M̧ōttā ro ipeļaakin Laļ in
Eta in Dria ij jān Philippines
Mabuhay, Kaibigan!*
Jen juon intōrpiu jān Amie Jane Leavitt
Em̧ōj ke am ettōņake kōn jokwe ioon juon āne? En̄in ej Alejandria, bōtaab baam̧le eo an im ro m̧ōttan rej kūri Dria n̄an kōkaduik. Liin ej jokwe ilo juon āne ilo Cebu ilo Philippines ippān jinen, jemān, im ruo sister. Liin ewōr juon jein ļaddik, bōtaab ekar mej m̧okta jen an Dria kar ļotak. “Ijeļā bwe ej m̧ōttan wōt baam̧le eo am, im inaaj bar loe juon raan kōnke baam̧le rej n̄an indeeo,” liin ej ba.
Juon iaan men ko rem̧m̧an ippa n̄an kōm̧m̧ane ej eeb. Ij juon rieb ballet. Iiō in tok ij kōjatdikdik n̄an wanlōn̄ļo̧k n̄an m̧ōttan eo juon, eo ej pointe. Meļeļe in bwe inaaj kōņak juuj in ballet ko me rej jipan̄ eō eeb kōn m̧aan addi in neeō.
Philippines elōn̄ļo̧k jen 7,000 taujin āne ko ie, kōn menin elōn̄ jikin ko raiboojoj n̄an loļo̧k. M̧weo im̧ōm epād turin bārijet, im em̧m̧an ippa ikkure ilo dān. Juon iaan men ko rem̧m̧an ippa n̄an kōm̧m̧ane ej aōō. Iaar make katakin eō elmen!
Em̧m̧an ippa etal ippān baam̧le eo aō n̄an loļo̧k bārijet ko reoktak. Ke kōm ar etaļ n̄an Palawan—juon āne epād repa eo ekileptata ium̧win laļ ilo laļin. Iaar etal im turo̧n̄ ijo kōn jinekōļ ko aō im alooje aolep ek ko rekōļarļar.
Juon raan ilo jikin jikuuļ, jet m̧ōtta rijikuuļ raar ba Mormon ro rejjab tōmak ilo Anij. Iaar ba n̄an er bwe jej. Raan eo tok juon iaar bōktok jet kaat ko n̄an letok-letak me ewōr pija in Jisōs itum̧aan im Laajraak in Tōmak ko itulik. Ke rijikuuļ ro m̧ōtta raar kalimjōk pija eo im riiti jet iaan tōmak ko ad, raar m̧ōņōņō n̄an jeļā bwe jej tōmak ilo Anij.
Ij Mōņōņō in Lo Tampeļ eo
Jejeram̧m̧an n̄an jokwe epaake Cebu City Philippines Temple eo. Iaar maron̄ alooje tampeļ eo ippān baam̧le eo aō m̧okta jen an kar aje. Ej juon jikin eaiboojoj im aenōm̧m̧an. Ij kam̧oolol bwe kōnke kōn tampeļ ko, baam̧le eo aō emaron̄ ippān doon n̄an indeeo.