Atong mga Panimalay, Atong mga Pamilya
Pagtudlo sa Doktrina kabahin sa Pamilya
Gikan sa usa ka sibya nga gipamulong ngadto sa mga magtutudlo sa seminary ug institute of religion niadtong Agosto 4, 2009.
Kini nga henerasyon gitawag sa pagpanalipud sa doktrina sa pamilya nga sukad wala pa mahitabo. Kon sila wala masayud sa doktrina, dili sila makapanalipud niini.
Sa akong pakighimamat sa mga young single adult sa tibuok kalibutan, nangutana ko nila,“Ngano man nga ang Unang Kapangulohan nag-amuma pag-ayo kaninyo ug nagsangkap og daghang mga kapanguhaan alang kaninyo?” Kini mao ang pipila sa mga tubag nga akong nakuha: “Kami mao ang umaabut nga mga lider sa Simbahan.” “Kami nagkinahanglan og pagbansay aron kami magpabiling lig-on.” “Ang among mga pagpamatuod nalig-on diha sa among mga klase sa seminary ug institute.” “Kinahanglan namong maila-ila ang ubang talagsaong mga batan-ong Santos sa Ulahing mga Adlaw.” “Kami mao ang paglaum sa umaabut.” Panagsa ra kong makadungog, “Aron sa umaabut ako mahimong mas maayo nga amahan o mas maayo nga inahan.” Ang ilang mga tubag sa kasagaran kabahin sa kaugalingon, tungod kay mao kini ang panahon sa kinabuhi nga anaa sila.
Bisan pa niana, ang mga ginikanan, mga magtutudlo, ug mga lider sa kabatan-onan kinahanglang motudlo sa nagtubo nga henerasyon sa doktrina kabahin sa pamilya. Importante nga tabangan sila nga makab-ut ang kinabuhing dayon (tan-awa sa Moises 1:39). Sila kinahanglang masayud nga ang teyolohiya sa pamilya nakabasi sa Paglalang, sa Pagkapukan, ug sa Pag-ula. Sila kinahanglang makasabut sa mga hulga ngadto sa pamilya aron sila masayud unsa ang ilang gipakigbatokan ug aron makaandam. Sila kinahanglang klaro nga makasabut nga ang kahingpitan sa ebanghelyo matuman diha sa mga ordinansa ug pakigsaad sa templo.
Ang Teyolohiya sa Pamilya
Sa Ang Simbahan ni Jesukristo sa mga Santos sa Ulahing mga Adlaw, kita adunay teyolohiya sa pamilya nga nakabasi sa Paglalang, sa Pagpakapukan, ug sa Pag-ula. Ang Paglalang sa yuta naghatag og dapit diin ang mga pamilya makapuyo. Ang Dios milalang sa lalaki ug babaye kinsa mao ang duha ka importanting kaparis sa usa ka pamilya. Kini kabahin sa plano sa Langitnong Amahan nga sila si Adan ug Eva ma-sealed ug mahimong mahangturong pamilya.
Ang Pagkapukan mihatag og paagi alang sa pamilya nga motubo. Sila si Adan ug Eva mga lider sa pamilya kinsa mipili nga makasinati og mortal nga kasinatian. Ang Pagkapukan nakapahimong posible alang kanila sa pagbaton og mga anak nga lalaki ug mga anak nga babaye.
Ang Pag-ula nagtugot sa pamilya nga ma-sealed sa kahangturan. Kini nagtugot sa mga pamilya nga makabaton og mahangturong paglambo ug pagkahingpit. Ang plano sa kalipay, nga gitawag usab og plano sa kaluwasan, maoy usa ka plano nga gimugna alang sa mga pamilya. Ang nagtubo nga henerasyon kinahanglang makasabut nga ang importanting mga haligi sa atong teyolohiya nakasentro sa pamilya.
