Juon Kijeek Etile Eō
Raan eo eaar katak riit ej barāinwōt raan eo Eduardo eaar bōk juon naan in kam̧ool kōn Bok in Mormon im kajoor eo an.
“Jimma ekijon̄ ba, ‘Eļan̄n̄e jej kōņaan kōkm̧anm̧anļo̧k kōj, jej aikukj katak riit,’” Eduardo Contreras ej ba. “Jim̧m̧a eaar jim̧we.”
N̄an Eduardo, ijowōtke, katak riit ebōk iien aitok. Āinwōt juon iaan ajri ro ļalem lale er jān juon jinen eo emej ļeo pāleen ilo bukōn in Córdoba, Argentina, eaar joļo̧k an jikuuļ ke eaar ralitōk an iiō im ilo̧k in jerbal n̄an jipan̄ kake baam̧le eo an.
“Kōm kar lukkuun jerata,” eaar ba. N̄an jipan̄ tōpar jem̧ļo̧k ko, Eduardo eaar kōrapōlpōl juuj, kōm̧m̧an pirōk, totak pitoto, wia kake nuujpeba, im jerbal ilo jerbal ko rekadu kitier m̧ae iien, āinwōt juon likao, eaar lo juon an lukkuun jerbal ippān kien eo an jikin bukōn eo.
Ilo an iiō ko eļļāļo̧k, Eduardo eaar m̧are im jino juon an make baam̧le. Ilo tōre eo enan̄in aolepen ajri ro nejin ļalem raar jino em̧m̧akūt jān m̧weo, ejjan̄in kar maron̄ riit im emaron̄ jidik wōt an katak ekōjkan. Ekar oktak juon raan ke eaar lukarkare jet ļaddik in jikin eo ro rekar kaktōtōik ruo mijinede ro an Armej Ro Rekwojarjar ilo Raan kein Āliktata itum̧aan in m̧weo im̧ōn. Eaar karuwaineneik mijinede ro, im ejjab etto e im lieo pāleen, María rekar jino katak.
“Ekar pen Aō meļeļe jabdewōt men rekar ba kōnke edik aer jeļā kōnono kajin Spanish,” Eduardo ej ba, “bōtaab rekar kwaļo̧k juon bok jidikdik me ewōr pija in Rilo̧mo̧o̧r im kōn Rikanaan Joseph Smith ilo Bukin Wōjke ko Rekwojarjar. Iaar ļōmņak pija ko rekar kwaļo̧ki im men ko raar katakin kōm raar aiboojoj.”
Ejjab to mijinede rein raar bōk jikier jān ro jet, ekoba juon eo ej kōnono kajin Spanish. Eduardo im María, ro eaar mej juon nejier leddik jidikdik jet iiō ko im̧aanļo̧k, kar im̧we kōn pija eo an Kabun̄ in Families Are Forever. Er, ippān ļaddik eo nejier ediktata, Osvaldo, ejjab to raar peptaij.
Kōn peptaij eo an Eduardo ilo 1987 eaar itok juon kōņaan n̄an kōkajoorļo̧k naan in kam̧ool eo an kōn riit Bok in Mormon. “Ekōjkan Aō katak riit?”eaar kajjitōk ippān lieo pāleen. María eaar jiron̄ e n̄an lale lōta ko, kobaik er ippān doon ilo ļōmņak eo an, kajjieon̄ ba etan naan ko, innām kajjeon̄ kōļap ainikein riti. Kōn kamminene, eaar kam̧oole n̄an e, enaaj kar āliktata katak n̄an riit.
Eduardo, ilo tōre eo 45, kar jeļā ba elōn̄ lōta ko, bōtaab ejjan̄in kar kajjieon̄ in riit jān ke eaar kam̧ōj an jikuuļ epaakeļo̧k en̄oul iiō ko im̧aanļo̧k.
Iaar En̄jake Juon Kijeek
Kōn jar ilo buruwōn, Eduardo eaar jijet ilo juon raan ebwil ilo jōm̧m̧ar ilo juon jikin ellor ilomeļan eo tulikin m̧weo im̧ōn. “Ijo,” eaar ba, “Iaar kije ilo ļōmņak n̄an kajjieon̄.”
María eaar ba bwe ejjāmin kar naaj jeļā ta eo eaar waļo̧k tok ālik. Ke eaar jerbal ilo jikin kōmat m̧ōn̄ā eo, eaar pād illo̧k ron̄jake ilo an Eduardo kar kajjieon̄ n̄an ba lōta ko im naan ko. “Ejjab to Iaar ron̄ an m̧ōkaj an kōnono,” liin ej ba. “Iaar ron̄jake im kile bwe ekar pidodo an—riit. Edikļo̧k jān jimettan awa eaar eļļā ļo̧k, im eaar riit!”
