2012
Bok eo an Alma: Katak ko n̄an Rainin
Oktoba 2012


Bok eo an Alma: Katak ko n̄an Rainin

Pija
Elder Paul B. Pieper

Ri Nipai ro raar tiljek ilo niknik mālijjon̄ ko raan ko aer im rej rikam̧ool bwe Irooj enaaj letok kōjeram̧m̧an ko im kōjparok eo jej aikuji n̄an wājepdik ilo ņa mejļan apan̄ ko an tōre eo ad.

Ilo jem̧ļo̧kin an tōl, Kiin̄ in Mosaia eaar ba bwe aelōn̄ in kiin̄ eo en bōk jikin kōn juon jejtōm̧ in riekajet ro kar kālōt jān armej ro. Jejtōm̧ eo kar elmakoti eaar pedped wōt ioon kakien ko litok jen Anij im kōmlet jen riekajet ro kālōt in armej.

Pedpe eo an anemkwoj eaar pedped in jejtōm̧ eo kar elmokote—kajjojo, ijjelo̧kin juon kiin̄, emaron̄ bōk eddoin im m̧ool n̄an kōm̧m̧ane ekkar n̄an kakien eo. Kōnke “ejjab ekkā bwe ainikien armej ro rej kōņaan jabdewōt oktak n̄an men eo e jim̧we” (Mosaia 29:26), jejtōm̧ in emaron̄ kwaļo̧k eļapļo̧k kōjparok n̄an jim̧we ko an kajjojo im jim̧we ko aini an juon juknukinpād.

N̄an uwaake kajjitōk eo an Mosaia, armej ro “kijoror otem kijoror bwe kajjojo armej en wōr an maron̄ jon̄an wōt ro jet ilo aolepān āneo; aaet, im kajjojo armej eaar kwaļo̧k an m̧ōņōņō n̄an uwaak kōn jerawiwi ko an make” (Mosaia 29:38).

Bok in Alma epād ie bwebwenato ko an armej ium̧win iiō ko 40 ālkin an jejtōm̧ eo kar elmakote ejaake jen armej ro. Jebta ko āliktata in ļo̧o̧k eo an Alma, jebta 43 n̄an 62, ej kwaļo̧k juon tōre in apan̄ ko im mālijjon̄ ko reppen. Ilo tōrein ekadu ium̧win 19 iiō ko, armej ro raar jelm̧ae apan̄ ko ilowaan kein, kaamijak ko itulik, im enan̄in lōkapokpok ko ejej uwaer.

Ruo alen an jejtōm̧ eo kien eo ioļap kar pād ilo uwōta jen em̧m̧aan ro raar kōņaan watōk er make kiin̄ ro im liko̧rko̧r e armej ro jen jim̧we eo n̄an kālōt ritōl ro aer im n̄an kabun̄jar ilo anemkwoj. Ejja iien in wōt, armej ro raar bōbraik er make jen apan̄ ko rej lōn̄ļo̧k jen Ri Leman ro raar lukkuun kōņaan kakkure Ri Nipai ro n̄an erom rikōm̧akoko.

Wāween mour eaar jorrāān itok wōt jen apan̄ kein, men̄e jab kalikkar ilo dipeioin, eaar āinļo̧k wōt juon apan̄ eļap n̄an armej ro. Mormon, ilo an aiin ļo̧o̧k ko rekwojarjar, kar en̄jake juon im̧we n̄an kwaļo̧k juon bwebwenato an tōre in. Ilo m̧ool, eļan̄n̄e emaron̄ kar kwaļo̧k meļeļe ko eierļo̧k n̄an aolepān 1,000 iiō in bwebwenato an Ri Nipai ro, Bok in Mormon eo emaron̄ kar ļapļo̧k jen 2,500 peij ko.

