Ես հետաքրքրված չեմ Եկեղեցով
Թանինտոա Սեքստոն, Մարշալյան կղզիներ
Ես չէի ուզում Եկեղեցու հետ որևէ առնչություն ունենալ, երբ կինս հարցրեց, թե կարո՞ղ են արդյոք միսիոներները ուսուցանել մեր որդիներին: Սակայն ես չմերժեցի, քանի որ նա արդեն անդամ էր:
Երբ միսիոներները սկսեցին շաբաթը երկու անգամ գալ մեր տուն, ես գնում էի ընկերոջս տուն, որը մեր հարևանն էր: Ընկերս մեկ այլ Քրիստոնյա Եկեղեցու հավատարիմ անդամ էր: Ամեն անգամ, երբ ես այցելում էի նրան, նա ցանկանում էր խոսել Աստվածաշնչի մասին: Ես ասում էի նրան, որ ինձ չեն հետաքրքրում նման բաները և չեմ ցանկանում կրոն ուսումնասիրել: Սակայն նա փորձում էր համոզել ինձ, և ի վերջո ես տեղի տվեցի: Այսպիսով, երկար ժամանակ ես Աստվածաշունչ էի ուսումնասիրում ընկերոջս հետ, մինչ միսիոներները ուսուցանում էին իմ տղաներին:
Մի օր միսիոներների գալու ժամն էր, սակայն տնից գնալու փոխարեն, ես որոշեցի մնալ մյուս սենյակում: Երբ միսիոներները սկսեցին ուսուցանել իմ որդիներին, ես զգացի, որ ավելի եմ ցանկանում լսել: Ես ավելի ու ավելի էի մոտենում դռանը, որպեսզի կարողանայի լավ լսել: Նրանք ուսուցանում էին իմ որդիներին առաքյալների և մարգարեների մասին:
Ավելի ուշ ես հասկացա, որ ուզում եմ ավելին իմանալ: Ես խոսեցի միսիոներների հետ և որոշեցի նրանց հետ անցնել զրույցները՝ առանձին: Կինս միշտ ներկա էր, սակայն ուրիշ ոչ ոք չգիտեր այդ մասին:
Այսպիսով, երբ միսիոներները գալիս էին շաբաթը երկու անգամ ուսուցանելու տղաներիս, ես գնում էի ընկերոջս տուն: Այնուհետև, մեկ այլ օր նրանք ուսուցանում էին ինձ:
Մի օր երբ ընկերս վատ բան ասաց Եկեղեցու մասին, ես պաշտպանեցի Եկեղեցին: Մարշալյան կղզիների շատ մարդկանց նման նա շատ բան չգիտեր Եկեղեցու մասին և սխալ էր հասկանում որոշ բաներ, որոնց հավատում են Վերջին Օրերի Սրբերը: Երբ նա կրկին բացասական կարծիք հայտնեց, ես կրկին պաշտպանեցի Եկեղեցին:
Այդպես շարունակվեց յոթ ամիս: Ապա մի օր ես հասկացա, որ Սուրբ Հոգին հաստատում էր ինձ, որ այն, ինչ միսիոներները ուսուցանում էին, ճշմարիտ էր: Ես հասկացա, որ պետք է մկրտվեմ, թեպետ դեռևս շատ քիչ գիտեի ավետարանի մասին:
2007թ. մկրտվելուց հետո ես անչափ ուրախ էի: Մենք սկսեցինք գումար հավաքել Հավայի տաճար գնալու համար, որտեղ կինս, մեր երեք երեխաները և ես կնքվեցինք 2008թ. դեկտեմբերին:
Եկեղեցու անդամ լինելը մեծապես ազդեց իմ կյանքի վրա: Ես որոշեցի թողնել իմ երկրորդ աշխատանքը ռեստորանում, որովհետև ես ուշ էի տուն գալիս և իմ ներքնահագուստը ներծծված էր լինում ծխախոտի ծխով: Չնայած այդ հավելյալ եկամտի կորստին, Տերը հոգ տարավ մեզ համար:
Ես գիտեմ, որ Եկեղեցին ճշմարիտ է, և Ջոզեֆ Սմիթը Աստծո մարգարեն է՝ Հոգու շնորհիվ, որ զգացել եմ, և օրհնությունների՝ որ ստացել եմ: