2013
Կվերադառնա՞ արդյոք Մեթյուն

Կվերադառնա՞ արդյոք Մեթյուն

Անանուն

Մեր ծխում երիտասարդ տղամարդկանց մի ամրակուռ խումբ ունեինք, սակայն մեր որդի Մեթյուն մտերիմ էր մի ոչ անդամի հետ, ով ևս մեծ սեր էր տածում մեքենաների և ամեն տեսակի մեխանիկական սարքերի հանդեպ: Ցավոք, այդ երիտասարդը դուրս էր եկել մի ընտանիքից, որտեղ չէին գնահատում կրոնը: Նրա ծնողները թույլ էին տալիս իրենց տանը խմել ալկոհոլ և ծխել, և չէին համարում, որ բարոյապես մաքուր լինելը կարևոր էր:

Մեթյուն սկաուտական շարժման մեջ առաջին տեղն էր գրավել, սակայն մրցանակաբաշխությանը չէր մասնացել, քանի որ դադարել էր ապրել սկաուտական չափանիշներով: Ես հավաքեցի նրա բոլոր սկաուտական պարգևները և տեղադրեցի ցուցատախտակի վրա: Այնուհետև պահեցի այն, հույս տածելով, որ մի օր նա կգնահատի դա: 16 տարեկանում նա ծխում էր, խմում էր և թմրանյութ էր գործածում: Նա դուրս էր մնացել դպրոցից և իր ընկերուհու հետ առանձին էր ապրում: Այդ տարիներին նրան հազվադեպ էինք տեսնում:

Մենք հուսահատված էինք: Չգիտեինք, արդյոք երբևէ նա կվերադառնար իր ընտանիքի մոտ և իր հավատքին, սակայն որոշեցինք հետևել իր կամակոր տղայի հետ պայքարող Ալմայի օրինակին: Ալման շարունակում էր սիրել իր որդուն և հավատքով աղոթում էր, որ նա «բերվեր ճշմարտության գիտելիքին» (Մոսիա 27.14):

Մենք մշտապես աղոթում էինք, որ Տերը միջամտեր Մեթյուի կյանքին, և մենք առիթը բաց չէինք թողնում, որ խոսքով և գործով դրսևորեինք մեր սերը նրա հանդեպ: Երբ նա տուն էր գալիս, մենք չէինք ասում այն, ինչը նա կհամարեր քննադատություն կամ դատապարտում, պարզապես ուրախանում էինք իրեն տեսնելու համար:

Մի օր Մեթյուն տուն եկավ և ասաց, որ ցանկանում է խոսել: Նա ասաց, որ մի երեկույթի ժամանակ հանդիպել էր մի աղջկա, որը հարցեր էր տվել Եկեղեցու վերաբերյալ: Չէր հասցրել ասել, որ ինքն այլևս չգիտի այդ հարցերի պատասխանները, բառերը սկսել էին դուրս գալ իր բերանից: Նա անմիջապես պատասխանել էր այդ աղջկա հարցերին: Մեթյուն ասաց, որ չէր հիշում, որ նման բաներ էր սովորել, սակայն գիտեր, որ այդ խոսքերը ճշմարիտ էին: Նա զարմացել էր, թե ինչու էր նման կյանքով ապրում, երբ դեռևս հավատում էր ավետարանին:

Երեք օր իր հոգին պրպտելուց հետո նա որոշել էր թողնել այն կյանքը, որով ապրում էր: Նա եկել էր տուն և օգնություն խնդրել նոր կյանք սկսելու համար:

Մեթյուն զանգահարեց մյուս նահանգում ապրող իր զարմիկին, որը նման դժվարությունների միջով էր անցել և խնդրեց, որ նրա մոտ ապրեր: Զարմիկը համաձայնել էր, և Մեթյուն սկսել էր նրա հետ Եկեղեցի հաճախել և հանդիպել եպիսկոպոսին, ով օգնում էր նրան անցնել ապաշխարության գործընթացով: Նա զգաց սեր և աջակցություն և ակտիվ դարձավ Եկեղեցում:

Ժամանակի ընթացքում նա հանդիպեց մի հրաշալի, արդարակյաց երիտասարդ աղջկա: Նրանք սիրահարվեցին և ամուսնացան տաճարում:

Երբ նրանց առաջնեկը ծնվեց, ես այցելեցի նրանց իմ հետ տանելով սկաուտական պարգևներով ցուցատախտակը: Նա ոգևորվեց և հպարտորեն կախեց այն իրենց տան աչքի ընկնող տեղում:

Մեր որդուն հրեշտակ չերևաց, ինչպես Ալմա Կրտսերին: Սակայն դեպի ճշմարտություն Մեթյուի վերադարձը նույնքան արտառոց էր: