Rikam̧ool ro Rejenolo̧k rej Kam̧ool kōn Kraist Eo Emour
Membōr ro an Būreejtōnji eo Kein Kajuon im Doulul eo an Jon̄oulruo Rijilōk ro rej rikanaan ro raan kein, rilolo ro, im rikwaļo̧k revelesōn ro rej jutak āinwōt rikam̧ool ro rejenolo̧k kōn etan Kraist ilo aolepān laļ in (lale D&C 107:23). Āinwōt, raar bōk eddo n̄an kam̧ool kōn kwojarjar eo an Jisōs Kraist im mijen eo An āinwōt Rilo̧mo̧o̧r im Ripinmuur eo an laļ in.
Ilo kout ko rej ellaajrak, em̧m̧aan rein kar kāleti im kum̧i in em̧m̧aan rein raar kwaļo̧k naan in kam̧ool ko aer kōn Pinmuur eo an Rilo̧mo̧o̧r eo, Jerkakpeje eo, wāween lukkuun mour.
Jisōs Ej Ad Ripinmuur
“Kōn aolepen būruō im en̄jake ko rekajoor an aō jetōb, Ij kotak ainikiō ilo naan in kam̧ool āinwōt juon rikam̧ool ejeno̧lo̧k im kwaļo̧k bwe Anij ej mour. Jisōs ej Nejin, Jitōnbōro eo Emake wōt an Jemed ilo kanniōk. E ej ad Ripinmuur; E ej ad Rijojomar ippān Jemed. E eo eaar me eaar mej ioon debwāāl eo n̄an en̄taan kōn jerawiwi ko ad. E eaar erom leen ko m̧oktata an Jerkakpeje. Kōnke E eaar mej, aolep renaaj bar mour. “Oh, jon̄an lan̄lōn̄ eo jem̧ļo̧k in ej letok: “Ijeļā bwe aō Ripinmuur ej mour!’” [“Ij Jela Bwe Aō Dri Pinmuur Ej Mour,” Al Ko Al In Ajri, nō. 136].”
Būreejtōn Thomas S. Monson, “I Know That My Redeemer Lives!” Liahona, May 2007, 25.
Ij Juon Rikam̧ool
“Ij juon rikam̧ool an Jerkakpeje eo an Irooj āinwōt em̧ool eļan̄n̄e iaar pād ijeņ joten eo ippān rikaļoor ro ruo ilo m̧weo ilo iaļ eo n̄an Emmaus. Ijeļā bwe Ej mour em̧ool āinwōt kar Joseph Smith ke eaar lo Jemān im Nejin ilo meram eo ilo juon jibbon̄ em̧m̧an ilo juon bukwin wōjke ko ilo Palmyra. …
“… Ij kam̧ool āinwōt juon rikam̧ool an Rilo̧mo̧o̧r eo ejerkakpeje im ad Ripinmuur.”
Būreejtōn Henry B. Eyring, Rikakpilōklōk eo Kein Kajuon an Būreejtōnji eo Kein Kajuon, “Itok n̄an Ippa,” Liahona, Eprōļ 2013, 25.
Pinmuur im Lo̧mo̧o̧r Eo
“Anij Jemed ej rijeje eo an ko̧jpeļ eo; ej kii eo im m̧ōttan karōk in lo̧mo̧o̧r eo an Anij, ak karōk in pinmuur eo. Ej ņaetan ko̧jpeļ eo an Jisōs Kraist kōnke ej Pinmuur eo an Jisōs Kraist ej kōm̧m̧an bwe pinmuur im lo̧mo̧o̧r en tōprak. Kōn Pinmuur eo an aolep em̧m̧aan, kōrā, im ajri ro rej pinmuur eo elikio jān mej in ānbwin, im aolep remaron̄ pinmuur jān jerawiwi ko aer ilo wāween bōk im pokake ko̧jpeļ eo an Jisōs Kraist… .
“Jen menin ij kwaļo̧k aō kam̧ool kōn aolepān būruwō im aō ļōmņak.”
Būreejtōn Dieter F. Uchtdorf, Rikakpilōklōk eo Kein Karuo ilo Būreejtōnji eo Kein Kajuon, “Have We Not Reason to Rejoice?” Liahona, Nov. 2007, 19, 21.