Eduardo eaar lukkuun mootļo̧k an ilo an kajjieon̄ jon̄an eaar jab kile bwe eaar riit. Bōtaab ke eaar riit, ej kememej, “Iaar en̄jake juon okemeņeņ ilowaō.” Kar mijak im bwilōn̄, Eduardo eaar kūr lio pāleen, “Mami, ta in ej waļo̧k n̄an eō?”
“Ej Jetōb eo an Irooj,” María eaar uwaak. “Epidodo an riit!”
Ilo an kemejmej en̄jake eo, María ej ba, “Ekar juon men eo kōm̧ij jab maron̄ kōjekdoon e.”
Eduardo ej kakkobaba, “Raan eo Iaar katak riit ej barāinwōt raan eo Iaar bōk naan in kam̧ool eo aō kōn Bok in Mormon.”
Jān tōre eo m̧aantak, Eduardo eaar jino ruj ilo 4:00 jibbon̄ n̄an riiti Bok in Mormon m̧okta jān an etaļ n̄an jerbal. Innām eaar riit Doctrine im Covenants, ālkin Baibōļ eo. Juon ļaibrāre kiiō loe ilo im̧ōn Contreras, ijo jet bok ko kar loi m̧okta jān 1978.
Ilo an eddōkļo̧k jeļā eo kōn ko̧jpeļ eo an Eduardo im María, barāinwōt naan in kam̧ool ko aer. Ke ļaddik eo nejier Osvaldo eaar mej ilo juon itaak in waan ettōr ilo 2001, naan in kam̧ool ko aer—koba ippān en̄jake ko rekajoor ilo jetōb ilo iien jar im ilo Buenos Aires Argentina Tampeļ, ijo erro im Osvaldo raar liāp ie—eaar jipan̄ er ilo aer ioon jako eo an ļaddik eo nejierro.
“Bōlen jet jinen im jemān remaron̄ kar bwebwe,” Eduardo ej ba, “bōtaab kōm kar en̄jake ineem̧m̧an bwe eaar ba, ‘Ļaddik eo nejimi em̧m̧an an pād.’ Aaet kōm kar jan̄. Eaar juon ļaddik eo em̧m̧an, im kōmij būrom̧ōj e. bōtaab em̧ōj am kar liāp ilo tampeļ, im kōm jeļā epād ia.”
Meram an Maron̄ Riit im Jeje
Kam̧oolol kōn jipan̄ katakin jān juon membōr an ward eo an, Eduardo eaar barāinwōt katak jeje. “M̧okta,” ej ba, “Ijjab maron̄ kar je eta.”
Kōn meram eo an maron̄ riit im jeje, Eduardo eaar meļeļe tallep in naan ko an jim̧m̧aan.
“Jej pād ijin ioon laļ in bwe jen maron̄ eddōkļo̧k jidik kajjojo raan,” ej ba. Jān katak riit im jeje, ej kakkobaba, ej kwaļo̧k n̄an ajri ro nejin im jibūn bwe ejjab rum̧wij n̄an katak, kōkm̧anm̧anļo̧k, im erom ta eo Anij ekōņaan bwe jen erom. “Kōnke Imaron̄ riit, Ij katak jet men ko rekāāl aolep raan,” ej ba.
Rainin Būratōr Contreras emaron̄ riit jabdewōt men ekōņaan riiti, ekoba nuujpeba eo ilo juon tōre eaar wia kake āinwōt juon ajri eo ejaje riit im jeje. Jeje ko rekwojarjar rej bok ko rem̧m̧an tata ippān, eļaptata Bok in Mormon. Em̧ōj an kar riiti jān jinoin n̄an jem̧ļo̧kin ralitok kattōn.
“N̄an N̄a Bok in Mormon eaar kōjem eo,” ej ba, kam̧oolol wōt kōn ekōjkan an maron̄ riiti im jeje im ko̧jpeļ eo kar ukōt mour e aō. “Bok in Mormon eaar men otemjej n̄an eō. Ej lukkuun men otemjej n̄an eō. Ij en̄jake Jetōb eo aolep iien Ij kōpeļļo̧ke n̄an riit.”
N̄an Eduardo Contreras, pija itulōn̄ ippān lieo pāleen, María, Bok in Mormon ekar kōjem eo n̄an maron̄ riit im jeje. “Ij en̄jake Jetōb eo aolep iien Ij kōpeļļo̧ke n̄an riit,” ej ba.
Pija jen Michael R. Morris