Bok in Mormon
Kōkajoorļo̧k Ad Tōmak ilo Jisōs Kraist
Bok in Mormon ej karuwaineneik kōj im baam̧le ko ad n̄an dāpij tōmak eo ilo Irooj Jisōs Kraist, im eo ej kwaļo̧k pedped ko me renaaj jipan̄ baam̧le ko ad tōprak.
Kobaik jān katak ko an rikanaan ro ium̧win jet epepen ko, Bok in Mormon kar je n̄an juon tōre tok ālik n̄e jepļaaktok in kii ko an priesthood eo, ippān ļo̧k juon koba eo eļap an im̧ōn Israel, naaj kar kepooj laļ eo n̄an itok eo an Rilo̧mo̧o̧r n̄an laļ in (lale 2 Nipai 25; 27; 3 Nipai 21). Nipai eaar kōmeļeļeik kwojarjar eo an bok eo āinwōt “ainikien juon ej kūr jān bwidej” (2 Nipai 33:13). Moronai eaar kwaļo̧k: “Lo, Ij kōnono n̄an kom̧ āinwōt n̄e kom̧ar pād, im mekarta kom̧ ij jab. A lo, Jisōs Kraist eaar kwaļo̧k kom̧ n̄an eō” (Mormon 8:35).
Bok in Mormon eo kar je n̄an tōre kein ad im raan kane rej itok. Enan̄in juon milien kape ko an Bok in Mormon kar būriini ilo iiō ko 100 im̧aan ālkin Jepļaaktok eo. Menin ekoba 15 kajin ko, juon kabwilōn̄lōn̄ eaar bōk jikin. Ilo iiō ko 50 jet (1930–80), eļōn̄ lo̧k jen 25 milien kape ko rekar būriin ilo 41 kajin ko. Jān tōre eo 30 iiō ko rem̧ootļo̧k, 125 milien bar kape ko an Bok in Mormon kar būriin ilo 107 kajin ko, ekoba Kālōt ko jān Bok in Mormon. Kajoor eo im im̧we eo an Bok in Mormon enaaj wōnm̧aanļo̧k wōt n̄an eddōkļo̧k āinwōt an aelōn̄ in kiin̄ eo an Anij ilo̧k n̄an aolep rilaļ, bwij, lo, im armej.
Taitōļ peij eo, kar je jān Mormon, ej kwaļo̧k meļeļe eo an kōttōpar ko raorōk an bok in. Un eo m̧okta ej kōnono kōn ro bwijin nejin Liai. Un eo āliktata ej “n̄an kareel [aolep armej] bwe Jisōs ej ri Kraist eo, Anij Indeeo” (taitōļ peij eo an Bok in Mormon).
Aorōk n̄an Tōre kein Ad
Etke bar juon kalim̧m̧ur kōn Jisōs Kraist eaorōk n̄an tōre kein ad? Etke Irooj eaar bōk m̧aantak bar juon kam̧ool n̄an kōkajoorļo̧k ennaan ko rekajoor kōn Baibōļ eo?
Jej mour ilo juon iien ejjab āinwōt ko jet. Men ko rej waļo̧k jen ekkatak kōn jaiintiij rej kōm̧m̧an bwe en lōn̄ kein taktō, kein itok-itak, kaenōm̧m̧an, im ineem̧m̧an eo jamin kar ļōmņak kake jān epepen ko im̧aad ļo̧k. Laļ in ej lutōkļo̧k kōn meļeļe im menin kapeel ko, kōkōm̧anm̧anļo̧k jerbal in menmenbwij an baam̧ļe im kwaļo̧k ko̧jpeļ eo bōtaab ebarāinwōt eobrak kōn pija/bok ko renana, ikkure ko kōn pija ko renana, im nana ko jet im karōk ko [me] repād ilo būruwōn armej ro rej kōm̧m̧ani (D&C 89:4). Ilo an tōr jān jon̄an ilo laļ in, jej mour ilo juon tōre ekajoor iiaioļo̧k eo n̄an men ko bwinniid.
Jekjek kein remaron̄, eļan̄n̄e jejab jojo kejparoke, kōm̧ad ak kapo kōj n̄an em̧m̧akūtļo̧k jān pedped ko me rej indeeo im m̧ool eo n̄an kajjojo epepen.
Ke Ikar juon mijinede em̧m̧an ded ilo Europe ilo jinoin 1970 ko, kōm̧ kar jino ekkatak eo am kōn kōmeļeļeik naan eo Bun̄ jān tōmak, kōnke kwojarjar eo an Jisōs Kraist kar pidodo bōke. Ke Iaar rool ļo̧k āinwōt juon mijen būreejtōn 20 iiō tokālik, kōm̧ kar jino ukōt kilen am katakin, kōnke tōmak ilo Jisōs Krasit āinwōt Nejin Anij, eo eaar leļo̧k mour eo An kōn jerawiwi ko ad im kar jerkakpeje ilo raan eo kein kajilu, eaar m̧ōkaj an jako ļo̧k.
