2012
‘Em̧ōj An Jerkak’—Naan in Kam̧ool an Rikanaan eo
Eprōļ 2012


Enaan eo an Būreejtōnji eo Kein Kajuon

“Em̧ōj an Jerkak”

Naan in Kam̧ool an Rikanaan eo

Pija
Būreejtōn Thomas S. Monson

“Juon kajjitōk eo ekajoor n̄an juon men n̄an an waļo̧k ilo laļ an Rikirijin,” Būreejtōn Thomas S. Monson eaar kwaļo̧k, ej bwe Jisōs ri Nazareth eaar jerkak jān mej. “M̧ool eo an Jerkakpeje eo ej bōktok n̄an juōn im n̄an aolep aenōm̧m̧an eo eļļā jān jeļā otemjej” (lale Pilippai 4:7).1

Ilo ennaan kein, Būreejtōn Monson ej kwaļo̧k naan in kam̧ool eo an kōn im kam̧oolol eo kōn Jerkakpeje eo an Rilo̧mo̧o̧r eo im kwaļo̧k bwe kōnke Nejin eaar anjo ioon mej, aolep ajri ro nejin Jemed me rej itok n̄an laļ in naaj bar mour.

Mour eo ilōn̄ ļo̧k Mour Wabanban

“Ij tōmak bwe ejjeļo̧k iaadwōj emaron̄ pijaiik ļo̧k tallep in eaorōk kōn ta eo Kraist eaar kōm̧m̧ane n̄an kōj ilo Gethsemane, bōtaab aolep raan Ij kam̧oolol kōn mour e aō kōn en̄taan in pinmuur eo An ilo etadwōj.

“Ilo tōre eo āliktata, Emaron̄ kar oktak liktak. Bōtaab Eaar jab. E eaar ettā ilo aolep men bwe En maron̄ lo̧mo̧o̧ren aolep men. Ilo kōm̧m̧ane menin, Eaar letok n̄an kōj mour ilōn̄ ļo̧k mour wabanban in. Eaar bar bōk kōj jān Wōtlo̧k eo an Adam.

“Jān ijo em̧wilaļ tata ilo aō, Ij kam̧oolol kōn E. Eaar katakin kōj ekōjkan n̄an mour. Eaar katakin kōj ekōjkan n̄an mej. Eaar kōboboik lo̧mo̧o̧r eo ad.”2

Ubaakeļo̧k Maroklep eo an Mej

“Ilo jekjek ko repen, n̄an waanjon̄ak en̄taan im nan̄inmej eļļap, mej ej itok āinwōt juon enjeļ in meanwōd. Bōtaab ilo tujab eo eļap, jej ļōmņak kake āinwōt rikōjdāt an m̧ōņōņō eo an armej.

“Maroklep eo an mej emaron̄ indeeo ubaakeļo̧k jān meram eo an m̧ool eo kar bar kwaļo̧ke. ‘N̄a jerkakpeje eo im mour eo,’ kar kōnono jān M̧aajta eo. ‘Eo ej lōke Eō, men̄e e mej, enaaj bar mour: Im jabdewōt eo ej mour im lōke Eō, e jāmin mej indeeo.’

“Kam̧ool in—aaet, em̧ool kapene eo ekwojarjar—an mour itulikin lōb emaron̄ jejjet an letok aenōm̧m̧an eo kar kalim̧m̧ur kake jān Rilo̧mo̧o̧r eo ke Eaar kam̧ool n̄an rikaļoor ro An: ‘Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧. N̄a Ij lewōj n̄an kom̧, jab āinwōt an laļ lewōj. En jab pok būruemi, im en jab lōļn̄o̧n̄.’”3

E jako Ijin

“Ad Rilo̧mo̧o̧r eaar bar mour. Men eo eaiboojoj tata, ekaenōm̧m̧an tata, im m̧ool an aolep m̧akūtkūt ko an bwebwenato an armej em̧ōj an bōk jikin—anjo eo ioon mej. Metak im en̄taan eo an Gethsemane im Calvary em̧ōj kar kōm̧akūti ļo̧k. Lo̧mo̧o̧r eo an armej em̧ōj kar kōjparoke. Wōtlo̧k eo an Adam em̧ōj bar ņa mejļan.