Jisōs Ej RiKraist eo
“Ijeļā bwe Anij ej Jemād. Eaar kwaļo̧k kajjeen Nejin, Jisōs Kraist, n̄an Joseph Smith. Ij kwaļo̧k n̄an kom̧ bwe ijeļā bwe Jisōs Kraist ej RiKraist eo. Ijeļā bwe E emour. Eaar ļotak ilo tōren iien ko. Eaar katakin ko̧jpeļ eo An im kar kajjieon̄. Eaar en̄taan im kar dōbwāāle im kar jerkakpeje ilo raan eo kein kajilu. E, barāinwōt Jemān, ewōr juon ānbwinnin in kanniōk im di. Eaar kōm̧m̧ane Pinmuur eo An. Kōn E ij kwaļo̧k aō kam̧ool. Kōn E ij kwaļo̧k aō kam̧ool.”
Būreejtōn Boyd K. Packer, Būreejtōn eo an Doulul eo an Jon̄oulruo Rijilōk ro, “The Twelve,” Liahona, May 2008, 87.
Juon wāween Kōļļā n̄an Baam̧le in Armej
“[Jisōs Krais] ej ioļapļap in karōk eo an Jemān, Rilo̧mo̧o̧r eo eaar letok āinwōt juon wāween kōļļā n̄an armej. Anij eaar jilkintok Nejin Emake wōt n̄an anjo̧ jen wōtlo̧k an Adam im Eve. Eaar itok n̄an laļ in āinwōt Rilo̧mo̧o̧r eo ad im Ripinmuur. Eaar anjo ioon menin bōbrae an mej ilo kanniōk n̄an kōj kōn leļo̧k mour eo An make. Ke Eaar mej ioon dōbwāāl eo, jetōb eo An eaar jepeļļo̧k jān Ānbwinnin. Ilo raan eo kein kajilu, jetōb eo An im Ānbwinnin raar bar koba ippān doon n̄an indeeo, jamin bar jepeļļo̧k.”
Elder L. Tom Perry jen Doulul eo an Jon̄oulruo Rijilōk ro, “The Plan of Salvation,” Liahona, Nov. 2006, 71.
M̧akūtkūt Eo Ioļapļap in Bwebwenato an Armej
“Pinmuur eo an [Rilo̧mo̧o̧r] eaar kakkure Gethsemane, ijo menokadu in Ānbwinnin kar wōtlo̧k kōn bōtōktōk (lale Luk 22:44), im ioon Golgotha (ak Calvary), Ānbwinnin kar bōk lōn̄ļo̧k ioon dōbwāāl ioon ‘Jikin Ļat in Bar,’ (Mark 15:22; Matu 27:33; bar lale 3 Nipai 27:14). Pinmuur in eļap enaaj kōrļo̧k em̧m̧aan jān mej eo eļap (lale 2 Nipai 9:7). Pinmuur eo an Rilo̧mo̧o̧r eo eaar kōm̧m̧an bwe jerkakpeje ej m̧ool im mour indeeo ej maron̄ n̄an aolep. Pinmuur eo An eaar erom m̧akūtkūt eo ioļapļap in aolep bwebwenato in armej.”
Elder Russell M. Nelson jen Doulul eo an Jon̄oulruo Rijilōk ro, “The Peace and Joy of Knowing the Savior Lives,” Liahona, Dec. 2011, 22.
Juon Katok kōn Jerawiwi
“Jisōs Kraist eaar kijenmej en̄taan eo em̧wilaļ n̄an katok kōn E make kōn jerawiwi ko an aolep. Katok in kar letok men eo eļap—ļaam eo ejjeļo̧k libijinjin ippān—n̄an jon̄an nana eo eļap—jerawiwi ko an aolepān laļ in. …
“Katok—in Pinmuur eo an Jisōs Kraist—ej ioļapļap in karōk in lo̧mo̧o̧r eo. …
“Ijeļā bwe Jisōs Kraist ej Make Wōt Nejin Anij Jemān Indeeo. Ijeļā bwe kōn katok in pinmuur eo An, ewōr ad lōke kōn jab wabanban im iien em̧m̧an n̄an mour indeeo. E ej ad Irooj, ad Rilo̧mo̧o̧r, im ad Ripinmuur.”
Elder Dallin H. Oaks jen Doulul eo an Jon̄oulruo Rijilōk ro, “Katok,” Liahona, May 2012, 19, 22.
