2011
Ang Paggamit sa Komperensya Makapausab sa mga Kinabuhi
Marso 2011


Ang Paggamit sa Komperensya Makapausab sa mga Kinabuhi

Wala madugay human sa Oktubre 2010 nga kinatibuk-ang komperensya, sila si Jared ug Kathleen Smith sa Utah, USA, medisider sa pag-drive libot sa kasilinganan kuyog sa tulo nila ka mga anak aron malingaw sa mabulukon nga mga dahon sa tinglarag. Sa wala pa mamiya, si Brother Smith mibutang og usa ka gamayng botilya sa gipahinungod nga lana sa iyang bulsa. Ang mga pulong sa priesthood nga pakigpulong ni Presidente Henry B. Eyring nga mangandam alang sa priesthood nga pagserbisyo sa tanang higayon diha na sa iyang hunahuna (tan-awa sa “Pagserbisyo uban sa Espiritu,” Liahona ug Ensign, Nob. 2010, 59).

Sa ilang pagpamauli, naagian sa mga Smith ang pundok sa mga tawo nga naglibut sa gamayng bata nga babayeng naghigda sa yuta, nga daw nag-antus og usa ka matang sa sakit sa ulo. Ilang nadungog ang usa ka babayeng nagsiyagit, “Palihug, kinsa ang dunay gipahinungod nga lana? Palihug!” Daling gikuha ni Smith ug gitunol ang iyang lana ngadto sa amahan sa babaye. Human sa priesthood nga panalangin, naulian ang babaye sa panimuot ug nakigsulti sa iyang mga ginikanan. Sa wala madugay, miabut ang mga paramedic ug midala kaniya sa ospital.

“Among gibati ang kainit ug kalinaw sa among mga kasingkasing tungod sa pagkaatol nga diha sa tukma nga dapit sa tukma nga higayon, nga nagdala og lana, ug ingon sa gisulti ni Presidente Eyring, andam gayud,” miingon si Brother Smith. “Nakita sa among mga anak ang panalangin sa gahum sa priesthood, ug namiya kami nga mibati sa gugma sa Langitnong Amahan alang kanamo ug niining batan-ong babaye ug sa iyang pamilya.”

Sama sa mga Smith, daghang pamilya ang napanalanginan tungod sa pagsunod sa tambag nga nadawat panahon sa kinatibuk-ang komperensya. Samtang ang mga miyembro nangandam alang sa laing kinatibuk-ang komperensya, dinhi tulo ka mga pamilya ang mopakigbahin sa ilang mga istorya sa pagsunod sa propetikanhong tingog.

Alang sa dugang nga mga istorya (sa Iningles) o sa pagpakigbahin sa inyong kaugalingong kasinatian (sa bisan unsang pinulongan), basaha ang kinatibuk-ang bersyon niini nga artikulo diha sa seksyon sa Mga Balita ug mga Panghitabo sa Simbahan sa LDS.org sa lds.org/church/news/how-general-conference-changed-my-life.

Anne Te Kawa, Tararua, New Zealand

Sa sayong bahin sa 2010, nag-atubang ako og daghang seryoso nga personal nga mga hagit. Ang akong bishop misugyot nga tingali makaayo kanako kon makigkita og usa ka propesyonal nga magtatambag. Ang ideya nakapakugang kanako. Nagtrabaho ug nagbansay ako diha sa natad sa pag-atiman sa pagkaadik sa druga ug alkohol, mao nga akong gihunahuna, “ako mismo usa ka magtatambag! Wala ako magkinahanglan og tabang sa gawas.”

Sa gihapon nakigbisog ako sa pipila sa akong mga hagit —ug sa kaugalingon nakong garbo —sa dihang ang kinatibuk-ang komperensya miabut pagka-Abril. Si Elder James B. Martino sa Seventy mihatag og pakigpulong nga giulohan og, “Matag Usa ka Butang Nagabuhat og Maayo” (tan-awa sa Liahona ug Ensign, Mayo 2010, 101), nga nagsentro sa pagsagubang sa kalisdanan.

Ang iyang mensahe nakatandog kanako, ug mihukom ako nga mag-ampo alang sa panudlo kon unsay akong angay buhaton. Mibiya ako sa komperensya nga nagtinguha og hugot nga pagtuo ug mosalig sa Manluluwas nga mogiya kanako pinaagi sa Espiritu Santo.

Sulod sa duha ka semana ako namalandong ug nag-ampo ug naghunahuna ug sa katapusan nakadesider nga akong sulayan ang pagpakigtambag. Nahimo kining usa ka makatabang, malampuson nga kasinatian. Agig dugang, ang pagbasa pag-usab sa pagkigpulong ni Elder Martino, nga gidasig pinaagi sa pag-ampo ngadto sa Langitnong Amahan, ug nagsalig sa Pag-ula sa Iyang Anak, nga si Jesukristo, nakahatag kanako og malungtaron nga kasiguroan Ako mopamatuod nga ang mapainubsanong paagi sa pagtawag sa Ginoo mao ang kanunay nga paagi sa pagbuntog sa mga pagsulay. Iya kita nga giyahan aron masayud kon unsang piho nga mga butang ang kinahanglan natong buhaton.

