« ផ្លូវរបស់អ្នកទៅកាន់ព្រះវិហារបរិសុទ្ធ » លីអាហូណា ខែ តុលា ឆ្នាំ ២០១០ ទំព័រ ៧២–៧៥
សម្រាប់កុមារ
ផ្លូវរបស់អ្នកទៅកាន់ព្រះវិហារបរិសុទ្ធ
តើអ្នកដឹងថាព្រះវិហារបរិសុទ្ធមួយណាដែលនៅជិតអ្នកបំផុតទេ ? សូមគូររូបភាពនៃព្រះវិហារបរិសុទ្ធនោះ ហើយព្យួរវានៅកន្លែងដែលអ្នកអាចមើលឃើញជារៀងរាល់ថ្ងៃ ។
ព្រះវិហារបរិសុទ្ធគឺជាដំណាក់របស់ព្រះអម្ចាស់ ។ វាគឺជាទីកន្លែងមួយដែលយើងអាចរៀនសូត្រអំពីព្រះវរបិតាសួគ៌ ចុះសេចក្ដីសញ្ញា ( ឬការសន្យា ) ជាមួយទ្រង់ ហើយទទួលពរជ័យដ៏មហិមា ។ នៅក្នុងព្រះវិហារបរិសុទ្ធ យើងធ្វើកិច្ចការសំខាន់ៗសម្រាប់ខ្លួនឯង និងសម្រាប់សមាជិកគ្រួសាររបស់យើងដែលបានទទួលមរណភាពទៅ ។ កិច្ចការដែលបានធ្វើឡើងនៅក្នុងព្រះវិហារបរិសុទ្ធ រួមមាន ពិធីបុណ្យជ្រមុជទឹកសម្រាប់មរណជន អំណោយទានពិសិដ្ឋ និងពិធីផ្សារភ្ជាប់ ។ ពិធីទាំងនេះត្រូវបានហៅថា ពិធីបរិសុទ្ធក្នុងព្រះវិហារបរិសុទ្ធ ។
អ្វីដែលកើតមានឡើងនៅក្នុងព្រះវិហារបរិសុទ្ធ
ពិធីបុណ្យជ្រមុជទឹកសម្រាប់មរណជន
នៅពេលអ្នកមានអាយុប្រាំបីឆ្នាំ នោះអ្នកអាចទទួលពិធីបុណ្យជ្រមុជទឹក និងពិធីបញ្ជាក់ជាសមាជិកម្នាក់នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ដូនតារបស់អ្នកជាច្រើនបានទទួលមរណភាពដោយមិនបានទទួលពិធីបុណ្យជ្រមុជទឹក និងពិធីបញ្ជាក់ឡើយ ។ ទោះជា រូបកាយរបស់ពួកគាត់បានស្លាប់ទៅហើយក៏ពិតមែន ប៉ុន្តែវិញ្ញាណរបស់គាត់នៅរស់ក្នុងពិភពវិញ្ញាណ ជាទីកន្លែងដែលពួកគាត់អាចទទួលការបង្រៀនពីដំណឹងល្អនៃព្រះយេស៊ូវគ្រីស្ទ ។
នៅពេលអ្នកមានអាយុ ១២ ឆ្នាំ អ្នកអាចទៅព្រះវិហារបរិសុទ្ធ ហើយជួយដល់ពួកគាត់ទាំងនេះដោយការទទួលពិធីបុណ្យជ្រមុជទឹក និងពិធីបញ្ជាក់ជំនួសពួកគាត់ ។ បន្ទាប់មក ពួកគាត់អាចជ្រើសរើសទទួលយក ឬបដិសេធចំពោះពិធីបុណ្យជ្រមុជទឹក និងពិធីបញ្ជាក់នោះបាន ។ អ្នកនឹងស្លៀកពាក់ពណ៌ស ទាំងអស់ នៅពេលអ្នកធ្វើពិធីបុណ្យជ្រមុជទឹកសម្រាប់មរណជន ដូចពេលដែលអ្នកធ្វើពិធីបុណ្យជ្រមុជទឹកសម្រាប់ខ្លួនឯងដែរ ។
