Bruce D. Blumell, The Mormons’ War on Poverty: A History of LDS Welfare 1830–1990 (1993), 95.

  3. Dieter F. Uchtdorf, “Kakke ilo Wāween eo an Irooj,” Kweilo̧k eo Eļap, Oktoba 2011, 54.

  4. Dieter F. Uchtdorf, “Kakke ilo Wāween eo an Irooj,” 39.

  5. Lale Dieter F. Uchtdorf, “You Are My Hands,” Liahona, May 2010, 68.

  6. Dieter F. Uchtdorf, “Kakke ilo Wāween eo an Irooj,” 39.

  7. Dieter F. Uchtdorf, “Kakke ilo Wāween eo an Irooj,” 39–40.