Koapworopwor me Pahn Pweida
Koapworopwor wia kisakis momour ehu, kisakis ehu me kin keirida ni atail kin kalaudehla atail pwoson Sises Krais.
Riei souleng kan koaros nan sampah, ni atail pahn tapiada ansou kesempwal en tiepene lap wet, nanleng pahn udahn ritida ong kitail. Kitail pahn karonge mahsen en Kauno sang Sapwellime ladu kan; kitail pahn kehn kaweid, marain, [oh] kansenamwahu” sang Ngehn Sarawi, oh atail pwoson pahn kehlailda.
Sounpar siluh samwalahro, Preseden Russell M. Nelson tapikihda kapokon lapo mahsen pwukat: “Kaudiahl mwakelekel ong peidek kan nan mohngiongomw pahn kahrehiong kapokon wet ah pahn kohwei mwowe oh sohte pahn kak manoknokla. Ma kumwail saikinte rapahki kaweid sang Ngehn Sarawi pwehn sewesei kumwail en rong mwahu dahme Kauno ketin kupwurki kumwail en rong nan rahn riau pwukat, I lukei kumwail en wia met. Menlau wiahki kapokon wet ehu ansou en medewe mwahu padahk kan sang Kauno rehn Sapwellime ladu kan.“
Pwuhksarawi kan kihpene mahsen siluh me inenen manaman: pwoson, koapworopwor, limpoak. Kisakis en koapworopwor iei endaumen me sohte pweipwei sang rehn Koht.
Lepin lokaia koapworopwor kin doadoahkong soahng tohto me kitail inengieng en wiawi. Karasape, “I koapworopworki me e sohte pahn ketou,“ de “I koapworopworki atail pwihn pahn kana.“ I men koasoia duwen atail doadoahk sarawi oh koapworopwor soutuk me poahsoanki Sises Krais oh rongamwahu kopwuropwurdo oh atail “kasikpen … kapai me inoukihdahr ong me pwung kan.”
Atail Koapworopwor ong Mour Soutuk
Atail koapworopwor en mour soutuk kohsang rehn kalahngan en Krais oh pein atail pilipil kan, me kahrehiong kitail kapai kaselel en pwuralahng atail wasahn kouson nanleng oh kousonla mwo ni popohl oh meleilei rehn Samatail Nanleng, Sapwellime Iehroso, atail peneinei me loalopwoat oh kempokepatail kan, oh irail me pwung kan nan sampah sang nan sahpw akan koaros oh mwehi kan koaros.
Pohn sampah kitail kin esehla peren oh pahtou ni atail kin sohpeihong kahpwal akan oh desla. Pweida kin kohsang pwoson Sises Krais ni atail kin powehdi dipatail akan, kahpwal akan, kasongosong kan, sapahrek kan, oh kahpwal kan koaros en mour wet.
Ni atail kin kakehlailih atail pwoson Sises Krais, kitail kin kilengla pohnangin atail kahpwal akan ong kapai kan oh inou en mour soutuk, Duwehte marain ni ah lingan pahn keirda, koapworopwor kin kamairanihda sampah rotorot, oh kitail kak kilang dahme pahn kohdo me lingan douluhl.
Koapworopwor kin Ketsang rehn Koht
Sangete ni tapio, Samatail Nanleng oh Sapwellime Iehroso kin kapaiada irail me pwung kan en ahniki kisakis kaselel en koapworopwor.
Mwurin ara mweseldahsang nan mwetuwelo, Adam oh Ihp kasukuhlsang rehn tohnleng en inou en Sises Krais. Kisakis en koapworopworo kamarainihda ara mour. Adam kalohkidahr, “Mesei kat kilangadahr wasa, oh nan mour wet I pahn ahneki peren.“ Ihp pil koasoia duwen “kaperenpen [ara] saledeklahro, oh mour soutuk me Koht ketkihong koaros me kin peik.“
Duwehte Ngehn Sarawi wadohng Adam koapworopwor, manaman en sapwellimen Kauno Ngehno kin kamarainihda irail me pwoson kan rahn pwukat, kasalehda mwomwen mour soutuk.
Sounkomouro ketin kadahredohng kitail Kansenamwahu men, Ngehn Sarawi, iengatail me kin wahdo pwoson oh koapworopwor, oh meleilei “sohte kihong kumwail nin duwen me sampah wet kin wia.“
“Sampah,“ Sounkomouro mahsanih, “pahn kalokei kumwail, ahpw kumwail koapworopwor, pwehki I kalowehdier sampah.“
Nan ansoun kahpwal akan, kitail pilada en koapworopworki Kauno ni pwoson. Kitail kin kapakap, “Kaidehn nseneni ahpw kupwuromwi en pweida.“ Kitail kin kehn sapwellimen Kauno utuht sang ni atail kin aktikitikla, oh kitail kin awih inou en meleilei me Kauno inoukidahr me E pahn kadaredo nan ansou me E kupwuriki.
