शान्ति निर्माताहरूको आवश्यकता छ
विवाद वा मेलमिलाप के छनौट गर्ने तपाईंहरूसँग छनोटको स्वतन्त्रता छ । म तपाईंहरूलाई अहिले र सदैव शान्ति निर्माता बन्ने छनोट गर्न आग्रह गर्छु ।
मेरा प्यारा दाजुभाइ तथा दिदीबहिनीहरू, तपाईंहरूसँगै हुनु पाउनु खुसीको विषय हो । बितेका छ महिनाहरूको अवधिमा तपाईंहरू निरन्तर मेरो मस्तिष्कमा र मेरो प्रार्थनामा हुनुहुन्छ । म प्रार्थना गर्छु कि मैले अहिले तपाईंहरूसँग बोल्दै गर्दा परमप्रभुले तपाईंहरूलाई सुनाउन चाहनु भएका विषयहरू पवित्र आत्माले सञ्चार गर्ने छ ।
धेरै वर्ष पहिले मेरो सर्जिकल इन्टर्नशिपका क्रममा, मैले एक सर्जनलाई सहयोग गरेँ जसले सडेको अत्यधिक सङ्क्रमित मासु भएका कारण एउटा खुट्टा काटिदिन लागिरहेका थिए । अपरेशन कठीन थियो । त्यसपछि, तनाव थप्नका लागि, टोली मध्ये एकले खराब कार्य प्रदर्शन गरे र सर्जन क्रोधित भए । उहाँको आक्रोशका बीचमा, उहाँले कीटाणुहरूले भरिएको आफ्नो छुरी फ्याँक्नुभयो । यो मेरो काँधमा खस्यो!
सर्जिकल अभ्यासको यो खतरनाक उल्लङ्घनबाट—अनियन्त्रित सर्जन बाहेक शल्यक्रिया कक्षमा सबैजना—आतङ्कित भए । कृतज्ञतापूर्वक, म सङ्क्रमित भइन । परन्तु यो अनुभवले ममा अमिट छाप छोड्यो । त्यही समयमा, मैले आफूस्वयंलाई प्रतिज्ञा गरेँ कि जे भए तापनि मेरो अपरेशन कक्षमा म आफ्नो संवेगमाथिको नियन्त्रण कहिल्यै गुमाउने छैन । मैले त्यो दिन यो पनि प्रतिज्ञा गरेँ कि क्रोधमा कुनै पनि विषय नफ्याँक्ने—चाहे त्यो छुरी होस् वा शब्दहरू ।
अहिले पनि, दशकौँ पछि, म स्वयं मनन गरिरहेको पाउँछु कि के मेरा बाहुमा खसेको दूषित छुरी आज हाम्रो नागरिक संवाद र धेरै व्यक्तिगत सम्बन्धहरूलाई सङ्क्रमित गर्ने विषाक्त विवाद भन्दा बढी विषाक्त थियो । विपरीत र आवेशपूर्ण असहमतिको यो युगमा सभ्यता र शालीनता हराएको देखिन्छ ।
अश्लीलता, गल्ती औँल्याउने र अरूहरूलाई दुष्ट बोल्ने सबै धेरै सामान्य छन् । धेरै पण्डितहरू, राजनीतिज्ञहरू, मनोरन्जनकर्ताहरू र अन्य प्रभावकारीहरूले निरन्तर रूपमा अपमान गर्छन् । म धेरै चिन्तित छु कि धेरै मानिसहरूले उनीहरूसँग सहमत नहुने जो कोही लाई निन्दा, बदनाम र तिरस्कार गर्न पूर्ण रूपमा स्वीकार्य छ भन्ने विश्वास गरेको देखिन्छ । अधिकांश करुणाजनक र अर्थपूर्ण देखिने काँटाले अर्काको प्रतिष्ठा विनास गर्न उत्सुक देखिन्छन्!
क्रोधले कहिल्यै अरूलाई मनाउँदैन । दुश्मनीले कसैलाई पनि निर्माण गर्दैन । विवादले कहिल्यै पनि प्रेरित समाधानतर्फ अगुवाइ गर्दैन । अफसोसको विषय, हामी कहिलेकाहीँ आफ्नै श्रेणी भित्र पनि विवादास्पद व्यवहार देख्छौँ । हामी आफ्नो जीवनसाथी र छोराछोरीलाई बेइज्जत गर्नेहरू, अरूहरूलाई नियन्त्रण गर्न क्रोधित भड्काउहरू प्रयोग गर्ने र परिवारका सदस्यहरूलाई “मौन व्यवहार” गरेर दण्ड दिनेहरूका सम्बन्धमा सुन्छौँ । हामीले युवा र बालबालिकाहरूका सम्बन्धमा सुन्छौँ जसले अरू मित्रहरूलाई दुःख दिन्छन् र आफ्ना सहकर्मीहरूलाई बदनाम गर्ने सहकर्मीहरूका सम्बन्धमा सुन्छौँ ।
मेरा प्यारा दाजुभाइ तथा दिदीबहिनीहरू, यस्तो हुनु हुँदैन । येशू ख्रीष्टका शिष्यहरूका रूपमा, हामीले अरूहरूसँग कसरी अन्तरक्रिया गर्ने भन्ने उदाहरण बन्नुपर्छ—विशेष गरी जब हामीसँग मत विभेद हुन्छ । येशू ख्रीष्टको सत्य अनुयायी लाई पहिचान गर्ने एउटा सजिलो तरिका भनेको त्यो व्यक्तिले अरू मानिसहरूलाई कति दयालु व्यवहार गर्छ भन्ने हो ।
मुक्तिदाताले दुबै गोलार्धका अनुयायीहरूलाई आफ्ना उपदेशहरूमा यो स्पष्ट पार्नुभयो । “शान्तिनिर्माताहरू आशीषित छन्,” उहाँले भन्नुभयो ।१ “जसले तिमीहरूको दाहिने गालामा प्रहार गर्छ, उसलाई अर्को गाला पनि फर्काइदेऊ ।”२ अनि नि:सन्देह, उहाँले सल्लाह दिनुभयो जसले हामी प्रत्येकलाई चुनौती दिन्छ: “आफ्ना शत्रुहरूलाई प्रेम गर, तिमीहरूलाई सराप्नेहरूलाई आशीर्वाद देऊ, तिमीहरूलाई घृणा गर्नेहरूलाई भलाइ गर र तिनीहरूका लागि प्रार्थना गर जसले तिमीहरूलाई प्रयोग गरेर समेत सताउँछन् ।”३
उहाँको मृत्यु हुनु अघि, मुक्तिदाताले आफ्ना बाह्र प्रेरितहरूलाई एकअर्कालाई प्रेम गर्न आज्ञा दिनुभयो जसरी उहाँले तिनीहरूलाई प्रेम गर्नुभएको थियो ।४ त्यसपछि उहाँले थप्नुभयो, “यदि तिमीहरूले एकअर्कालाई प्रेम गर्छौ भने, यसबाट सबै मानिसहरूले तिमीहरू मेरा शिष्यहरू हौ भनी चिन्ने छन् ।”५
मुक्तिदाताको सन्देश स्पष्ट छ: उहाँका सत्य शिष्यहरूले—परिस्थिति जतिसुकै कठिन भए तापनि निर्माण, उत्थान, प्रोत्साहन गर्छन्, सहमत हुन्छन् र प्रेरणा दिन्छन् । येशू ख्रीष्टका सत्य शिष्यहरू शान्ति निर्माता गर्नेहरू हुन् ।६