Kon kita maghisgut kabahin sa pagkwalipikar alang sa mga panalangin sa kinabuhing dayon, kita nagpasabut sa pagkawlipikar alang sa mga panalangin sa mahangturong mga pamilya. Kini mao ang doktrina ni Kristo, ug kini napahiuli pinaagi ni Propeta Joseph Smith. Kini narekord sa Doktrina ug mga Pakigsaad 2:1–3:
“Tan-awa, Ako mopadayag nganha kaninyo sa Pagkapari, pinaagi sa kamot ni Elijah ang propeta, sa dili pa moabut ang mahinungdanon ug makalilisang nga adlaw sa Ginoo.
“Ug siya motanom diha sa mga kasingkasing sa mga anak sa mga saad nga gihimo ngadto sa mga amahan, ug ang mga kasingkasing sa mga anak mobati sa ilang mga amahan.
“Kon kini dili mao, ang tibuok yuta sa hingpit malaglag sa iyang pag-anhi.”
Kini nga kasulatan naghisgut kabahin sa mga panalangin sa templo—mga ordinansa ug mga pakigsaad nga kon wala kini “ang tibuok yuta [sa] hingpit malaglag.”
“Ang Pamilya: Usa ka Pamahayag ngadto sa Kalibutan” gisulat aron sa paghatag og gibug-aton nga ang pamilya sentro sa plano sa Tiglalang.1 Kon wala ang pamilya, walay plano; walay rason alang sa mortal nga kinabuhi.
Mga Hulga ngadto sa Pamilya
Agi og dugang sa pagpasabut sa teyolohiya sa pamilya, kitang tanan kinahanglang makasabut sa mga hulga ngadto sa pamilya. Kay kon dili, kita dili makaandam alang sa gubat Ang ebidensya nag-alirong kanato nga ang pamilya nagkahimong dili na kaayo importante. Ang gidaghanon sa kaminyoon nagkaubos, ang edad sa mga nag-minyo nagkataas, ug ang gidaghanon sa diborsyo nagkataas. Ang mga bata nga natawo gawas sa kaminyoon nagkadaghan. Ang aborsyon nagkataas ug nahimong mas legal. Atong makita nga miubos ang gidaghanon sa pagkatawo sa mga bata. Kita makakita sa dili patas nga mga relasyon tali sa mga lalaki ug mga babaye, ug kita makakita og mga kultura nga gipraktis gihapon ang pang-abuso sulod sa mga relasyon sa pamilya. Kadaghanan ang propesyon mas importante kaysa pamilya.
Daghan sa atong mga kabatan-onan nawad-an og pagsalig sa institusyon sa mga pamilya. Sila mas naghatag og bili sa edukasyon ug nagpaminus sa kaimportante sa pagmugna og mahangturong pamilya. Daghan ang wala makakita nga ang pagmugna og mga pamilya maoy usa ka buhat nga nagkinahanglan og hugot nga pagtuo. Alang kanila, kini usa ka proseso sa pagpili nga mora og nag-shopping. Daghan usab ang walay salig sa ilang kaugalingong moral nga kalig-on ug sa moral nga kalig-on sa ilang mga kaedad. Tungod kay ang mga tintasyon hilabihan ka pintas, daghan ang dili sigurado nga sila magmalampuson sa paghupot sa mga pakigsaad.
Daghang mga batan-on usab ang adunay dili igo ug wala kaayo mapalambo nga sosyal nga mga kahanas, nga makapugong sa pagmugna og mahangturong mga pamilya. Sila nagka-eksperto sa pagpakig-istorya og usa ka tawo mga 50 ka milya (80 km) ang gilay-on ug dili na kaayo makaistorya sa mga tawo diha sa sama nga kwarto. Kana nakapalisud kanila sa pagpakig-istorya [socialize] sa usag usa.