Būreejtōn Ezra Taft Benson (1899–1994) eaar katakin:

“Bok in Mormon … kar je n̄an tōre in ad. Ri Nipai ro ejjan̄in kar wōr aer bok in; barāinwōt Ri Leman ro ilo iien ko etto. Eaar n̄an kōj. … Ium̧win im̧weo an Anij, eo ej lo men otemjej jen jinoin, [Mormon] eaar tokaduin ļo̧o̧k ko an epepen ko, kālōt bwebwenato ko, kōnono ko, im iien ko raar waļo̧k bwe ren maron̄ erom menin jipan̄ n̄an kōj. …

“Jaikuj emmakijkij ad kajjitūkin kōj make, ‘Etke Irooj eaar im̧we Mormon (ak Moronai ak Alma) n̄an kobaik menin ilo ļo̧o̧k eo an? Ta katak eo Imaron̄ kar katak jene n̄an jipan̄ eō mour ilo rainin im iiō in?’”1

Rainin Armej ro Rekwojarjar ilo Raan-ko Āliktata ipeļaakin laļ in rej lo aer make jelm̧ae ejja kain apan̄ ko an Ri Nipai ro raar jelm̧ae ilo tōre in ilo bwebwenato eo aer, ekoba kijejeto n̄an liko̧rko̧re membōr ro jen jim̧we eo n̄an kabun̄jar im kōnono kōn un ko raorōk n̄an jukjukinpād ko raar jokwe ie. Jet Armej ro Rekwojarjar ilo Raan-ko Āliktata raar en̄jake kōn kaamjak eo an liko̧rko̧r ko jān itulik im apan̄ eo kōn kajoor ko kar kalim̧m̧ur kaki n̄an kakkure eo an laļ ko im anemkwoj ko aer.

Jeram̧m̧an, Ri Nipai ro raar maron̄ anjo̧ ioon apan̄ ko aer kōn kōttōpar, wujlepļo̧k, im jipan̄ jen Irooj. Jejjo katak ko kōn wāween aer kar jeram̧m̧an in uwaak n̄an apan̄ ko aer ko remaron̄ letok tōl n̄an kōj im peran n̄an jelm̧ae apan̄ ko ad rainin.

1. Dāpij wōt kōņaan ko rekkar im jipadpad ko.

Kōn aolepān apan̄ ko aer, Ri Nipai ro raar jim̧we raar maron̄ bōk kajoor jān m̧ool eo bwe raar jerbal kōn laudin̄din̄ jejjet. Ikdelel eo aer eaar “n̄an jojomar n̄an ermake, im noke ko aer, im bwidej ko aer, im jim̧we ko aer, im tōmak eo aer” (Alma 43:47). Aer kōņaan eaar n̄an kōjparok anemkwoj—jim̧we eo n̄an jerbal ilo wānōk im n̄an uwaak n̄an kōm̧m̧an ko aer make—ijjelo̧kin an wōr juon kiin̄ ej kōmeļeļe kōn kōm̧m̧an ko aer. Jipadpad eo aer eaar n̄an kōjparok jokkin wōt juon ium̧win kakien, eļaptata anemkwoj eo aer n̄an kabun̄jar n̄an Anij im kabun̄ eo aer (lale Alma 43:9, 45).

Ewōr im iien otemjej naaj wōr ilo jukjukinpād ko kajoor n̄an pukōt n̄an kōjerbal ļōmņak ko an armej n̄an bōk kajoor n̄an jeram̧m̧an eo an juon make. Ewōr juon kapo n̄an bōk jipadpad ko im ukōtļo̧k ļōkapokpok eo n̄an juon kajoor. Wāween eo an Irooj ej n̄an iien otemjej jerbal pedped wōt ioon ikdelel ko im jibadbad ko rerreo, āinwōt Ri Nipai ro raar kōm̧m̧ane. Kōm̧m̧ane āindein emaron̄ kōtļo̧k er n̄an alitoto ioon kajoor ko an lan̄ n̄an eļļā jen apan̄ ko aer “ilo kajoor eo an Irooj” (Alma 46:20; lale barāinwōt Alma 60:16; 61:18).

Ejja āinwōt, ilo uwaak ko ad n̄an apan̄ ko jej jelm̧ae rainin, jej aikuj emmakijkij etale būruwōd n̄an kam̧ool bwe kōņaan ko ad im jibadbad ko rerreo im rej pedped ioon katak ko an ko̧jpeļ eo an Jisōs Kraist. Eļan̄n̄e jej jerbal (ak kōjerbal ro jet n̄an m̧akūtkūt) itok jen ļōmņak kōn e make, n̄an kōņaan eo ad makmake, ak n̄an kōttāik ro jet, jejjamin bōk jipan̄ eo aikuj jen lan̄ n̄an bōbraik apan̄ ko ad.

