Ward Ko̧o̧njeļ ko rej Jerbal
Armej ro Rekwojarjar ilo Raan-ko Āliktata rej kōjerbal ward im branch ko̧o̧njeļ ko n̄an kōjeram̧m̧an mour ko an ro rej pād ilo aikuj.
Ilo joten Māe 22, 2011, ilo ioļapļap in ainikien jaidiin̄ ko reļļaaj, juon aire ļapļap kar bun̄it ioļapļap in Joplin, Missouri, USA, kakkure m̧ōko im mour ko. Joplin First Ward eo eaar lukkuun jorrāān jān aire eo, bōtaab ilo iien eo em̧ōkaj tata Bisop Chris Hoffman im ward ko̧o̧njeļ eo raar jino lale bwe aolep membōr ro an ward eo ren inem̧m̧an.
“Ewōr juon am karōk in wāween jerbal epojak kōnke kōm kar kōnono kōn kōppopo kein ilo ward ko̧o̧njeļ eo m̧okta jān aer waļo̧k,” eaar ba. “Kōm kar barāinwōt pedped ioon Jetōb eo n̄an jeļā ta eo n̄an kōm̧m̧ane. To in jarom̧ ko raar wōtlo̧k. Cell boon ko raar jab jerbal. Kōm kar jar im ron̄jake uwaak ko, im raar itok—iien otemjej raar itok. Eaar kam̧ōņōņō n̄an eō āinwōt juon bisop n̄an ron̄ an membōr ro ba, ‘En̄in ej ta eo Iaar kōm̧m̧ane,’ ijjello̧kin an, ‘Ta eo kwoj kōņaan bwe in kōm̧m̧ane?’”
Uwaak eo ilo Joplin ej kwaļo̧k kajoor eo an juon ward ko̧o̧njeļ ebōrokuk. “Kweilo̧k eo an ward ko̧o̧njeļ ej juon iaan kweilo̧k ko raorōk tata ilo Kabun̄ in,” Elder M. Russell Ballard an Doulul eo an Jon̄oulruo Rijilōk ro eaar je, “kōnke ritōl ro an doulul eo an priesthood im radik ko remaron̄ ekōnono im karōke ippān bisoprik eo. … Iaan aolep ko̧o̧njeļ ko im kamiti ko ilo Kabun̄ in, Ij tōmak ward ko̧o̧njeļ eo emaron̄ ewōr ankilaan eļap ilo jipan̄ ajri ro nejin Jemedwōj.”1
Ippān doon kōn Iakwe im Tōmak
Ilo Puerto Francisco de Orellana, juon bukwōn emakeļo̧k ilo iooj in Ecuador, membōr ro ewōr juon aer jemjerā ekajoor kōn iakwe im tōmak. Branch ko̧o̧njeļ eo kajjojo allōn̄ ej kwaļo̧k ewi jon̄an aer kea. Rej kalimjōk kajjojo armej im baam̧le ko m̧oktata, innām ekōjkan an būrookraam̧ ko maron̄ jipan̄. Im̧weo ej itok ālkin.
Elōn̄ membōr ro rej aikuj jipan̄ kappok jerbal. Branch ko̧o̧njeļ eo emakijkij an lo bwe apan̄ ko an membōr ro remaron̄ ņa mejļaer ilo jon̄an eo an ijo jokwe ie. Ilo an ko̧o̧njeļ eo kar ekōnono kōn aikuj ko an juon jinen eo ejjeļo̧k pāleen ippān juon nejin jiron̄ me ewōr an jorrāān ko ikkijien ājmour, būreejtōn eo an Doulul eo an Kōrā eaar jeļā kōn juon jerbal ijo eo jinen emaron̄ jerbal ie im epaake wōt leddik eo nejin.
Branch ko̧o̧njeļ eo eaar barāinwōt kōjerbal kein jipan̄ ko an Kabun̄ in, āinwōt bok ko kōn kile kappok jerbal an LDS Employment Services ko.2 Raar kajutak juon kūlaj kar katakin jān juon membōr in branch eo, eo eaar jipan̄ bar juon membōr in juon branch kappok an jerbal em̧m̧anļo̧k.
Ramiro Reyes, rikakipilōklōk eo kein kajuon ilo branch būreejtōnji eo, ej ba kōn branch ko̧o̧njeļ eo: “Kōmij kein jerbal ilo pein Irooj. Enaaj tōpar menin kōttōpar ko An kōn jerbal ko am.”
Juon Iaļ n̄an Tampeļ
Ilo Liverpool, New York, USA, ke Būraimere būreejtōn eo Melissa Fisk eaar pād ilo kweilo̧k eo an ward ko̧o̧njeļ eo, eaar bōk meļeļe n̄an kajoor eo an. Ke eaar etto̧ļļo̧k n̄an lowaan pāāk eo an n̄an juon bok in jeje, eaar lo juon pija in 28 ajri in Būraimerero ioon jikin iuwe ko an Palmyra New Yokwe Tampeļ eo. Aolep ajri ro raar kalibubu kōn wasp ekan̄kan̄. Ium̧win jidik iien, pija eo eaar kūnōōr an jān kweilo̧k eo, im eaar ļōmņak ilo tukadu in raan eo ward Būraimere eo eaar ilo̧k n̄an Palmyra n̄an lem̧ōņōņō kōn en̄jake eo ekwojarjar an peļaak ko an tampeļ eo. Ejerata, ke ajri ro raar eļļo̧ki ko̧o̧j būļan̄kōj ko aer, raar jirilo̧k im kakkure eel eo an wasp eo.
Ālkin an kar etale aolep, ritōl ro raar karuwaineneik ajri ro n̄an jibwe tampeļ eo. Ajri ro raar jab kōnke raar mijak bwe emaron̄ kar lōn̄ļo̧k wasp ko . Kōn menin ro jinen im jemen im ritōl ro raar juon ilo juon ļain im kar ejake juon iaļ ļo̧k n̄an tampeļ eo. Menin eaar leļo̧k n̄an ajri ro peran n̄an wōnm̧aanļo̧k.
Ke Melissa eaar bar kōro̧o̧l ļo̧k an n̄an kweilo̧k eo an ward ko̧o̧njeļ eo, eaar ļōmņak, “Eļan̄n̄e aolep remaron̄ in kar jepooļ kōn ro m̧ōttaer im ritōl ro rej iakwe ilo aer wōnm̧aanļo̧k n̄an tampeļ eo.”
Ļōmņak ko an raar bōjrak ke eaar ron̄ an būreejtōn eo an Doulul eo an Kōrā kwaļo̧k kōn juon sister epād ilo aikuj: “Eaar jab pād ilo m̧ōn jar eo Jabōt eo ļo̧k. Inaaj kanooj lale bwe rūkaki in loļo̧k ro an kōrā an ren jeļā kōn juon tampeļ tūreep ej itok wōt.”
“Ewōr jet men ko reppen rej waļo̧k kiiō,” būreejtōn eo an doulul eo an elder ro eaar kakobaba. Inaaj kōnono ippān rūkaki im m̧ōko ro aer im lale eļan̄n̄e ewōr jabdewōt jemaron̄ kōm̧m̧ane.”
“Jiron̄ ro remaron̄ jipan̄ kōn kōkkajiriri,” būreejtōn eo an Doulul eo an Jiron̄ Ro eaar ba.
Ke Melissa eaar kalimjōk turin mejān membōr ro an ward ko̧o̧njeļ eo, eaar lo iakwe em̧ool im n̄ūrbōktak. Etōn̄dikdik eajerer aolepen turin mejān. “Irooj eaar kōpooj iaļ ko n̄an ajri ro Nejin n̄an aer pād ilo kejparok im iakwe,” eaar ļōmņak. “Ward ko̧o̧njeļ eo!”
Ejja āinwōt ilo Joplin, Puerto Francisco de Orellana, im Liverpool, ritōl ro an Kabun̄ in ipeļaakin laļ in rej wōnm̧aanļo̧k wōt n̄an lo kōjeram̧m̧an ko an ward im branch ko̧o̧njeļ ko. N̄e rej kōm̧m̧ane, renaaj bōk kajoor eo āinjuon an ko̧o̧njeļ kein n̄an jipan̄ Irooj kōjeram̧m̧an ajri ro Nejin im kadedeļo̧k jerbal eo An.
Ituanmiin̄: pija jen Graig Dimond
Ituanmiin̄: pija jen Joshua J. Perkey