Jerbal Em̧m̧an Ijo Koņaam̧
Jān juon nokon in jota an Church Educational System n̄an rūm̧m̧an ded kar letok ilo Brigham Young University–Idaho ilo M̧aaj 4, 2012. Kōn aolep ennaan eo ilo English, etal n̄an lds.org/broadcasts/archive/ces-devotionals/2012/01?lang=engspeeches.byu.edu.
Kwōn Jim̧we. Ejaake juon baam̧le. Pukōt juon wāween ekkar n̄an kakke. Jerbal āinwōt kar kūri. M̧aanjebpopo n̄an iioon Anij.
Būreejtōn David O. McKay (1873–1970) ekkā an kwaļo̧k kōn juon bwebwenato ekar waļo̧k ke eaar juon mijenede ej jerbal ilo Scotland. Eaar en̄jake an o̧o̧n̄ ālkin an kar pād ilo mijen jidik iien im kar joļo̧k jejjo awa ko alooj iturin Stirling Castle. Ke e im kampānion eo an raar ro̧o̧l jān aer loļo̧k castle eo, raar eļļāļo̧k jen juon em̧ ijo dōkā eo ilōn̄ in kōjam̧ eo eaar wōr juon jekjek kōm̧m̧an jen pā ej kōmeļeļeik juon kout, ej pijaikļo̧k Shakespeare, eo ej riit, “Ta eo kwoj kōm̧m̧ane, kōm̧m̧ane bwen em̧m̧an.”
Kakeememejtok en̄jake in, Būreejtōn McKay eaar kōmeļeļeik: “Iaar ba n̄an n̄a make, ak Jetōb eo ilowaaō, ‘Kwoj juon membōr an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ļapļo̧k jen menin, kwoj pād ijin āinwōt juon ripinej jenkwan Irooj Jisōs Kraist. Kwaar bōk eddo eo āinwōt juon ripinej jenkwan Kabun̄ in.’ Innām iaar ļōmņak [kōn] ta eo kōm̧ ar kōm̧m̧ane joten eo. Kōm̧ ar loe; bwe kōm̧ ar bōk kōmeļeļe im meļeļe ebun̄bun̄, ej m̧ool, im eaar ļo̧kjeņ aō kake. … Mekarta, eaar jab jerbal in mijenede. … Iaar bōk ennaan eo letok n̄an eō ioon dōkā eo, im jān iien eo kōm̧ ar kajjieon̄ kōm̧m̧an ijo koņaam̧ āinwōt mijenede ro ilo Scotland.”1
Ennaan in eaar lukkuun aorōk im eaar wōr juon an kareel ioon Būreejtōn McKay eaar kōjerbale āinwōt im̧we n̄an aolepān mour eo an. Ej kōļmenļo̧kjeņ kōn jabdewōt eddo ippān, enaaj kōm̧m̧an jon̄on wōt an maron̄.
Jab Ukōtļo̧k Mwilim
Āinwōt juon waļo̧k an jibadbad eo eļap n̄an em̧m̧an bwe kom̧ epepen eo edik an Kabun̄ in rej bōk, ta ko rej aō inepata kōn ilju im jekļaj eo ami? Ta kapilōklōk eo imaron̄ lewaj n̄an kom̧? M̧oktata, kom̧ naaj jeļmae kapo eļap n̄an ukōtļo̧k m̧wilim—aaet kōņak juon māj—im erom juon armej eo eban lukkuun kwaļo̧k wōn kom̧ ak wōn eo kom̧ kōņaan erom.
Ilo iien ko m̧okta ilo bwebwenato in Kabun̄ in, Rikanaan Joseph, Emma, im bo ro ruo 11 aer allōn̄, Joseph im Julia, raar pād ilo Hiram, Ohio, ilo m̧weo im̧ōn John im Alice Johnson. Jim̧or ajri ro raar en̄taan kōn nan̄inmej in mijeļ. Joseph im ļaddik ro nejin raar kiki ioon juon trundle peet turin kōjam̧ in deļo̧n̄tok eo.
Ke ej bon̄ juon kumi in em̧m̧aan ro raar unoik mejāer raar rube kōjam̧ eo im kanōk namōjļo̧k Rikanaan eo, ijo raar m̧an e im jauni kōn bij im Sidney Rigdon.
