N̄on Kokajur Jodrikdrik Ro
Kwōn Kajoor, Kwōn Ājmour, Kwōn Māletlet
Kōņaan en̄jake em̧m̧anļo̧k im ļapļo̧k lōke ilo ānbwin im en̄jake? Kāājimourur iien otemjej naaj jipan̄.
Iaar riiti juon ļōmņak ekaitoktok limo kōn kāājimourur. Iaar riiti bwe eļan̄n̄e kwoj ruj in jibbon̄ tata, kōņak nuknuk in ekjōrjaij ko am̧, im ļōmņak, “Inaaj baj kōņak menin, diwōjļo̧k im etetal, im eļan̄n̄e em̧m̧an, inaaj jino ettōr,” kwonaaj bōk juon iien kāājimourur em̧m̧an m̧okta jān am̧ kile. Itok kōn juon karōk āinwōt in emaron̄ jipan̄ eok ejaake iminene ko rem̧m̧an an kāājimourur im kea kōn ānbwinūm̧. N̄an elōn̄ armej, pojak in jino im niknik wōt rej ruo m̧ōttan ko eļāp aer pen. Eļan̄n̄e kwoj keememej bwe kāājimourur ej kōjeram̧m̧an ejjab wōt ānbwinūm̧ ak barāinwōt ļōmņak im lōllātāt eo am̧, enaaj jipan̄ eok bwe kwōn kōnaan bwe en kekem̧o̧j ānbwin. Ilo am̧ kāājimourur, kwonaaj erom juon armej eo ewemourur eo ej en̄jake an kajoor, lōke make, raane lo̧jen, im inem̧m̧an.
Jab āinwōt bao eo ejowan me eaar jāniji kooļ ko koļan n̄an m̧aj ko.
Kōmeļeļe jen Greg Newbold
Ij keememej bwebwenato eo kōn juon bao me eaar jino jāniji kooļ ko koļan n̄an m̧aj ko. Eaar pidodo lok elolo m̧ōn̄ā ilo jekjek eo, im bao eo eaar ļōmņak eaar kanooj lōn̄ kooļ ko koļan. Ke eaar wōnm̧aanļo̧k wōt n̄an jāniji kooļ ko, bao eo eaar lem̧ōņōņō ilo an jab ruj wōt in jibbon̄tata n̄an kakijen kijen m̧aj ko n̄an jidik. Eaar maron̄ jijet ilo eel eo elen aolepān raan im jab aikuj in kōm̧akūt juon m̧ajeļ. Āliktata, mekarta, bao eo eaar ļap an iminene kōn menin im kar kile eaar jab maron̄ ekāke kōnke eaar luuji aolep kooļ ko koļan raorōk.
Menin emaron̄ waļo̧k n̄an jabdewōt eo me ej ejaake kain iminene ko renana, iminene ko an jowan, ak kōjerbal uno ko rōkkajoor rekōm̧m̧an an̄ūrlep. Ilo N̄on Kokajur Jodrikdrik Ro jej riit bwe men kein “kakkure ānbwinūm̧, kōmālij, en̄jake, im em̧m̧an ilo jetōb. Rej kakkure kadkad ko ippān baam̧le eo im ro m̧ōttad im kadikļo̧k en̄jake ko an aorōk eo am make. Rej kōm̧m̧an jon̄an maron̄ eo am̧ n̄an kōm̧m̧ani kālet ko n̄an kwe make.”1 Niknik im jejjet kijed ej jipan̄ kōj bōjrak jen iminene kein renana. Eļan̄n̄e bao eo eaar wōnm̧aanļo̧k wōt im keļo̧k im kakijen, ejjamin kar jerwani kooļ ko koļan. Ejja āinwōt, eļan̄n̄e jej “kōjerbal m̧ajōļ ko ad” im kāājimourur aolep raan, jej kōļapļo̧k maron̄ eo n̄an joļo̧k kōņaan ko me rej kakkure im kajetokjād.
