Iai te Bwai ae Riki ma Au Wanikiba
Craig Willie, Utah, USA
Teuana te tairiki ngke I a kabuta au wanikiba ae e onrake irouia bwatintia nakon te kawai ni kiba, Iai te namakin bwa iai te bwai ae e riki ma ana bwai n taubwe te wanikiba. Ni kamatoa ana namakin tamneiu, I kitana te kawai ni kiba ao ni karaoa tabeua kabwakean te wanikiba i nanon 360 te tikuri. Akea te bwai ae taara ni bure.
I iangoia, “I riai ni kiba ao ni karokoia bwatintia nakon aia tabo i aon te tai, ke I riai n oki nakon te keite?” I ataia bwa te oki e na karekea te iremwe ae maan. A ti kariaiakaki wanikiba ni buti n ti teuana te kawai i aon te kawai ni biri; N na riai n tataninga bairean aontano ni karekea te mwaawa ibukiu ni buti rikaaki ni kaitaraa te kawai ni buti. I mwiina ti na taningaia taani karaoa te uruaki n tuoa te wanikiba. Te waeremwe e na kona ni karekei kangaanga nakon te earain ao ibukiia bwatintia ake iai aika a na kaitibo ma ngaiia ao wanikiba tabeua ake a na kaei nakon ara tabo ake ti na nako iai. I iangoia naba bwa e na kangaa te tabo ni karaoa te uruaki ni kaeka au ribooti bwa te wanikiba iai ana kangaanga ngkana akea au kakoaua ma tii te namakin ae matoatoa.
Ngkai te kaben n te wanikiba, I bon mwiokoaki ni mauira, ngaia are I baireia n iira au namakin ao n oki.
Ngke ti roko n te keite, I tuanga te mwakaeneke bwa I namakinna bwa iai te bwai ae riki n te wanikiba ma anne I aki ataia bwa terana te kangaanga. E aki kakoauaa ae iai te kangaanga.
“Tao bon tii te kawai ni buti i aontano ae mwaimwai,” e taku. “Ko kona ni marannako i aon te korotaa.” E kariaia, e ngae n anne, n taraa te kiia n taubwe i aon te wiira i moana. I mwin tuoakina, e tuangai bwa N na karuoia bwatintia bwa e aonga ni kabutia n tuoia.
Ngke e oki 30 te miniti i mwiina, e bon rangi n raraoma. I nanon ana tai n tutuo, e a tia n ongo tangitangin te kangkangtaki ae aki boraoi. Ngke e kamanena te bureiki ngke e a rairaki ni bwake nakon te keite, e aki kona n taua bween te wanikiba ae e kuri ni butinako man te kawai.
Te tutuo ae karaoaki raoi e kaotia bwa bureiki a tia n aki karaoaki raoi n te tairiki are i mwaaina. Ngke arona bwa I katuka te wanikiba i mwiin kibara, tian bureiki a na tia n aki mwakuri, ao N na aki kona ni kabwakeea te wanikiba.
I anganaki tewaana te wanikiba bwa N na kabutia, ao I karokoia au batintia nakon aia tabo teniua te aoa n rimwii.
I bon kukurei bwa I ongo ana wirikiriki te Tamnei. I ataia bwa te Tamnei e na kairiira ngkana ti kakaea ana kairiiri te Uea ao n ongo nakon ana wirikiriki ake a roko.