2. Kwom̧in Jouj im Meanwōd n̄an ro rejerata.

Ke rikōjdat ro aer m̧okta, armej in Anti-Nipai-Liai ro, raar kaamijak er kōn kakkure, Ri Nipai ro rar pout n̄an leļo̧k juon jikin n̄an aer jokwe im ejaake juon mour kāāl im leļo̧k n̄an er kōjparok (lale Alma 27:21–22; 43:11–12). Kōnke Anti-Nipai-Liai ro raar bōk ioer juon kalim̧m̧ur n̄an jamin bar bōk kein tariņae ko aer, ijjelo̧kin raar leļo̧k “eļap m̧ōttan m̧weiuk ko aer n̄an rejtake jar in tariņae ko aer” (Alma 43:13) kumi in tariņae eo an Ri Nipai ilo tōre ko reppen. Mekarta, Ejjeļo̧k ļo̧o̧k ej kwaļo̧k bwe Ri Nipai ro rekar kōm̧m̧an n̄an ri-itoitak rein kōn ejjeļo̧k ijjelo̧kin kautiej im iakwe, men̄e ekar wōr kakien ko repidodo n̄an ro rekar kōņaan kōļapļo̧k iakweleel.

Jerbal jouj eo Ri Nipai ro raar leļo̧k n̄an armej ro an Ammōn, ke raar itok n̄an ņa etaer, kar kwaļo̧k e im āliktata jipan̄ļo̧k n̄an ejaak eo an juon iaan jarin tariņae ro reim̧we tata ilo ļo̧o̧k in bwebwenato—2,000 ritariņae ro. Ealikkar, jerbal in jipan̄ eo an likao ro emaron̄ in kar aorōk eo n̄an kōjparok jukjukinpād eo an Ri Nipai jān kakkure eo em̧ōkaj.

Ilo iien iakweleel ko reļļap, aped ko itulik, im apan̄ in wāween mour, ekar wōr juon kōņaan em̧m̧akūt n̄an kakkūre ro me rejjab “āinwōt kōj.” Epidodo erom kōrraat er im kōm̧m̧an in ekajet ko. Juon emaron̄ kajjitōk kōn aer m̧ool im aorōk ilo jukjukinpād im aer jelōt wāween in ad mour. Uwaak kein renana rejjab jokkin wōt juon ilo kōm̧anm̧an eo an Rilo̧mo̧o̧r eo n̄an iakwe ro ipeļaakūd āinwōt kōj make, im rej ejaak kumi in jum̧ae, likōmjaje, im jenolo̧k. Armej in Ammon ro rekar jab ruwainene n̄an jukjukinpād eo an Ri Nipai, bōlen emaron̄ kar ejaak matōrtōr ijjelo̧kin kam̧m̧oolol ilo diktak in epepen in. Ijjelo̧kin kajutak 2,000 ritariņae ro reperan, epepen eo ekāāl emaron̄ kar emm̧akūt im kobaļo̧k ippān Ri Leman ro.

Ikdelel n̄an meanwōd im jouj n̄an riaikuj ekar jekjek eo eaorōk ilo kōjparok laļ eo an Ri Nipai im kōpelpel Ri Nipai ro kōn kōjeram̧m̧an ko jen lan̄ ilo iien ko aer reppen. Armej ro an Anij raikuj kōjeram̧m̧an kein rainin.

3. Ron̄jake im ļoor ritōl ro reim̧we.

Irooj ejeļā kōn apan̄ ko Ri Nipai ro raar jelm̧ae, im Ej kotak ritōl ro reim̧we n̄an jipan̄ er ioon apan̄ ko. Kiaptin Moronai ekar juon ļadipenpen bōtaab ekar im̧we n̄an kōpooj kein kōttōrak ko, dipil, im kein pelpel, im nuknuk ko remijel n̄an kōjparok armej ro an (lale Alma 43:19). Āinwōt juon tōprak, Ri Nipai ro rekar ļap aer iiet ilo jikin tariņae jen Ri Leman ro (lale Alma 43:37–38). Tokālik, Moronai eaar tōl armej ro n̄an kubwij ejojik in bwidej ko ipeļaakin aolepen jikin kweilo̧k ko kōn aļaļ ko en wōr dumej kaleki (lale Alma 50:1–3). Kōppopo kein reim̧we rekar jipan̄ kōjparok Ri Nipai ro jen kakkure.

