Zoo Siab Tau Txais lub Txiaj Ntsim cov Yawm Sij Pov Thawj Hwj

Los ntawm Thawj Tswj Hwm Russell M. Nelson

Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg

Cov yawm sij pov thawj hwj tswj hwm kev siv Vajtswv lub pov thawj hwj kom muaj raws li tus Tswv tej lub hom phiaj thiab foom koob hmoov rau txhua tus uas lees txais txoj moo zoo uas tau muab txum tim rov qab los.

Kuv cov kwv tij thiab cov muam, hnub no yog ib hnub tseem ceeb rau Thawj Tswj Hwm Dallin H. Oaks thiab kuv. 40 xyoo tas los, thaum lub Plaub Hlis Ntuj 7, 1984, wb txais kev txhawb nqa pom zoo los koom Pawg Kaum Ob tug Thwj Tim.¹ Txij thaum ntawd los, wb twb zoo siab kawg nyob hauv txhua lub tuam rooj sab laj, tsis hais lub rooj sab laj no los yog. Peb sawv daws twb tau koob hmoov vim peb muaj tus Ntsuj Plig ntau nplua mias. Kuv cia siab hais tias nej yuav kawm tej zaj lus los ntawm lub rooj sab laj no thaum ob peb lub hlis tom ntej.

Thaum kuv yug los,² tsuas muaj rau lub tuam tsev hauv lub Koom Txoos—ib lub nyob hauv St. George, Logan, Manti, thiab Salt Lake City, Utah; kuj muaj ib lub nyob hauv Cardston, Alberta, Canada; thiab Laie, Hawaii. Twb muaj ob lub tuam tsev uas twb siv dhau los nyob hauv Kirtland, Ohio, thiab Nauvoo, Illinois. Thaum cov Ntseeg tau mus rau sab hnub poob, Haiv Neeg Ntseeg yuav tsum tso ob lub tuam tsev ntawd tseg.

Ib tug txhob txwm muab lub Tuam Tsev Nauvoo hlawv. Ces twb rov qab ua lub tuam tsev ntawd thiab Thawj Tswj Hwm Gordon B. Hinckley tau muab lub tuam tsev ntawd fij tseg lawm.³ Lub Koom Txoos cov yeeb ncuab ua rau lub Tuam Tsev Kirtland piam sij. Tom qab ntawd Community of Christ tau yuav lub Tuam Tsev Kirtland, lawv twb yuav lawm tau ntau xyoo.

Lub hlis tas los peb tau tshaj tawm tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yuav lub Tuam Tsev Kirtland, nrog rau lwm qhov chaw tseem ceeb rau zaj keeb kwm hauv Nauvoo. Peb zoo siab uas peb tej kev sib tham zoo nrog cov thawj coj hauv Community of Christ kom peb sib pab twb ua rau peb pom zoo ua li no.

Lub Tuam Tsev Kirtland yog ib qho chaw tseem ceeb hauv Kev Muab Yexus Khetos Txoj Moo Zoo Txum Tim Rov Qab Los. Muaj ob peb yam uas tshwm sim hauv qhov chaw ntawd uas cov yaj saub puag thaum ub qhia txog thiab yog tej yam tseem ceeb rau tus Tswv lub Koom Txoos kom ua tau nws ntiag tug hauj lwm hauv hnub nyoog kawg.

Qhov tseem ceeb tshaj plaws yog thaum Hnub Easter Sunday, lub Plaub Hlis Ntuj 3, 1836.⁴ Hnub ntawd, muaj coob tus neeg tshwm sim rau Joseph Smith thiab Oliver Cowdery pom. Tus Tswv Yexus Khetos yog thawj tug uas tshwm sim. Tus Yaj Saub sau hais tias tus Cawm Seej “ob lub qhov muag zoo li ib tug nplaim hluav taws; cov plaub ntawm nws lub taub hau dawb zoo li cov tseem daus; nws lub ntsej muag ci tshaj qhov lub hnub ci; thiab nws lub suab zoo li lub suab dej tsaws tsag loj loj.”⁵

Lub sij hawm no, tus Tswv qhia tias Nws yog leej twg. Nws hais tias, “Kuv yog tus thawj thiab tus kawg; kuv yog tus uas muaj sia nyob, kuv yog tus uas raug tua tuag; kuv yog tus sawv cev uas daws nej zaj ntawm Leej Txiv.”⁶

Ces Yexus Khetos tau tshaj tawm tias Nws tau txais yuav lub tuam tsev ua Nws lub tsev thiab cog lus li no tias: “Kuv yuav ua kuv tus kheej tshwm sim los rau kuv cov neeg los ntawm txoj kev hlub tshua rau hauv lub tsev no.”⁷

Cov lus cog tseg tseem ceeb no yeej hais txog txhua lub tuam tsev uas tau muab fij tseg lawm. Kuv caw nej xav txog qhov us tus Tswv cov lus cog tseg muaj nqis rau nej npaum li cas.

