M̧ae iien Jenaaj Bar Ioon Doon
Pukōt Kōjatdikdik ilo Ilju im Jekļaj
Rijeje eo ej jokwe ilo Arizona, USA.
Ejja kōto ko wōt me raar wōtlo̧k im kamijak kōm ebarāinwōt bōktok iien em̧m̧an n̄an oktak im eddōk ļo̧k.
Ilo Jeptōm̧ba 12, 2001, lio pāleeō im n̄a kar etetal ilo būļoor in Im̧ōn Taktō eo ilo Tucson, Arizona, USA, mōk in kōttar ium̧win elōn̄ awa ko n̄an an ļaddik eo nejūm̧ ļotak. Jān TV eo nejūm̧ im jān aolep tipi ko ilo m̧weo, kōm ar ilbōk kōn ainikien im̧m̧ūn̄m̧ūn̄ jen raan eo ļo̧k ilo New York City—mirokan tawōr ko ruo me rekar dāpij mejatoto eo an bukōn eo, wōtlo̧k n̄an meno̧kno̧k im būn̄aln̄al. Pija ko, kadiwōjļo̧k ilo mejatoto ium̧win elōn̄ awa ko, kar letok n̄an kōm juon jekjek in kabbweerer. Āinwōt eaar iien eo enana tata n̄an bōktok juon nin̄nin̄ n̄an laļ in—juon laļ eo me eaar āinwōt lukkuun marok im kamijak.
Jibbon̄ in raan eo tok juon nin̄nin̄ ļaddik eo nejūm̧ edik eaar ļotak. Ke iaar jibwe nin̄nin̄ jidikdik eo nejūm̧, iaar ļōmņak kōn tōre ko renana jet raan ko remoot ļo̧k, tōre ko me raar kōm̧m̧an bwe in kememej ļok kijeek ko ilo Yellowstone National Park eo ilo 1988. Kijeek ko raar kakkure enan̄in 800,000 taujin acres (323,750 ha) in wōjke ko reļļap. Baak eo āinwōt elukkuun baj jorrāān. Pija in nuuj ko raar kwaļo̧k wōt bwin̄al in laļ im paat eo ekilmej im mijel ilo mejatoto. Ejjeļo̧k jon̄an kijejeto ko an armej emaron̄ kōro̧o̧ltok ta eo ejako. Eaar āinwōt n̄e jekjek in bar kōkāāl im kajoor in mejatoto eaar jab jokkuun wōt n̄an kakkure eo an kijeek eo ekajoor.
Aaet spring eo tok juon kabwilōn̄lōn̄ eaar waļo̧k—wōjke ko im wut ko raar jino eddōk ilo bwidej eo eaar bwil. Jidik kōn jidik, elōn̄ im lōn̄ wut ko im wōjke ro raar ebbōl jān bwidej. Ejaake bar baak eo eaar rum̧wij im obrak kōn men dikdik ko raiboojoj, im ilo iien ko tōprak ko raar em̧m̧an.
Ilo tōre ko rekamijak me renan̄in kakkure kōj āinwōt kijeek ko ilo Yellowstone, n̄e tōmak im kōjatdikdik eo ad ebwe jon̄aer, jej aikuj kemejmej bwe ewōr wōt juon pedped ejjamin m̧akūtkūt itulaļid, eļapļo̧k an kajoor jen jabdewōt nana jenaaj iooni. Hilamōn eaar kōmeļeļeik bwe pedped in ej “ejm̧aan in ad RiPinmuur, eo ej Kraist, eo Nejin Anij.” Eļan̄n̄e jej kemejak e kōj make n̄an E, innām “n̄e devil enaaj jilkintok kōto ko an rekajoor, aaet, mōdi ko an ilo aire, aaet, n̄e aolep wōt dekā im lan̄ rekkajoor an renaaj bun̄it eok, enaaj ejjeļo̧k an kajoor ioom̧ n̄an kinōōrļo̧k laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļan̄n̄e armej rej ekkal ioon rej jamin bun̄” (Hilamōn 5:12).
Eļān̄n̄e jelm̧ae mejatoto ko renana im kapo ilo laļ in, kōm̧m̧an bwe jen maron̄ ļōmņak bwe kareel eo edik im elam waan an ko̧jpeļ epen keidi im ejej uwaan. Ekōm̧m̧an bwe jān maron̄ en̄jake pere im ļōkatip ilo ad kōttar ilo waan kōn bōd ko n̄an kajim̧we, metak n̄an kemouri, im kajjitōk ko n̄an ņa mejļaer. Kōto ko me rej un̄ūr kōj, ijowōtke, katōk ine in oktak eo im eddōk, im kajoor eo eļap an ko̧jpeļ ej jerbal ium̧win bwidej in laļ, kōpooj taujin ine ko reddik an kōjatdikdik im mour.