आज पाम आइतबार हो । हामी पृथ्वीमा अभिलेख गरिएको सबैभन्दा उत्कृष्ट घटनाको सम्झना गर्न तयारी गर्दै छौँ, जुन परमप्रभु येशू ख्रीष्टको प्रायश्चित र पुनरुत्थान हो । हामीले मुक्तिदातालाई सम्मान गर्न सक्ने उत्तम तरिकाहरू मध्येको एक तरिका शान्ति निर्माता बन्नु हो ।७
मुक्तिदाताको प्रायश्चितले हामीलाई सबै कलह सहित—दुष्टतामाथि विजय प्राप्त गर्न सम्भव बनायो । यसका सम्बन्धमा कुनै गल्ती नगर्नुहोस्: विवाद खराब छ ! येशू ख्रीष्टले घोषणा गर्नुभयो कि “कलहको आत्मा” भएकाहरू उहाँका होइनन् तर “शैतानका हुन्, जो झगडाको पिता हो र [शैतान] ले मानिसहरूको हृदयलाई एकअर्कासँग रिस उठाउन उत्प्रेरित गर्छ ।”८ झगडालाई बढावा दिनेहरूले शैतानको पुस्तकबाट एक पाना निकाल्दै छन्, चाहे तिनीहरूले यो बुझेका छन् वा छैनन् । “कुनै पनि मानिसले दुई मालिकहरूलाई सेवा गर्न सक्दैन ।”९ हामी हाम्रो मौखिक आक्रमणहरूले शैतानलाई समर्थन गर्ने र त्यस पछि पनि अझै परमेश्वरको सेवा गर्न सक्छौँ भनी सोच्न सक्दैनौँ ।
मेरा प्यारा दाजुभाइ तथा दिदीबहिनीहरू, हामीले एकअर्कालाई कस्तो व्यवहार गर्छौं त्यो वास्तवमा नै महत्त्वपूर्ण छ! हामी घरमा, चर्चमा, काममा र अनलाइनमा अरूहरूसँग कसरी बोल्छौँ भन्ने विषय वास्तवमा नै महत्त्वपूर्ण हुन्छ । आज, म हामीलाई अरूहरूसँग उच्च, पवित्र तरिकामा अन्तरक्रिया गर्न आग्रह गर्दै छु । कृपया ध्यान दिएर सुन्नुहोस् । “यदि त्यहाँ केही सद्गुण, प्रिय वा असल प्रतिवेदन भएको वा प्रशंसनीय कुनै विषयवस्तु छ”१० जुन हामी अर्को व्यक्तिका सम्बन्धमा भन्न सक्छौँ—चाहे उसको सामु वा उसको पछाडि—त्यो हाम्रो सञ्चारको मानक हुनुपर्छ ।
यदि तपाईंहरूको वार्डमा एक दम्पतीको सम्बन्धविच्छेद हुन्छ वा जवान सुसमाचार प्रचारक समय अगावै घर फर्कन्छ वा एक किशोर या किशोरीले आफ्नो गवाहीमा शङ्का गर्छन् भने, तिनीहरूलाई तपाईंहरूको फैसलाको आवश्यकता पर्दैन । तिनीहरूले तपाईंहरूका वचनहरू र कार्यहरूमा येशू ख्रीष्टको प्रेम प्रतिबिम्बित भएको अनुभव गर्न आवश्यक छ ।
यदि सामाजिक सञ्जालमा एक मित्रका प्रखर राजनीतिक वा सामाजिक विचारहरू छन् जुन तपाईंहरूले राखेको विश्वासका सबै विषयहरू उल्लङ्घन गर्छ भने तपाईंको क्रोधित प्रतिवादले कुनै सहयोग गर्दैन । समझदारीको पुल निर्माण गर्न तपाईंहरूका लागि अति नै आवश्यक छ तर तपाईंहरूका मित्रलाई पनि त्यही आवश्यक छ ।
