2011
Juon Naan in Kam̧ool, Juon Bujen, im juon Kam̧ool
Oktoba 2011


Juon Naan in Kam̧ool, Juon Bujen, im juon Kam̧ool

Ij kwaļo̧k aō kam̧ool bwe Bok in Mormon ej juon bujen kāāl, juon kallim̧ur ekāāl jān Laļ eo Ekāal n̄an aolepen laļ in.

Pija
Elder Jeffrey R. Holland

Kapen ko rekwojarjar ewōr ippa ikkijien Rilo̧mo̧or eo im Kabun̄ eo An kar bar jepļaaktok kar m̧oktata itok n̄an eō āinwōt juon likao ke Iaar riiti Bok in Mormon. Eaar ilo tōre eo kar riiti ļo̧o̧k in ekwojarjar me Iaar en̄ajke—alen im bar alen—unojdikdik eo ban kowaane an Jetōb Kwojarjar kwaļo̧k n̄an eō m̧ool eo.

Riiti bok eo eaar jinoin meram eo aō. Eaar unin kam̧ool eo aō ilo jetōb moktata bwe Anij emour, bwe E ej Jema Ilan̄, im bwe karōk in lem̧ōņōņō eo kar kōm̧m̧ane n̄an indeeo ejjeļo̧k jem̧ļo̧k n̄an eō. Eaar tōl eō n̄an iakwe Baibōļ eo Ekwojarjar im bok in jeje ko rekwojarjar jet an Kabun̄ in. Eaar katakin eō n̄an iakwe Irooj Jisōs Kraist, n̄an kalimjōk meanwōd jouj eo An, im n̄an ļōmņak kōn jouj im kwojarjar kōn en̄taan in pimuur eo An.

Kōnke Iaar katak kōn n̄a make bwe Bok in Mormon ej juon kam̧ool eo em̧ool—bar juon kalim̧m̧ur im juon bujen kāāl—bwe Jisōs ej RiKraist eo, Iaar barāinwōt katak bwe Joseph Smith eaar im ej juon rikanaan an Anij. Āinwōt eo ļōļļap eo jim̧m̧an-jim̧m̧an-jim̧m̧an jim̧m̧aō kar ba ilo raan ko im̧aan tata an Jepļaaktok eo, “Ejjeļo̧k juon armej nana maron̄ je kain bok in āinwōt in; im ejjeļo̧k armej em̧m̧an enaaj kar je, ijello̧kin wōt n̄e eaar m̧ool im kar kappeik jān Anij n̄an kōm̧m̧ane.”1

N̄an ļōke ko aō im̧aan tata em̧ōj an kobaik aolep iien ko reļļap meļeļeier im kōkaļļe ko rekwojarjar me raan eo ej letok meļeļe ko rem̧wilaļ n̄an mour eo aō, unin mour e aō, im juon pedped epen n̄an naan in kam̧ool eo aō.

Kiiō, Iaar jab jerak ippān ļeo jein Jared. Iaar jab ron̄ an Kiin̄ Benjamin kōnono ilo an kar kwaļo̧k katak eo an. Iaar jab pād ilubwilijin RiNipai ro me raar an̄ūr kijen ko an jerkakpeje Irooj, ak Iaar jab jan̄ ippān Mormon im Moronai kōn kakkure eo an jukjuk in pād eo aer. Bōtaab naan in kam̧ool eo aō kōn ļo̧o̧k in im aenōm̧m̧an eo ej bōktok n̄an būruwōn armej—kar letok n̄an eō kōn unojdikdik eo an Jetōb Kwojarjar āinwōt an kar lewaj n̄an kom̧—ej aorōk in wōt im alikkar in wōt āinwōt eo aer. Ij kam̧ool kōn bok in āinwōt an m̧ool āinwōt eļan̄n̄e Iaar pād, ippān Rikam̧ool ro Jilu, kar lo enjeļ Moronai ak, ippān Rikam̧ool ro Ralitōk, kar jibwe pileij gold ko.

Ij etal wōt n̄an kam̧ool bwe ejjeļo̧k juon iaad emaron̄ itok n̄an tōmak elikieo ilo jerbal eo ilo raan kein āliktata im kōn menin lo tallep in aenōm̧m̧an eo im kaenōm̧m̧an eo ilo tōre kein ad m̧ae iien ej dāpij kwojarjar eo an Bok in Mormon im Irooj Jisōs Kraist, eo im ej kam̧ool kake. Āinwōt an Mormon kar ba n̄an Moronai ilo juon iaan iien ko aer eļap kajjitōk, kōn menin Ij ba ilo iien ko ad eļap kajjitōk ie: “Kwon tiljek ilo Kraist. … Im bwe jouj an Anij Jemān, eo an tron euteej ilo lan̄ ko, im ad Irooj Jisōs Kraist, eo ej jijet ianbwijmaron̄ in pein An kajoor … pād, im juk ilo bwe indeeo” (Moronai 9:25–26).

Bok in Mormon ej en̄jake eo ekwojarjar an Kraist kōn bujen eo eļap āliktata ippān aolep armej. Ej juon bujen kāāl, juon kalim̧m̧ur jān Laļ eo Ekāāl n̄an aolepen laļ in. Meram eo Ij etetal kake ej An meram. An meanwōd im utiej pōtata ej tōl eō—im kwe—ilo ad kam̧ool kōn E n̄an laļ in.

Kakeememej

  1. George Cannon, kar kouti ilo “The Twelve Apostles,” ilo Andrew Jenson, ed., The Historical Record, 6:175.

Baibōl eo im Bok in Mormon rej Kam̧ool kōn Kraist, jān Greg K. Olsen