Iren Mahsen en Presidensi Keieu, Mahs 2010
Soupeikasal ong Me Pwung
Ehu kahrepe kan en mour wet iei en kamehlel ong Koht me kitail pahn kolokol Sapwellime kosonned akan ansou me soahng wet pahn anahne kitail en soupeikasal. Kitail pweidahr nan kamehlel wet nan sapwen ngehn. Ahpw silikis ehu en tohn lahng uhwengada koasoandi me irail pahn kamehlel nan mour en sampah wasa me re kakete sohte pweida.
Mwohn atail ipwidi, kitail patohwan Koht Sahm oh Nah, Sises Krais. Kitail kin kak patohwan Ira oh rong Ira ni Ara ketin padahk oh ketin kangoange kitail. Met mie mehkot me pere atail madamadau kan oh atail kak en tamando. Sehdan, semen likamw kan, ahniki ahnsou mwahu en poweikitaildi pwe kitail anahne kilang uhdahn ihs kitail sang ni pwoson, oh ni ahnsouohte paliwaratail kan kin kihieng kitail nan kasongosong en paliwar oh luwet en paliwar.
Kitail ahniki sawas kaselel pwehn kihieng kitail kehlail en soupeikasal nan mour wet. Me keieu lap sang koaros iei Tomw en Sises Krais. Pwehki me E ketin wia, dihp kan kak wideudsang nan pihl kan en pepdais. Kitail kak pwurehng alehdi kapai wo ni atail kin alehda kamadipw sarawi ni pwoson oh ni mohngiong en koluhla.
Kisakis kan en pali ngehn wia pil ehu sawas tohrohr. Kitail kin alehdi Ngehn en Krais ni ipwidi. Met kin kihieng kitail kehlail en ese ansou me pilipil ehu me kitail ahniki pahn kahreikitaillahng nan ahl kohlahng mour soutuk. Pwuhk sarawi kan wia ehu mehn kaweid tengeteng ni ansou me kitail kin wadek ni Ngehn Sarawi eh kin ketin ieiang kitail.
Ngehn Sarawi kin mweidehng kitail en kasalehda kaping kalahngan oh peki sawas ni kapakap ni dehde oh koapwoaroapwoar me kitail ahniki mahs rehn Samatail Nanleng oh me kitail pahn pwurehng ahniki ni ansou me kitail pahn pwurala Reh. Koasoakoasoaipene wet ong rehn Koht kin sewese kihlahsang masepwehk nan atail mohngiong kan ni ansouohte me e kin kairada pwoson oh limpoak ong Sahm Nanleng oh Sises Krais.
Priesthood sarawi kin kihieng kitail kehlail ni atail papah. Sang ni tiahk sarawi kan kitail kin alehdi kehlail en papah sapwellimen Koht serihkan oh en powehdi ahng en me suwed kan. Ni ansou me E kin ketin malipe kitail en papah, kitail ahniki inou me ihs sohte lipilipil me pahn aleikitailda, E pahn pil ket wasao, pwe E pahn ketin tiengla mwohtail. E pahn ket ni palimaun oh ni palimeing, oh sapwellime Ngehn pahn ket nan mohngiongitail, oh sapwellime tohnleng kan pahn kapil kitail, pwehn pwekkitailda (Tehk D&C 84:88).
Soukohp Joseph Smith ahniki kahrepe mehlel en masepwehk ni eh wie papah. Ahpw Koht ketkihieng ih kehlail en soupeikasal iangahki kamehlel wet en karasaras en Mwohnsapwo:
Ma ke pahn lekideklong nan pwoahr, de nan pehn me kin kemehla aramas, oh koasoandihieng en kamakamala; ma ke pahn lekideklong nan wasa keieu loal; de ma koaros me uhweng uhk patpene pwehn pelian uhk; ma kisinieng kehlail pahn wiahla ahmw imwintihti; ma nanleng pahn rotorotala, oh koaros kisiniei de kisinieng de sohte lipilipil pahn patpene pwehn perehla ahmw ahl; oh mwohn mehkoaros, ma wenihmw kan en ehl pahn sarahpeseng pwehn kanguhkala, ese met, nei pwutak, me koaros mepwukat pahn kihieng uhk irair en mour oh pahn mwahu ong uhk.
Sapwellimen Aramas ketdihlahier pahn koaruhsiehn. Ia duwen kowe, ke lapalap sang ih? (Tehk D&C 122:7–8.
Koht ketkihieng kitaillehr depalahn sawas pwehn sewese pwakiala masepwehk oh kihieng kitail kehlail en dehr peikasal, sohte lipilipil me kitail pahn sohpai nan mour wet. Ni atail pahn rapahki Sapwellime sawas, E pahn ketin pwekkitailda ong mour soutuk me kitail rapahki.
© 2010 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/09. Kamanaman ong kawehwe: 6/09. Kawehwehpen First Presidency Message, March 2010. Pohnpeian. 09363 885
Padapadahk sang Iren Mahsen Wet
Sises Krais, Sounpadahk Lapalapo, kin kalapw kihda peidek kan pwehn kangoange aramas en medewe oh doadoahngki iren padahk kan me E ketin padahngki. … Sapwellime peidek kan kangoange madamadau, kilenglong pein loalle, oh inou” (Teaching, No Greater Call [1999], 68). Medewehda wiahda oh kihda ekei peidek pwehn sewese aramas kan wehwehki oh doadoahngki mehlel kan me padahk nan iren mahsen wet. Ni karasaras, komw kak peidek, “soangen sawas dah me Koht ketkihwei pwehn kihsang masepwehk oh kihieng komwi kehlail en soupeikasal?” de “Ia duwen Koht eh ketin sewese komwi powehdi dah me komw kin masak?” Kangoange aramas akan en medewe mahs arail pasapeng kan mwohn arail pahn lokaia.