Blueberry ko im Bok in Mormon
Suellen S. Weiler, Georgia, USA
Jet iiō ko rem̧ootļo̧k baam̧le eo aō eaar em̧m̧akūt jān juon jikin kweilo̧k, eaen̄wen̄we, ekiojaļjaļ n̄an juon eria edik, ettoļo̧k jān tauun itulikin ļo̧k juon bukwōn ebwe an dik. Iturin ļo̧k eaar juon jikin kallib in blueberry kar kakkure, im jān ro m̧ōttan eo an jikin eo, kōm kar bōk mālim eo n̄an kōm̧ōj aolep blueberry ko kōm kar kōņaan.
Jet jibbon̄ōn ko kajjojo wiik ilo jōm̧m̧ar jab eo kōm kar ejouj ļo̧k n̄an lowaan waan ettōr eo kōn bōkaj ko im pāāk ko im joļo̧k juon awa n̄an aini blueberry ko rōkaijoļjoļ, enno̧. Juon jibbon̄ diktata eo nejim ļaddik, Hyrum, eaar āinwōt eaar jab kōņaan itok ippām. Eaar jeļā kōm kar kōm̧ōj aolep blueberry ko im bwe enaaj kar juon iien joļo̧k kōn ejjeļo̧k tokjen n̄an bar etal. Ewi jon̄an an bwilōn̄ ke eaar lo elōn̄ blueberry ko jān m̧okta. Eaar wōr ejouj ko ilo jikin ko eaar jab mijōki, im jet iaan bery ko renno̧ tata raar eddōk ioon ra ko eaar ļōmņak eaar kappok ie m̧okta ļo̧k.
Ejja ilo iien in wōt, ritōl ro an jodikdik ilo ward eo raar idajon̄jon̄e jodikdik ro am n̄an riiti aolepen Bok in Mormon eo m̧okta jān an jikuuļ kar ijjino ilo O̧kwōj eo. Ajri ro nejim raar bōktok idajon̄jon̄ eo n̄an m̧weo, im baam̧le eo am eaar kalim̧m̧ur n̄an koba ippāer ilo kijejeto ko aer.
Ejjab tok jān iien eo kōm kar kadedeļo̧k Bok in Mormon eo ke O̧kwōj 2005 Ensign eo am eaar jikrōktok, kōn idajon̄jon̄ eo an Būreejtōn Gordon B. Hinckley (1910–2008) n̄an riiti aolepen Bok in Mormon m̧oka jān jemļo̧k in iiō eo. Hyrum im ļaddik eo jein raar laudin̄din̄—n̄an ļōmņak bwe ededeļo̧k ad kar pokake rikanaan eo! Innām ro jeier rōrūttoļo̧k, Seth im Bethany, raar kakememej er bwe Būreejtōn Hinckley eaar kajjitōk ippād n̄an bar riiti, jekdo̧on jete kōttan an m̧ōj ad kōjem̧ļo̧ke.
“Ak etke?” ļaddik ro raar kajjitōk. “Em̧ōj ad kar riiti aolep naan, im ta eo ebar pād ie n̄an katak ijello̧kin ta eo emōj ad kar riiti kadede?”
Ālkin jidik iien kar ikōn̄, juon eaar kōnono kōn blueberry ko. “Kememej ke jaar ļōmņak jaar kōm̧ōj aolep blueberry? Bōtaab ke jaar bar ro̧o̧l ļo̧k, eaar iien otemjej lōn̄ļo̧k blueberry ko—iien otemjej! Jekdo̧o̧n jete kōttan ad kar ilo̧k, jekdo̧o̧n iien eo āliktata, eaar iien otemjej wōr blueberry ko ilo ra ko.”
Em̧ōkaj am kar kile ekkeijel eo. Ejja āinwōt jikin kallib eo epaak im an obrak kōn blueberry ko rōkaijoļjoļ, Bok in Mormon ej juon kein jipan̄ ejjab oktak an m̧ōn̄ā ilo jetōb kōn m̧ool ko rekāāl n̄an loi. Kōn mein kōm kar bar juon alen riiti Bok in Mormon.
Ilo aō kar bōk idajon̄jon̄ eo an rikanaan eo, Iaar riiti men ko ilo Bok in Mormon me Iaar riiti elōn̄ kōttan m̧okta, bōtaab Iaar loi ilo juon wāween eo eoktak ak kar meļeļe kaki āinwōt raar jerbal n̄an jekjek ko rekāāl ak apan̄ ko. Ijeļā bwe kajjojo iien jej m̧ool in riiti Bok in Mormon, jemaron̄ bōk ļōmņak ko im epaake ļo̧k Rilo̧mo̧o̧r eo.