2011
Kajjitōk ko Remakijkij kōn Bok in Mormon
Oktoba 2011


Kajjitōk ko Remakijkij kōn Bok in Mormon

Men̄e jān ro m̧ōttad, baam̧ļe, ro em̧ool aer itok limoier, ak ro rej jum̧ae, jej aolep bōk kajjitōk ko kōn Bok in Mormon. Errein rej jet iaan uwaak ko.

Ta eo Bok in Mormon, im ekōjkan keidi ļo̧k n̄an Baibōļ eo?

Bok in Mormon ej juon bok in jeje ko rekwojarjar āinļo̧k wōt Baibōļ eo. Ej bar Juon Kalim̧m̧ur Kōn Jisōs Kraist.1 Ekkā an Baibōļ eo ekōnono kōn mour ko im katak ko an Israel eo m̧okta. Bok in Mormon epād ie jeje ko an jet kumi ko me raar etal n̄an Amedka, ekoba juon baam̧le eo eaar em̧m̧akūt jān Jerusalem ilo 600 B.C. Armej rein raar barāinwōt bwijjin im̧ōn Israel. Kōn menin Baibōļ im Bok in Mormon raar jeje jān armej ro rej juon wōt bōtaab ilo m̧ōttan ko roktak an laļ in.

Āinļo̧k wōt Baibōļ, Bok in Mormon eļapļo̧k jān juon ļo̧k in bwebwenato. Epād ie tarļļep in ko̧jpeļ eo an Jisōs Kraist (lale D&C 20:9): en̄jake ko, katak ko, im kanaan ko me rej kam̧ool kōn Anij Jemen im Nejin, Jisōs Kraist.

Rikanaan Joseph Smith eaar kōmeļeļeik bwe Bok in Mormon “ej jiron̄ kōj bwe ad Rilo̧mo̧o̧r eaar kōm̧m̧ane loļo̧k eo An n̄an laļ in [America] ālkin jerkakpeje eo An; bwe En kajutak Ko̧jpeļ eo ijin ilo aolepen tallep eo an, im jeram̧m̧an eo an, im kajoor eo, im kōjeram̧man eo; bwe eaar wōr aer Rijilōk, Rikanaan, Pastor, Rūkaki, im Evangelist, ejja laajrak eo wōt, ejja priesthood eo wōt, ejja kain̄i ko wōt, menin letok ko, kajoor ko, im kōjeram̧m̧an ko, āinwōt kar lem̧ōņōņō kaki ilo laļ eo m̧okta; … bwe rikanaan ro aer āliktata me raar pād ibwilijier kar kakien er n̄an je kanaan ko aer, bwebwenato ko im ko jet aer ilo tukadu in, im n̄an ņooji ilo buļōn laļ in, im bwe enaaj waļok tok im juon wōt ippān Baibōļ eo n̄an kōtōprak kōttōpar eo an Anij ilo raan kein.”2

Membōr ro an Kabun̄ in rej ekkatak jim̧or Baibōļ eo im Bok in Mormon. Ilo m̧ool, ruo iaan iiō ko emen ilo laajrak in kein katak ko ad ilo Jabōt Jikuuļ rej ilo̧k n̄an ekkatak kōn Baibōļ eo. (N̄an meļeļe ko reļļap ļo̧k kōn unin kōnono in, lale peij 16, 24, im 53 ilo bok in.)

Wōn eo eaar je Bok in Mormon?

Rikanaan ro etto, āinwōt Nipai, Jekab, Mormon, im ļaddik eo nejin Mormon Moronai, rekar rijeje ro reļlap. Mormon eaar aiin im je tukadu in ļo̧o̧k ko kar kejparoki jān rikanaan ro kōn bwebwenato eo aer, kanaan ko, im katak ko. Eaar barāinwōt kobaik jet iaan en̄jake ko an make. Mormon eaar je ļo̧o̧k eo an ioon jiit in māāl—ekōļar gold—eo emakijkij ņa etan pileij gold ko.

Ālkin mej eo an Mormon, Moronai eaar kadedeļo̧k ļo̧o̧k eo im kar kalbwini ilo juon toļ n̄an kejparoki n̄an tōre in ad. Ilo 1823 Moronai eaar waļo̧k āinwōt juon enjeļ n̄an Joseph Smith im kar kwaļo̧k n̄an e ia eo ļo̧o̧k eo kar kalbwini ie. Emen iiō ko tokālik Joseph kar kōtļo̧k bwe en bōk ļo̧o̧k ko. Eaar “ukōte ļo̧o̧k eo kōn menin letok im kajoor eo an Anij” n̄an kajin In̄lij jān kajin eo etto me eaar jeje ie.3 Innām Eaar būriini im kar letok letak Bok in Mormon. (N̄an meļeļe ko reļapļok kōn unin kōnono in, lale peij 22 im 72 ilo bok in.)

Ta eaar waļo̧k n̄an ļo̧o̧k eo ukook jāne—gold pileij ko?

