2011
Ilo Nuuj ko
Eprōļ 2011


Ilo Nuuj ko

Eļtōr Perry Ej Ejaake Stake eo Jinoin Tata ilo Guam

Eļtōr L. Tom Perry an Doulul eo an Jōn̄oulruo Rijilōk ro eaar loļo̧k Guam ilo Tijem̧ba in 2010 n̄an ejaake Barrigada Guam Stake, stake eo jinoin tata ilo territory eo an Guam. Ke eaar pād ijōņ, Eļtōr Perry, eo eaar jerbal ilo United States Marine Corps ilo eria eo ilo Pata eo an Laļ II, eaar barāinwōt loļo̧k Pacific War Museum eo im Saipan. Ewōr 1,971 membōr ro an Kabun̄ in jokwe ilo Guam. Territrory eo an Guam ej m̧ōttan wōt Asia North Eria eo an Kabun̄ in.

Taktō in LDS ro rej Kōm̧adm̧ōde Cholera eo ilo Papua New Guinea

Bōjin taktō in LDS ro jān Australia raar joļo̧k iien n̄an taktōik rinan̄inmej in cholera ro ilo jikin ko rettoļo̧k ituiiōn̄ turilik in Papua New Guinea ilo jem̧ļo̧k in ļo̧k 2010 eo.

Taktō ro raar jerbal ippān buki jim̧a rinan̄inmej ro, kemour juon em̧m̧aan eo eaar minit wōt jān an kar mej ke eaar jikrōkļo̧k ilo im̧ōn taktō eo im ro jet remaron̄ in kar jab tōprak n̄e raar jab taktō.

Armej ro raar aiin er ilo āne im kōn kōrkōr n̄an taktō ro. David Williams jān Brisbane im Anthony Mahler jān Cairns raar ba bwe ilowaan juon raan jān ke raar jikrōk ļo̧k ilo jikin eo Sogere, raar taktōik elōn̄ ļo̧k jān 200 nan̄inmej in cholera ko. Ilo kōnono kōn en̄jake eo, Dr. Mahler eaar ba, “[Eaar] en̄jake eo em̧m̧an tata kōn mour e aō em̧m̧an tata,” jekdoon kapan̄pan̄ ko im jerbal ko eļap jān jon̄ak.

Ilo kakobaba n̄an jilkinļo̧k taktō ro, Kabun̄ in eaar leļo̧k kein jipan̄ ko, ekoba kein taktō im kein karreo dān ko. Waan m̧ōn̄ā ko im joob ko kar barāinwōt jilkinļo̧k n̄an jikin ko eļap aer jorrāān jān Kabun̄ in ilo Port Moresby, im waan kein karreo ko kar jilkinļo̧k jān Port Moresby im Brisbane. Juon mijenede ripālele ewōr tijem̧ļo̧k eo kōn kilen kōm̧m̧an dān kar etal n̄an Papua New Guinea n̄an jipan̄ kōjeikik jerbal in jipan̄ ko.

DVD Eo Ej Kwaļo̧k Kadkad in Unin Tōl An Ippān Doon n̄an 2011

Ilo Jānwōde, Kabun̄ in eaar jino leto-letak 2011 DVD eo an Non Kokajur Jodrikdrik Ro, We Believe, n̄an iunit ko an Kabun̄ in ipeļaakin laļ in n̄an kōjerbale ilo rejtake 2011 unin tōl eo an Ippān Doon eo.

DVD eo eobrak kōn būjin pija ko kar kōm̧m̧ani n̄an jipan̄ jodikdik ro kōm̧m̧ane unin tōl eo, Laajrak in Tōmak 1:13, m̧ōttan eo ioļapļap in mour ko aer.M̧ōttan eo ej kwaļo̧k Būreejtōn Thomas S. Monson, būreejtōn ro rōutiej an Doulul eo an Likao Ro im Doulul eo an Jiron̄ Ro, al ko, naan in kam̧ool ko an jodikdik ro, im elōn̄.

Enan̄in aolepen kobban epād ie naan in kam̧ool ko an jodikdik ro im en̄jake ko rōkaļujurjur.

Al ko, ennaan ko, im naan in kam̧ool ko maron̄ kōjerbali n̄an jipan̄ kūlaj ko an jodikdik ro, kweilo̧k ko, im m̧akūtkūt ko ilo aolepen iiō eo.

Aolep bok ko rej pād ilo online n̄an kanni ilo youth.lds.org.

DVD eo ej barāinwōt koba ukook eo an kajin kein: Kajin China, English, Franch, German, Italy, Japan, Korea, Portugese, Russia, im Spain.