Kita usab nag-atubang sa problema nga atong mabasa diha sa Mga Taga-Efeso 6:12: “Kay ang atong pakigdumog dili batok sa mga binuhat nga unod ug dugo, kondili batok sa mga punoan, batok sa mga kagamhanan, batok sa mga labawng agalon niining mangitngit nga kalibutan karon, batok sa mga dautan nga espirituhanong panon diha sa mga dapit sa kalangitan.” Ang pangpubliko nga mga palisiya gipanghimo matag adlaw nga supak sa pamilya, ug ang kahulugan sa pamilya nagkausab sa legal nga paagi sa tibuok kalibutan. Ang pornograpiya nagdagsang. Alang niadtong tighimo sa pornograpiya, ang ilang bag-ong gipunting mao ang batan-ong mga babaye. Ang mga ginikanan gihulagway nga walay kabangkaagan ug kanunay nga wala diha. Mga mensahe sa medya nga supak sa pamilya anaa bisan asa. Ang kabatan-onan giwagtangan sa pagbati sa panginahanglan sa pagmugna og mahangturong mga pamilya.
Atong makita kon sa unsang paagi nga kini mahimong mahitabo kon kita mobasa sa mga pulong ni Korihor, usa ka antikristo: “Ug sa ingon siya misangyaw ngadto kanila, naglingla sa mga kasingkasing sa daghan, nakahimo kanila sa pagpagarbo diha sa ilang pagkadautan, oo, naglingla sa daghan nga mga babaye, ug usab sa mga lalaki, aron sa pagbuhat og malaw-ay nga buhat” (Alma 30:18). Si Satanas nasayud nga siya dili gayud makabaton og lawas; siya dili gayud makabaton og pamilya. Busa siya nagpunting sa batan-ong mga babaye, kinsa maoy magmugna og mga lawas alang sa umaabut nga mga henerasyon.
Si Korihor usa ka antikristo. Ang antikristo usa ka supak sa pamilya. Bisan unsa nga doktrina o baruganan nga ang atong kabatan-onan makadungog gikan sa kalibutan nga supak sa pamilya usa usab ka antikristo. Ingon ana kini ka klaro. Kon ang atong mga kabatan-onan mohunong sa pagtuo sa matarung nga mga tradisyon sa ilang mga amahan sama sa mga tawo nga gihulagway diha sa Mosiah 26, kon ang atong kabatan-on wala makasabut sa ilang bahin diha sa plano, sila mahimong masalaag.
Pagtudlo sa Nagtubo nga Henerasyon
Unsa man ang atong gilauman nga masabtan ug buhaton niining nagtubo nga henerasyon tungod sa atong gitudlo kanila? Ang mga tubag niana nga pangutana ingon man ang importanting mga elemento sa doktrina kabahin sa pamilya makita diha sa pamahayag sa pamilya. Si Presidente Gordon B. Hinckley (1910–2008) miingon nga ang pamahayag mao “ang usa ka deklarasyon ug pagpamatuod sa mga baruganan, mga doktrina ug mga gipraktis” nga kanunayng anaa niini nga Simbahan.2
Si Presidente Ezra Taft Benson (1899–1994) miingon, “Kini nga pamaagi … sa pagdumala sa pamilya diin ang usa ka lalaki ug usa ka babaye mosulod ngadto sa pakigsaad uban sa Dios—sama sa gibuhat nila ni Adan ug Eva—nga ma-sealed hangtud sa kahangturan, nga makabaton og kaliwatan … mao lang ang paagi diin kita sa usa ka adlaw mahimong makakita sa panagway sa Dios ug mabuhi.”3
Ang nagtubo nga henerasyon kinahanglang makasabut nga ang sugo sa “pagsanay, ug pun-a ang yuta” (Genesis 1:28; Moises 2:28) nagpabiling gipatuman. Ang pagpanganak og mga bata usa ka buhat nga nagkinahanglan og hugot nga pagtuo. Si Presidente Spencer W. Kimball (1895–1985) miingon, “Kini usa ka buhat nga hilabihan nga pagkahinakog alang sa magtiayon nga magdumili sa pagbaton og mga anak kon sila mahimong makabuhat sa ingon.”4 Ang pagkainahan ug pagkaamahan mga mahangturong tahas. Ang matag usa nagdala sa responsibilidad alang sa lalaki o sa babaye nga kabahin sa katunga niana nga plano. Ang kabatan-on mao ang panahon sa pagpangandam alang niadtong mahangturong mga bahin ug mga responsibilidad.
