2014
Moses
Eprōļ 2014


Rikanaan ro ilo Kalim̧m̧ur M̧okta

Moses

“Moses eaar lukkuun in ļap barāinwōt Kraist āinwōt kar kōmeļeļeik āinwōt juon Rikanaan āinwōt ritōl ro etto an wōj in Israel.”1 —Elder Bruce R. McConkie (1915–85) jen Doulul eo an Jon̄oulruo Rijilōk ro

Iaar ļotak ilo Egypt ilo juon iien ke armej ro aō, Riisrael ro, kar pād ilo kōm̧akoko. Mijak oran eo eļap an rikamakoko ro an Israel, Pharaoh eaar kūr bwe aolep em̧m̧an Riisrael aikuj m̧an er n̄e rej ļotak. N̄an kōjparok eō, jinō eaar nooj eō ium̧win jilu allōn̄ ko ālkin ļotak eo aō m̧okta jen an kar likūt eō ilo juon ieb ilubwilijin Nile. Kōrā eo nejin Pharaoh eaar loe eō im kōkkajririik eō āinwōt ļaddik eo nejin.2

Ke iaar rūtto, iaar etal jen Egypt im kar mour ilo ānen Midian. Ijeņ, iaar loe jipan̄ jen Jethro, juon seperd im juon pris, im kar m̧areik leddik eo nejin Zipporah. Jān Jethro, iaar bōk Melkisedek Priesthood eo.3

Juon raan iaar lale menin mour ko an Jethro, Irooj eaar waļo̧k tok n̄an n̄a ilo juon wōjke euruur im kūr eō n̄an bōk ļo̧k ajri in Israel jān kōm̧akoko.4

Iaar ro̧o̧l ļo̧k n̄an Egypt im jiron̄ Pharoah n̄an kanōmkwoj armej ro an Irooj, ak ijjelo̧kin eaar kōļap ļo̧k eddodo ko aer. Irooj eaar jilkin ļo̧k juon nan̄inmej ioon Riegypt ro, ak Pharaoh eaar kapen būruwōn im m̧akoko in kanōmkwōj Riisrael ro. Nan̄inmej eo āliktata eaar juon enjeļ in kakkure eaar m̧an m̧aanje in ļaddik ro nejin aolep baam̧le in Egypt. Riisrael ro raar kōjparok jān enjeļ in kakkure eo jen kajedeed bōtōktōk juon ļaam̧ erreo ioon kōjam̧ ko aer im pād wōt ilowaan m̧ōko m̧weer. Jen n̄a, Irooj eaar kōm̧m̧ane Kwojkwoj in Kijone eo āinwōt juon kain̄i n̄an jipan̄ Riisrael ro keememej kabwilōn̄lōn̄ eo aolep iiō.5

Nan̄inmej in āliktata eaar kōm̧m̧an bwe Pharaoh en bōk im kanōmkwōj Riisrael ro. Ak Pharaoh tokālik eaar kapen būruwōn im jilkin ļo̧k jarin tariņae ro an ālkin an Riisrael ro kar em̧m̧akūt. Irooj eaar kōjeram̧m̧an eō kōn kajoor eo n̄an kōjepel Red Sea, im kōm̧ kar ko ioon āne em̧rā iien eo lo̧m̧aļo̧ eaar kaibwijleplep jarin tariņae eo an Pharaoh.6

Innām Irooj ej tōl kōj ilo āne jam̧den ilo juon kōto jen raan im jen juon juran kijeek ilo bon̄. E eaar rie kōj kōn dān, m̧ōnna, im bao in mejatoto.7

Iaar tallōn̄e Toļ Sainai, ijin iaar pād 40 raan im kar bōk Kien ko Jon̄oul jān Irooj. Ke iaar ro̧o̧l tok jān toļ eo, Riisrael ro raar oktak ļo̧k jān Anij im kar kōm̧anm̧an juon menin mour kooļ n̄an kabun̄. Raar jab erreo n̄an bōk kakien eo Anij eaar letok n̄an n̄a, kōn menin iaar rube dōkā ko repād ie. Iaar ro̧o̧l ļo̧k n̄an toļ eo, ijo Irooj eaar letok kien eo edik ļo̧k eo ej ņaetan etan—kien eo an Moses.8

Ilo āne jam̧den Irooj eaar kwaļo̧k tok n̄an n̄a pija ko n̄an kalōk juon tabernacle, ak tampeļ jidikdik. Kōm̧ ar kotak e tabernacle eo ippām̧ ilo am etetal bwe kōm̧in maron̄ kabun̄ n̄an e. Ilo tabernacle eo, armej raar bōk kain̄i ko im iaar kōnono n̄an Irooj “jelm̧ae doon, āinwōt armej ej kōnono ippān jeran.”9 Irooj ear barāinwōt kwaļo̧k n̄an n̄a wāween aō kōm̧m̧ane tōptōp in kallim̧ur eo, juon menin jolet ekwojarjar eo eaar pād ilo jikin eo ettiņo̧ ilo tabernacle eo, Kwojarjar im Kwojarjar.10

Ke Irooj eaar jilkinļo̧k “jedpānit baijin ko” n̄an katakin Riisrael ro, kar kakien eō n̄an kōm̧m̧ane juon jadpānet brass im likūt ioon juon joor bwe aolep ro jadpānet ko raar kiji maron̄ relōn̄ ļo̧k n̄an e im maron̄ mour. Ak kōnke utiej an būruwer im pidodo in jerbal eo, elōn̄ raar jab reilōn̄ ļo̧k im kōn menin raar jako.11

Irooj eaar kōm̧m̧an bwe Riisrael ro ren jebwābwe ilo āne jam̧den ium̧win 40 iiō ko m̧okta jen an kōtļo̧k er n̄an deļo̧n̄ e ānen kallim̧ur.12 Iaar jab deļo̧n̄ ak kar “bwe Jetōb eaar bōk lōn̄ļo̧k” n̄an Irooj.13