Rilo̧mo̧o̧r eo ej Tōl Kabun̄ in An Rainin
“Pinmuur eo an Jisōs Kraist eaar m̧ōttan eo elukkuun aorōk an karōk eo an Jemedwōj Ilan̄ n̄an mijen eo an Nejin ioon laļ in im n̄an lo̧mo̧o̧r eo ad. Ewi jon̄an ad aikuj kam̧ool bwe Jemedwōj Ilan̄ eaar jab kōjerbal juon n̄an kareel ak ijjelo̧kin dāpij wōt maron̄ eo An n̄an lo̧mo̧o̧ren Nejin Jitōn Bōro. Kōnke iakwe eo An indeeo n̄an kwe im n̄an n̄a, Eaar kōtļo̧k bwe Jisōs en kam̧ōj mijen eo An kar kapiti m̧okta n̄an erom ad Ripinmuur. …
“Jisōs Kraist, Rilo̧mo̧o̧r im Ripinmuur eo an aolep armej, ej jab mej. Ej mour—Nejin Anij eaar jerkakpeje ej mour—en̄in ej naan in kam̧ool eo aō, im E tōl jerbal ko an Kabun̄ in rainin.”
Elder M. Russell Ballard jen Doulul eo an Jon̄oulruo Rijilōk ro, “The Atonement and the Value of One Soul,” Liahona, May 2004, 85, 86.
Ad Kōjatdikdik, Ad Rijojom̧ar, Ad Ripinmuur
“Ad kōjparok ej ilo [Jemedwōj Ilan̄] im Nejin Jitōn Bōro, Jisōs Kraist. Ij Jela Bwe Aō Dri Pinmuur Ej Mour Enaaj kapen kijejeto ko am̧ n̄an kōkajoorļo̧k naan in kam̧ool eo am̧ bwe en erom juon kajoor elikio n̄an em̧m̧an ilo mour eo am̧, juon kajoor enaaj rie eok ilo aolep iien aikuj im lewaj aenōm̧m̧an im lōke ilo iien ko reppen.
“Āinwōt juon iaan Rijilōk ro An remālim n̄an kwaļo̧k kam̧ool kōn E, ij kam̧ool bwe ijeļā bwe Rilo̧mo̧o̧r ej mour, bwe E ej juon armej eaar jerkakpeje, aiboojoj kōn iakwe ewāppen. Ad Kōjatdikdik, Ad Rijojom̧ar, Ad Ripinmuur.”
Elder Richard G. Scott jen Doulul eo an Jon̄oulruo Rijilōk ro, “The Power of a Strong Testimony,” Liahona, Jan. 2002, 103.
Idaak Kab Eo Emeo
“Ilo Jikin Kallib Gethsemane, Rilo̧mo̧o̧r im Ripinmuur eo ad eaar jab makunļo̧k jān idaak kab eo em̧eo an Pinmuur eo [lale D&C 19:16–19]. Im ioon dōbwāal eo Eaar en̄taan bar juon alen n̄an kōm̧m̧ane ankilaan Jemān, m̧ae iien āliktata E maron̄ kar ba, ‘em̧ōj’ [John 19:30]. Eaar niknik n̄an jem̧ļo̧kin. Ilo uwaake pokake eo an Rilo̧mo̧o̧r im wāppen ilo jutak pen, Jemedwōj Ilan̄ eaar kwaļo̧k ‘Lo in Nejū JitenBōro, eo ilo E Ebun̄buruō, ilo E Iaar kaiboojoj Eta’ [3 Nipai 11:7].
“… Jen kaiboojoj etan Anij n̄an jutak pen kōn ad Rilo̧mo̧o̧r, Jisōs Kraist. Ij kwaļo̧k aō kam̧ool bwe Ej mour.”
Elder Robert D. Hales jen Doulul eo an Jon̄oulruo Rijilōk ro, “Jutak Pen ilo Jikin ko Rekwojarjar,” Liahona, Eprōļ 2013, 51.
Nin̄nin̄ Ewāppen Emake Wōt Nejin Anij
“Ijeļā bwe Anij ej pād aolep iien im ilo aolep iaļ ko im aolep jekjek ko Jemed ilo Lan̄ eo eakwe. Ijeļā Jisōs eaar e wōt Nejin ewāppen, mour eo An kar m̧ōņōņō in leļo̧k jen ankilan jim̧or Jemed im Nejin kōn pinmuur eo An, kōj aolep ro rej jab wāppen. Ijeļā E bwe eaar jān ro remej n̄an mour bar juon alen, kōnke Eaar kōm̧m̧ane, kwe im n̄a naaj barāinwōt.”
Elder Jeffrey R. Holland jen Doulul eo an Jon̄oulruo Rijilōk ro, “Irooj, Ij Tōmak,” Liahona, Eprōļ 2013, 95.