Andrea Roucche, Texas, USA

Ang akong bana, si Collin, ug ako nahimong mga ginikanan niadtong Oktubre 2009. Sa dihang ang among anak nga babaye, si Eliza, nag-edad og lima ka bulan, nagsabut kami kon kanus-a namo sugdan sa paglakip kaniya sa family home evening ug pagtuon sa kasulatan. Maayo ba nga magpahigayon og family home evening samtang nagmata siya? Makakat-on ba siya og bisan unsang butang pinaagi sa among pagbasa og kusog sa Basahon ni Mormon?

Atol sa Abril 2010 nga kinatibuk-ang komperensya, si Elder David A. Bednar sa Korum sa Napulog Duha ka mga Apostoles miingon, “Ang mga kabatan-onan sa tanang edad, bisan ang mga masuso, makahimo ug makatubag sa talagsaon nga espiritu sa Basahon ni Mormon” (“Magtukaw uban sa Bug-os nga Pagkamapadayunon,” Liahona ug Ensign, Mayo 2010, 40).

Ang mga kausaban nga atong nabuhat nahimong simple ug inanay. Kanunay namong ipatukar ang CD sa mga kanta sa Primary alang ni Eliza. Among basahon ang pipila ka mga bersikulo gikan sa Basahon ni Mormon uban kaniya atol sa tingpanihapon. Among gisugdan ang pag-ampo sa pamilya sa dili pa matulog si Eliza. “Sa pagpanuroy, akong tudluon ang mga langgam ug sultihan siya, “Si Jesus mibuhat niadtong mga langgam alang kanato.” Mahimong dili siya makasabut karon, apan makahimo ra unya siya.

Akong nakaplagan nga kining mga butanga nakapaminus og maayo sa akong kabalaka sa umaabut. Akong nabati nga kon buhaton nako ang akong bahin pinaagi sa pagtudlo ni Eliza sa unsay kinahanglan niyang masayran ug sa pagsunod sa propetikanhong tambag, mapanalanginan ra siya sa umaabut.

Sela Fakatou, West Midlands, England

Sa among pamilya, ang matag usa daghan og buhat. Usahay kami walay higayon nga maminaw og maayo sa usag usa o sa paghatag og kapuangod o pagkamatinahuron. Busa agig pagpangandam alang sa umaabut nga kinatibuk-ang komperensya, kami nag-ampo aron masayud kon unsaon namo nga mas masuod isip usa ka pamilya.

Ang pakigpulong ni Elder Robert D. Hales, “Ang Atong Katungdanan ngadto sa Dios: Ang Misyon sa mga Ginikanan ug mga Lider ngadto sa Bag-o nga Kaliwatan” (tan-awa sa Liahona ug Ensign, Mayo 2010, 95), mitubag sa among mga pag-ampo ug among mga pangutana.

Natandog ako kaayo sa istorya mahitungod sa apo nga lalaki ni Elder Hales nga nangutana, “Lolo! Anaa ka ba diha?” Si Elder Hales sa Korum sa Napulog Duha ka mga Apostoles mipasabut, “Ang pagka anaa diha nangahulugan nga nakasabut sa mga kasingkasing sa atong kabatan-onan ug mangilabut kanila. Ug ang pagpangilabut kanila nagpasabut nga dili lamang ang pagpakigsulti uban kanila kondili ang pagbuhat usab og mga butang nga kauban sila.”

Naninguha kami nga mapalambo ang among pakig-uban sa usag usa. Sa pagpanga-on, among hisgutan ang mahitungod nianang adlawa. Naghisgut kami sa mga hagit nga among giatubang ug sa unsang paagi nga ang mga butang nga among makat-unan gikan sa mga kasulatan makatabang kanamo nga masagubang ug mabuntog kadto nga mga hagit.

Ang paggahin og panahon alang niini nga mga panaghisgot nakahimog kaayohan. Samtang kining maayo nga mga pamatasan nahimong kabahin sa kinabuhi sa pamilya, akong gibati ang talagsaong gugma alang sa akong pamilya. Samtang gisunod nako ang propetikanhong tambag nga akong nadawat sa komperensya, mga tubag sa laing mga pangutana ang mipuno sa akong pangisip, ug akong nakita ang mga paagi nga makahimo nako nga mas sama sa Manluluwas nga si Jesukristo. Labaw pa kay sa kaniadto, gibati nako ang pagbati sa kalinaw imbis nga kabalaka.

Ang mensahe sa komperensya ni Elder James B. Martino naghatag ni Anne Te Kawa sa New Zealand og pagsalig sa pag-ampo alang sa paggiya nga iyang gikinahanglan.

Nakaplagan nila ni Collin ug Andrea Roueche ang mga tubag nga ilang gipangita diha sa mensahe ni Elder David A. Bednar sa komperensya.