Erom juon Em̧m̧aan in Aenōm̧m̧an

Jen Matthew O. Flitton

Māākjiin ko an Kabun̄

Tampeļ, mijen ko, im jerbal in jipan̄ eaar jipan̄ Roger im baam̧le eo an em̧akūt n̄an erom juon baam̧le indeeo.

Roger Randrianarison ekar jeļā jet men rejako jān mour in baam̧le eo an.

“Iaar jar n̄an Anij n̄an jipan̄ eō pukot jet men n̄an tōl baam̧le eo aō,” eaar ba. “Eaar wōr juon aō ikdelel n̄an tōl baam̧le eo aō ilo men ko rem̧m̧an, men ko me remaron̄ tōl ļo̧k n̄an iaļ eo ejim̧we.”

Eaar n̄ūrbōktak kōn wāween an karūttoļo̧k ļaddik ro jilu—nejier, Randrianandry im Sediinirina, im leddik, Nirina. Eaar jab m̧ōņōņō bwe paoktok eo an epidodo n̄an illu ekar jelet jet apan̄ ko ilo baam̧le eo. Eaar kōņaan bwe en em̧m̧an n̄an ro jinen im jemen.

“Iaar kālet bwe in juon eo ej oktak kōnke Ij lo wōn eo imaron̄ in erom,” eaar ba.

Roger eaar luuji jerbal eo an jejjo iiō m̧oktaļo̧k im eaar jerbal āinwōt juon rikattōr taxi ilo Antananarivo, Madagascar. Juon raan eaar ektake ruo sister mijenede.

“Ke rej pād ilo wa eo, raar kajjitōkin eta im eļan̄n̄e ewōr aō baam̧le,” eaar ba. “Raar kajjitōk eļan̄n̄e Ijeļā wōn eo Anij im eļan̄n̄e Ij jar n̄an E.”

Mijenede ro raar al al ko ippān Roger ke rej iuwe im kar karuwaineneik e n̄an jar. Eaar kajieon̄ in etal (n̄an jar) jet tōre bōtaab ar jab maron̄ tōprak ilo kweilo̧k ko kōn jikejuuļ eo an.

Ilo laļem allōn̄ tokālik Roger eaar jerbal ilo m̧weo im̧ōn juon raan ke eaar ron̄ an ruo mijenede kōnono n̄an juon ituņam̧ōjin wōrwōr eo an. Roger eaar jeļā bwe renaaj itok im kōnono ippān. Eaar en̄jake eaikuj in ba aaet n̄an jabdewōt kajjitōk ko renaaj kajjjitōk ippān.

Ālkin kwaļo̧k kadkadier, mijenede ro raar kajjitōk ippān eļan̄n̄e ejeļā kōn Anij. Aaet. Eaar ke kōņaan jar n̄an Anij? Aaet. Eaar ke kōņaan kōnono n̄an mijenede ro? Aaet. N̄āāt? Kiiō. Mijenede ro raar ba renaaj jepļaaktok ilo 20 minit. Ke rej jepļaak tok, eaar wōr juon membōr ippāer eo ej jokwe epaake er.

Mijenede ro raar katakin Roger elōn̄ tōre ko kōn juon allōn̄ ilo m̧weo im̧ōn. Kōnke men ko renana baam̧le eo an Roger raar ron̄ kōn Kabun̄ in, jet iaan baam̧le eo an raar jab kōņaan ekkatak ippān mijenede ro. Ālkin juon allōn̄ in ekkatak kōn ko̧jpeļ in, Roger eaar etal n̄an jar ippān mijenede ro. Wāween eo im membōr ro ilo im̧ōn jar eo rej karuwaineneiki ekōm̧m̧an juon oktak ilo e. “Membōr ro raar bōk e āinwōt n̄e raar jeļā kajiō m̧oktaļo̧k,” eaar ba.

Roger eaar jepļaak n̄an m̧weo im̧ōn jān m̧ōn jar eo im jiron̄ baam̧le eo an bwe ej tin peptaij im bwe aer kālet n̄an kobatok ilo Kabun̄ in ak jaab. Raar kajjitōk ippān bwe en kōttar bwe rej kobatok ippān. Raar jino pād ilo kweilo̧k ko im raar barāinwōt lukkuun bwilōn̄.

Tōre eo m̧oktata eaar pād ilo kweilo̧k ko an Kabun̄ in ar likūt juon en̄jake ejjeļo̧k jem̧ļo̧kin ioon ļaddik eo erūttotata nejin Roger, Randrianandry. “Jinoin aō itok n̄an jar Iaar lukkuun bwilōn̄ kōn ettā eo an armej ro,” eaar ba. “M̧oktata, raar lukkuun kōņaak nuknuk in jar. Ālkin Iaar kile bwe rej lukkuun pād ijen kōn juon wun, ejjab n̄an jādetok n̄an bar jet armej.”

Randrianarisons ro raar peptaij āinwōt juon baam̧le ilo Pāpode 20, 2003. Ilo tōre eo Nirina eaar 8, im Sediniria eaar 17, im Randrianandry eaar 19. Baam̧le in ar bōjrak aer jerbal ilo Jabōt im mour kōn ko̧jpeļ in.

Oktak ko

“Ālkin aō peptaij, Iaar lo juon oktak ilo m̧weo im̧ōm̧,” Arelina eaar ba, kōrā eo ippān Roger. “Eaar erom juon em̧ ejetōbtōb, im barāinwōt elōn̄ kōjeram̧m̧an ko, jim̧or ilo kanniōk im jetōb, raar itok jen am mour kōn ko̧jpeļ in.”