Ilo an kar Moronai kōppopo n̄an tariņae, Hilamōn im m̧aan ro jein im jatin rekar kwaļo̧k naan in Anij im likjōrjōr e armej ro n̄an mour jim̧we bwe Jetōb in Irooj en maron̄ tōl im kōjparok er. Jen ron̄jake tōl an mour in kanniōk im mour in jetōb an ritōl ro reim̧we, Ri Nipai ro kar kōjparok er. M̧ae iien n̄e iakweleel ko renaaj bar waļo̧k im armej ro remakoko in ron̄jake kakkōl ko unoojdikdik kaki ajļo̧k im en̄taan rej uwaak ko.

Kōj jejeram̧m̧an n̄an mour ilo juon raan ke Irooj eaar kūr rikanaan ro remour, rilolo, im ribōk m̧adenļo̧k ro n̄an kakkōl kōj im tōl kōj n̄an kōppopo n̄an apan̄ ko rainin. Ilo 1998, Būreejtōn Gordon B. Hinckley (1910–2008) eaar letok kōmeļeļe eo eim̧we im kakkōl eo n̄an membōr ro an Kabun̄ in:

“Iien em̧ōj an itok n̄an kōllaajraki m̧ōko im̧ōd.

“Innām elōn̄ iaan armej ro ad rej mour kōn jidik kōļļā ko aer. Ilo m̧ool, jet rej mour kōn m̧uri. …

“Jeram̧m̧an ko bōk mour jene ej juon men epidodo an jorrāān. … Ewōr juon kōkaļļe in mejatoto ko rekōtoto im̧aan me jej aikuj em̧m̧an ad kalimjōki.”2

Jem̧aanļo̧k Iaar kōnono ippān juon em̧m̧aan eo ekar ron̄ naan ko an Būreejtōn Hinckley im unoojdikdik ko an Jetōb. E im kōrā eo pāleen raar ļōmņak n̄an kadikļo̧k aer kōjerbal jāān, kōļļāik m̧weo m̧weer, im eļļāļo̧k jen m̧uri.

Rainin em̧m̧aan eo ej make un̄n̄are-pein. Okoktak in menin jeram̧m̧an ko me kar waļo̧k ālkin ewōr jidik kilaer ilo baam̧le eo an. Ilo m̧ool, an make un̄n̄are pein ekapidodoik n̄an e im kōrā eo pāleen n̄an jerbale juon mijen.

Būreejtōn Thomas S. Monson kar karūttoļo̧k n̄an tōre in ad. Mour im katak ko An rej ennaan eo Anij eaar jilkintok n̄an kōjparok im kōjeram̧m̧an kōj rainin. Ilo juon iien ke elōn̄ raar inepata kōn ta eo ejjeļo̧k ippāer, Būreejtōn Monson ej katakin kōj n̄an kam̧m̧oolol kōn elōn̄ kōjeram̧m̧an ko Irooj eaar litok n̄an kōj. Im ilo juon iien n̄e elōn̄ renaaj pedped wōt ioon jorrāān ko aer make, Būreejtōn Monson ej likjōrjōr e kōj n̄an pukōt im lo̧mo̧o̧r, meļo̧kļo̧k kōjmake ilo kōjeram̧m̧an ro jet. Ron̄jake tōl eo an Būreejtōn Monson enaaj boktok n̄an baam̧le ko ad jitōbōn kōjparok im kōjeram̧m̧an ko aikuji ilo raan eo ad.

N̄aij m̧ōņōņō n̄an mour ilo juon raan ke ko̧jpeļ eo eaar bar jepļaaktok. N̄aij m̧ōņōņō bwe Irooj eaar kōpooj Bok in Mormon n̄an tōre eo ad. Ri Nipai ro raar tiljek ilo niknik mālijjon̄ ko raan ko aer im rej rikam̧ool bwe Irooj enaaj letok kōjeram̧m̧an ko im kōjparok eo jej aikuji n̄an wājepdik ilo ņa mejļan apan̄ ko an tōre eo ad.

Kakememej ko

  1. Ezra Taft Benson, “The Book of Mormon—Keystone of Our Religion,” Ensign, Nov. 1986, 6.

  2. Gordon B. Hinckley, “To the Boys and to the Men,” Ensign, Nov. 1998, 53.

Bun̄m̧aanļo̧k, jān Walter Rane, pija eo an Church History Museum

Raar Likūt Aer Leke ilo Anij, jān Walter Rane, pija eo an Church History Museum

Kiaptin Moronai im Taitōļ an Anemkwoj,jān Clark Kelley Price