Tom qab tus Cawm Seej tau los, Mauxes tshwm sim rau nkawd pom. Muaxues muab cov yawm sij ntawm kev muab Ixayees sau los ua ke thiab kev muab kaum xeem neeg txoj kev rov los rau Joseph Smith.⁸

Thaum kev ua yog toog no tag lawm, “Eli-as tshwm sim los, thiab muab lub caij nyoog tso txoj cai ntawm Anplaham txoj moo zoo cob” rau Joseph.⁹

Ces tus yaj saub Eliyas tshwm sim los. Nws txoj kev los twb ua kom muaj raws li Malakais txoj kev cog lus tias ua ntej Txoj Kev Los Zaum Ob, tus Tswv yuav xa Eliyas kom “cov yawg koob lub siab tig mus rau cov me nyuam, thiab muab cov me nyuam lub siab tig mus rau cov yawg koob.”¹⁰ Ces Eliyas tau muab cov yawm sij ntawm hwj chim sib khi rau Joseph Smith.¹¹

Qhov uas tus Tswv txib peb tug tub xa xov saum ntuj ceeb tsheej no kom muab cov yawm sij txum tim rov qab los rau lub ntiaj teb no los tsis paub piav tias qhov no tseem ceeb npaum li cas. Cov yawm sij pov thawj hwj yog txoj cai thiab lub hwj chim ntawm kev tswj hwm. Cov yawm sij pov thawj hwj tswj hwm kev siv Vajtswv lub pov thawj hwj kom muaj raws li tus Tswv tej lub hom phiaj thiab foom koob hmoov rau txhua tus uas lees txais txoj moo zoo uas tau muab txum tim rov qab los.

Ua ntej tau muab lub Koom Txoos txhim tsa, cov tub xa xov saum ntuj ceeb tsheej tau los muab lub Pov Thawj Hwj Aloos thiab lub Pov Thawj Hwj Mekhixedes rau tus Yaj Saub Joseph thiab tau muab cov yawm sij rau ob lub pov thawj hwj no.¹² Cov yawm sij no ua rau Joseph Smith muaj txoj cai txhim tsa lub Koom Txoos nyob rau xyoo 1830.¹³

Ces nyob hauv lub Tuam Tsev Kirtland nyob rau xyoo 1836, yeej yuav tsum muab cov yawm sij pov thawj hwj no—uas yog, cov yawm sij ntawm kev muab Ixayees sau los ua ke, cov yawm sij ntawm Anplaham txoj moo zoo, thiab cov yawm sij ntawm lub hwj chim sib khi. Cov yawm sij no ua rau Joseph Smith muaj cai—ib yam li tag nrho cov Thawj Tswj Hwm ntawm tus Tswv lub Koom Txoos tom qab ntawd—kom muab Ixayees sau los ua ke nyob rau ob sab ntawm daim ntaub thaiv, foom Anplaham cov koob hmoov tag nrho rau cov me nyuam khi lus, pom zoo muab tag nrho cov kab ke pov thawj hwj thiab tej kev khi lus khi tseg, thiab muab tsev neeg khi ua ke mus ib txhis li. Lub hwj chim ntawm cov yawm sij pov thawj hwj los kav ntev mus ib txhis thiab zoo kawg nkaus.

Cia li xav seb nej lub neej yuav txawv li cas yog tias tsis tau muab cov yawm sij pov thawj hwj txum tim rov qab los rau hauv lub ntiaj teb.¹⁴ Yog tsis muaj cov yawm sij pov thawj hwj, yuav muab tsis taus qhov vaj txiaj ntsim kom muaj Vajtswv lub hwj chim.¹⁵ Yog tsis muaj cov yawm sij pov thawj hwj, lub Koom Txoos yuav ua ib lub koom haum uas qhia zoo thiab pab lwm tus neeg tiam sis ua tsis tau dab tsi ntxiv. Yog tsis muaj cov yawm sij pov thawj hwj, tsis muaj leej twg uas yuav txais tau cov kab ke thiab tej kev khi lus tseem ceeb uas muab peb khi rau cov uas peb hlub mus ib txhis li thiab thaum kawg ua rau peb nyob taus nrog Vajtswv.