Kōn juon jeļā, Roger ar kam̧oolol Jemedwōj Ilan̄ kōn an jipan̄ bar kalek pejnej eo an. Ālkin ruo iiō ko in kattōr taxi im kōm̧m̧ane jabdewōt men emaron̄e n̄an kabwe aikuj n̄an baam̧le eo an, eaar jino bar bōk contruction contract ko an. “Ij tōmak bwe aolep iien Anij ej kōjeram̧m̧an eō n̄e Ij kālet n̄an ļoor E,” eaar ba.

Bōtaab ļaddik ro nejin raar ba oktak eo eļaptata rej loe ej paoktok eo an jemeer. Rej kōmeļeļeik e kiiō āinwōt juon jon̄ok in ettā im meanwōr. Roger eaar ba ko̧jpeļ in ar im̧we e bwe en kōm̧m̧an oktak. Jen eaar jino ekkatak, Roger eaar kajieon̄ in kobrak mour eo an kōn men ko rem̧m̧an.

“Kōn katak ko an ko̧jpeļ in, eaar jako aō illulu,” eaar ba. “Jet iien elōn̄ lim̧okta, ak ko̧jpeļ eo ej pād ilo būruwō, ilo bōra, im ilo jetōb eo aō. Ej jipan̄ eō bwe in aenōm̧m̧an.”

N̄e inepata ej waļo̧k, Roger ej e eo ej kaenōm̧m̧an ro uwaan baam̧le eo im kakememej er n̄an kōm̧m̧an āinwōt Rilo̧mo̧o̧r ar kōm̧m̧an.

“Jema eaar jino ettā im kiiō kea kōn baam̧le eo am kōn iakwe,” Sedinirina eaar ba. “N̄e ij kalimjōk oktak eo ilo e, Ij lukkuun kam̧oolol Jemedwōj Ilan̄, kōn ko̧jpeļ in, im kōn membōr ro ilo Kabun̄ in.”Juon Baam̧le Indeeo

Juon Baam̧le Indeeo

Ilo 2006, kōn jipan̄ eo an General Temple Patron Assistance Fund eo, Roger im Arelina raar etal n̄an Johannesburg, South Africa, n̄an liāp ilo tampeļ eo.

Jān 2009 n̄an 2011, Sedinirina im Randrianandry raar jerbale mijen ko n̄an South Africa—Sedinirina ilo Cape Town im Randrianandry ilo Johannesburg. M̧ōttan eddōkļo̧k eo aer n̄an jerbal in jipan̄ ej n̄an jipan̄ ukōt baam̧le ko jet, āinwōt baam̧le eo aer.

“Kabwilōn̄lōn̄ rōt in emaron̄ waļo̧k, im ewaļo̧k kōnke mijenede ro raar itok n̄an m̧weo im̧ōm̧,” Randrianandry ar ba. “Kōn menin iaar kōņaan kōm̧m̧an ejja men eo wōt n̄an baam̧le ijoko jabdewōt.”

Kōļmenļo̧kjeņ in ekar bar bōktok kōjeram̧m̧an n̄an baam̧le eo an Randrianarison. Eaar wōr ratimjuon raan in kōttar ke Sedinirian im Randrianandry jim̧or naaj pād ilo Johannesburg Missionary Training Center. Roger eaar karōk n̄an kelak n̄an South Africa ippān Arelina im leddik eo nejier, Nirina, bwe aolepen baam̧le eo ren maron̄ liāp ilo tampeļ eo. Nirina, eo eaar 14 ilo tōre eo, eaar ba eaar pen n̄an kōmeļeļik en̄jake eo im ta eo eaar en̄jake.

“Eaar kōkajoorļo̧k tōmak eo aō im kar jipan̄ eō epaake ļo̧k Anij,” eaar ba.

Rainin ro uwaan baam̧le in rej jerbal n̄an kalōk im kōkajoorļo̧k ro ipeļaakier. Roger ej jerbal āinwōt bisop ilo ward eo an. Arelina ej jerbal ilo Būraimere kōn būrookram̧ eo an Tōmak ilo Anij. Sedinirina ej juon assistant stake clerk. Randrianandry ej juon assistant ward clerk. Nirina ej juon ritōl ilo ward.

Ko̧jpeļ eo ej juon uwaak n̄an jar ko ilo im̧weo im̧ōm̧ Randrianarison. Eaar bōkļo̧k metak ko am m̧okta, kar kepaaktok er, im kar leļo̧k n̄an er iien em̧m̧an n̄an indeeo ejjeļo̧k jem̧ļo̧kin. Kar katakin Roger n̄an iakwe. “Mour in baam̧le,” eaar ba, “ej juon mour eobrak kōn iakwe.”

Ekōtake mijenede ro ilo juon taxi ar jino iaļ eo an Roger Randrianarison n̄an rikaļoor.

Pija in baam̧le eo an Randrianarison jen Matthew D. Flitton

Ekkatak ko̧jpeļ in āinwōt juon baam̧le eaar jipan̄ baam̧le eo an Randrianarison eddōkļo̧k ippān doon.

Etal n̄an South Africa n̄an liāp ilo Johannesburg Temple ar kōkajoorļo̧k baam̧le eo an Randirianarison.