Օգտագործելով աղոթքի երկնային պարգևը
Աղոթքը յուրաքանչյուր հոգուն մեր Երկնային Հոր կողմից շնորհված երկնային պարգև է:
Այս համաժողովը սկսվեց Մորմոնական Թաբերնաքլի Երգչախմբի «Աղոթքի քաղցր ժամը» դասական սքանչելի հիմնի խորապես հուզիչ կատարմամբ: Երգի ծանոթ խոսքերը հիշեցնում են մեզ, որ աղոթքը հանգստի, սփոփանքի և պաշտպանության աղբյուր է, որը մեզ պատրաստակամորեն շնորհել է մեր սիրառատ և գթառատ Երկնային Հայրը:
Աղոթքի պարգևը
Աղոթքը յուրաքանչյուր հոգուն մեր Երկնային Հոր կողմից շնորհված երկնային պարգև է: Պատկերացնո՞ւմ եք, բացարձակ Գերագույն Էակը, ամենագետ, ամենատես, ամենազոր անձնավորությունը, խրախուսում է ձեզ և ինձ, որքան էլ որ մենք աննշան ենք, խոսել Իր հետ, որպես մեր Հայր: Որովհետև Նա փաստորեն գիտի, թե որքան շատ ունենք Նրա առաջնորդության կարիքը, Նա պատվիրում է. «Դու պիտի աղոթես` ինչպես բարձրաձայն, այնպես էլ քո սրտում. այո, ինչպես աշխարհի առաջ, այնպես էլ գաղտնի, ինչպես հրապարակավ, այնպես էլ առանձին»:1
Նշանակություն չունի մեր իրավիճակը` խոնարհ ենք թե գոռոզ, աղքատ ենք թե հարուստ, ազատ ենք թե գերված, ուսյալ ենք թե տգետ, սիրված ենք թե լքված, մենք կարող ենք դիմել Նրան: Մեզ անհրաժեշտ չէ ժամադրություն նշանակել: Մեր աղոթքը կարող է լինել համառոտ, կամ կարող է զբաղեցնել անհրաժեշտ ողջ ժամանակը: Այն կարող է լինել սիրո և երախտագիտության երկարաձիգ արտահայտություն կամ օգնության հրատապ աղերս: Նա արարել է անթիվ տիեզերքներ և բնակեցրել դրանք աշխարհներով, սակայն մենք կարող ենք անհատապես խոսել Նրա հետ և Նա միշտ կպատասխանի:
Ինչպե՞ս պետք է աղոթենք:
Մենք աղոթում ենք մեր Երկնային Հորը Նրա Սիրելի Որդու` Հիսուս Քրիստոսի սրբազան անունով: Աղոթքը շատ արդյունավետ է, երբ մենք աշխատում ենք լինել մաքուր և հնազանդ, արժանի դրդապատճառներով և պատրաստ ենք կատարել այն, ինչ Նա խնդրում է: Խոնարհ, վստահող աղոթքը բերում է առաջնորդություն և խաղաղություն:
Մի անհանգստացեք ձեր զգացմունքները ոչ սահուն արտահայտելու համար: Ուղղակի խոսեք ձեր գթառատ, ըմբռնող Հոր հետ: Դուք Նրա թանկագին զավակն եք, ում Նա սիրում է կատարյալ ձևով և ցանկանում է օգնել: Երբ դուք աղոթում եք, իմացեք, որ Երկնային Հայրը մոտ է, և Նա լսում է:
Աղոթքի բարելավման համար կարևոր է սովորել ճիշտ հարցեր տալ: Աշխատեք ձեր ցանկացած բաները խնդրելու փոխարեն ազնվորեն ձգտել իմանալ, թե Նա ինչ է կամենում ձեզ համար: Հետո, երբ իմանաք Նրա կամքը, աղոթեք, որ առաջնորդվեք, որ ուժ ունենաք այն կատարելու համար:
