Ta eo Jej Tōmak ie

Oņaake Mour Ej Kōpooj Kōj n̄an Ilju im Jekļaj

Armej ro Rekwojarjar ilo Raan-ko Āliktata rej tōmak ilo m̧aanjeppopo im un̄n̄are peid make. Jej tōmak ilo kōppopo ilo jeļāļo̧kjeņ n̄an jerbal, ilo kōppopo ilo jāān n̄an jekjek ko reppen kōn jāān, im ilo kōppopo ilo juon iien ekadu kitien n̄an idin̄ in jorrāān ko ak apan̄ ko jet. Eo eaorōktata, jej tōmak ilo kōppopo ilo jetōb n̄an Itok eo Kein Karuo an Jisōs Kraist im n̄an mour ippān Jemed ilo Lan̄ bar juon alen. Jekjek in n̄an m̧aanjeppopo ej ņaetan oņaake mour.

Oņaake mour ej kwaļo̧k jekjek eo ad em̧ool ejjeļo̧k jem̧ļo̧kin: jej pād “n̄an kōm̧m̧an n̄an [kōj make] im jab n̄an kipel” (2 Nipai 2:26). Irooj ekōņaan bwe jen bōk eddo im makeļo̧k (lale D&C 78:14). Ekōņaan bwe jen oņaake mour kōnke jej erom wōn ro ilo jerbal in: Bōk eddo, jouj, ekkeke, meanwōd. Bwe ilo an ļapļo̧k ad un̄n̄are peid make, emaron̄ em̧m̧anļo̧k ad jipan̄ baam̧le ko ad im ro jet. Ewi wāween ad maron̄ naajdik eo ekwōle eļan̄n̄e kōj make jekwōle? Ewi wāween ad maron̄ leļo̧k jeļāļo̧kjeņ eļan̄n̄e kōj make ejabwe jeļāļo̧kjeņ ippād? Ewi wāween ad maron̄ kalōk tōmak ko an ro jet eļan̄n̄e kōj make ejabwe tōmak eo ippād?

Pedped ko kōn oņaake mour ekitbuuj laajrak in:

• M̧aanjeppopo. Armej ro Rekwojarjar kar kean̄ er n̄an kōppopo n̄an iien eo ej itok (lale D&C 1:12).

• Eowan. Irooj eaar kean̄ kōj bwe jen jab jowan (lale D&C 42:42).

• Jej aikuj pukōt jelāļo̧kjen jen katak im barāinwōt jen tōmak (lale D&C 88:118).

N̄e membōr ro an Kabun̄ in rej kōm̧mane jon̄an wōt maron̄ n̄an kakke n̄an er make ak rejjab maron̄ tōpar aikuj ko aer, rej m̧okta oktakļo̧k n̄an baam̧le ko aer kōn jipan̄. Eļan̄n̄e menin ejjab bwe, Kabun̄ eo emaron̄ jipan̄. Bisop ro im branch būreejtōn ro remaron̄ kōjerbal jipan̄ ko jān im̧ōn kakkoņkoņ eo an Irooj n̄an jipan̄ membōr ro (lale D&C 82:18–19). Jabdewōt jipan̄ jān Kabun̄ eo rej jibadbad ko n̄an jipan̄ membōr ro jipan̄ er make im n̄an rōjan̄ er jerbal ilo mour ko aer.

Jemaron̄ jerbal n̄an ad un̄n̄are peid make ilo laajrak in eria kein:

• Kajoor ilo Jetōb: Lōke ilo Irooj; pokake kien ko; jar im katak jeje ko rekwojarjar aolep iien; jerbal n̄an ro jet.

• Ājmour ilo Āinbwin: Pokake Naan in Māletlet; kōmourur; kabwe awa in kiki; kamminene wāween im pedped in kājjimourur.

• Jeļāļo̧kjeņ: Maron̄ jeje ak riit; bōk kapāāl in jerbal ko; ekkatak bok ko rem̧m̧antata (lale D&C 88:118).

• Jerbal: Jerbal n̄an kakke n̄an kwe make im aikuj ko an baam̧le eo am̧.

• Jikin Kakoņkoņ ilo M̧weo: Kakkoņkoņ dān in idaak erreo im jidik kōn jidik kajutak juon jikin eo̧jōk m̧ōn̄ā ko kwoj kan̄i aolep iien im juon jikin m̧ōn̄ā ko eto aer jorrāān, āinwōt leen wōjke ko im biin ko.

• Jāān ko: Kōļļā juon m̧ōttan jon̄oul im jāān in jitlo̧k im jortak ko; joļo̧k m̧ūri ko ejjeļo̧k tokjāer; lukkuun ejaak juon jikin kakkoņkoņ jāān.

N̄an meļeļe ko relōn̄ļo̧k, lale Jenesis 41; D&C 38:30.

Elder Robert D. Hales

“Kōj aolep rej bōk eddo n̄an kakke n̄an kōj make im baam̧le ko ad jim̧or ilo jekjek ko ilo ānbwin im jetōb. N̄an kakke oņaake, jej aikuj kammineneik pedped ko an oņaake mour: lan̄lōn̄ ilo ad jab kōjerbal eļapļo̧k jen jon̄an wōnāān eo ad, ad jerbale ta eo ewōr ippād, joļo̧k tarjen jon̄an m̧uri, im tiljek ilo kakkoņkoņ im kōppopo n̄an aikuj ko reidin̄.”

Elder Robert D. Hales jen Doulul eo an Jon̄oulruo Rijilōk ro, “Becoming Provident Providers Temporally and Spiritually,” Liahona, Māe 2009, 8.

Kajjitōk im Uwaak ko

Jet remaron̄ kōļmenļo̧kjeņ eļan̄n̄e Armej ro Rekwojarjar rej kakoņkoņ m̧ōn̄ā. Ilo m̧ool, jej kakoņkoņ m̧ōn̄ā im dān n̄an pojak n̄an iien ko n̄e m̧ōn̄ā im dān erreo maron̄ ejjeļo̧k ak pen tōpari ak n̄e jāān ko an baam̧le rej jab bwe. Ilo idin ko, jabdewōt ro raar kakoņkoņ m̧ōn̄ā naaj en̄jake eļapļo̧k kōjparok im naaj em̧m̧anļo̧k aer maron̄ jipan̄ baam̧le ko aer im armej ro itureer jen jekjek eo epen.

Jān tuanmiin̄: Itok eo Kein Karuo, jen Grant Romney Clawson © IRI; kōmeļeļe ko in pija ko jen Craig Dimond, Christina Smith, John Luke, im Robert Casey © IRI; pija in jerri ko jen David Stoker © 2008