“Lōb eo ejjeļo̧k kobban me jibbon̄ōn eo m̧oktata ilo Ijtō eo eaar uwaak eo n̄an kajjitōk eo an Job, ‘Eļan̄n̄e juon armej e mej, enaaj bar mour ke?’ N̄an ro rej ron̄jake ainikiō, Ij kwaļo̧k, Eļan̄n̄e juon armej emej, enaaj ke bar mour. Jejeļā, bwe ewōr ippād meram eo an m̧ool eo kar bar kōjepļaaktok. …

“Ro jeiū im jatū, ilo awa eo ad ekabūrom̧ōjm̧ōj tata, jemaron̄ bōk aenōm̧m̧an eo em̧wilaļ jān naan ko an enjeļ eo me ilo jibbon̄ in Easter eo m̧oktata, “E jako ijin, bwe E ar jerkakpeje.’”4

Aolep Armej Renaaj Bar Mour

“Jej ettōn̄, jej jan̄, jej jerbal, jej ikkure, jej iakwe, jej mour. Innām jej mej. …

“Im jenaaj kar pād wōt ilo mej bōtaab n̄an juon Em̧m̧aan im mijen eo An, em̧ool Jisōs RiNazareth. …

“Kōn aolepen būruō im en̄jake ko rekajoor an jetōb eo aō, Ij kotak ainikiō ilo naan in kam̧ool āinwōt juon rikam̧ool ejeno̧lo̧k im kwaļo̧k bwe Anij ej mour. Jisōs ej Nejin, Jitōnbōro eo Emake wōt an Jemed ilo kanniōk. E ej ad Ripinmuur; E ej ad Rijojomar ippān Jemed. E eo me eaar mej ioon debwāāl eo n̄an en̄taan kōn jerawiwi ko ad. E eaar erom leen ko m̧oktata an Jerkakpeje. Kōnke E eaar mej, aolep renaaj bar mour.”5

Juon Aō Make Naan in Kam̧ool

“Ij kwaļo̧k naan in kam̧ool eo aō make bwe mej em̧ōj kar eļļā ioon, anjo eo ioon lōb eo em̧ōj kar ņa mejļan. Kōm̧m̧an bwe naan ko kar kōkwojajari jān E eo eaar kakūrm̧ooli ren erom jeļāļo̧kjeņ eo em̧ool n̄an aolep. Kememeji. Kaorōki. Kautieji. Em̧ōj An Jerkak.6

Kakeememej ko

  1. “Em̧ōj An Jerkak,”Liaona, Eprōļ. 2003, 2–7.

  2. “At Parting,” Liahona, May 2011, 114.

  3. “Now Is the Time,” Liahona, Jān. 2002, 68; bar lale Jon 11:25–26; 14:27.

  4. “E Em̧ōj An Jerkak,” Liaona, Eprōl 2010, 16, 28; bar lale Job 14:14; Matu 28:6.

  5. “I Know That My Redeemer Lives!” Liahona, May 2007, 24, 25.

  6. Liahona, Apr. 2003, 7.

Katakin jān Ennaan In

Ālkin kwaļo̧k kout ko jān ennaan eo an Būreejtōn Monson, lale naan in kam̧ool eo me ej kwaļo̧ke kōn meļeļe eo em̧ool an Easter. Komaron̄ kajjitōk ippān ro uwaan baam̧le eo kajjitōk kein: “Ta meļeļe in n̄an kwe bwe juon rikanaan emour eaar kam̧ool kōn m̧ool kein rainin?” Ekōjkan am̧ maron̄ kōjerbali ilo mour eo am̧?” Ļōmņak n̄an kobaik ļo̧k naan in kam̧ool eo am̧.

Thomas Ripere Eo, jen Carl Heinrich Bloch