Kabatan-onan
Wala Gayud Mag-inusara
Sa milabayng tulo ka tuig, ako adunay oportunidad nga masulayan. Nakaamgo ko nga bisan unsa pa ang inyong panlimbasog, uban sa Dios dili nimo kini kinahanglang buhaton nga mag-inusara.
Sa wala madugay human sa akong ika-16 nga adlawng natawhan, nadiskobrehan nako nga aduna koy eczema. Lisud kaayo kada buntag nga motan-aw sa samin ug makita ang mga panlimbagha [rashes] sa akong lawas. Gihagit nako ang akong kaugalingon nga hunahunaon kini isip oportunidad nga masulayan. Imbis nga mobati og kalooy sa akong kaugalingon, gipaningkamutan nakong buhaton unsa ang gitudlo kanako sa mga magtutudlo sa Young Women: sa pag-ihap sa akong mga panalangin matag adlaw bisan pa sa mga pagsulay. Bisan tuod og dili hamis ang akong panit karon, mapasalamaton ko sa akong pamilya ug mga higala ug sa akong talento sa musika. Mapasalamaton ko nga adunay duha ka paa, duha ka kamot ug tiil, mga mata aron sa pagtan-aw, mga dalunggan aron sa pagpaminaw. Nasayud ko nga ang tinuod nga kaanyag anaa sulod sa atong kaugalingon, wala sa pisikal.
Apan ang akong eczema hinay-hinay nga nakaapekto sa akong emosyon. Dili nako ingon ana kamahigalaon sama sa una ug dili na kaayo mopahiyom. Daghang doktor nga akong gikonsulta misiguro nga “mahamis” akong panit sa dili pa mag-Pasko. Apan wala ni mahitabo. Nag-ampo ko kada adlaw sa kalig-on aron mabuntog ang pagkamaulawon tungod sa akong sakit sa panit.
Ang tanan nagsulti kanako nga dili maghunahuna kabahin sa akong lisud nga sitwasyon, nga kinahanglang molihok ko nga normal lang ug magpakaron-ingon nga walay problema akong panit. Apan lisud ni nga buhaton. Ang akong inahan hinay-hinayng balik-balikon ang mga istorya sa kasulatan, naglaum sa paghupay ug pagdasig kanako.
Mabasa sa Doktrina ug mga Pakigsaad 24:8, “Pagpailub sa mga kasakit, kay ikaw makabaton og daghan; apan lahutay kanila, kay tan-awa, Ako anaa uban kanimo, gani ngadto sa katapusan sa imong mga adlaw.” Kini nga kasulatan naghatag kanako og tambag kon unsay angay nga buhaton. Gisulat ko kini diha sa mga bookmark, mga notebook, ug sa akong kwarto. Karon usa na kini sa akong paborito nga bersikulo sa pagdasig kanako sa pagbuhat sa akong pinakamaayo bisan pa sa akong pagsulay.
Ang paglahutay niining pagsulay lisud kaayo, apan karon mas andam nako alang sa umaabut nga mga pagsulay. Giandam ko sa Langitnong Amahan aron mabuntog nako ang bisan unsang mga hagit nga moabut. Karon nasayud ko nga bisan unsa pa ang akong panlimbasog, dili ni nako kinahanglang buhaton nga mag-inusara.
Ang Nawala nga Karnero, ni Del Parson