Bujen Ej N̄an indeeo

Jen Marta Valencia Vásquez

N̄e ej itok n̄an jokālōt ko em̧ōj Aō kōm̧m̧ane āinwōt juon m̧ōttan bujen eo ippān Jemed Ilan̄ eo ej iakwe, jekdoon ta eo laļ in ej ba.

Ke Iaar juon jodikdik, būreejtōn eo Doulul eo an Jiron̄ ro am eaar leļo̧k n̄an kajjojo jiron̄ juon menin letok: juon pija in tampeļ. Eaar kōnono n̄an kōm kōn bujen ko im mour mour ko rerreo. Innām eaar kōketak kōm n̄an kōm̧m̧ane juon menin kōttōpar n̄an etal n̄an tampeļ juon raan.

Iaar bōk kapilōk eo an jejtōr in ilo būruwō im kar jokālōt n̄an kōm̧m̧ane kōppopo eo juon mein im̧aantata. Eaar ejjeļo̧k tampeļ ilo Costa Rica ilo tōre jab eo, bōtaab Iaar jeļā jān aō kar peptaij ta eo kar bujen, im Iaar reim̧aanļo̧k n̄an iien eo em̧m̧an n̄an kōm̧m̧ani dam̧oļo̧k in bujen ko jet ippān Irooj.

Ejjeļo̧k bar juon eaar membōr in Kabun̄ in ilo baam̧le eo aō ilo tōre eo, kōn menin ko̧jpeļ eo eaar jab katakin ilo m̧weo im̧ōm. Jekdoon, Iaar jokālōt bwe Imaron̄ katak kōn jon̄ak ko an ko̧jpeļ eo kōn n̄an make im ļoori. Kōppopo eo aō eaar koba pād ilo jemeneri, men̄e eaar kōm̧m̧an ilo jibbon̄ tata. Eaar koba jab jerā m̧ae iien Iaar tōpare 16 iiō detta. Im eaar meļeļe in mour kōn kien erreo—em̧ool eaar jab juon men eo ebun̄bun̄ ak em̧ool jeļā kake ibwilijin ro m̧ōtta, bōtaab juon men eo Iaar jeļā Imaron̄ kōm̧m̧ane kōnke Iaar bujen ippān Iroj bwe Inaaj kar kōm̧m̧ane.

Ekkatak jeje ko rekwojarjar, jim̧or ilo jemeneri im ippa make, eaar kōkajoorļo̧k kūje eo aō n̄an jab mour in kanniōk, mour erreo. Ij kememej kar im̧we eō eļaptata kōn ritariņae ro reddik 2,000. Āinwōt an ba ilo Alma 53:20–21, likao rein, “raar pen otem pen kōn peran, im barāinwōt kōn kajoor im wāmourur; a lo, en̄in eaar jab aolep—raar armej ro raar m̧ool iien otemjej ilo jabdewōt men kar door ilo aer kōjparok. … Raar armej in m̧ool im jatōr, bwe kar katakin er n̄an kōjparok kien ko an Anij im etetal jim̧we im̧aan Mejān.” Iaar barāinwōt kōņaan tiljek ilo aolep men em̧ōj lōke Eō kaki, ekoba bujen in peptaij ko aō.

Ļapļo̧k in meļeļe kōn bujen ko raar itok ke Iaar kūr n̄an jerbal ilo El Salvador San Salvador East Mijen eo. Ke Iaar bōk menin letok kwojarjar eo aō ilo tampeļ, Doctrine and Covenants 82:10 eaar itok n̄an ļōmņak eo aō: Ijo ej jiron̄ kōj bwe Irooj ej kalim̧m̧ur n̄e jej kōm̧m̧ane ta eo Ej ba; bōtaab n̄e jej jab kōm̧m̧ane ta eo Ej ba, ejjeļo̧k ad kalim̧m̧ur. Ilo aolepen mijen eo aō, ļōmņak jab in kōn bujen ko—kōn ad kōm̧m̧ane m̧ōttan eo ad im Irooj ej kōm̧m̧ane eo An—eaar ļujir aō n̄an kōm̧m̧ane ijo em̧m̧an imaron̄e. Ke Iaar kōm̧m̧ane āindein, ro m̧ōtta im N̄a kar jeram̧m̧an ilo jerbal eo am.

Mijen eo aō kar elōn̄ iiō ko remootļo̧k, bōtaab Ij wōnm̧aanļo̧k wōt n̄an pukōt kajoor jān kejparok bujen ko aō. Em̧ōj kōjeram̧m̧an eō jān tōre n̄an jerbal ium̧win jimjuon iiō ko ilo San José Costa Rica Tampeļ. Jerbal āinwōt juon rijerbal an tampeļ eaar letok n̄an eō iien ko rem̧m̧an aolep iien n̄an kememej bujen ko Iaar kōm̧m̧ani. Em̧ōj aō lo ejjar kain kakememej rōt in wōt ilo jerbal ilo Doulul eo an Jiron̄ ro, ijo Iaar kajion̄ katakin kōn bujen ko raorōk ejja āinwōt an ritōl ro aō kar katakin eō.

