Jipan̄ Violet
“Kwōn io̧kwe ri turum̧ im āinwōt kwe” (Mark 12:31).
Ekōjkan an Emma jouj eļan̄n̄e Violet elukkuun lāj?
Emma eaar keņe kein ejjōp eo ilo backpack eo an ilo an etaļ n̄an kūlaajruum̧ eo an ekāāl. Ekar raan in jikuuļ eo kein kajuon. Eaar kōņak nuknuk eo em̧m̧an ippān, im Jinen eaar kōpooj juon kijen m̧ōn̄ā in rālep—betkōj jōkjōk in menin mour.
“Rainin enaaj kanooj em̧m̧an, ”Emma eaar make ļōmņak ippān. “Toon wōt an—”
Emma eaar bōjrak im reitoreitak ilowaan kūlaajruum̧ eo. Ijeņ ekar pād. Violet.
Iiō eo ļo̧k, Violet ekar m̧ōm̧aelep e jikin ikkure pittoto eo aolep iien kakkūje. Ekar kūr Emma elōn̄ kain āt. Ekar barāinwōt aņokņake eo m̧ōttan Emma!
Violet ekar lo Emma im kato loon n̄ane. Emma eaar kapūrōrō likļo̧k n̄ane, ekar keeņ ļo̧k wōt backpack eo an. Violet ekar lāj aolepān iiō eo ļo̧k, im āinwōt iiō in eban wōr oktak.
“Ruwainene n̄an juon iiō ekāāl, kūlaaj!” Miss Caldwell ekar ba jān tum̧aan in kūlaaj eo. “Jen kōkkāālel jikin jijet.”
Tebōļ ko raar kōkkar ilo ruo ļain lowaan kūlaajruum̧ eo. Miss Caldwell eaar lali laajrak in āt ko laļļo̧k kōn addiin pein, innām ekar jitōn̄ ļo̧k ruo tebōļ itulik. “Emma. Kwonaaj jijet ijjūweo lik.”
Emma ekar jijet ilo juon iaan tebōļ ko lik. Ekar kōtmāne bwe Liselle enaaj jijet turin. Ak Jaime. Ak—
“Violet.”
Emma ekar m̧ōkaj an ejjed. Ejim̧we ke an ron̄?
Aaet. Miss Caldwell ekar jiton̄ļo̧k wōt tebōļ eo iturin. “Kwonaaj jijet iturin Emma, Violet,”ekar ba.
Violet ekar jibadōkļo̧k Emma ilo an kōjjememe. Emma eaar door bōran ioon tebōļ eo an im kalimjōk dipin m̧weo. Enaaj juon iiō aetok.
Ilo iien bōnbōn, Miss Caldwell ekar je jet kajjitōk ioon boot eo n̄an an kūlaaj eo uwaaki. “Komaron̄ jerbal ippam̧ make ak ippān eo iturum̧,”ekar ba.
Emma eaar kōkkairir libobo ioon peba eo an, kōtan n̄e epoub. Kajjitōk ko ebwe aer pidodo. Ekar kajjeon̄ in karmejete Violet. Eaar jab reilo̧k n̄an e juon alen aolepān jibbon̄en eo.
Juon men eaar dibōj aeran. Kar āinwōt juon pinjōļ. Emma eaar kajejtokjān.
Bar dibōje. Violet ekar dibōjļo̧k! Emma ekar jerbal wōt im kapen buruōn.
Dōbdōp eo kein kajilu an Violet ekar bwe an kōmettak. Emma eaar en̄jake an buļļuļuļ tulowa. Enaaj āindein wōt aolepān iiō in ke? Ekar ļōmņak in kajutak pein bwe en ba n̄an Miss Caldwell. Ak bōlen en bar mejān kūtōtōļo̧k n̄an Violet.
Innām Emma ekar ron̄ ainikien bo̧ti. Ewōr en ej jan̄ ke? Pinjōļ eo ekar bar dibōjeļo̧k bar juon alen. Ekar reilo̧k im lo an Violet kalimjōke. Pinjōļ eo an epād pein, im ewōr dānin kōmjaaļaļ ilo mejān. Pepa eo an ekar libobo kōn ettoon in ejjeer.
Violet ekar in̄ti pinjōļ eo ilo pein. “Komaron̄ ke jipan̄ eō?” Eaar kajjitōk uņoojdikdikļo̧k.
Emma ekar kalimjōke ium̧win juon minit, ekar bwilōn̄. Violet ekōņaan bwe en jipan̄e? Ālkin jon̄an lāj ko an aolep iien? Emma ekar bar oktakļo̧k n̄an peba eo an make. Violet emaron̄ jerbal make iaan. Ekar jab aikuji jipan̄ eo an Emma, men̄e en kar …
… riturin?
Emma eaar ikōñ im jitm̧aanļo̧k. Ekar maron̄ ron̄ an Violet jan̄ dikdik iturin. Jeje ko Rekwojarjar aolep iien rej ba io̧kwe riturum̧—ak Violet eoktak. Emma ekar jijet wōt turin ilo kūlaaj!
Emma ekar bar jepļaak n̄an jerbal eo an. Innām ekar bōjrak. Bōlen Violet ejjab oktak. Bōlen n̄e jeje ko rekwojarjar rej ba io̧kwe riturum̧, rej ba aolep armej. Barāinwōt ro rellāj. Men̄e enaaj pen.
Emma ekar joļo̧k kitwōn im likūt pinjōļ eo an. Eaar oktak ļo̧k n̄an Violet im kajjeon̄ ettōn̄ dikdik n̄an e. “Imaron̄ ke jipan̄?” leddik eo ekar kajitok.
Violet ekar em̧m̧ajidjid, iriļo̧k denin mejān kōn pein.
Emma ekar m̧alm̧aanļo̧k ioon peba eo an Violet im jino jipan̄ kōn kajjitōk eo kein kajuon. Em̧ōj kadede an bōk juon en̄jake eokmāāņāņ itulowaa. Ekar kōņaan jelā eļan̄n̄e Violet ekōņaan m̧ōn̄ā betkōj jōkjōk in menin mour.
Kōmeļeļe jen Brad Teare; The Lord Jesus Christ, jen Del Parson © IRI