Bōktok Būraimere n̄an M̧weo
Jisōs Kraist Ej Aō Rilo̧mo̧o̧r im Ripinmuur
Kom̧ maron̄ kōjerbal katak in im m̧akūtkūt eo n̄an katak eļapļo̧k kōn unin kōnono eo an Būraimere an allōn̄ in.
“Kōmij tōmak bwe kōn Pinmuur eo an Kraist, aolep armej remaron̄ bōk lo̧mo̧r, kōn pokake kien im kain̄i ko an Gospel eo” (Laajrak in Tōmak 1:3).
Ta eo kom̧ naaj kar kōņaan leļo̧k n̄an juon eo kom̧ij lukkuun, lukkuun ļap ami iakwe? Ad Rilo̧mo̧r, Jisōs Kraist, eļap an iakwe kōj jon̄an Eaar leļo̧k mour eo an An make kōn kōj.
Jemed Ilan̄ eaar jeļā bwe eļan̄n̄e jaar jerawiwi im kar kōm̧m̧ani bōd ko, jenaaj kar jab maron̄ mour Ippān bar juon alen. Kōn menin Eo Nejin, Jisōs Kraist, eaar letok n̄an erom ad Rilo̧mo̧r. Jemed Ilan̄ eaar kālōt E n̄an lo̧m̧o̧o̧ren kōj kōnke Eaar e wōt eo emaron̄ in mour juon mour ejjeļo̧k jerawiwi.
Jisōs eaar en̄taan im kar mej n̄an lo̧mo̧o̧ren kōj jān mej im jerawiwi ko ad. Jerbal in iakwe in ej ņa etan Pinmuur. Kōnke kōn Pinmuur eo, jemaron̄ ukweļo̧k jān jerawiwi ko ad, jeorļo̧k ad bōd, im erom erreo im karbōb āinwōt Jisōs.
Jisōs eaar debweāāl im kar mej, bōtaab ālkin jilu raan ko Eaar jerkakpeje. Ej bar mour! Kōnke Eaar jerkakpeje, jenaaj barāinwōt jerkakpeje. Meļeļe in bwe ānbwin ko ad im jetōb ko ad renaaj bar koba ippān doon n̄an indeeo.
Em̧ool, Jisōs Kraist ej ad Rilo̧mo̧o̧r im Ripinmuur. E ej juon waanjon̄ak eweppān n̄an kōj aolep. Eaar katakin kōj ekōjkan n̄an kōm̧m̧an n̄an doon kōn jouj. Eaar katakin kōj ekōjkan n̄an jerbal n̄an doon. Eaar katakin kōj ekōjkan ad em̧m̧anļo̧k. Jejjab maron̄ mour juon mour eweppān āinwōt Eaar, bōtaab jemaron̄ bar rool n̄an mour ippān Jisōs im Jemed Ilan̄ kōn pokaki kein ko im kōm̧m̧ane ijo em̧m̧an tata ippād. Jej aikuj ļoor Jisōs Kraist aolep raan.
Ituanmiin̄: Pija jān Paul Mann © 1991 IRI; ituanmooņ: pija jān Beth M. Whittaker