2011
Ang Dios Mopadayag og Kamatuoran ngadto sa Iyang mga Propeta ug ngari Kanato
Marso 2011


Unsa ang Atong Gituohan

Ang Dios Mopadayag og Kamatuoran ngadto sa Iyang mga Propeta ug ngari Kanato

Ang usa ka propeta mao ang linain nga saksi ni Jesukristo ug nagapamatuod sa Iyang pagkabalaan. Ang Dios motawag sa propeta nga mahimo Niyang representante dinhi sa yuta. Ang usa ka propeta nagtudlo sa kamatuoran, naghubad sa pulong sa Dios, ug sa ingon nagsunod sa mga direksyon sa Dios sa pagpanalangin sa atong mga kinabuhi. Kon ang usa ka propeta mamulong alang sa Dios, sama ra kini nga ang Dios ang namulong (tan-awa sa D&P 1:38). Ang mga propeta ania karon sa yuta sama sa karaan.

Ang pagpadayag alang sa tibuok Simbahan magagikan sa Presidente sa Ang Simbahan ni Jesukristo sa mga Santos sa Ulahing mga Adlaw, nga si Thomas S. Monson. Siya mao ang propeta sa Dios. Kon ang mga miyembro sa Simbahan maghisgot mahitungod sa “propeta,” sila nagpasabut sa Presidente sa Simbahan. Hinoon, adunay laing mga propeta sa yuta karon. Ang duha ka mga magtatambag ni Presidente Monson, si Presidente Henry B. Eyring ug Presidente Dieter F. Uchtdorf, mga propeta usab. Laing dose ka mga tawo—ang Korum sa Napulog Duha ka mga Apostoles—gitawag usab nga mga propeta.

Isip mga anak sa mahigugmaong Langitnong Amahan, makadawat usab kita og pagpadayag gikan Kaniya alang sa atong personal nga mga kinabuhi. Bisan usahay ang pagpadayag moabut pinaagi sa mga panan-awon, mga damgo, o mga pagbisita sa mga anghel, ang labing komon nga paagi nga makigsulti ang Dios kanato mao ang pinaagi sa mahilom nga espirituhanong mga pag-aghat sa Espiritu Santo. Pinaagi sa personal nga pagpadayag kita makadawat og kalig-on ug mga tubag sa atong mga pag-ampo.

Asa nato mabasa ang dinasig nga mga pagtulun-an sa moderno nga mga propeta?

  1. Ang Dokrtina ug mga Pakigsaad mao ang koleksyon sa mga pagpadayag nga gihatag sa modernong mga propeta. Makita kini sa internet sa www.scriptures.lds.org.

  2. Usa ka mensahe gikan sa Presidente sa Simbahan o usa sa iyang mga magtatambag ang i-imprinta kada bulan diha sa Liahona nga magazine (anaa sa pipila ka mga pinulongan sa LDS.org).

  3. “Ang Pamilya: Usa ka Pamahayag ngadto sa Kalibutan” ug ang “Ang Buhi nga Kirsto: Ang Pagpamatuod sa mga Apostoles” mao ang propetikanhong mga pamahayag sa kamatuoran mahitungod sa pamilya ug sa Manluluwas. Kining duha anaa sa LDS.org.

  4. Ang tanang mga sakop sa Unang kapangulohan ug sa Korum sa Napulog Duha ka mga Aposotles mamulong kada unom ka bulan sa kinatibuk-ang komperensya sa Simbahan. Basaha ang teksto o tan-awa ang mga video sa ilang mga pakigpulong sa www.conference.lds.org.

Unsaon man nato sa pagdawat og personal nga pagpadayag?

  1. Pagpuasa, pamalandong, ug pag-ampo alang sa giya.

  2. Pagbasa sa mga kasulatan. Mao kini ang mga paagi diin ang Langitnong Amahan makatubag sa atong mga pag-ampo ug mohatag nato og giya samtang ang Espiritu Santo motabang nato nga makasabut unsay atong gibasa.

  3. Pagsimba kada Dominggo ug, kon mahimo, tambong sa templo.

  4. Pagsunod sa mga kasugoan aron takus kamong modawat sa inspirasyon gikan sa Espiritu Santo.

Mga paghulagway sa litrato pinaagi ni David Stoker