विवादले—हरेक पटक आत्मालाई टाढा लैजान्छ । विवादले त्यो झूटो धारणालाई मजबुत बनाउँछ कि टकराव भनेको मतभेदहरू समाधान गर्ने तरिका हो; तर यस्तो कहिल्यै हुँदैन । विवाद एक छनोट हो । शान्ति निर्माण एक छनोट हो । विवाद वा मेलमिलाप के छनौट गर्ने तपाईंहरूसँग तपाईंको छनोटको स्वतन्त्रता छ । म तपाईंहरूलाई अहिले र सदैव शान्ति निर्माता बन्ने छनोट गर्न आग्रह गर्छु ।११
दाजुभाइ तथा दिदीबहिनीहरू, हामी शाब्दिक रूपमा—एक पटकमा एक व्यक्ति र एक अन्तरक्रियाबाट संसारलाई परिवर्तन गर्न सक्छौँ । कसरी? प्रतिरूपणद्वारा पारस्परिक सम्मान र सम्मानजनक संवादका साथ इमानदार मत भिन्नताहरूलाई कसरी व्यवस्थापन गर्ने ।
विचारका भिन्नता जीवनका अंश हुन् । म हरेक दिन परमप्रभुका समर्पित सेवकहरूसँग कार्य गर्छु जसले सदैव समस्यालाई उस्तै देख्नुहुँदैन । उहाँहरूलाई थाहा छ म उहाँहरूका विचारहरू र हामीले छलफल गर्ने सबै विषयहरूका सम्बन्धमा—विशेष गरी संवेदनशील विषयहरू ईमानदार भावनाहरू सुन्न चाहन्छु ।
मेरा दुई महान् सल्लाहकारहरू, अध्यक्ष ओक्स र अध्यक्ष आइरिङ, उहाँहरूले आफ्ना भावनाहरू व्यक्त गर्ने तरिकामा उदाहरणीय हुनुहुन्छ—विशेष गरी जब उहाँहरू विचारमा भिन्न हुनु हुँदा । उहाँहरू एकअर्काप्रति विशुद्ध प्रेमका साथ यसो गर्नुहुन्छ । दुवैजना आफूलाई बढी थाहा छ र त्यसकारण आफ्नो स्थानको दृढताका साथ रक्षा गर्नुपर्छ भनेर सुझाव दिनुहुँदैन । न त एकअर्कासँग प्रतिस्पर्धा गर्न आवश्यक ठान्नुहुन्छ । किनभने दुवैजना करुणाले भरिएका छन्, “ख्रीष्टको विशुद्ध प्रेम,”ले१२ हाम्रा विचारहरू परमप्रभुको आत्माद्वारा निर्देशित हुन सक्छन् । म यी दुई महान् पुरुषहरूलाई कति प्रेम र सम्मान गर्छु!
करुणा कलहको औषधि हो । करुणा आत्मिक उपहार हो जसले हामीलाई स्वार्थी, रक्षात्मक, घमण्डी र ईर्ष्यालु स्वभावको प्राकृतिक मानिसलाई हटाउन सहयोग गर्छ । करुणा येशू ख्रीष्टको सत्य अनुयायीको प्रमुख विशेषता हो ।१३ करुणाले शान्ति निर्मातालाई परिभाषित गर्छ ।
जब हामी स्वयंलाई परमेश्वरसामु विनम्र तुल्याउँछौँ र हाम्रो हृदयको सम्पूर्ण ऊर्जाले प्रार्थना गर्छौँ, परमेश्वरले हामीलाई करुणा दिनुहुने छ ।१४
यो अलौकिक वरदान पाएकाहरू सहनशील र दयालु हुन्छन् । तिनीहरू अरूहरूलाई ईर्ष्या गर्दैनन् र तिनीहरूको आफ्नै महत्त्वमा सङ्कुचित बनेका छैनन् । तिनीहरू सजिलैसँग उत्तेजित हुँदैनन् र अरूहरूको नराम्रो सोच्दैनन् ।१५