Men eo elukkuun nana an jodik eo an rinana ro eaar kōn an Joseph ļaddik jidikdik eo jorrāān joten eo im maron̄ biba tōre eo jemān kar kanōk namōjļo̧k. Āinwōt juon uwaak, eaar mej jet raan tokālik.2
Ro raar bōk kuņaer ilo Mōrō eo an Rikanaan eo im ļaddik eo jatin Hyrum raar barāinwōt unoke mejāer n̄an ņo̧o̧jļo̧k kadkad eo aer em̧ool.3
Ilo rainin, n̄e ņo̧o̧j kadkad eo ad em̧ool ej pidodo jān kar mokta, ewōr pedped in katak ko raorōk raar ekkejel ilo jab kōņak juon māj im ilo “m̧ool n̄an tōmak eo ad … bwe mōrō ro em̧ōj aer jako.”4
Juon iaan kōjparok ko reļļap ņae kōm̧m̧an kālet ko rebōd ej jab n̄an likūt jabdewōt māj kōn jabdewōt jekjek. Eļan̄n̄e kwoj loe eok make am̧ kōņaan in kōm̧m̧ane menin, jouj jeļā ej juon kōkkaļļe eļap kōn kauwōtata im juon iaan kein jerbal an rikapo eo n̄an bōk eok n̄an kōm̧m̧ani jabdewōt men kwoj jab aikuj kōm̧m̧ane.
Ekkā an waļo̧k rainin n̄an ņo̧o̧j kadkad an juon ke jeje in kōjdat, lāj, kōnono ko relaj online. Jet armej rej kōnono kake āinwōt illu.
Rijilōk Paul eaar je:
“Kom̧win jab bōd: kōm̧m̧ao ko re nana rej kakōt m̧anit ko rem̧m̧an.
“Kom̧win ruj n̄an wānōk, im jab jero̧wiwi; bwe ejjeļo̧k jeļā Anij ippān jet” (1 Korint 15:33–34).
Ealikkar bwe kōm̧m̧ao ko renana rej juon kain m̧wil ko renana. Eļan̄n̄e kōjerbali jen Armej ro Rekwojarjar ilo Raan-ko Āliktata, remaron̄ jelōt jabdewōt ro rej jab jeļā kōn Anij ak wōr juon aer naan in kam̧ool kōn Rilo̧mo̧o̧r eo.
Jabdewōt wāween kōjerbal Intōrnet eo n̄an kaamjak, kakkure juon ripo̧o̧t, ekkōm̧m̧an bwe juon armej en nana ej mwil nana. Ta eo jej loe ilo jukjukinpād eo ej bwe n̄e armej rej ekkōņak māj in kattiņo̧, eļapļo̧k aer pād ilo kain m̧akūtkūt rot in, eo me ej kakkure ļōmņak ko n̄an kōļapļo̧k meļeļe. Ej barāinwōt rube pedped in katak ko repidodo Rilo̧mo̧o̧r eo eaar katakin.
Rilo̧mo̧o̧r eo eaar kōmeļeļeiki bwe E eaar jab itok n̄an kakkure laļ in ak n̄an lo̧mo̧o̧ren laļ in. Innām Eaar kōmeļeļeiki ta meļeļein kakkure:
“Im men in ekajet eo, bwe meram e moottok n̄an laļ, im armej rej yokwe marok eļap jān meram, bwe jerbal ko aer re nana.
“Bwe jabdewōt eo ej kōm̧anm̧an nana ej kōjdat meram, im e jab itok n̄an meram n̄e ab kauwe jerbal ko an.
“A eo ej kōm̧anm̧an m̧ool, ej itok n̄an meram, bwe en alikkar jerbal ko an, bwe ar kōm̧m̧ani ilo Anij” (Jon 3:19–21; barāinwōt lale eoon ko 17–18).
Riwānōk ro ejjab aikuj in ekkōņak māj ko n̄an ņo̧o̧j kadkad eo aer.
M̧akūtkūt Ekkar n̄an Tōmak ko Am̧ Rem̧ool
Am̧ m̧akūtkūt ekkar n̄an tōmak ko rem̧ool jen joļo̧k am̧ iien ilo men ko renaaj kalōk im ejaake m̧wilim im jipan̄ eok erom āinwōt Kraist. Ij kōjatdikdik bwe ejjeļo̧k iami ej lo mour āinwōt jidik iien limo ak ikkure ko ijjelo̧kin āinwōt juon iien “m̧aanjebpopo n̄an iioon Anij” (Alma 34:32).
Juon waanjon̄ok em̧m̧an kōn kōm̧mane ijo koņaam̧ im kōjerbal iien ilo jejjet ej itok jān mour an Elder L. Tom Perry jen Doulul eo an Jon̄oulruo Rijilōk ro, iien eo, āinwōt juon ritariņae, eaar m̧ōttan U.S. force eo ej bōk eddo ilo Japan jem̧ļo̧kinļo̧k Patak eo an Laļ in Kein Karuo. Elder Perry eaar kwaļo̧k bwebwenatok in ke eaar reko̧o̧te kam̧ool eo an eaorōk n̄an Rilo̧mo̧o̧r eo.