Cov yawm sij pov thawj hwj yog ua rau Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg txawv dua li lwm lub koom haum hauv lub ntiaj teb. Muaj ntau lub koom haum uas muaj peev xwm thiab ua rau nej lub neej zoo dua hauv lub neej no. Tiam sis tsis muaj ib lub koom haum uas muaj hwj chim thiab yeej yuav hloov nej lub neej tom qab nej tuag.¹⁶

Cov yawm sij pov thawj hwj ua rau peb muaj txoj cai foom tag nrho cov koob hmoov uas tus Tswv tau cog lus rau Anplaham muab rau txhua tus poj niam thiab txiv neej uas ua raws li lawv tej kev khi lus. Tej hauj lwm hauv lub tuam tsev ua rau tag nrho Vajtswv cov me nyuam txais tau cov koob hmoov zoo kawg no tsis hais lawv nyob qhov twg los sis lawv tau nyob thaum twg. Cia peb muaj kev xyiv fab vim peb rov qab muaj cov yawm sij pov thawj hwj hauv lub ntiaj teb no!

Kuv caw nej ua tib zoo xav txog peb kab lus no:

Kev muab Ixayees sau los ua ke ua pov thawj tias Vajtswv hlub tag nrho Nws cov me nyuam nyob txhua qhov chaw.
Anplaham txoj moo zoo ua pov thawj ntxiv hais tias Vajtswv hlub tag nrho Nws cov me nyuam nyob txhua qhov chaw. Nws caw txhua tus kom los cuag Nws—“tsis hais cov neeg dub los sis cov neeg dawb, cov neeg ua qhev los sis cov neeg ywj pheej, tsis hais poj niam los sis txiv neej; … txhua tus yeej zoo tib yam rau Vajtswv.”¹⁷
Lub hwj chim sib khi ua pov thawj zoo tshaj plaws txog qhov uas Vajtswv hlub Nws cov me nyuam txhua leej txhua tus npaum li cas thiab xav kom lawv txhua leej txhua tus nyob txhua qhov chaw xaiv kom rov qab los tsev rau Nws.

Cov yawm sij pov thawj hwj uas tau muab txum tim rov qab los dhau los ntawm tus Yaj Saub Joseph Smith ua rau txhua tus txiv neej thiab poj niam uas ua raws li lawv tej kev khi lus nyias txais tau nyias cov koob hmoov ntawm sab ntsuj plig zoo kawg nkaus. Los ntawm no, muaj ntau yam rau peb kawm los ntawm zaj keeb kwm dawb ceev ntawm lub Tuam Tsev Kirtland.

Joseph Smith zaj lus thov Vajtswv muab lub Tuam Tsev Kirtland fij tseg qhia peb zoo txog qhov uas lub tuam tsev ua rau peb muaj hwj chim ntawm sab ntsuj plig kov yeej teeb meem ntawm lub neej no hauv hnub nyoog kawg. Kuv thov kom nej kawm zaj lus thov Vajtswv, ntawd, raws li sau hauv Lus Qhuab Qhia thiab Kev Khi Lus tshooj 109. Zaj lus thov Vajtswv muab lub tuam tsev fij tseg, uas tau txais los ntawm kev tshwm sim, qhia tias ib lub tuam tsev yog “ib lub tsev thov Vajtswv, ib lub tsev yoo mov, ib lub tsev muaj kev ntseeg, ib lub tsev muaj kev kawm, ib lub tsev muaj yeeb koob, ib lub tsev muaj chaw txawb chaw rau, ib lub tsev rau Vajtswv.”¹⁸

Tej no tsis yog kev piav txog lub tuam tsev xwb. Yog ib txoj kev cog lus txog cov neeg uas ua hauj lwm thiab hwm tus Tswv hauv Nws lub tsev yuav txais tau dab tsi. Lawv yuav muaj kev cia siab tias lawv yuav txais lus teb rau lawv tej lus thov, txais kev tshwm sim, muaj kev ntseeg ntxiv, muaj zog, kev nplij siab, kev txawj ntse, thiab lub hwj chim ntxiv.

