Hangtud sa Sunod Natong Panagkita
Kinahanglan nga molahutay kita hangtud sa katapusan, kay ang atong tumong mao ang kinabuhing dayon sa atubangan sa atong Amahan sa Langit.
Akong mga kaigsoonan, puno ang akong kasingkasing sa atong pagtapos niining talagsaon nga kinatibuk-ang komperensya sa Simbahan. Espirituhanon kitang napakaon samtang naminaw kita sa tambag ug mga pagpamatuod niadtong miapil sa kada sesyon. Nakasiguro ko nga ako namulong alang sa tanang mga miyembro bisan asa sa dihang akong gipahayag ang pasalamat sa mga kamaturoan nga gitudlo kanato. Atong masubli ang mga pulong, nga makita sa Basahon ni Mormon, niadtong kinsa nakadungog sa sermon ni Haring Benjamin ug “misinggit sa usa ka tingog, nag-ingon: Oo, kami mituo sa tanan nga mga pulong diin ikaw namulong ngari kanamo; ug usab, kami nasayud sa ilang pagkatinuod ug kamatuoran, tungod sa Espiritu sa Ginoong Makagagahum.”1
Manghinaut ko nga mogahin kita og panahon sa pagbasa sa mga pakigpulong sa komperensya, nga i-imprinta sa Nobyembre nga isyu sa magasin nga Ensign, ug Liahona kay angay kini sa mainampingon natong pagtuon.
Pagkadakong panalangin nga kita nakahimo sa pagpundok dinhi, niining talagason nga Conference Center, sa kalinaw ug kahupayan ug kasiguroan. Kita adunay dili ordinaryo nga sibya sa komperensya, miabut tabok sa mga kontinente ug sa mga kadagatan ngadto sa mga tawo bisan asa. Bisan og layo kami gikan kaninyo, gibati namo ang inyong espiritu ug mopadala sa among gugma ug pasalamat kaninyo.
Sa among mga Kaigsoonan nga na-release niini nga komperensya, akong ipahayag ang kinasingkasing nga pasalamat kaninyong tanan sa inyong daghang mga tuig sa mahalaron nga pagserbisyo. Dili maihap ang mga napanalanginan tungod sa inyong kontribusyon sa buhat sa Ginoo.
Ang Tabernacle Choir ug ang uban pang mga choir nga miapil sa mga sesyon nakadalit og langitnong musika nga nakapalambo ug nakapatahum sa tanan nga nahitabo. Nagpasalamat ako kaninyo sa pagpakigbahin sa inyong mga talento ug mga abilidad sa musika.
Gimahal ug gidayeg nako ang akong matinud-anong mga magtatambag, si Presidente Henry B. Eyring ug Presidente Dieter F. Uchtdorf. Mga tawo gayud sila sa kaalam ug panabut, ug ang ilang pagserbisyo bililhon kaayo. Dili nako mahimo ang tanan nga gitawag nako nga akong buhaton kon wala ang ilang suporta ug tabang. Gimahal ug gidayeg nako ang akong mga Kaigsoonan sa Korum sa Napulog Duha ka mga Apostoles ug ang tanang mga korum sa Seventy ug sa Presiding Bishopric. Nangalagad sila sa walay paghinakog ug epektibo kaayo. Sa samang paagi akong ipahayag ang akong pasalamat alang sa mga babaye ug mga lalaki kinsa nagserbisyo isip kinatibuk-ang mga opisyales sa auxiliary.
Pagkabulahan nato nga nakabaton sa gipahiuli nga ebanghelyo ni Jesukristo. Nakahatag kini og tubag sa mga pangutana kon diin kita gikan, ngano nga kita ania dinhi, ug asa kita paingon kon molabay na gikan niini nga kinabuhi. Nakahatag kini og kahulugan ug katuyoan ug paglaum sa atong kinabuhi.
Nagpuyo kita sa masamok nga kalibutan, usa ka kalibutan nga daghan og mga hagit. Ania kita niini nga yuta aron atubangon ang atong indibidwal nga mga hagit kutob sa atong mahimo, sa pagkat-on gikan niini, ug sa pagbuntog niini. Kinahanglang molahutay kita hangtud sa katapusan, kay ang atong tumong mao ang kinabuhing dayon sa atubangan sa atong Amahan sa Langit. Nahigugma Siya kanato ug buot nga kita magmalampuson niini nga tumong. Motabang Siya kanato ug mopanalangin kanato kon kita motawag Kaniya sa atong mga pag-ampo, samtang kita magtuon sa Iyang mga pulong, ug samtang magsunod kita sa Iyang mga sugo. Niana makita ang kasiguroan; niana makita ang kalinaw.
Hinaut nga panalanginan kamo sa Dios, akong mga kaigsoonan. Nagpasalamat ako sa inyong mga pag-ampo para kanako ug para sa tanan nga mga General Authorities. Mapasalamaton gayud kami kaninyo ug sa tanan ninyong gibuhat sa pagpadayon sa gingharian sa Dios dinhi sa yuta.
Hinaut nga ang mga panalangin sa langit maanaa kaninyo. Hinaut nga ang inyong mga panimalay mapuno sa gugma ug pagtahud ug sa Espiritu sa Ginoo. Hinaut nga kanunay ninyong amumahan ang inyong mga pagpamatuod sa ebanghelyo, nga kini mahimo ninyong panalipod batok sa pag-ataki ni Satanas.
Nahuman na ang komperensya. Samtang kita mamauli sa atong mga panimalay, hinaut nga kita moabut nga luwas. Hinaut nga ang espiritu nga atong gibati dinhi magpabilin uban kanato samtang kita magbuhat sa mga butang nga atong gihimo kada adlaw. Hinaut nga magpakita kita og dugang nga kamabination sa usag usa, hinaut nga kita makita nga nagbuhat sa buhat sa Ginoo.
Gimahal ko kamo; nag-ampo ako alang kaninyo. Manamilit na ako ‘hangtud sa sunod natong panagkita unom ka bulan’ gikan karon. Sa pangalan sa atong Ginoo ug Manluluwas, gani si Jesukristo, amen.