“Iaar pād ilubwilijin kumi eo jinoin an Marine ro n̄an juur ioon pārijet in Japan ālkin jaini koņ in aenōm̧m̧an eo ālkin Pata eo an Laļ in Kein Karuo. Ke kōm̧ ar deļo̧n̄e bukwōn jorrāān Nagasaki, eaar juon iaan en̄jake ko rekabūrom̧ōjm̧ōj an mour eo aō. Juon jikin ekilep ilo bukwōn in eaar lukkuun jorrāān. Jet iaan rimej ro rej jan̄in kar kalbwin er. Āinwōt ritariņae ro rej kōjparok jikin em̧ōj anjo̧ ioer, kōm̧ ar kajutak opiij ko am̧ im etal im jerbal.
“Jekjek eo eaar lukkuun nana tam̧m̧win, im jet wōt iaam̧ raar kōņaan leļo̧k eļapļo̧k. Kōm̧ ar etal n̄an raan bōk eddo in jar eo im kajjitōk mālim n̄an jipan̄ kalōk kabun̄ ko an Rikūrijin. Kōn mo̧ ko ilo kien eo ioļap ilo pata eo, kabun̄ kein raar nan̄in kabōjrak aer jerbal. Eaar lōn̄ jejjo em̧ ko raar lukkuun jorrāān. Juon kumi ippām̧ eaar paļenteer n̄an kōkāāl im bar kōmetalļo̧k dipin im̧ōn jar ko ilo iien am kakkije jen jerbal bwe ren maron̄ pojak n̄an kōm̧m̧an jar an Rikūrijin bar juon alen.
“… Kōm̧ ar lo rūkaki in kabun̄ ro raar jab maron̄ jerbal ilo iiō in tariņae ko im kar rōjan̄ er n̄an jepļaaktok n̄an jerbal eo aer. Ekar wōr am̧ en̄jake elukkuun in em̧m̧an ippān armej rein ke rej bar juon alen lo anemkwoj n̄an kōjerbal tōmak an Rikūrijin ko aer.
“Juon m̧akūtkūt eaar waļo̧k ke kōm̧ ar em̧m̧akūt jān Nagasaki n̄an ro̧o̧ltok n̄an kapijuknen eo inaaj aolep iien keememej. Ke kōm̧ ar jino deļo̧n̄eļo̧k tūrāān eo enaaj kar bōk kōm̧ n̄an tim̧a ko waam̧ n̄an am̧ ro̧o̧ltok n̄an kapijuknen, elōn̄ ritariņae ro raar kōm̧m̧an kōjak kōn kōm̧. Eaar wōr jerāer leddik ro ippām̧ im [rekar] itok im iakiakwe er. Raar kajirere kōn kōm̧ im kwaļo̧k bwe kōm̧ ar luuji kam̧ōņōņō eo ilo am̧ kar pād ilo Japan. Kōm̧ kar kakkure iien eo am̧ jerbal im kōmetalļo̧k wo̧o̧ļ ko.
“Tōre eo rej pād ilo bwiltōn̄tōn̄ in aer kajjirere, ilōn̄ in juon toļ jidikdik epaake im̧ōn tūreen eo eaar itok enan̄in 200 iaan Rikūrijin in Japan rein reļļap jān kabun̄ ko kōm̧ ar kōkāāli, rej al ‘Onward, Christian Soldiers.’ Raar itok im lutōktok ioom̧ menin leļo̧k ko. Innām raar ekkar ilo ļain iturin iaļen tūreen eo. Im ke tūreen eo eaar em̧m̧akūt ilo iaļ eo, kōm̧ ar lenamōjļo̧k peim̧ im un̄ūr addiin peier ke kōm̧ij em̧m̧akūt. Kōm̧ ar jab maron̄ kōnono; en̄jake eo am̧ eaar lukkuun kajoor. Bōtaab kōm̧ ar kam̧oolol bwe kōm̧ maron̄ kar jipan̄ ilo jet wāween reddik ilo bar kajutak mour in Kūrijin ilo juon laļ ālkin pata eo.”5
Jouj kōļmenļo̧kjeņ im kwōn māletlet ilo kālet wāween am̧ kōjerbal iien ko am̧. Āinwōt komaron̄ loe jān waanjon̄ok eo an Elder Perry, ijjab kōnono kōn am̧ kwaļo̧k kabun̄ eo am̧ n̄an aolep armej ak paotokum̧ en aolep kwaļo̧k tōmak eo am̧. Remaron̄ kajokook n̄an kwe im Kabun̄ eo. Ij kōnono kōn am̧ erom ta eo kwo aikuj erom.