Kev siv sij hawm hauv lub tuam tsev yuav pab nej xav txog tej yam xilethi-aus thiab paub tias nej yog leej twg tiag, nej muaj peev xwm hloov los ua leej twg, thiab lub neej uas nej muaj tau mus ib txhis li. Kev hwm Vajtswv hauv lub tuam tsev yuav hloov nej txoj kev pom nej tus kheej thiab nej muaj feem nrog Vajtswv txoj hau kev zoo kawg nkaus. Kuv cog lus rau nej txog qhov no.

Peb kuj txais lus cog tseg hais tias nyob hauv lub tuam tsev peb yuav “txais tus Vaj Ntsuj Plig Dawb Huv tag nrho.”¹⁹ Cia li xav txog lub ntsiab ntawm kev cog lus ntawd hais txog qhov uas lub rooj ntug yuav qhib rau txhua tus uas mob siab nrhiav tej yam tseeb mus ib txhis li.

Peb txais kev qhia tias txhua tus uas hwm Vajtswv hauv lub tuam tsev yuav muaj Vajtswv lub hwj chim thaum lawv tawm mus thiab cov tim tswv yuav “saib xyuas lawv.”²⁰ Qhov no ua rau nej ua siab loj npaum li cas ntxiv thaum nej paub tias, vim nej yog ib tug poj niam los sis txiv neej uas tau txais nej qhov vaj txiaj ntsim kom muaj Vajtswv lub hwj chim, nej thiaj li tsis tas ua lub neej no nej tus kheej xwb? Qhov uas nej paub tias cov tim tswv yuav pab nej tiag puas ua rau nej ua siab loj ntxiv?

Qhov kawg, peb txais kev cog lus tias “tej kev phem txoj kev tuav hauv” yuav kov tsis yeej cov uas hwm Vajtswv hauv tus Tswv lub tsev.²¹

Hnub no peb yuav tsum to taub cov koob hmoov ntawm sab ntsuj plig uas peb txais tau hauv lub tuam tsev.

Kuv cov kwv tij thiab cov muam, kuv cog lus rau nej li no: Tsis muaj ib yam dab tsi uas yuav pab nej tuav tus nqaj hlauntau tshaj²² qhov uas nej hwm Vajtswv hauv lub tuam tsev ntau npaum li nej mus tau. Yeej tsis muaj dab tsi uas yuav pov hwm nej ntau tshaj thaum nej raug lub ntiaj teb tej huab tsaus ntuj. Tsis muaj dab tsi uas yuav txhawb nqa nej zaj lus tim khawv txog tus Tswv Yexus Khetos thiab nws txoj Kev Theej Txhoj ntau tshaj los sis pab nej to taub Vajtswv txoj hau kev zoo kawg nkaus. Thaum nej muaj kev nyuaj siab, tsis muaj dab tsi uas yuav nplij nej lub siab ntau tshaj. Tsis muaj dab tsi uas yuav qhib lub rooj ntug ntau tshaj. Tsis muaj ib yam dab tsi!

Lub tuam tsev yeej yog lub qhov rooj rau peb txais tau cov koob hmoov zoo tshaj plaws uas Vajtswv tau npaj rau peb txhua tus, vim lub tuam tsev yog tib qho chaw hauv lub ntiaj teb uas peb yuav txais tag nrho cov koob hmoov uas Vajtswv cog lus rau Anplaham.²³ Yog li ntawd peb thiaj li ua txhua yam peb ua tau, raws li tus Tswv qhia, kom ua yooj yim rau lub Koom Txoos cov mej zeej txais tau cov koob hmoov hauv lub tuam tsev. Yog li ntawd, peb zoo siab tshaj tawm tias peb npaj ua ib lub tuam tsev tshiab nyob hauv 15 qhov chaw no:

Uturoa, French Polynesia
Chihuahua, Mexico
Florianópolis, Brazil
Rosario, Argentina
Edinburgh, Scotland
Brisbane, Australia south area
Victoria, British Columbia
Yuma, Arizona
Houston, Texas cheeb tsam qab teb
Des Moines, Iowa
Cincinnati, Ohio
Honolulu, Hawaii
West Jordan, Utah
Lehi, Utah
Maracaibo, Venezuela

Cov kwv tij thiab cov muam, nov yeej yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Nws yog tus coj. Peb yog Nws cov thwj tim.

Cia peb muaj kev xyiv fab vim tau muab cov yawm sij pov thawj hwj txum tim rov qab los, uas ua rau nej thiab kuv muaj cib fim txais tau txhua txoj koob hmoov ntawm sab ntsuj plig uas peb txaus siab thiab tsim nyog txais. Kuv ua tim khawv li no los ntawm Yexus Khetos lub npe dawb ceev, amees.