Ijeļā bwe Rilo̧mo̧o̧r eo ej mour.
“Ij kwaļo̧k aō naan in kam̧ool im kam̧oolol kōn katok eo ejjeļo̧k jem̧ļo̧k in im indeeo an Irooj Jisōs Kraist. Ijeļā bwe Rilo̧mo̧o̧r eo ej mour. Em̧ōj aō en̄jake jim̧or kajoor in lo̧mo̧or eo An im kajoor in jpan̄ eo An, im Ij kam̧ool bwe kajoor kein rej m̧ool in im repād n̄an kōj kajjojo. Ilo m̧ool, ‘ilo kajoor eo an Irooj’ jemaron̄ kōm̧m̧an im anjo ioon aolep men ko ilo ad wōnm̧aanļo̧k ioon ito-itak eo an mour wabanban.
Elder David A. Bednar jen Doulul eo an Jon̄oulruo Rijilōk ro, “The Atonement and the Journey of Mortality,” Liahona, Apr. 2012, 19.
Kraist Eaar Kakūrm̧ool Mijen Eo An
“[Rilo̧mo̧o̧r eo] eaar bōk ioon Make ‘eddodo in jerawiwi ko an armej’ im ‘en̄jake mijak bwe Satan … emaron̄ kiel’ [James E. Talmage, Jesus the Christ, 613]. Ilo jerbal in Eaardibuk mālijjon̄ ko im riab ko renana, m̧akūtkūt ko renana rej tōl ļo̧k n̄an Dōbwāāl eo An. Anjo Jerkakpeje in eļap im epaak an jem̧ļo̧k an Kraist ilo Jabōt in Ijtō. Kraist eaar kakūrm̧ool mijen eo An ekwojarjar āinwōt Rilo̧mo̧o̧r im Ripinmuur. Jenaaj jerkakpeje jān rimej im jetōb ko ad renaaj bar koba ippān ānbwinnid. …
“Ij kwaļo̧k aō kam̧ool bwe Jisōs Kraist ej mour im ej Rilo̧mo̧o̧r im Ripinmuur eo an laļ in. Eaar letok iaļ eo n̄an m̧ōņōņō eo em̧ool.”
Elder Quentin L. Cook jen Doulul eo an Jon̄oulruo Rijilōk ro, “Jej Ļoor Jisōs Kraist,” Liahona, Māe 2010, 47–50.
Rilo̧mo̧o̧r Eo Eaar Pinmuuri Kōj
“Rilo̧mo̧o̧r eo eaar en̄taan ilo Gethsemane im An en̄taan ioon dōbwāāl eo ej pinmuuri kōj jān jerawiwi jen kaju bōro kajjitōk ko ekajet kōj kaki. Ej leļo̧k tūriam̧o̧ im jeorļo̧k bōd n̄an ro rej ukweļo̧k. Pinmuur eo ej barāinwōt kaju bōro m̧uri in ekajet jej m̧uri kaki jen kōmour im ņa wōnāāer kōn jabdewōt en̄taan jej kijenmej i. ‘Bwe lo, eaar en̄taan kōn metak ko an aolep men in mour, em̧m̧an, kōrā, im ajri, ro rej jān baam̧le eo an Adam’ (2 Nipai 9:21; lale barāinwōt Alma 7:11–12). …
“… Pinmuur eļap ej ilo Jisōs Kraist im ilo E make. Ij ettā im kile E āinwōt Ripinmuur eo.”
D. Todd Christofferson, “Lo̧mo̧o̧r,” Liahona, Eprōļ 2013, 109.
N̄a jerkakpeje eo im Mour eo
“Ilōn̄ in men otemjej, jej kwaļo̧k kōn ad Rilo̧mo̧o̧r im Ripinmuur, Jisōs Kraist. Aolep men ippād—aolep men naaj ippān—jej m̧uri n̄an E. …
“Naan ko An rej ainikien jen epepen ko:
“’N̄a jerkakpeje eo im mour eo: eo ej lōke Eō, men̄e e mej, enaaj bar mour:
“‘Im jabdewōt eo ej mour im lōke Eō, e jāmin mej indeeo’ (Jon 11:25–26).
“Ro jeiū im jatū, Ej mour. Eaar jerkakpeje. Ej tōl jerbal in An ekwojarjar ioon laļ in.”
Elder Neil L. Andersen jen Doulul eo an Jon̄oulruo Rijilōk ro, “Itok n̄an E,” Liahona, May 2009, 5, 9.