Ļōmņak ko kōn Nokon in Jota an Baam̧le
Peba in epād ie bwebwenato im m̧akūtkūt ko me remaron̄ in kōjerbali ilo iien Nokon in Jota an Baam̧le. Laajrak in ej ruo waanjon̄ak ko.
“Oņaake Mour ej Kōpooj Kōj n̄an Ilju im Jekļaj,” peij 12: Riiti jiljino eria ko kōnono kaki ilo bwebwenato in ilo wāween ad maron̄ un̄n̄are peid make. Ta jet iaan idin̄ ko ak jorrāān ko remaron̄ kōwaani jen kōļapļo̧k un̄n̄are peid make ilo eria kein? Karuwaineneik membōr in baam̧le eo n̄an lukkuun kōļmenļo̧kjeņ kōn eria ko raikuj in kōkōm̧anm̧anļo̧ki im n̄an kōm̧m̧an kōttōpar ko n̄an kōļapļo̧k aer un̄n̄are peid make ilo eria kein.
“Erreo ilo juon Laļ Ejjab Erreo,” peij 42: Kōnono ippān membōr in baam̧le eo kajjitōk ko kajjitōk kaki ilo bwebwenato in. Ļōmņak in kwaļo̧k pedped ko im en̄jake ko me raar kōkajoorļo̧k naan in kam̧ool eo am kōn erreo. Kōnono kōn wāween ko n̄an kōjerbal kapilōk eo jān bwebwenato in.
“Kom̧in Māletlet im Erom juon M̧ōttā,” peij 48: Jino jen riiti teej eo an Elder Hales n̄an kālet ro m̧ōttā rem̧m̧an. Ļōmņak in kōnono kōn aorōk in erom juon m̧ōttā eo em̧m̧an. Karuwaineneik kajjojo baam̧le n̄an ļōmņak kōn jilu wāween ko ļeo ak lio emaron̄ erom juon m̧ōttā eo em̧m̧an.
“Iakwe Amiga,” peij 60, im “Karuwaineneik Juon Season Ekāāl an Mour,” peij 61: Riiti kōn ajri in Būraimere ro im wāween aer kōppopo n̄an deļo̧n̄e Doulul eo an Jiron̄ ro im Doulul eo an Likao ro. Āinwōt juon baam̧le, ļōmņak in kōnono kōn ta eo ajri rein raar kōm̧m̧ane n̄an kōppopo. Karuwaineneik membōr in baam̧le eo n̄an riit Personal Progress ak Jerbal n̄an Anij bok ko im pukōt jet m̧akūtkūt ko rej m̧ōņōņō in kadedeikļo̧k ilju im jekļaj.
Ruo Katak ko, Juon Nokon in Jota an Baam̧le
Juon bon̄ jinō im jema im ro jibū im jim̧aaō raar lotok ilo nokon in jota an baam̧le. Kajjojo ajri ro jilu nejū rem̧ōņōņō in bōk koņaer, im ilo bon̄ in eaar an ļaddik eo nejū jiljilimjuon an iiō iien n̄an letok juon katak. Kōm̧ ar kōpooj juon jikin katak jidikdik, likūt ioon pija ko kōn Kōm̧anm̧an eo, im kar ekkatak im etale ta eo enaaj katakin. Ļaddik eo nejū eaar pojak im m̧ōņōņō.
Ilo katak eo, kōm̧ aolep kar ron̄jake ta eo ļaddik eo nejū eaar kōmeļeļeiki. Ke eaar dedeļo̧k, Samuel, eo enan̄in jilu iiō, eaar pepe bwe enaaj barāinwōt kōņaan in bōktok juon katak. Kōn menin eaar bōk pija ko im jikin katak jidikdik eo im likūt er ioon tebōļ eo.
Ilo ainikien eo an emera im jet iien naan ko ebōd an ba etaer, Samuel eaar letok n̄an kōm juon katak em̧m̧an an nokon in jota an baam̧le. Im men̄e eaar jab kōppopo, eaar ron̄jake. Eaar kōmeļeļeik n̄an kōm̧ wāween an laļ in kar kōm̧anm̧an im kar jiron̄ kōm̧ kōn iakwe eo an Jisōs Kraist n̄an kajjojo kōj.
Kōm̧ ar bwilōn̄ n̄an loe wāween an pidodo an katakin katak eo—kōm̧m̧an ejja āinwōt an būratōr eo an kar kōm̧m̧ane. Ro jinō im jema im ro jibū im jim̧aaō raar bwilōn̄ im m̧ōņōņō. Kōj aolep maron̄ iakwe eo an ajri reddik n̄an ko̧jpeļ eo—im iakwe eo an Jisōs Kraist n̄an er.
Lizbeth Sánchez Fajardo, Mexico