दाजुभाइ तथा दिदीबहिनीहरू, ख्रीष्टको विशुद्ध प्रेम आज हामीलाई समस्यामा पार्ने विवादको जवाफ हो । करुणाले हामीलाई अर्कामा बोझको थुप्रो बन्नु भन्दा “एक अर्काको बोझ वहन गर्न” प्रेरित गर्दछ ।१६ ख्रीष्टको विशुद्ध प्रेमले हामीलाई “सबै समय र सबै विषयमा परमेश्वरको साक्षीका रूपमा खडा हुन”१७—विशेष गरी तनावपूर्ण परिस्थितिहरूमा अनुमति दिन्छ । करुणाले हामीलाई—विशेष गरी आलोचनाको आक्रमणमा पर्दा ख्रीष्टका पुरुष र महिलाहरूका रूपमा कसरी बोल्ने र व्यवहार गर्ने भनेर प्रदर्शन गर्न अनुमति दिन्छ ।
अब, म “कुनै पनि मूल्यमा शान्ति”का बारेमा कुरा गरिरहेको छैन ।१८ म अरूहरूसँग व्यवहार गर्ने सम्बन्धमा कुरा गरिरहेको छु जुन तपाईंहरूले प्रभुभोजमा सहभागी हुँदा तपाईंहरूले गर्नुभएका करारहरू पालना गर्नसँग सुसङ्गत छन् । तपाईंहरूले मुक्तिदातालाई सदैव सम्झने प्रतिज्ञा गर्नुहुन्छ । अत्यधिक दोषारोपण र विवादले भरिएका परिस्थितिहरूमा, म तपाईंहरूलाई येशू ख्रीष्टलाई सम्झन आमन्त्रण गर्छु । उहाँले भन्नुहुने वा गर्नुहुने साहस र बुद्धि प्राप्त गर्न प्रार्थना गर्नुहोस् । जब हामी शान्तिका राजकुमारलाई अनुशरण गर्दछौँ , हामीहरू उहाँका शान्ति निर्माता बन्ने छौँ ।
यस अवस्थामा तपाईंहरूले सोचिरहनुभएको हुन सक्छ कि तपाईंहरूलाई चिनेको व्यक्तिलाई यो सन्देशले वास्तवमै सहयोग गर्छ । सम्भवत: तपाईंहरूले आशा गरिरहनुभएको छ कि यसले ऊ वा उनलाई तपाईंहरू प्रति अझै असल हुन सहयोग गर्ने छ । मलाई आशा छ यो हुने छ! परन्तु म यो पनि आशा गर्छु कि तपाईंहरू ले आफ्ना हृदयमा गहन रूपमा हेर्नुहुने छ कि त्यहाँ घमण्ड वा ईर्ष्याका अंशहरू छन् कि छैनन् जसले तपाईंहरू लाई शान्ति निर्माता बन्नबाट रोक्छन् ।१९
यदि तपाईंहरू इस्राएललाई जम्मा गर्न सहयोग गर्न र अनन्तकालसम्म रहने सम्बन्धहरूको निर्माण गर्ने सम्बन्धमा गम्भीर हुनुहुन्छ भने, अब तीतोपनालाई पन्छाउने समय हो । अब यो कि त तपाईंहरूको मार्ग हो वा कुनै पनि होइन भन्ने जिद्दी बन्द गर्ने समय हो । अब तपाईंहरूलाई अप्ठ्यारो पार्ने त्रासले अरूहरूलाई विचलित गर्ने नाजुक छालमा हिंड्ने कार्यहरू गर्न बन्द गर्ने समय हो । अब तपाईंहरूका युद्धका हतियारहरू गाड्ने समय हो ।२० यदि तपाईंहरूको मौखिक शस्त्रशाला अपमान र आरोपहरूले भरिएको छ भने, अब तिनीहरूलाई हटाउने समय हो ।२१ तपाईंहरू आध्यात्मिक रूपमा ख्रीष्टका मजबुत पुरुष वा महिलाका रूपमा उठ्नुहुने छ ।