Kōm̧m̧ani Kōttōpar ko Rekkar
Kapilōk eo aō kein kajilu n̄an jet iaan kōttōpar ko kwoj aikuj ļōmņak kaki. Ilo ejja jejjet in iien in me Elder Perry eaar pād ilo Japan ippān ritariņae ro, Būreejtōn Boyd K. Packer, Būreejtōn eo an Doulul eo an Jon̄oulruo Rijilōk ro, kar jerbal ilo Japan ippān air force ilo jem̧ļo̧kinļo̧k Pata eo an Laļ in Kein Karuo.
Ilo 2004, iaar mije Būreejtōn Packer im ro jet n̄an Japan. Eaar jeram̧man n̄an bar lo jet iaan bun̄tōn nee ko neen im kōļmenļo̧kjeņ kōn jet iaan en̄jake ko im kālet ko eaar kōm̧m̧ani ilo iien in. Kōn mālim eo an, ij kwaļo̧k jet iaan ļōmņak ko an im en̄jake ko.
Būreejtōn Packer eaar kōmeļeļeik en̄jake ko raar waļo̧k ioon juon āne ilo Okinawa. Ej kile menin āinwōt toļ eo an ilo āne jam̧den. An m̧aanjebpopo make im kweilo̧k ippān membōr ro jet eaar kam̧wiļalļo̧k tōmak eo an ilo katak ko an ko̧jpeļ eo. Ta eo eaar ejjeļo̧k ippān ekar kapen eo—em̧ool an jeļāļo̧kjeņ eaar kadede itok n̄an en̄jake bwe em̧ool.
Ripija eo an Būreejtōn Packer eaar pijaik ta ko raar waļo̧k: “Oktak eo n̄an aenōm̧m̧an in kapen in eaar pukōte, eaar itok n̄an en̄jake kōn e make tariņae enana ņae ro ejjeļo̧k ruwāer. Pukōt an m̧akeļo̧k iaan im iien n̄an ļōmņak, eaar tallōn̄, juon raan, n̄an juon toļ euteijļo̧k jān ioon lo̧jet. Ijin eaar loe m̧aalkan eo eaar pād wōt an juon mōn rikalib, ej kowaan meļaaj in piteto tōn̄al eo iturin. Im ej babu ilubwilijin menin eddōk ko rekkōt eaar loi kumi in ritariņae ro raar m̧an ruo ajri im jineer. Menin eaar kobrak e kōn būrom̧ōj eļap ekāre ippān en̄jake ko kōn iakwe n̄an baam̧le eo an make im n̄an aolep baam̧le ko.”6
Eaar deļo̧n̄ļo̧k ilowaan ban̄ eo an, ijo eaar kejekļo̧kjeņ, kōļmenļo̧kjeņ, im jar. Būreejtōn Packer, ilo an reilikļo̧k n̄an iien in, eaar kōmeļeļe ta in inaaj ņaetan juon en̄jake ej kam̧ool ilo jetōb. Eaar en̄jake im̧we n̄an ta eo ej aikuj in kōm̧m̧ane ilo mour eo an. E, aaet, kar jab jeļā bwe enaaj kar kūr n̄an kūr eo eutiej im ekwojarjar eo ej kiiō kabwijere. An ettōņak eaar kōņaan erom juon rūkaki, kōmejajaik katak ko an Rilo̧mo̧o̧r eo. Eaar kajim̧weik ļōmņak eo an bwe enaaj mour juon mour ejim̧we.
Eaar itok n̄an e ilo juon wāween bwe eaar aikuj pukōt juon pāleen kōrā ewānōk im bwe ippān doon renaaj ejaake juon baam̧le ekilep. Ritariņae in edik eaar kile bwe kālet in jerbal eo an enaaj pukōt wōņāān eo ekarbab im bwe kampānion eo an em̧m̧an enaaj aikuj in mour ippān ejja kālet ko im̧aantata im m̧ōņōņō in mour ilo ejjeļo̧k m̧weiuk. Sister Donna Packer eaar, im ej, n̄an Būreejtōn Packer, kampānion eo ejjejet. Eaar jab bwe aer jāān, ak raar jab en̄jake jabwe ilo jabdewōt wāween. Raar kōkkaajririik 10 ajri ro, innām raar kaarmejet. Kiiō ewōr 60 jibuer ajri ro im elōn̄ļo̧k jen 80 jibuer im jibuer ajri ro.