សូមឲ្យឪពុកម្ដាយរបស់អ្នកជួយអ្នកធ្វើបញ្ជីឈ្មោះសមាជិកគ្រួសារដែលបានទទួលមរណភាពទៅដោយពុំបានទទួលពិធីបុណ្យជ្រមុជទឹកនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ សូមស្វែងរកថាតើមាននរណាម្នាក់បានទៅព្រះវិហារបរិសុទ្ធដើម្បីធ្វើពិធីបុណ្យជ្រមុជទឹកជូនពួកគាត់ហើយឬនៅ ។
អំណោយទានពិសិដ្ឋ
ពរជ័យដ៏ធំមួយនៅក្នុងព្រះវិហារបរិសុទ្ធ គឺជាអំណោយទានពិសិដ្ឋ ។ អំណោយទានពិសិដ្ឋ មានន័យថាជា « អំណោយ » ។ នៅពេលអ្នកទទួលអំណោយទានពិសិដ្ឋរបស់អ្នក នោះអ្នកនឹងរៀនសូត្របន្ថែមទៀតពីផែនការសង្រ្គោះ ហើយចុះសេចក្ដីសញ្ញានឹងព្រះវរបិតាសួគ៌ ។ សេចក្ដីសញ្ញាទាំងឡាយគឺជាសេចក្តីសន្យា ដែលយើងនឹងធ្វើជាមួយព្រះវរបិតាសួគ៌ ។ នៅពេលអ្នករក្សាសេចក្ដីសញ្ញាទាំងនោះ នោះអ្នកបានរៀបចំខ្លួនទៅរស់នៅជាមួយនឹងព្រះវរបិតាសួគ៌ និងព្រះយេស៊ូវគ្រីស្ទនៅថ្ងៃណាមួយ ។
នៅក្នុងព្រះវិហារបរិសុទ្ធ គឺមានបន្ទប់ដ៏ស្រស់ស្អាតមួយ ហើយពោរពេញដោយសេចក្ដីសុខសាន្ត មានឈ្មោះថា បន្ទប់សេឡេស្ទាល ។ នៅក្នុងបន្ទប់សេឡេស្ទាលនោះ យើងនឹងទទួលអារម្មណ៍ថា នៅជិតព្រះវរបិតាសួគ៌ និងព្រះយេស៊ូវ គ្រីស្ទ ហើយយើងនឹងទទួលបាននូវអារម្មណ៍នៃផ្នែកដ៏តូចមួយនៃទិដ្ឋភាពរស់នៅជាមួយនឹងទ្រង់ទាំងទ្វេរ នៅក្នុងនគរសេឡេស្ទាល ។
ពិធីផ្សារភ្ជាប់សម្រាប់ពេលនេះ និងដ៏នៅអស់កល្បជានិច្ច
នៅពេលបុរស និងស្ត្រីម្នាក់រៀបអាពាហ៍ពិពាហ៍នៅក្នុងព្រះវិហារបរិសុទ្ធ នោះពួកគេបានលុតជង្គង់ចុះនៅមុខអាសនាមួយ ហើយត្រូវបានផ្សារភ្ជាប់សម្រាប់ពេលនេះ និងដ៏នៅអស់កល្បអស់កាលជានិច្ច ។ នេះមានន័យថាពួកគេ និងកូនចៅរបស់ពួកគេអាចរួមរស់ជាមួយគ្នា ជាគ្រួសារដ៏នៅអស់កល្បជានិច្ចមួយ ។ សូមរៀបចំផែនការរៀបអាពាហ៍ពិពាហ៍នៅក្នុងព្រះវិហារបរិសុទ្ធនាថ្ងៃណាមួយ ។ នេះគឺជាពរជ័យដ៏ធំជាងគេបំផុតនៅក្នុងព្រះវិហារបរិសុទ្ធ ។