मन्दिरले हामीलाई हाम्रो खोजमा सहयोग गर्न सक्छ । त्यहाँ हामी परमेश्वरको शक्तिले सम्पन्न हुन्छौँ, जसले हामीलाई सबै विवादको उत्प्रेरक शैतानमाथि विजय प्राप्त गर्न सक्ने क्षमता प्रदान गर्छ ।२२ आफ्नो जीवनबाट उसको प्रभाव बाहिर निकाल्नुहोस्! ध्यान दिनुहोस् कि हामी प्रत्येक पटक जब हामीले मिथ्याबोधलाई समाप्त पार्छौँ वा अपमान लिन अस्वीकार गर्छौँ भने हामी विरोधीको आलोचना गर्छौँ । बरु, हामी येशू ख्रीष्टका सत्य शिष्यहरूको विशेषताको रूपमा कोमल कृपा देखाउन सक्छौँ । शान्ति निर्माताहरूले विरोधीलाई विफल पार्छन् ।
हामी जनका रूपमा पहाडमा एक सत्य ज्योति बनौँ—त्यो ज्योति जुन “लुकाउन सकिँदैन” ।२३ हामीले जटिल समस्याहरू समाधान गर्ने सम्मानजनक तरिका र असहमतिहरू समाधान गर्ने एउटा प्रबुद्ध तरिका छ भनी देखाऔँ । येशू ख्रीष्टका सत्य अनुयायीहरूका रूपमा तपाईंहरूले प्रकट गरेको करुणालाई परमप्रभुले तपाईंहरूको उच्च कल्पनाभन्दा बाहिरका तपाईंहरूका प्रयासहरूलाई बढावा दिनुहुने छ ।
सुसमाचारको सञ्जाल संसारको सबैभन्दा विशाल सञ्जाल हो । परमेश्वरले “कालो र सेतो, बन्धक र स्वतन्त्र, पुरुष र महिला सबैलाई उहाँकहाँ आउन आमन्त्रण गर्नुभएको छ ।”२४ त्यहाँ सबैका लागि स्थान छ । यद्यपि, कुनै पनि प्रकारको पूर्वाग्रह, निन्दा वा विवादका लागि त्यहाँ कुनै स्थान छैन ।
मेरा प्यारा दाजुभाइ तथा दिदीबहिनीहरू, अरूहरूको निर्माणमा आफ्नो जीवन यापन गर्नेहरूका लागि सबैभन्दा उत्तम आउन बाँकी छ । आज म तपाईंहरूलाई आफूहरूले अरूहरूसँग कस्तो व्यवहार गर्नुहुन्छ भन्ने सन्दर्भमा तपाईंहरूको शिष्यताको परीक्षण गर्न आमन्त्रण गर्छु । म तपाईंहरूलाई आवश्यक पर्न सक्ने कुनै पनि समायोजन गर्नका लागि आशीर्वाद दिन्छु ताकि तपाईंहरूको व्यवहार असल, सम्मानजनक र येशू ख्रीष्टको सत्य अनुयायीको प्रतिनिधि होस् ।
म तपाईंहरूलाई आशीर्वाद दिन्छु कि युद्धलाई बिन्तीले, वैमनस्यलाई समझले र कलहलाई शान्तिले प्रतिस्थापन गर्नुहोस् ।
परमेश्वर जीवित हुनुहुन्छ! येशू नै ख्रीष्ट हुनुहुन्छ । उहाँ यस चर्चको शिरमा उभिनुहुन्छ । हामी उहाँका सेवकहरू हौँ | उहाँले हामीलाई उहाँको शान्ति निर्माता बन्न सहयोग गर्नुहुने छ । म येशू ख्रीष्टको पवित्र नाममा यो प्रमाणित गर्छु, आमीन ।