Ang mga ginikanan, mga magtutudlo, ug mga lider makatabang sa mga batan-on nga makaandam sa mga panalangin ni Abraham. Unsa kadto nga mga panalangin? Si Abraham nagsulti kanato diha sa Abraham 1:2. Siya miingon nga gusto niya “ang katungod diin ako kinahanglan nga ma-orden aron makapangalagad; … nga mahimo nga usa kinsa makaangkon og dako nga kahibalo, … nga mahimo nga usa ka amahan sa daghan nga mga nasud, usa ka prinsipe sa kalinaw, ug nagtinguha sa pagdawat og mga panudlo, ug sa paghupot sa mga sugo sa Dios, ako nahimo nga usa ka tinuod nga sumusunod, usa ka Halangdon nga Pari, naghupot sa katungod nga gihuptan sa mga amahan.”
Asa man pagadawaton kining mga panalangin ni Abraham? Kini moabut lamang niadtong kinsa magpa-sealed ug magminyo sa templo. Ang usa ka lalaki dili mahimong usa ka “amahan sa daghang mga nasud” nga dili ma-sealed ngadto sa iyang asawa. Sa ingon, si Abraham dili makahupot sa katungod nga gihuptan sa mga amahan kon walay usa ka asawa kinsa adunay katungod nga gihuptan sa mga inahan.
Ang mga istorya nila ni Abraham ug Sara ug Isaac ug Rebekah makita diha sa Genesis. Si Abraham ug Sara adunay usa lang ka anak, si Isaac. Kon si Abraham mahimong “amahan sa daghang mga nasud,” unsa ka importante ang asawa ni Isaac, si Rebekah? Siya importante kaayo nga iyang gipadala ang iyang sulugoon mga gatusan ka milya aron sa pagpangita sa saktong batan-ong babaye—kinsa mohupot sa iyang mga pakigsaad, kinsa nakasabut unsa ang kahulugan sa paghimo og mahangturong pamilya.
Sa Genesis 24:60, si Rebekah napanalanginan nga mahimong “mainahan sa linibolibo.” Asa man nato makita kadtong matang sa mga panalangin? Kini madawat sa templo.
Ang istorya nila ni Isaac ug Rebekah usa ka ehemplo sa usa ka lalaki, kinsa adunay mga yawe, ug sa babaye, kinsa adunay impluwensya, nagtinabangay sa pagsigurado sa katumanan sa ilang mga panalangin. Ang ilang istorya kinahanglanon. Ang mga panalangin sa balay ni Israel nagdepende sa usa ka lalaki ug babaye kinsa nakasabut sa ilang bahin sa plano ug sa ilang mga responsibilidad sa pagbaton og mahangturong pamilya, sa pagbaton og mga anak, ug sa pagtudlo kanila.
Sa atong panahon kita adunay responsibilidad sa pagdala nila ni “Isaac” ug “Rebekah” sa atong mga panimalay ug mga klasehanan. Ang matag batan-ong lalaki ug batan-ong babaye kinahanglang makasabut sa iyang tahas [role] niining talagsaong panag-uban—nga ang matag usa kanila usa ka “Isaac” o usa ka “Rebekah.” Dayon sila klarong masayud unsa ang angay nilang buhaton.
Pagpuyo sa Paglaum sa Kinabuhing Dayon
Mga ginikanan, mga magtutudlo, ug mga lider: puyo diha sa inyong mga panimalay, sa inyong mga pamilya, sa inyong kaminyoon aron ang mga batan-on makapalambo og paglaum alang sa kinabuhing dayon gumikan sa paglantaw kaninyo. Pagpuyo ug pagtudlo nga klaro kaayo ang inyong gitudlo makapahunong sa tanang kabanha nga nadungog sa mga batan-on ug aron kini modulot ngadto sa ilang mga kasingkasing ug makatandog kanila.