ប័ណ្ណចូលព្រះវិហារបរិសុទ្ធ
ព្រះវិហារបរិសុទ្ធ គឺជាទីកន្លែងមួយដ៏បរិសុទ្ធ ។ ប៊ីស្សព និងប្រធានសាខាទាំងឡាយត្រូវធ្វើឲ្យប្រាកដថា អ្នកទាំងឡាយណាដែលចូលទៅព្រះវិហារបរិសុទ្ធបានរៀបចំខ្លួន និងមានភាពស័ក្ដិសម ។ ពីមុនអ្នកទៅព្រះវិហារបរិសុទ្ធ អ្នកនឹងមានការសម្ភាសន៍ពិសេសមួយជាមួយនឹងប៊ីស្សព ឬប្រធានសាខារបស់អ្នក ។ គាត់នឹងសួរថាតើអ្នកមានទីបន្ទាល់ពីសាសនាចក្រ, រក្សាព្រះបញ្ញត្តិទាំងឡាយ, គាំទ្រដល់ថ្នាក់ដឹកនាំសាសនាចក្រ, គោរពច្បាប់គតិបណ្ឌិត, បង់ដង្វាយមួយភាគក្នុងដប់ និងមានភាពស្មោះត្រង់នៅក្នុងគ្រប់កិច្ចការដែលអ្នកធ្វើ និងនិយាយដែលឬទេ ។ គាត់នឹងជួយអ្នកឲ្យដឹងនូវអ្វីដែលត្រូវធ្វើដើម្បីមានភាពស័ក្ដិសមចូលទៅក្នុងព្រះវិហារបរិសុទ្ធ ។
សូមរៀបចំខ្លួនឥឡូវនេះ ដើម្បីចូលទៅក្នុងព្រះវិហារបរិសុទ្ធ
ព្រះវរបិតាសួគ៌បានប្រទានពរជ័យជាច្រើនដល់អស់អ្នកណាដែលរស់នៅដោយសុចរិត ហើយទៅព្រះវិហារបរិសុទ្ធ ។ វាគឺជាការសំខាន់ដើម្បីរៀបចំខ្លួនចូលទៅក្នុងព្រះវិហារបរិសុទ្ធ ខណៈដែលអ្នកនៅក្មេង ។
ព្រះវរបិតាសួគ៌សព្វព្រះទ័យនឹងអ្នក ហើយសព្វព្រះទ័យឲ្យអ្នកទទួលបាននូវពរជ័យនៃព្រះវិហារបរិសុទ្ធ ។ ទ្រង់នឹងប្រទានពរដល់អ្នកចំពោះការធ្វើពិធីបរិសុទ្ធនៅក្នុងព្រះវិហារបរិសុទ្ធសម្រាប់ខ្លួនឯង និងអ្នកដទៃ ។ ទោះបីជា អ្នកមិនទាន់មានលទ្ធភាពចូលទៅក្នុងព្រះវិហារបរិសុទ្ធនៅពេលនេះក្ដី អ្នកក៏អាចទៅលេងនៅបរិវេណព្រះវិហារបរិសុទ្ធ ហើយទទួលអារម្មណ៍នូវព្រះវិញ្ញាណដែលមាននៅទីនោះដែរ ប្រសិនបើមានព្រះវិហារបរិសុទ្ធមួយនៅជិតទីនោះ ។ អ្នកក៏អាចតាំងរូបភាពព្រះវិហារបរិសុទ្ធនៅក្នុងគេហដ្ឋានរបស់អ្នក ដើម្បីរំឭកអ្នកពីសារៈសំខាន់នៃព្រះវិហារបរិសុទ្ធផងដែរ ។ សូមរស់នៅដោយសុចរិត ដើម្បីអ្នកមានភាពស័ក្ដិសមចូលទៅក្នុងដំណាក់របស់ព្រះអម្ចាស់ ។