Wahnparon Paul padahngki, “Koht en koapworopwor [pahn] audehkin uhkada … peren oh meleilei … , pwe kumwail en ahneki koapworopwor,“ “pereperenki koapworopwor; kanengamahiong ansoun kahpwal;“ “sang ni manaman en Ngehn Sarawi.“
Padahkpen Koapworopwor
Soukohp Moronai ese ni mehl duwen koapworopworki Krais nin dokon ansoun kahpwal akan. E kawewehda duwen ansou me E mihla Nan kahpwal.
“Ih kelehpw. … I sohte ahneki … wasa ieu en kohla.”
“I sohte kin kasalehieda… pwe re de kawehiela.”
Ahpw, nan ansou rotorot oh kelekelepw wet, Moronai ntingihdi koasoi ehn ah pahpa mahsen en koapworopwor kan:
“Ma aramas men ahneki pwoson e udahn pahn anahne ahneki koapworopwor; pwe ma sohte pwoson e sohte kak en mie koapworopwor.”
“Dahme kumwail pahn koapworopworki? … Kumwail pahn koapworopworki tomw en Krais oh manaman en sapwellime iasadao, en alehdi mour soutuk.”
Riei ko, koapworopwor wia kisakis momour ehu, kisakis ehu me kin keirda ni atail kin kalaudehla atail pwoson Sises Krais. ”Pwoson, iei kamehlele mehkan me kitail kin koapworopworki de kasikasik.” Kitail wiahda mepwukat—mehn dehde en atail pwoson—sang ni kapakap, inou en tehnpas sarawi kan, kolokol kosonned akan, kamkamadipwki pwuhk sarawi kan oh mahsen en soukohp akan en rahn-pwukat, tungtungoale kamadipw sarawi, papah mehteikan oh iangiang kaudok rehn rieitail Sounleng kan.
Ihmw en Koapworopwor
Pwe en kalaudehla atail koapworopwor nan ansoun kahpwal akan, Kauno padahkiong Sapwellime soukohp akan en kadirehkila sampah Sapwellime tehnpas sarawi kan.
Ni atail kin pidelong nan tehnpas en Kauno, kitail kin kehn Ngehn en Koht, kadehdeiong kitail atail koapworopwor.
Tehnpas sarawio kin kadehdehki duwen sousou me sohte towe oh duwen mour me pahn pil doulahte palio kahdengo.
Ong koaros me sohte arail pwoud nan mour wet, tiahk sarawi kan pil kadehdeier me aramas pwung koaros pahn iang sohsohki inou koaros.
Mie koapworopwor laud ehu ni pwopwoud pwulopwul ehu kelehpwikidi ni pei sarawi pwe en katengetengpene, kaidehn ongete ansou wet ahpw kohkohlahte.
Mie koapworopwor laud ong kitail nan inou kan me wiawihong kadaudokepahtail, sohte lipilipil soangen irair dah me re mih loale.
Sohte medek, sohte soumwahu, sohte me sapwung, sohte lokolok, sohte mehkot kak karotorotengala atail koapworopwor ni atail kin kamehlele oh kolokol teng atail inou kan rehn Koht nan tehnpas en Kauno. E wia tehnpas en marain, tehnpas en koapworopwor.
Ahnsou Me Koapworopwor Sohrala
Kitail kin kakerehdi pilen mas en pahtou ni atail kin kilang insensuwed oh kahpwal en irail akan me sohte koapworopworki Krais.
I ahpwtehn mwasahn pwoupwoud ehu me ni ansou ehu re ahneki pwoson Krais ahpw re pilada en kesehla ara kamehlele. Re diar pweida laud nan sampah, oh re diarada peren nan pein ara loalokong oh ara soikala sang ara pwoson.
Soahng koaros mwomwen mwahu lau ohlo, ni ah pwulopwul oh kehlail, mwadangete soumwahuda oh mehla. Duwehte ansou me maramo kin perehla ketipino, ira perehla marain en Iehroso, oh dahme pwarada iei rotorotalahn koapworopwor. Liho, nan ah peikasal, pirikida pingaping, sohte kaunop me e wia, sohlar kak kansenamwahuih nah serihko. Pein ah loalokong padahkiong ih me ah mour inenen unsek lau e pehmada me e sohte pahn kak koanohdi mandahn rahno. Ah patou wahdo rotorot oh sawehwe.
Koapworopwor nan Kahpwal Kapatou
Mweidohng ie iehn kasalehda wekipeseng en ah pahtoulahud ong ehu peneinei me koapworopworki Krais nan ansoun pahtou.