Ilo laļ in rainin, iakweļeļ ko an Korior enana, rijum̧ae Kraist eo, ej kōpeļļo̧k lojiln̄ūn:
“Etke kom̧ij pukot juon Kraist? Bwe ejjeļo̧k juon armej emaron̄ jeļā kōn jabdewōt men ej itok.
“Lo, men kein ko kom̧ij ba kanaan … rej imminene ko an ro jemāmi rebwebwe.
“… Kom̧ij jab maron̄ jeļā kōn men ko kom̧ij jab maron̄ loi. …
“… Jabdewōt armej ej jeram̧m̧an ekkar n̄an jeļāļo̧kjeņ eo [an], im … anjo̧ ioon an [make] kajoor” (Alma 30:13–15, 17).
Jej aikuj kapen im katōt tōmak eo ad make ilo Irooj Jisōs Kraist, im jej aikuj jipan̄ ilo kōkajoorļo̧k baam̧le ko ad bwe tōmak in en eddōk ļo̧k ilo būruwōn ajri ro nejid im ajri ro jibwid. Tōmak ilo Jisōs Kraist, n̄e ej liok titbok ilo jetōb ko ad, ej bōktok oktak em̧ool, im kōn jeļā eo an make ej itok ukweļo̧k, rikaļoor m̧ool, kabwilōn̄lōn̄ ko, menin letok ko ilo jetōb, im niknik ilo jim̧we. Menin ej juon m̧ōttan eo eaorōk kōn mijen eo ekwojarjar an Bok in Mormon.
Āinwōt juon kar mijinede edik, eaar wōr juon Aō bwebwenato ekaitoktok limo ippān juon rūkaki. Eaar jiron̄ eō bwe ejjab maron̄ kar bōk Bok in Mormon eo kōnke elap an kōnono kōn Jisōs Kraist, kōjerbal etan im m̧akūtkūt ko ilo mour eo An buki iiō ko m̧okta jān ļotak eo An. Eaar lo alikkar in ejjab juon men ejejjet jān jon̄ak eo an Kalim̧m̧ur M̧okta me ej kwaļo̧k kōn Rilo̧mo̧o̧r eo eļap an oktak.
N̄an n̄a enaan eo ealikkar kōn Jisōs Kraist ej kajoor eo an Bok in Mormon. Aaet, jej aikuj bōk juon kam̧ool ilo jetōb bwe bok in ej an Anij. Ak ilo iien eo bōke, kōttōpar ko an Kraist, m̧ool eo kōn mour im Jerkakpeje eo An, alikkar eo kōn ta eo emenin aikuj n̄an ļoor E im bōk mour indeeo Ippān rej kalikkar kōkalle ko im̧aad.
Ko̧jpeļ eo an Jisōs Kraist
Jipan̄ jān kajoor eo an Jetōb Kwojarjar, riit im kejokļo̧kijen kōn kwaļo̧k eo eļap an Jisōs Kraist ilo Bok in Mormon ebōk tok juon kam̧ool kōn m̧ool ko aer. Ij iakwe riiti Bok in Mormon eo kwojkwoj ioon kajoor in katak ko an Kraist: Visōn eo an Nipai kōn wōjke in mour eo, ippān enjel eo ej kajjitōk, “Kwojeļā ke ettā eo an Anij?” (1 Nipai 11:16); naan in kam̧ool eo an Liai “lo̧mo̧r ej itok ilo im kōn Messaia Ekwojarjar; bwe E eobrak kōn jouj im m̧ool (2 Nipai 2:6), Kakobaba eo an Jekab bwe E ej “ri lale kōjām eo ej … im E jab kōjerbal jabdewōt ri karejeran ijo” (2 Nipai 9:41).
Innām n̄e jej loor katak ko an Kiin̄ Benjamin ilo an katakin kōj kōn em̧m̧an ko an ro ri karejeran, kōn ennaan eo an ekajoor bwe “ejjeļo̧k naaj bar āt letok ak jabdewōt bar iaļ ak wāween lomo̧r emaron̄ itok n̄an ro nejin armej, ilo wōt im kōn wōt etan Kraist” (Mosaia 3:17).
Ejjab to jej pād ippān Abinadi, epojak in leļo̧k mour eo an n̄an ta eo ej tōmak:
“A ewōr jerkakpeje, kōn menin lōb ejjeļo̧k an anjo̧, im kein ire an mej ej oran̄ļo̧k ilo Kraist.
“E ej meram eo im mour eo an laļ; aaet, meram eo ejjeļo̧k jem̧ļo̧kin, eo emaron̄ jab tinaad” (Mosaia 16: 8-9).
