2012
Kōjatdikdik ilo Pinmuur eo
Eprōļ 2012


M̧ae Iien Jej Bar Ioon Doon

Kōjatdikdik ilo Pinmuur eo

Jān juon ennaan in nokon kar kwaļo̧ke ilo Brigham Young University ilo Nobōm̧ba 4, 2008. Kōn aolepen ennaan eo ilo Pālle, lale speeches.byu.edu.

Pija
Bisop Richard C. Edgley

Kōjatdikdik ej aikuj jab pedped wōt ioon jeļāļo̧kjeņ eo im naan in kam̧ool eo bōtaab barāinwōt ioon kōm̧m̧an bwe Pinmuur eo en m̧ool in ilo mour ko ad make.

Em̧ōj aō ioon armej ro me em̧ōj aer jerwane aolep kōjatdikdik. Ukweļo̧k, rej en̄jake, ejjeļo̧k meļeļe in n̄an er im jeorļo̧k bōd ejako n̄an er. Kain rōt in ejjab meļeļe kōn kajoor in karreo eo an Pinmuur eo. Ak, eļan̄n̄e rej meļeļe, rejjan̄in kōm̧m̧an bwe meļeļe eo an en̄taan eo an Jisōs Kraist ilo Gethsemane im ioon debwāāl eo en m̧ōttan mour eo aer. N̄an jabdewōt iaad n̄an joļo̧k kōjatdikdik kōn karreo eo an mour ko ad ej n̄an karmejete m̧wilaļ eo, kajoor eo, im jekjek eo an en̄taan eo An ilo etad.

Jet iiō ko remootļo̧k kar letok ijjitōn̄ eo ilo aō kar pād ilo juon kweilo̧k eļap an stake n̄an intōrpiuik juon em̧m̧aan 21-iiō dettan n̄an lale erreo eo an n̄an jerbale juon mijen. Kiiō, Ritōl ro Routiej an Kabun̄ in ejjab emakijkij aer intōrpiuk ro repojak in erom mijinede ro. Menin eaar jej uwaan. Ke Iaar riiti jet meļeļe ikkijien un ko n̄an aō kar intōrpiu, būruō eaar metak. Ļaddik in eaar kōm̧m̧ani bōd ko reļļap. Iaar ļōmņak etke kar kajjitōk ippa n̄an loļo̧k in kōn kain bwebwenato eo, jem̧ļo̧k eo enaaj kar men eo ejej uwaan n̄an eō n̄an kwaļo̧k ļōmņak eo aō kōn e kōn mālim eo n̄an erom juon mijinede.

Ālkin m̧wein̄anin kweilo̧k eo ilo jotān Jādede eo, Iaar ilo̧k n̄an opiij eo an stake būreejtōn eo n̄an intōrpiu. Ke Iaar kōttar, juon likao ewulieo kōn juon paoktok eo em̧m̧an eaar deļo̧n̄ tok. Iaar ļōmņak ekōjkan aō maron̄ kar jekpen ņae eō make kōnke eaar alikkar ke ekōņaan kōnono im eaar wōr aō iien ippān likao eo elukkuun jorrāān. Innām eaar kwaļo̧k kadkad in make. Eaar likao eo Iaar pād ijo n̄an e.

Ilo ijo eņojak an opiij eo, Iaar kajjitōk juon wōt kajjitōk: “Etke Ij intōrpiuk eok?”

Eaar kwaļo̧k kon mour eo an m̧o̧kta. Ke aar dedeļo̧k, eaar jino kōmeļeļeik bun̄tōn ko im en̄taan eo an make eaar dipuki. Eaar kōnono kōn Pinmuur eo—kajoor eo ejjeļo̧k jem̧ļo̧k in an Pinmuur eo. Eaar kwaļo̧k naan in kam̧ool eo an im kar kwaļo̧k iakwe eo an n̄an Rilo̧mo̧o̧r eo. Innām eaar ba, “Ij tōmak ilo en̄taan eo make an Rilo̧mo̧o̧r eo ilo Gethsemane im en̄taan eo An ioon debwāāl eo raar bwe aer kajoor n̄an lo̧mo̧o̧ren em̧ool juon armej āinwōt n̄a.”

Kar em̧m̧akūt kōn ettā eo an im jān Jetōb, Iaar ba, “Inaaj kajjitōkļo̧k kake eok n̄an am̧ jerbal āinwōt juon eo ej jutak ilo etan Jisōs Kraist.” Innām Iaar ba, “Inaaj kajjitōk wōt juon men jen kwe. Ikōņaan bwe kwon erom juon mijinede eo em̧m̧an tata ilo aolepen Kabun̄ in. Edeiin.”

Jilu ak emen allōn̄ tok ālik, Sister Edgley im n̄a kar kōnono ilo juon jikin kaminene an mijinede. Ilo jem̧ļo̧k in nokon eo, Iaar bwebwenato ippān ruo mijinede ro ke Iaar lo juon likao kōn juon turin māj eo ijeļā kake.

Eaar kajjitōk, “Kwoj ke kememej eō?”

Ilo juon wāween ekajookok, Iaar ba, “Joļo̧k aō bōd. Ijeļā Ij aikuj in kar, bōtaab Ijjab kememej.”

Innām eaar ba, “In jiron̄ eo wōn n̄a. Ij mijinede eo em̧m̧an tata ilo jikin kaminene eo an mijinede.” Im Iaar tōmak e.

Kōjatdikdik eo an likao in eaar jab pedped wōt ioon jeļāļo̧kjeņ eo im naan in kam̧ool eo bōtaab barāinwōt ioon kōm̧m̧an bwe Pinmuur eo en m̧ōttan mour eo an. Eaar meļeļe bwe eaar kōn e make! Eaar jeļā kōn kajoor eo an Pinmuur eo im kōjatdikdik ej leļo̧k ke aolep men maron̄ kar āinwōt jako ak ejjeļo̧k kōjatdikdik.