Sounpar rieisek-ehu samwalahro seri me apwtehn ipwidi nein Ben Andersen me I pahn naineki oh ah pwoud, Robbie, pihrala pwehki repen-mour sang sapwarail nan Idaho ong Salt Lake City. I lella ni ihmwen winio, oh Ben kawewehiong ie uwen laud, en keper-en mour me wiewiawi ong mohngiong en neira serio. Se kihdi peht ko pohn moangen Trey. Kauno kapaikihda ah mour en doulahte.
Trey alehdier koadoahkpen ah mohngiong tepin wihk en ah mour, oh pil oakoai koadoahk pil mwuri sang. Ni pahr akan douluhla, e sansalehr me Trey pahn anahne ehu mohngiong. Mendahte arail kin kainapwih dahme paliwere kak wia, ah pwoson laudla. E ntingidi, ”I sohte nsensuwedkihla paliwereiet pwehki ansou koaros I ese uwen kesempwalpen ahneki pwoson Sises Krais oh kadehde ieu en pilahn en komouro.”
Trey kin kolokol pohn nah sel lepin padahk ehu sang Preseden Nelson: ”Peren me kitail kin pehm sohte kin sang irair en atail mour ahpw e kin kohsang dahme kitail medewe me kesempwal ong atail mour kan.”
Trey intingihdi: “I kin ansou koaros iang kasik iehn kak iang wia ahi misin, ahpw… nei toahkte kan sohte mweidohng ie iehn wia ahi misin lau sounpar ehu mwurin ahi welianda ai mongiong. … I kolokol ahi pwoson Sises Krais.”
Trey inenen pereniki ah alahlda nan palien mwohni ni BYU me tepla semester, ahpw e pil inenen peren ni imwin Sulai ansou me E alehdi delepwohn ehu en kohdo ni ihmwen wini pwe e pahn weliandahr ah mohngiong.
”Sounpar ehu,” Trey nda, ”oh I pahn kohla wia ahi misin.”
Diren mehkot e kasik ansou me E pidelong nan pere en koadoahko. Ahpw, nan ansoun koadoahko mie apwal ekei pwarada, eri Trey sohte pwurehng kehnda wasa.
Ah nohnou, Robbie, koasoia: “Nialemo wia rahn me inenen kansensued ehu … ni aht songisong en wehwehkihla dahme wiawiero. … I kin wie pepehd werei ni ahi songisong en wehwehkihla soahng koaros. … Ahpw Rahn kaunopo, I pirikihda pepehm en popohl ehu. Kaidehn te meleilei; kaidehn te soikala. I ahneki peren pwehki nei pwutako, oh I ahneki peren nin duwen ahi wia nohnou men. … Ben pirida mwadangsang ie, eri ni ansou me se ahneki ansou en koasoipene, Ben pirikihda soangen pepehm ohte.“
Ben kawewehda: “sansal kohdong palingeniet ansou me Koht padahkiong ie sang Sapwellime Ngehn Sarawi. I pirida kuloak 4:00 ni mensengo oh audaudkihda meleilei oh peren me I sohte kak koasoia. Ia mwomwen ah pahn wiawi? … Mehlahn Trey inenen kamedek, oh I inenen loaloidki mehlel. Ahpw Kauno sohte kin sohpeisang kitail ansou me kitail kin nsensuwed. … I kasikasik ansou me se pahn pilehu tuhpeneh.”
Inou en Koapworopwor
Trey intingihdi nan nah journal lepin kosoi pwukat sang Preseden Nelson nan ehu kapokon lap: “E sohte kak wiawi kehn koahn peren ansou me noumw seri kin ahneki kahpwal en soumwahu me sohte kak mwahula de ansou me ke sohlar doadoahk de ansou me amw pwoud kin pitihiukedi. Ahpw ih perenohte me Sounkomouro ketkihdo. Sapwellime peren iei poatoapoat, kawkawehwehiong kitail me atail ’lokolok kan pahn kisin ansou kiste’ [Doctrine and Covenants 121:7] oh e pahn wiahla kamwahupetail.”
Riei Souleng ko, popohl me kumwail kasik nek sohte kohdo mwadang nin duwen amwail pahn mwahuki, ahpw I inoukieng kumwail me ansou me kumwail koapworopworki Kauno, Sapwellime popohl pahn kohwei.
Kitail en apwalih mwahu atail pwoson, wenlahte mwowe ahneki koapworopwor unsek. I kadehde me atail koapworopwor iei atail Sounkomour, Sises Krais. Pwehki Ih, atail ouraman pwung koaros pahn sansalada. Ih me Koht en koapworopwor—koapworopwor me pahn pweida. E ketin Ieias oh E ketin poakohng uhk. Ni mwaren Sises Krais, ahmen.