Եթե երբևէ հեռացած զգաք մեր Հորից, դա կարող է լինել բազմաթիվ պատճառներով: Ինչ էլ լինի պատճառը, երբ շարունակեք օգնություն խնդրել, Նա կառաջնորդի ձեզ անել այն, ինչը կվերականգնի ձեր վստահությունը, որ Նա մոտ է: Աղոթեք նույնիսկ, երբ ցանկություն չունեք աղոթելու: Երբեմն, երեխայի նման դուք կարող է սխալ գործեք և զգաք, որ չեք կարողանում մոտենալ ձեր Հորը այդ խնդրով: Դա այն դեպքն է, երբ դուք ամենաշատը կարիք ունեք աղոթելու: Երբեք չպիտի զգաք, թե աղոթելու համար խիստ անարժան եք:
Հետաքրքիր է, թե երբևէ մենք իսկապես կկարողնա՞նք հասկանալ աղոթքի հզոր ուժը, մինչև չհանդիպենք ցնցող, հրատապ խնդրի և հասկանանք, որ մենք անզոր ենք լուծելու այն: Այդ ժամանակ մենք դառնում ենք դեպի մեր Հայրը խոնարհ հասկացողությամբ, որ մենք լիովին կախված ենք Նրանից: Օգնում է, երբ առանձնացված մի տեղ ենք գտնում, որտեղ մեր զգացմունքները կարող ենք արտահայտել բարձրաձայն` այնքան երկար և այնքան ուժգին, որքան պետք է:
Ես արել եմ դա: Մի անգամ այնպիսի մի փորձառություն ունեցա, որն ինձ մեծ խռովմունք պատճառեց: Դա ոչ մի կապ չուներ անհնազանդության կամ օրինազանցության հետ, այլ կապված էր կենսական կարևորւթյուն ունեցող մարդկային հարաբերության հետ: Որոշ ժամանակ ես դուրս թափեցի սիրտս թախանձագին աղոթքով: Սակայն փորձելով ողջ իմ զորությամբ, ես ելք չգտա, ներքին հզոր խռովվածությանս համար անդորր չգտա: Ես օգնություն աղերսեցի այն Երկնային Հորից, որին ճանաչում և լիովին վստահում էի: Ես չէի կարողանում տեսնել ճանապարհ, որը կտար այն հանգստությունը, որն ընդհանրապես վայելել եմ որպես իմ օրհնություն: Քունը հաղթեց ինձ: Երբ ես արթնացա լիակատար խաղաղության մեջ էի: Նորից ծնկի իջա հանդիսավոր աղոթքով և հարցրեցի. «Տե՛ր, ինչպե՞ս արվեց սա»: Սրտումս ես գիտեի պատասխանը` Նրա սիրո և Նրա hոգատարության շնորհիվ: Այսպիսին է գթառատ Հորն ուղղված անկեղծ աղոթքի զորությունը:
Ես շատ բան եմ սովորել աղոթքի մասին` լսելով մեր ժողովներում Նախագահ Հինքլիի աղոթքները: Դուք ևս կարող եք սովորել նրանից` ուշադրությամբ ուսումնասիրելով ողջ աշխարհի Հոր զավակների համար 2001 թվականի հոկտեմբերի համաժողովի փակման ժամանակ այդ բացառիկ հասարակավ հղած աղոթքը: Նա աղոթում էր իր սրտից, ոչ թե նախապատրաստված ձեռագրից: (Այդ աղոթքը տրված է այս ուղերձի վերջում:)2