Ejja āinwōt an jet armej kañōt kōn ājmour ilo ānbwin, ro jet rej kañōt kōn ājmour ilo en̄jake. Mour emaron̄ in pen, im jet iien emaron̄ wōr ad en̄jake ko an addimakoko, ebbwer, ak jabwe lōke eok make. Bōtaab keememej bwe jim̧or ājmour an ānbwin im en̄jake, kāājimourur im niknik jerbal rej jipan̄ dāpij juon kōļmenļo̧kjeņ em̧m̧an. “Kōjparok ānbwinnūm̧ ej barāinwōt kōjeram̧m̧an kōļmenļo̧kjeņ eo am̧ im jipan̄ eok kakeememej eok bwe kwoj juon ajri nejin Anij im maron̄ lōke im m̧ōņōņō. M̧ōttan ko ilo ad en̄jake, ilo ānbwin, im jetōb rej aolep ekkejel ippān doon.” Non Kokajur Jodrikdrik Ro ej katakin: “Ājmour eo an en̄jake eo am̧ ej barāinwōt aorōk im emaron̄ jelet ājmour eo am ilo jetōb im kanniōk. Inepata im jet iien būrom̧ōj rej m̧ōttan mour wabanban in. Mekarta, eļan̄n̄e ewōr am̧ en̄jake ko an būrom̧ōj, ejjeļo̧k kōjatdikdik, inepata, ak jab m̧ōņōņō aitok kitier, kōnono ippān jemam̧ im jinōm̧ im bisop eo ami ak pukōt jipan̄.”2
Etke jej lo armej ro ipeļaakid me rej āinwōt eļapļo̧k aer ājimourur im lan̄lōn̄? Juon un eļap ej iminene ko. Eļan̄n̄e jej lale ānbwinid jān juon jekjek ilo jetōb im meļeļe bwe ej “ juon tampeļ, juon menin letok jān Anij,” jenaaj iakwe im kōjparok ilo ekwojarjar.3
N̄an n̄a, kwojarjar ej meļeļe in erreeo, najdik, im kajoor. Juon iaan wāween ko Jemedwōj Ilan̄ ej jipan̄ kōj kōjparok ānbwin ko ad rekwojarjar ej kōn letok n̄an kōj Naan in Māletlet. Non Kokajur Jodrikdrik Ro ej kōmeļeļeik: “N̄e kwoj pokake [Naan in Māletlet], kwoj anemkwoj jān an̄ūrlep ko rōkakkure im kwoj kōjbwebweik mour eo am̧. Kwoj bōk kōjeram̧m̧an ko an juon ānbwin ājmour, juon ļōmņak eruj, im tōl eo an Jetōb Kwojarjar. Kwonaaj pojak n̄an jerbal n̄an Irooj. Jab kōtļo̧k n̄an jidik bwe Satan ak ro jet ren m̧oņe eok n̄an ļōmņak bwe kakkure Naan in Māletlet enaaj kōm̧m̧an bwe kwon m̧ōņōņō ļo̧k, bun̄bun̄ ļo̧k, ak ļapļo̧k am̧ tooj lo̧k.4 Ilo am̧ ļoor Naan in Māletlet, keememej bwe kwoj kōjparok jim̧or ānbwiūm̧ im ļōmņak eo am̧ im bwe enaaj kōtļo̧k bwe kwon lo māletlet, im menin aorōk ko rettiņo̧ an jeļāļo̧kjeņ (lale D&C 89:19).
Ijello̧kin am̧ erom juon bao ejowan ej jāniji kooļ ko koļan, kōņak juuj in tenij ko am̧ im m̧akūtkūt. En jab jokod kāājimourur. Deļo̧n̄e ikkure eo em̧m̧an ippam̧ ak kōm̧m̧an jemjerā ippān eo komaron̄ ettōr ippān ak kōm̧m̧ani m̧akūtkūt in ikkur ko jet. Ilo am̧ kōm̧m̧ani men ko ilo ānbwin, kwoj kamineneik ejjab ānbwinūm̧ wōt ak barāinwōt ļōmņak eo am̧. Kāājimourur ej kōkajoorļo̧k ājmour eo an en̄jake barāinwōt. Keememej bwe men eo aorōk tata ejjab ewi m̧ōkaj ak am̧ jeļā ikkure—ej ewi jon̄an am̧ niknik. Ilo am̧ kāājimourur aolep raan, ko̧pan mōnōnōļo̧k wōt, ak kwonaj bar kajoor ļo̧k, ājmourļo̧k im m̧āletlet ļo̧k.