Alma ej bōktok aiboojoj in katak ko an Pinmuur, jim̧we, im jouj eo an mour: “Karōk in tiriam̧o kake ejjamin kar kūrm̧ool ijjeļo̧kin n̄e pinmuur eo en kar jab kōm̧m̧an; kōn menin, Anij make Eaar pinmuur kōn jerawiwi ko an laļ, n̄an kakūrm̧ool karōk in tiriam̧o kake, n̄an medek akweļap ko an kien, bwe Anij en maron̄ wānōk, Anij in jim̧we, im Anij in tiriam̧o kake barāinwōt” (Alma 42:15).
Innām jej itok n̄an loļo̧k eo ekabwilōn̄lōn̄ an Rilo̧mo̧o̧r eo n̄an ro nejin Liai. Jej barāinwōt en̄jake iakwe eo An, tiriam̧o kake eo An, katak ko An, naan in kam̧ool eo An make:
“En̄in ej gospel eo Iaar lewōj n̄an kom̧—bwe Iaar itok n̄an laļ in n̄an kōm̧m̧an ankilaan Jema. …
“Im Jema eaar jilkintok Eō bwe In maron̄ toto ioon debāāl; im ālkin kar kotak Eō ioon debāāl, bwe In maron̄ kan̄ōltok armej otemjej n̄an Eō, bwe āinwōt kar kotak Eō jān armej em̧ool āindein Jema enaaj kotak armej; n̄an jutak im̧aō, n̄an ekajet kōn jerbal ko aer, eļan̄n̄e rem̧m̧an ak eļan̄n̄e re nana—(3 Nipai 27:13–14).
Āliktata jabeneneej ko an Mormon im Moronai: “Kom̧in jeļā bwe kom̧ij aikuj … ukweļo̧k jān aolep jerawiwi ko im nana ko ami, im leke Jisōs Kraist, bwe E ej Nejin Anij” (Mormon 7:5). “Aaet, itok n̄an Kraist, im weppen ilo E, im karmejete kom̧ make jān aolep men ko rej jab em̧m̧an, im eļan̄n̄e im iakwe Anij kōn aolepen am̧ maron̄, ļōmņak im kajoor, innām An jouj enaaj bwe n̄an kom̧, bwe jān An jouj kom̧ maron̄ weppān ilo Kraist” (Moroni 10:32).
Ennaan eo an (Bok in Mormon) ej waļo̧k ilo Bwebwenato ko an Baam̧le ko
Naan in kam̧ool ilo jetōb ekajoor, ekareel bwe Jisōs Kraist ej Messaia eo em̧ool kar kalim̧m̧ur kake—eo kar kapiti Nejin Anij, kar jilkintok n̄an laļ in n̄an bōktok jerkakpeje eo an aolep armej im karreo eo ilo jetōb an ro renaaj ukweļo̧k im ļoor E—ej pād ilowaan wōt bwebwenato eo an baam̧le ko.
Bok in Mormon ej ijjino kōn juon baam̧le, juon jemen im jinen, ļaddik im leddik ro rej nejier rej ron̄jake m̧adenļo̧k eo an rikanaan eo jemeer n̄an door jeram̧m̧an ko aer ilo mour in itulikier im ļoor kapilōk eo an Irooj. Bwebwenato ko an bok in robrak kōn ro jinen im jemen rej pukōt n̄an katakin ajri ro nejier kalim̧m̧ur im kōjatdikdik eo kōn Jisōs Kraist. Ilo juon iien Iaar kwaļo̧k jān alen ko an juon baj kapilōk jān ro jemen n̄an ļaddik ro nejier—kar totaļ in 52 peij ko. Ilo Bok in Mormon, jej lo ekōjkan an ro jinen im jemen kar katakin tōmak ilo Kraist im pokake kien ko an Anij n̄an jim̧or ajri ro me raar pokake jān ke raar iddik wōt im n̄an ajri ro me raar lo iaļ eo aer—jet iien ilo ejja baam̧ļe eo wōt. Ej juon katak n̄an tōre in ad, n̄an ajri ro nejid, n̄an baam̧le ko ad.