Kejparok bujen ko ad ejjab iien otemjej epidodo. N̄an waanjon̄ak, elōn̄ armej rej lo kien erreo (ak, ilo jet jekjek ko, m̧wil in kabun̄) ejjeļo̧k tokjāer. Jeram̧m̧an, Iaar jab kile kobaik tok kōņaan ko jān ro me rejjab kwaļo̧k tōmak ko aō ak jān juon wōt tōre. Ij reilikļo̧k ioon ta eo Iaar en̄jake āinwōt juon jiron̄ ke ritōl ro am kar kōketak kōm n̄an kōppopo im mour n̄an bujen ko an tampeļ. Jokālōt eo Iaar kōm̧m̧ane tōre eo ej juon Iaar ļoore n̄an rainin.

Imaron̄ jutak pen ilo jokālōt ko aō kōnke raar jab jokālōt ko Iaar kōm̧m̧ani kōn n̄a make, n̄an make. Ijowōt ke, raar jokālōt ko Iaar kōm̧m̧ani ejja m̧ōttan wōt juon bujen ippān Jemed Ilan̄ eo ej iakwe. Ejjeļo̧k tokjen ta eo laļ in ej ba. Iaar kalim̧m̧ur n̄an Irooj bwe Inaaj kar pokake kien ko An. Ej juōn jerbal in kautiej. Bujen ko Iaar kōm̧m̧ani ilo peptaij im bujen ko Iaar kōm̧m̧ani ilo tampeļ eo rej jerbal rainin āinwōt raan eo Iaar kōm̧m̧ani. Juon bujen ippān Anij ej n̄an indeeo.

Mour ilo wāween eo Anij eaar kajjitōk ippān n̄an mour kake ejjab aolep iien pidodo, bōtaab Ij kam̧ool bwe epidodo. Jemaron̄ bōk lōke im kajoor jān mour kōn bujen ko ad, im jemaron̄ in jeļā bwe Jemed Ilan̄ ejjamin kōmakeikļo̧k kōj. Ilo an pād ilo rājet eo ad, jemaron̄ kōm̧m̧an aolep men (lale Moronai 7:33).

N̄an Kōkajoorļo̧k Rim̧m̧an Ded ro

Elder M. Russell Ballard

“Ewōr wōt juon aō kajjitōk: Kom̧ naaj ke ļoor m̧ool eo im rikanaan ro rej mour ak jaab? Ejjab lukkuun in ļapļo̧k an kapokpopk jān in. Jon̄ak ko an Kabun̄ in ikijien mour erreo ealikkar kar je ilo ‘Non Kōkajur Jodrikdri ro’ bok jidikdik eo, eo kom̧ij jan̄in eddōkļo̧k jān e, em̧ool men̄e elōn̄ iaami ejako aer pād ilo Doulul eo an Liaro ro im Doulul eo an Jiron̄ ro. Eļan̄n̄e kom̧ij kālōt n̄an riit jabdewōt me me epād ie bok ko me rej jum̧ae jon̄ak ko an mour erreo an Kabun̄ in, innām kom̧ij likūt kom̧ make im meletlet eo ami make ilōn̄ in kapilōk eo an rikanaan ro an Anij—juon iaļ in m̧akūtkūt eo me enaaj ilo m̧ool lukkuun in bwebwe. Ilo iien eo wōt armej rej jino ļōmņak bwe rejeļā ļo̧k jān Anij ak kanaan ko an, ak bwe kapilōk eo kar leļo̧k ejjab jerbal n̄an er, rej em̧m̧akūt ļo̧k n̄an juon jekjek eo ekauwōtata me em̧ōj an bōk elōn̄ an rikōm̧akoko. Ebōk tōmak—m̧ool in tōmak, dim im pen—n̄an bōk im kajion̄ n̄an mour kōn kanaan in kapilōk eo men̄e n̄e kom̧ij jab meļeļe likieo in. Kain tōmak rōt in ejej uwaan ewōr an kajoor n̄an tōl kom̧ ilo kejparok ilo aolep apan̄ ko kom̧ij jelm̧ai ilo mour ko ami.”

Eļtōr M. Russell Ballard jān Doulul eo an Jōn̄oulruo Rijilōk ro, “When Shall These Things Be?” ilo Brigham Young University 1995–96 Speeches (1996), 189.

Bujen ko Iaar kōm̧m̧ani ilo peptaij im bujen ko Iaar kōm̧m̧ani ilo tampeļ eo rej jerbal rainin āinwōt raan eo Iaar kōm̧m̧ani.

Pija ko jān Scott Greer