Iaar kwaļo̧k bwebwenato eo em̧ool kōnke kōttōpar ko ad ekkā aer pedped wōt ioon ta eo laļ in ej kaorōke. Jekjek ko raorōk rej lukkuun pidodo n̄an membōr ro raar bōk kain̄i in lo̧mo̧o̧r ko. Kwōn Jim̧we. Ejaake juon baam̧le. Pukōt juon wāween ekkar n̄an kakke. Jerbal āinwōt kar kūri. M̧aanjebpopo n̄an iioon Anij.
Rilo̧mo̧o̧r eo eaar katakin bwe “bwe an armej mour e jab kōn an lōn̄ men ko an” (Luk 12:15).
Kalōk Laļ eo Am̧ im Jukjukinpād eo
Ilo kakkobaba n̄an m̧wil ko an juon make, karbab ko, im kālet ko, eļan̄n̄e kwaar iten pād ilo epepen eo kwoj aikuj in pād ie, kwonaaj kalōk laļ eo am̧ im jukjukinpād eo ijo kwoj jokwe ie. Epepen eo am̧ enaaj aikuj in kōjparok anemkwoj an jim̧we im kabun̄. Ineen RiJudeo-Christian eo kōm̧ ar jolete ej jab aiboojoj wōt ak ej barāinwōt aorōk n̄an karōk eo an Jemedwōj Ilan̄. Jej aikuj in kōjparoke n̄an epepen ko ilju im jekļaj. Jej aikuj in kobaļo̧k ippān armej ro rem̧m̧an, ekoba ro jen aolep tōmak ko—eļaptata ro jej en̄jake bōk eddo in n̄an Anij kōn kōm̧m̧an ko aer. Rein rej armej ro renaaj meļeļe kapilōk eo bwe “jabdewōt men kwoj kōm̧m̧ane, jerbal em̧m̧an ijo koņaam̧.” Anemkwoj in kabun̄ im aorōk kein rem̧man an RiJudeo-Christian renaaj kōkkaļļeik epepen eo am̧ āinwōt epepen eo eļap ej menin aikuj.
Kōn apan̄ ko rej waļo̧k ilo laļ in rainin, Būreejtōnji eo Kein Kajuon im Doulul eo an Jon̄oulruo Rijilōk ro rej lukkuun inebata bwe kom̧in jejjet ilo ami bōk koņaami ilo m̧akūtkūt an kien eo ioļap ilo laļ eo ami kom̧ij jokwe ie. Kabun̄ in ej jab jutak ilo jiāe ko ilo kien im jab jipan̄ rijibadōk ro ak bade ko. Jej kōtmāne, kōn menin, bwe membōr ro ad renaaj lukkuun jipan̄ rijibadōk ro im bade ko jen kālet eo aer pedped wōt ioon katak ko renaaj kōjparok kien eo ejim̧we. Katak eo ad ej alikkar: ro rem̧m̧an, m̧ool, im māletlet aikuj pukōt tiljek (lale D&C 98:10).
Eļap am̧ lōke kom̧. Ritōl ro an Kabun̄ in rej m̧ool tōmak bwe kom̧ maron̄ kalōk aelōn̄ in kiin̄ eo āinwōt ejjan̄in kar wōr ilo epepen ko m̧okta. Kom̧ ar jab wōt am̧ iakwe im lōke ak barāinwōt jeram̧m̧an im kōjeram̧man eo am̧. Kōm̧ jeļā bwe tōprak jen epepen eo ami ej aorōk n̄an wōnm̧aanļo̧k in ejaake Kabun̄ eo im eddōkļo̧k an aelōn̄ in kiin̄ in. Kōm̧ij jar bwe kom̧in jerbal em̧m̧an ijo koņaam̧i ilo ami jab kōņak juon māj, m̧akūtkūt ekkar n̄an kadkad eo em̧ool ami, kōm̧m̧ani kōttōpar ko rekkar, im kalōk laļ eo ami im jukjukinpād eo.
Pija in Elder Quentin L. Cook jen Craig Dimond; kōmeļeļe in pija ko jen Scott Davis
Elder L. Tom Perry kar jerbal em̧m̧an kar ijo koņaan iien eo eaar pād ilo Japan.
Pija in Elder L. Tom Perry © IRI
Būreejtōn Boyd K. Packer eaar jeram̧m̧an jen kōttōpar ko rejim̧we eaar kōm̧m̧ani.
Pija in Būreejtōn Boyd K. Packer, jab maron̄ kapeiki