Ուսումնասիրեք այդ աղոթքը և դուք կգտնեք, որ այնտեղ չկան զուր կրկնողություններ, ուրիշների վրա տպավորություն գործելու կեցվածք, ինչը երբեմն տեղի է ունենում: Նա հասարակ բառերը վարպետորեն է միացնում միմյանց: Նա աղոթում է որպես խոնարհ, վստահող որդի, որը լավ գիտի Իր սիրելի Երկնային Հորը: Նա իսկապես վստահում է, որ Նրա պատասխանը կգա, երբ խիստ անհրաժեշտ կլինի: Յուրաքանչյուր աղոթք կազմվում է իր ուրույն նպատակով` հստակ նշելով, թե ինչը լուծման կարիք ունի, ինչպես նաև ակնհայտ որոշակի օրհնությունների համար առատ երախտագիտության արտահայտմամբ: Նրա ինքնաբուխ աղոթքները նման են մշակված գոհարների, ի լուռ վկայություն այն բանի, թե աղոթքն ինչպիսի հիմնական տեղ է գրավել նրա կյանքում շատ-շատ տարիների ընթացքում:
Ինչպե՞ս են պատասխանվում աղոթքները:
Մի քանի ճշմարտություններ, թե ինչպես են աղոթքները պատասխանվում, կարող են օգնել ձեզ:
Հաճախ, երբ աղոթում ենք որևէ կարևոր հարցում օգնություն ստանալու համար, Երկնային Հայրը սովորաբար տալիս է թեթևակի հուշումներ, որոնք մեզանից պահանջում են մտածել, հավատք գործադրել, աշխատել, երբեմն պայքարել, հետո գործել: Դա քայլ առ քայլ գործընթաց է, որը մեզ ուժ է տալիս տեսնել ոգեշնչված պատասխանները:
Ես հայտնաբերել եմ, որ այն, ինչ հաղորդակցության մեջ երբեմն թվում է անանցանելի արգելապատ, վստահությամբ կատարված մի հսկայական քայլ է: Հազվադեպ կարող է լրիվ պատասխանը միանգամից ստանաք: Այն կտրվի ամեն անգամ մի հատված, փոքրիկ փաթեթներով, որպեսզի դուք աճեք կարողությամբ: Քանի որ յուրաքանչյուր հատվածին հավատքով եք հետևում, ձեզ կտրվեն ուրիշ հատվածներ, մինչև որ կունենաք լրիվ պատասխանը:
Այդ ձևը պահանջում է ձեզանից հավատալ մեր Հոր պատասխանելու կարողությանը: Չնայած երբեմն շատ դժվար է, դա բերում է անհատական նշանակալի աճ:
Նա միշտ կլսի ձեր աղոթքները և անպայման կպատասխանի դրանց: Այնուամենայնիվ, Նրա պատասխանները հազվադեպ կգան, երբ դուք ծնկի իջած աղոթեք, նույնիսկ, երբ աղերսեք անմիջական պատասխան: Ավելի շուտ Նա կհուշի ձեզ խաղաղ պահերին, երբ Հոգին կարող է ամենաարդյունավետ ձևով ազդել ձեր մտքի և սրտի վրա: Հետևաբար, դուք պետք է գտնեք խաղաղ պահեր` զանազանելու, երբ եք հրահանգավորվում և զորացվում: Նրա այս եղանակը ստիպում է ձեզ աճել:
Նախագահ Դեյվիդ Օ. Մակքեյը վկայել է. «Ճիշտ է, որ մեր աղոթքների պատասխանները միշտ չէ որ կարող են գալ ուղղակիորեն և տվյալ պահին, ոչ էլ այն ձևով, որ մենք ենք սպասում, բայց դրանք իսկապես գալիս են և գալիս են այն պահին և այն ձևով, որը լավագույնն է նրա օգտի համար, ով աղոթել է»:3 Եղեք շնորհակալ, որ երբեմն Աստված թողնում է, որ դուք նախքան պատասխան գալը պայքարեք երկար ժամանակ: Ձեր բնավորությունը կկոփվի, ձեր հավատքը կմեծանա: Այդ երկուսի միջև կապ կա` որքան ավելի մեծ է ձեր հավատքը, այնքան ավելի ուժեղ է ձեր բնավորությունը, իսկ զորացած բնավորությունը մեծացնում է ձեր ունակությունը` մինչև անգամ գործադրելու ավելի ուժեղ հավատք:
Երբեմն Տերը կպատասխանի ձեզ, նախքան դուք կխնդրեք Նրան: Սա կարող է լինել, երբ դուք անտեղյակ եք վտանգին կամ կատարում եք սխալ բան, որը ձեր կարծիքով ճիշտ է:
Այնքան դժվար է, երբ որևէ բանի վերաբերյալ անկեղծ աղոթքը, որը դուք շատ եք ցանկանում, չի պատասխանվում այն ձևով, որ դուք եք կամենում: Դժվար է հասկանալ, թե ինչու ձեր հնազանդ կյանքի խորն ու անկեղծ հավատքի գործադրումը չի բերում ցանկալի արդյունք: Փրկիչը սովորեցրել է. «Ինչ որ խնդրեք Հորը` իմ անունով, կտրվի ձեզ, այն, ինչը նպատակահարմար է ձեզ համար»:4 Երբեմն ժամանակի ընթացքում դժվար է զանազանել, որն է լավագույնը կամ նպատակահարմարը ձեզ համար: Ձեր կյանքն ավելի հեշտ կլինի, երբ դուք ընդունեք, որ ինչ Աստված է անում ձեր կյանքում, ձեր հավերժական կյանքի բարիքի համար է:
Ձեզ խնդրվում է սպասել ձեր աղոթքների պատասխանին:5 Հնազանդվեք Վարդապետի խորհրդին «քննե[ք] այն [ձեր] մտքում»:6 Հաճախ դուք լուծման մասին մտածելիս, երբ հաստատում որոնեք, թե ձեր պատասխանը ճիշտ է, թե ոչ, կգա օգնություն: Դա կարող է լինել ձեր աղոթքների միջոցով կամ զգացողություն Սուրբ Հոգուց և երբեմն էլ ուրիշների միջամտության միջոցով:7
Օլիվեր Քաուդերիին տրված այս առաջնորդությունը աղոթքի վերաբերյալ նույնպես կարող է օգնել ձեզ. «Ահա … դու կարծում էիր, որ ես պիտի տայի քեզ, երբ դու միտք չարեցիր, այլ միայն խնդրեցիր ինձ …
Դու պետք է քննես այն քո մտքում. հետո … հարցնես, թե արդյոք դա ճիշտ է, և եթե դա ճիշտ լինի, … կուրծքդ կայրվի … ուստի, դու պիտի զգաս, որ դա ճիշտ է»:8
Այդ ժամանակ պատասխանը գալիս է որպես զգացողություն համոզվածության հետ միասին: Փրկիչը սահմանում է երկու տարբեր ուղիներ. «Ես կասեմ քեզ քո մտքում և քո սրտում, Սուրբ Հոգով»:9
Պատասխանները մտքում և սրտում ուղերձներ են Սուրբ Հոգուց մեր հոգիներին: Ինձ համար պատասխանը մտքում շատ որոշակի է` թելադրվող խոսքերի նման, մինչդեռ պատասխանը սրտում ընդհանրացված է` ավելի շատ աղոթելու զգացման նման:10
Հետո Տերը պարզաբանում է. «Բայց եթե [այն, ինչ դու խնդրում ես] ճիշտ չլինի դու կունենաս մտքի ընդարմացում»:11 Դա ինձ համար տագնապի, անհանգստության զգացում է:
Օլիվեր Քաուդերիին ուսուցանվեց մեկ այլ ուղի, որով գալիս են դրական պատասխաններ. «Խաղաղություն չխոսեցի՞ ես քո մտքին այդ հարցի վերաբերյալ»:12 Խաղաղության զգացումը ամենատարածված հաստատող վկայության զգացումն է, որը ես անձնապես զգում եմ: Երբ ես շատ անհանգստացած էի մի կարևոր հարցի կապակցությամբ, պայքարելով լուծել այն առանց հաջողության, ես շարունակեցի այդ ջանքերը հավատքով: Հետագայում ողջ էությունս պարուրող խաղաղություն համակեց ինձ` հանգստացնելով մտահոգություններս, ինչպես Նա է խոստացել:
Որոշ թյուրըմբռնումներ աղոթքի վերաբերյալ կարելի է պարզաբանել` հասկանալով, որ սուրբ գրքերը սահմանում են սկզբունքներ արդյունավետ աղոթքի համար, բայց դրանք չեն հավաստում, երբ կտրվի պատասխան: Փաստորեն, Նա կպատասխանի երեք ուղիներից մեկով: Առաջինը դուք կարող եք զգալ խաղաղություն, հանգստություն և համոզվածություն, որոնք հաստատում են, որ ձեր որոշումը ճիշտ է: Կամ երկրորդը, դուք կարող եք զգալ տագնապի զգացում, մտքի ընդարմացում, որը կնշանակի, որ ձեր որոշումը սխալ է: Կամ երրորդը, և սա դժվար ուղին է, դուք ոչ մի պատասխան չեք կարողանում զգալ:
Ի՞նչ եք անում, երբ խնամքով պատրաստվել եք, ջերմեռանդորեն աղոթել, բավականին ժամանակ սպասել եք պատասխանի և դեռ չեք զգում պատասխան: Դուք գուցե ցանկանաք շնորհակալություն հայտնել, երբ դա տեղի է ունենում, քանի որ դա ցույց է տալիս, որ վստահում եք Նրան: Երբ ապրում եք արժանի և ձեր ընտրությունը Փրկչի ուսմունքների համաձայն է և դուք պետք է գործեք, առաջ գնացեք վստահությամբ: Երբ դուք զգայուն եք Հոգու հուշումների հանդեպ, երկու բաներից մեկը անպայման տեղի կունենա պատշաճ ժամանակին. կամ մտքի ընդարմացում, ցույց տալով ոչ ճիշտ ընտրություն, կամ խաղաղություն կամ էլ կրծքի այրում կզգաք` հաստատելով, որ ձեր ընտրությունը ճիշտ է: Երբ արդար եք ապրում և գործում վստահորեն, Աստված թույլ չի տա, որ դուք շատ հեռուն գնաք առանց նախազգուշացնելու ձեզ, եթե դուք սխալ որոշում եք ընդունել:
Երախտագիտություն աղոթքի պարգևի համար
Երախտագիտությունն աղոթքի կարևոր կողմն է: Հիսուսը հայտարարեց. «Եվ ոչնչով մարդ չի վիրավորում Աստծուն … բացի նրանցից, ովքեր չեն խոստովանում նրա ձեռքը բոլոր բաներում և չեն հնազանդվում նրա պատվիրաններին»:13 Երբ մենք խորհում ենք աղոթքի անզուգական պարգևի մասին և անսահման օրհնությունների մասին, որոնք հորդում են դրանից, անկեղծ շնորհակալությամբ է լցվում մեր միտքն ու սիրտը` դառնալով գոհաբանության հեղեղ: Ուստի, միթե՞ մենք անընդհատ և խորապես չպետք է մեր անսահման երախտագիտությունն արտահայտենք մեր սիրելի Հորը, մեր կարողության չափով, աղոթքի երկնային պարգևի և Նրա պատասխանների համար, որոնք բավարարում են մեր կարիքները միևնույն ժամանակ խթանելով մեզ աճել:
Ես վկայում եմ, որ Երկնային Հայրը միշտ կպատասխանի ձեր աղոթքներին այն ձևով և այն ժամանակ, որը լավագույնը կլինի ձեր հավերժական բարիքի համար: Հիսուս Քրիստոսի անունով, ամեն: