Ij Tōn Mej!
Ramona Ross, Tennessee, USA
Āinwōt kar juon nōōj ilo juon jikin kamomo ālkin m̧wijm̧wij, Iaar bōk juon kūr juon raan ikkijien juon rinan̄inmej kar etan Bill eo ej kab m̧ōj an kar m̧wijm̧wij. Emaron̄ in kar etaļ n̄an jikin kejparok an ro rōkauwōtata bōtaab kar kōm̧akūti tok n̄an eō kōnke jikin eo eaar obrak.
Ejjab to rinan̄inmej eo eaar tōkāk tok ippān baam̧le eo an. Iaar bōk kūtuwō ke kar lo bwe eaar mejān iruj wōt, jeļā ia eo epād ie, im eaar jab āinwōt enana an mour.
Ālkin ļo̧o̧ke vital sign ko an im kwaļo̧k n̄an e im baam̧ļe eo kōn ruum̧ eo an, Iaar etal n̄an hall eo n̄an kōm̧m̧ane juon kakememej ilo jaat eo an. Ilo iien eo pen eo aō eaar an̄ur peba eo, Iaar ron̄ juon ainikien ej ba, “Bar ro̧o̧l n̄an ruum̧ eo an.” Iaar kabōjrak aō jeje im reilikļo̧k itulikū. Eaar ejjeļo̧k juon ijo. Iaar ļōmņak Iaar ļōmņake ainikien eo, ke ejjab to Iaar ron̄ alen kein karuo—eperan ļo̧k.
Iaar ettōr ļo̧k n̄an ruum̧ eo an Bill n̄an lo bwe kōnwaan eaar ruo kōttan an lapļo̧k jān jon̄an, im eaar pen an menono. Ļōmņak bwe eke eo ilo kōnwaan em̧ōj an ettal, Iaar jiped kōnwaan kōn tuambwijmaron̄ in peiū ilo aō kōjerbal tuanmiin̄ in peiū n̄an kūr rim̧wijm̧wij eo em eaar kōm̧m̧ane m̧wijm̧wij eo an. Rim̧wijm̧wij eo eaar ba enaaj kar jilkintok juon kumi n̄an bōk Bill ilo iien eo em̧ōkaj tata. “Im jab kōm̧akūt peiūm̧!” ekar ba:
Ilo aō kar wōnm̧aanļo̧k wōt im jipede, Iaar kile juon bok ijeļā kake an Kabun̄ in turin jikin babu eo an Bill. “Kwoj juon membōr in Kabun̄ in?” Iaar kajjitōk.
Eaar kajieon̄ kōm̧ajidjdid bōran innām eaar jiron̄ eō eaar juon rijerbal in kain̄i ilo Atlanta Georgia Tampeļ eo. Innām eaar do̧o̧r dān in kemjaaļaļ ko im ba, “Ij tōn mej!”
Iaar jiron̄ e bwe eban mej, kije ilo ba, “Ij tōn m̧are ilo Atlanta Tampeļ allōn̄ in laļ, im kwonaaj pād ijo.” Innān kumi in m̧wijm̧wij eo eaar jikrōk tok im bwilli ļo̧k Bill.
Ilo limo eo an karōk ko aō n̄an m̧are eo ilo allōn̄ eo tok juon, m̧ōttan wōt jidik in kar meļo̧kļo̧k Bill, eo eaar waļo̧k bwe eaar mour jān uno ko. Bōtaab ke matron (kōrā eo ippān būreejtōn eo an tampeļ) eo ej an̄inļo̧k eō n̄an ruum̧ in liāp eo ilo raan in m̧are eo aō, Iaar lo juon turin māj ijeļā kake: lio pāleen Bill, Georgia. Ke Iaar jiron̄ e Iaar tōn m̧are, liin eaar ilo̧k im pukōt Bill. Iien eo m̧okta jān an kar jino m̧are eo, kōjām eo eaar peļļo̧k im eaar deļo̧n̄ tok. Ālkin wiik ko in metak bar ko, m̧ōļan̄ļōn̄, im m̧ōjņo̧, Bill eaar bwe an em̧m̧an an mour bwe raan eo n̄an ilo̧k n̄an tampeļ eo, jab kile eaar raan in m̧are eo aō.
Ruo iiō tok ālik ļeo pāleō im n̄a kar kūr n̄an erom rijerbal in kain̄i ko ilo Nashville Tennessee Tampeļ eo. Ke kōm kar jikrōkļo̧k ilo tampeļ eo n̄an kōjeno̧lo̧k, juon em̧m̧aan eaar kōpeļļo̧k kōjām eo n̄an eō im kar ba, “Ruwainene tok n̄an Nashville Tampeļ eo!” Eaar Brother Bill.
Kōm kar jerbal ippān doon Ium̧win jilu iiō ko. Bill eaar jiron̄ aolep bwe Iaar kejparok mour eo an, bōtaab Iaar jeļā bwe Irooj eo eaar dāpij mour eo an. Ilo wāween eo, Eaar katakin eō aorōk eo an ron̄jake im̧we ko jān Jetōb.