Jerbal ko rej an wōt kōrā im leddik ro rej n̄an jet ļapļo̧k ko jab kōtmene kaki, āinwōt an jab oktak ilo jeje ko etto. Bōtaab kalimjōk eļapļo̧k jān alikkar in, jej lo kareel eo im niknik eo indeeo aer. Jej kaorōk men dikdik ko raorōk me ej kōnono kōn kōrā ro im m̧am̧a ro, āinwōt n̄e en̄jake ko aer rej kōmeļeļeik āinwōt “pidodo im erreo im kwojarjar im̧aan Anij” (Jekab 2:7) ak ke Hilamōn ej kōmeļeļeik em̧m̧an ko an kumi in tariņae ro rem̧m̧an ded ilo an kar im̧we jān ro jineer rejim̧we:
“Raar pokake im kōjparok n̄an kōm̧m̧an naan in jiron̄ otemjeļo̧k ilo jejjet; aaet, im em̧ool ekkar n̄an tōmak eo aer eaar waļo̧k n̄an er; im Iaar kememej naan ko raar ba n̄an eō bwe ro jineer raar katakin er. …
“Kiiō en̄in ej tōmak eo an rein ro Iaar kōnono kake er; rej inono, im ļōmņak ko aer re pen, im rej likūt aer leke ilo Anij iien otmejej. …
“… Raar ekkatak jān ro jineer, bwe eļan̄n̄e re ban pere, Anij enaaj lo̧mo̧ren er.
“Raar kōmeļeļeik n̄an eō naan ko an ro jineer, im ba: Kōmij jab pere ke ro jinnām raar jeļā” (Alma 57:21, 27; 56:47–48).
Ikōņaan karuwainenei kom̧ n̄an kejōkļo̧kjen kōn kajjitōk kein n̄an jipan̄ kom̧ keidi katak ko an Bok in Mormon n̄an baam̧le eo am̧:
-
Eoon ta ko ilo Bok in Mormon rej katakin kōj bwe ajri ro rej aikuj in loe m̧ool eo im jim̧we ilo tōmak eo an ro jiner im jemeir?
-
Ta kapilōk eo baba ro ilo Bok in Mormon rekar leļo̧k n̄an ļaddik ro nejier me jemaron̄ kōņaan kwaļo̧k ippān ro nejid?
-
Ta eo jej katak kōn kijejeto ko ad ippān ajri ro nejid n̄e rejjab pokake?
-
Ekōjkan an ro jinen im jemen ilo Bok in Mormon kwaļo̧k tōmak ko aer remwilaļ n̄an ajri ro nejier?
-
Ta eo jej katak kōn tōmak āinwōt an emakūt jān juon epepen n̄an bar eo juon?
Ejjeļo̧k men eļapļo̧k an aorōk n̄an kwaļo̧k ippān ro jet ijjeļo̧kin tōmak ilo Irooj Jisōs Kraist. Ej bōktok meļeļe n̄an apan̄ ko an mour in, m̧ōņōņō ioļapļap in apan̄, im mour indeeo ilo laļ eo ej itok.
Eļōn̄ kareel ko an laļ in me rej kanōk kōj im baam̧le ko ad jān tōm̧ak in ekanooj in aorōk. Bok in Mormon ej karuwaineneik kōj im baam̧le ko ad n̄an dāpij wōt tōmak eo ilo Irooj Jisō Kraist, im ej kwaļo̧k pedped ko me renaaj jipan̄ baam̧le ko ad tōprak.
Ij kam̧ool bwe Bok in Mormon ej m̧ool im bwe ilo lukkuun m̧ool kar ļeļo̧k n̄an Rikanaan Joseph Smith jen enjeļ Moronai, ium̧win tōl eo an Irooj Jisōs Kraist. Ej n̄an tōre in ad, n̄an ajri ro nejid im ajri ro jibūd. Ilo ad kōpeļļo̧k kajjojo raan kōn tōmak, Ij kalim̧m̧ur bwe Jetōb eo an Irooj enaaj pād iood im baam̧le ko ad naaj jeram̧m̧an ejjeļo̧k jem̧ļo̧kin.
Vision eo an Nipai
Naan in Kam̧ool an Liai
Katak an Kiin̄ Benjamin
Kam̧ool eo an Abinadai
Waļo̧ļo̧k eo an Jisōs Kraist
Kajjitōk eo āliktata an Mormon im Moronai
Pija in Kraist, jān Heinrich Hofmann, kōn jipan̄ eo an C. Harrison Conroy Co.
Korihor Ej Jelm̧ae Alma, jen Robert T. Barrett
Visiōn eo an Nipai, jān Clark Kelley Price; melele jān Liaona jān Arnold Friberg © 1951 IRI; King Benjamin’s Address jān Jeremy Winborg, maron̄ jab kapeiki; meļeļe jān Abinadi ej Waļo̧k im̧ann Kiin̄ Noa, jān Arnold Friberg © 1951; © 1951; Bwe Kom̧win Kemejmej Eō Iien Otemjeļo̧k, jān Gary Kapp © 1998, jab maron̄ kapeiki; Mormon ej Leļo̧k Juon Iakweiakwe n̄an Juon Laļ Ekajoor, jān Arnold Friberg © 1951 IRI
Liai im armej ro An rej Tōkeakļo̧k ilo Āne in Kallim̧ur, jān Arnold Friberg