Pagpuyo sa inyong mga panimalay aron kamo mahanas sa mga sukaranan, aron kamo maghunahuna sa inyong mga tahas ug mga responsibilidad sa pamilya. Paghunahuna bahin sa katukma dili sa kahingpit. Kon kamo aduna mga tumong ug tukma kamo sa pag-implementar niini sa inyong mga panimalay, ang mga batan-on makat-on gikan kaninyo. Sila makakat-on nga kamo nag-ampo, dungan nga nagtuon sa mga kasulatan, nag-family home evening, himoong prayoridad ang panahon sa tingpangaon, ug mosulti nga may pagtahud sa inyong kapikas. Dayon gikan sa inyong ehemplo ang nagtubo nga henerasyon makaangkon og dakong paglaum.
Kini Ako Nasayud
Atong giandam ang atong kabatan-onan alang sa templo ug alang sa mahangturong mga pamilya. Daghang mga hulga ang nagsingabut ngadto kanila nga makapawala sa ilang kadasig sa pag-ugmad og mahangturong pamilya. Ang atong tahas mao ang pagtudlo kanila aron sila dili masayop sa pagsabut. Kinahanglan natong klarohon pag-ayo ang importanting mga punto sa doktrina, nga atong makita sa “Ang Pamilya: Usa ka Pamahayag ngadto sa Kalibutan.”
Kini nga henerasyon pagatawagon aron sa pagpanalipud sa doktrina kabahin sa pamilya nga wala pa gayudmahitabo sukad. Kon sila wala masayud niini, sila dili makapanalipud niini. Sila kinahanglang makasabut sa mga templo ug priesthood.
Si Presidente Kimball miingon:
“Daghang sosyal nga mga pagpugong sa nangagi nakatabang sa pagpalig-on ug pagsuporta sa pamilya nga nag-anam og kawala. Moabut ang panahon nga kadto lang nagtuo og maayo ug aktibo sa pamilya ang makapreserba sa ilang mga pamilya gikan sa dautan nga nag-alirong kanato. …
“… Adunay uban nga naghatag og kahulugan sa pamilya sa dili tradisyonal nga paagi nga ila kining gihatagan og kahulugan nga walay basihan. …
“Kita sa tanang mga tawo, mga kaigsoonan, ang dili angay nga motuo sa sayop nga mga argumento nga ang unit sa pamilya mora og may kalabutan ngadto sa usa ka piho nga bahin sa kalamboan nga gisagubang sa usa ka moral nga katilingban. Kita gawasnon sa pagbuntog niadtong mga kalihokan nga makapakunhod sa kaimportante sa pamilya ug makapasaka sa kaimportante sa hinakog nga pagkaindibidwal. Kita nasayud nga ang pamilya magmahangturon.”5
Ang ebanghelyo ni Jesukristo tinuod. Kini gipahiuli pinaagi ni Propeta Joseph Smith. Anaa kanato ang kahingpitan sa ebanghelyo karong panahona. Kita mga anak nga lalaki ug babaye sa langitnong ginikanan, kinsa mipadala kanato aron kita makasinati niining yutan-on nga kasinatian aron sa pag-andam kanato alang sa panalangin sa mahangturong mga pamilya. Mopamatuod ako kaninyo kabahin sa atong Manluluwas, si Jesukristo, nga pinaagi sa Iyang Pag-ula kita mahimong hingpit ug managsama sa atong mga responsibilidad sa atong mga pamilya dinhi sa yuta ug nga pinaagi sa Iyang Pag-ula anaa kanato ang saad sa kinabuhing dayon sa mga pamilya.
Paghulagway sa litrato pinaagi ni Steve Bunderson; litrato ni Sister Beck © Busath Photography
Sa wala: detalye gikan sa Kawanangan, ni Sidney King; detalye gikan sa Pagbiya sa Tanaman sa Eden, ni Joseph Brickey; detalye gikan sa Dili ang Akong Pagbuot, Maoy Matuman, Kondili ang Imo, ni Harry Anderson, sa maayong kabubut-on sa Pacific Press Publishing Association, Inc.; mga paghulagway sa litrato pinaagi ni Weston C. Colton ug CRAIG DIMOND.
Sa wala: paghulagway sa litrato pinaagi ni Jerry Garns; Sa tuo: litrato sa Templo sa Nauvoo Illinois ug paghulagwat sa litrato pinaagi ni John Luke © IRI; litrato sa tiil © Getty Images