Joseph Smith eaar bōk pileij ko ilo Jeptemba 1827 raar pād ippān m̧ae spring in 1829. Ke eaar jei bwebwenato eo an ilo 1838, eaar kōmeļeleik ta eo eaar waļo̧k n̄an pileij ko: “Ekkar n̄an koņ eo, rikoj meļā in lan̄ eo [Moronai] eaar kajjitōki, Iaar bōkļo̧ki n̄an e; im eaar būki ilo kejparok eo an n̄an rainin, āinwōt Māe ruo, juon taujin ralitōk buki im jiln̄uul-ralitōk.” (Joseph Smith—History 1:60).

Wōn ro jet raar loe gold pileij ko?

Ippān ļo̧k Joseph Smith, jet bar em̧m̧aan im kōrā ro raar loi pileij ko im kam̧ool kōn waļo̧k eo aer. Jon̄ouljuon em̧m̧aan ro eļaptata, jeļā kake er āinwōt Rikam̧ool ro Jilu im Rikam̧ool ro Ralitōk, kar ļo̧o̧ki naan in kam̧ool ko aer kōn aer kar lo piliej ko im, ilo jekjek eo an Rikam̧ool ro Ralitōk, kōn aer jibwi pileij ko. Naan in kam̧ool ko aer repād ilo jinoin kajjojo kape in Bok in Mormon.

Em̧m̧aan rein rej jutak āinwōt rikam̧ool ro rekajoor kōn Bok in Mormon, bōlen aaet eļapļo̧k kōnke jet iaer raar “ilo juon tōre dike Joseph,” Eļtōr Jeffrey R. Holland an Doulul eo an Jōn̄oulruo Rijilōk ro ej kwaļo̧k m̧ool. Mekarta, raar “kam̧ool n̄an n̄e remej bwe em̧ōj aer kar lo juon enjeļ im eaar leļo̧k pileij ko. ‘Raar kwaļo̧ki n̄an kōm kōn kajoor eo an Anij, im ejjab an armej,’ raar kwaļo̧k. ‘Kōn menin kōm jeļā kōn juon kam̧ool bwe jerbal eo ej m̧ool.’”4

Ewōr ke kein kam̧ool eo loe bwe Bok in Mormon ej m̧ool?

Men̄e jejjab likūt ad tōmak ioon kein kam̧ool ko loi, ewōr katak kōn kajin, bwebwenato, im ekkatak ko kōn men ko ipeļaakid jān etto kōn Bok in Mormon. N̄an waanjon̄ak, ļōmņak ko kōn jeje ilo pileij māāl ko kar juon iien kar kajirere kake, bōtaab ilo iiō ko jem̧aanļo̧k elōn̄ waanjon̄ak ko kōn jeje ko rekwojarjar ioon pileij māāl ko—jet kar ņooji ilo bo̧o̧k dekā ko—em̧ōj loi.

Ekkatak ko kōn kajin eaar kile bwe naan ko im jabōn kōnnaan ko ilo Bok in Mormon ekōjak ron̄jaki ilo kajin In̄lij bōtaab rejejjet ilo kajin Hibru im kajin ko repaake me kar jeļā kaki jān armej ro an Bok in Mormon—kajin ko Joseph Smith eo edik eaar jab jeļā kaki.

Bōtaab kein kam̧ool kein rejjab ta eo ej kareel kōj kōn tarļļep in m̧ool eo an Bok in Mormon. Ej kōn aorōk in tōmak im m̧adenļo̧k an juon make.

Ekōjkan Aō jeļā bwe Bok in Mormon ej m̧ool?

Wāween eo em̧ool tata n̄an jeļā kōn kwe make ej kōn kajoor eo an Jetōb Kwojarjar. Jepta eo āliktata ilo Bok in Mormon ej kūr jabdewōt eo ej riiti, kejōkļo̧kjeņ kake, im ilo lukkuun m̧ool kōņaan jeļā eļan̄n̄e ej m̧ool n̄an kajjitōk ippān Jemed Ilan̄ ilo etan Jisōs Kraist. Ro me rej bōk kepaak in naaj jeļā kōn kajoor eo an Jetōb Kwojarjar bwe bok eo ej m̧ool (lale Moronai 10:3–5). Milien membōr ro an Kabun̄ in em̧ōj aer kar jar kake im jeļā kōn kam̧ool eo an Jetōb Kwojarjar bwe Bok in Mormon ej m̧ool. (N̄an meļeļe ko reļļapļo̧k lale peij 4, 60, im 18 ilo bok in.)

Iaar tarpok kōn Revelesōn 22:18–19, eo ej jiron̄ kōj n̄an jab kobaik jabdewōt n̄an naan eo an Anij.

Juon iaan tōmak ko raorōk ej bwe Anij eaar iien otemjej kwaļok Ankilaan n̄an ajri ro Nejin ioon laļ in im enaaj iien otemjej. Jej tōmak bwe Baibōļ eo ej naan an Anij bōtaab jab tōmak epād ie aolep m̧adenļo̧k ko me Anij eaar litok ak enaaj liļo̧k n̄an rikanaan ro An. Em̧ool rainin Ej wōnm̧aanļok wōt n̄an kwaļo̧k Ankilaan kōn rikanaan ro im rijilōk ro rej mour, pedped eo an Kabun̄ eo an Jisōs Kraist im Armej ro Rekwojarjar ilo Raan-kein Āliktata (lale Epesōs 2:20).

