Al im Bwebwenato
Ke lieo riiū, Sandra, im na kar kūr n̄an jerbal ilo South Africa Burban Mijen, kōm kar jino kapikote juōn jerbal in jiban̄ an jukjukin pād. Ikar juōn uwaan ilo Mormor Tabernacle Choir iumwin 20 iio ko, im riiū, juōn rijipan̄ in laibrere, ej eddoik iien bwebwenato ilo juōn elmentōre jikuul. Ke mijen būrejtōn eo ekar lōmnak n̄an kōbelļo̧k juōn jerbal in mijenede ilo juōn jikin iturin ijo, kōm kar jelā menin en iien emman aō am in.
Kōm kar loļo̧k jikin eo im kar loe bwe ekar ejjeļo̧k laibrere ilo jikuul ko ie, ewōr juōn laibrere an jukjuk in pād eo. Jodikdik in elder ro rōkar ba kajiem n̄an ribōk eddo in laibrere eo. Kōm kar kōmeleleik n̄an lieo ke kōm kōnaan kōm̧m̧ane juōn iien bwebwenato wiik otemjej n̄an ajri ro. Ekar jab kanoj erra ie, ak ālkin jet iien an lōmnak kake ekar erra im tilmake ļo̧k ennaan eo im kōm naaj kajeoon̄.
Ilo raan eo moktata lallem ajri rōkar pād. Ejtoļo̧k wōt im elōn̄ rōkar itok. Ālkin jet allōn̄ kōm kar kobaik tok jipan̄ an juōn jiron̄, juōn ruoktak kaal, eo ekar kōnono kajin Balle emman im Zulu. Jon̄an ritok ro n̄an iien bwebwenato in ekar eddokļo̧k, im ribōk eddo eo im jine im jemā ro rōkar ellowetak kake ta eo ekar waļo̧k.
Armej in Zulu emman al ippāer, innem kōm kar kobaik al ko repidodo im wanlōn̄ wanlal ilo kōnono ko n̄an iien bwebwenato eo am. Ilo jemļo̧kin mijen eo am, kōm kar kōm̧m̧an̄e ruo ak jilu mwen̄ōn ko kōn al im iien bwebwebato ilo juōn wiik n̄an kabwe elōn̄ ļo̧k jān 100 ajri ro rōkar delon̄. Ta kar juōn jeramman ekar ke kōm kar loe ajri ro ijoko im rōkar jino al al ko am̧ im anōki eoon ko n̄an kōm.
Bar juōn jeramman ekar waļo̧k ilo iien jerbal eo am ijin. Ilo an uwaan ilo Kabun̄ eo ijo kar eddokļo̧k im kōm kar aikuji juōn jikin n̄an am kōm̧m̧an̄e kweļo̧k ko am ilo Jabot., ribōk eddoon laibrere eo kōnaan bwe kōm̧m̧in kōjerbale laibrere eo ilo ejjeļo̧k wōnaan.
Kōm lukkun jeramman bwe Irooj ekar jipan̄ kōm loe juōn waween n̄an kōjerbale telan ko am, jerbal n̄an jukjuk in pād eo, im jipan̄ kōpelļo̧k juōn jikin n̄an mijen.