Ke Rijilōk John eaar je bok in Revelesōn, eaar jab bok eo āliktata an Baibōļ. Kallim̧ur M̧okta im Kallim̧ur Ekāāl raar jab kobaik ilo juon wōt bok in jeje ko rekwojarjar—kiiō ņa etan Baibōļ—m̧ae epeepen eo kein kajilu A.D.

Ilo ejja wāween in wōt, Duteronomi 4:2 ej jiron̄ kōj n̄an jab kobaikļo̧k n̄an naan ko an Moses. Aaet, eoon in, ilo jinoin Kalim̧m̧ur M̧okta, ejjab kajetokjān aolepen Baibōļ eo. Moses ak John jim̧or remaron̄ in kar kōnono kōn ukōt juon bok eo me ejjan̄in de waļo̧k; ijello̧kin raar kakkōl kōj ņae ukōt katak ko rem̧ool an ko̧jpeļ eo.

Bok in Mormon, eo epād ie tallep in ko̧jpeļ eo, ejjab ukōt naan eo an Anij bōtaab ej bar kapenļo̧k. (N̄an meļeļe ko reļļapļo̧k, lale peij 24 im 39 ilo ennaan in.)

Em̧ōj Aō kar ron̄ bwe oktak ko em̧ōj aer kar kōm̧m̧an n̄an Bok in Mormon jān ke eaar jinoin tata būriin. Ta eo kar ukōte im etke?

Uwaak eo n̄an kajjitōk in ej pedped wōt ioon meļeļe jidik kōn ukook eo an Bok in Mormon im jerbal in būriin eo.

1. Ke Joseph Smith eaar ukōt gold pileij ko kōn kajoor eo an Anij, eaar ba naan ko n̄an juon rijeje. Emakijkij an rijeje eo kar kōm̧m̧an bōd in jipeeļ im gramma ko ilo aer je naan ko an. N̄an waanjon̄ak, ilo 1 Nipai 7:20 naan ko “raar būrom̧ōj (were sorrowful)” kar je āinwōt “ware sarraful.” Rijeje ro raar jab tijem̧ļo̧k, bōtaab jipeeļ eo kar jan̄in kar kōm̧m̧an bwe en juon wōt ilo tōre eo.

2. Bok eo kar je kōn pād m̧okta an ukook eo kar kapeiki n̄an kōm̧m̧ane juon bok kāāl kar je n̄an an būriin. Ilo iien in, jet bōd in jipeeļ im gramma raar kajim̧wi, im punctuation kar kobaik tok. Bōtaab jet bōd kāāl raar barāinwōt waļo̧k ilo an naan ko kar bōd kapeiki.

3. Ribūriin eo eaar kōm̧m̧ane ijo em̧m̧an emaron̄e n̄an kajejjet kilen taibi. Mekarta, jet iien eaar kōm̧m̧ane wōt jet bōd ko. N̄an waanjon̄ak, ilo Alma 57:25 eaar bōd an riiti naan eo “lan̄lōn̄ (joy) im je “foes.”

4. Rikanaan Joseph Smith eaar kanooj lale ilo kape ko jilu im̧aan tata an Bok in Mormon, im eaar wōnm̧aanļo̧k wōt n̄an jipan̄ kōm̧m̧ani kajjim̧we ko im okoktak ko. Bōtaab jet bōd ko raar jab loi m̧ae kape ko tok ālik. Ilo 1981 juon bōd an ribūriin eo ilo Alma 16:5 āliktata kar kajim̧we, oktak eo “whether” n̄an “whither (ia)”—kōm̧m̧an bwe en jejjet n̄an bok eo m̧oktata āinwōt an Rikanaan eo kar ukōte jān gold pileij ko.

5. Oktak ko jet ekoba jepta kāāl im jem̧ļo̧kin eoon ko im footnote ko ippān eoon in jipan̄ ko.

Leto letak juon Kape

Jekdoon kajjitōk ta armej rej kajjitōk kōn Bok in Mormon, bok eo make ej ribōbrae eo em̧m̧an tata. Komaron̄ kam̧ool kōn bok eo, leto letak juon kape, im karuwainenetok ro jet n̄an jar kake kōn er make. Eļan̄n̄e juon armej ewōr ippān bōro em̧ool im m̧ool in ikirelel n̄an jeļā eļan̄n̄e bok eo ej m̧ool, Irooj “enaaj kwaļo̧k m̧ool in n̄an kom̧, jān kajoor eo an Jetōb Kwojarjar” (Moronai 10:4).

Kakememej ko

  1. Lale, n̄an waanjon̄ak, Boyd K. Packer, “The Book of Mormon: Another Testament of Jesus Christ,” Liahona, Jan. 2002, 71.

  2. Katak ko an Būreejtōn ro an Kabun̄in: Joseph Smith (2007), 64

  3. Teachings: Joseph Smith, 60.

  4. Jeffrey R. Holland, “Safety for the Soul,” Liahona, Nob. 2009, 90.

Pija ko jen Robert Casey