Si Jesukristo Mao ang Kalig-on sa Kabatan-onan

Ni Elder Dieter F. Uchtdorf

Sa Korum sa Napulog Duha ka Apostoles

Ibutang ang inyong pagsalig kang Jesukristo. Siya mogiya ninyo sa saktong dalan. Siya ang inyong kalig-on.

Sa pagpangandam alang niini nga mensahe karon, akong gibati ang kusog nga mga pag-aghat sa paghisgot sa mga batan-ong babaye ug mga batan-ong lalaki.

Ako usab mamulong ngadto niadtong kinsa mga batan-on kaniadto, bisan niadtong kinsa wala na gani makahinumdom niini.

Ug ako mamulong ngadto sa tanang kinsa nagmahal sa atong kabatan-onan ug gusto nga sila molampos sa kinabuhi.

Alang sa nagtubo nga henerasyon, ako adunay mensahe alang kaninyo gikan sa atong Manluluwas nga si Jesukristo.

Ang Mensahe sa Manluluwas nganha Kaninyo

Minahal nga batan-ong mga higala, kon ang Manluluwas ania karon, unsa kaha ang Iyang isulti kaninyo?

Ako nagtuo nga Siya mosugod sa pagpadayag sa Iyang dakong gugma alang kaninyo. Siya mahimong mosulti niini, apan kini usab modagayday pag-ayo—bisan gikan sa Iyang presensya—nga dili masaypan, kusganon nga mabati gayod ninyo ang Iyang gugma alang kaninyo!

Ug gani, tungod kay kitang tanan huyang ug dili perpekto, tingali kita mabalaka nga dili takos sa iyang gugma. Kamo tingali makahinumdom og mga sayop nga inyong nahimo, mga panahon nga kamo nagpadala sa tintasyon, mga butang nga kamo nanghinaot nga wala unta ninyo buhata—o nanghinaot nga kamo nakahimo unta og mas maayo.

Ang Manluluwas makahibalo niana, ug ako nagtuo nga Siya mosiguro kaninyo uban sa mga pulong nga Iyang gisulti diha sa mga kasulatan:

Ayaw kahadlok.¹

“Ayaw pagduha-duha.”²

“Pagmaya.”³

“Ayaw kamog kaguol.”⁴

Ako wala magtuo nga Siya mohimo og mga pamalibad alang sa inyong mga sayop. Siya dili moingon nga ang sayop dili importante. Dili, Siya mosugo ninyo sa paghinulsol—sa pagbiya sa inyong mga sala, sa pag-usab, aron Siya makapasaylo kaninyo. Siya mopahinumdom kaninyo nga 2,000 ka tuig ang milabay Siya mipas-an niadtong mga sala sa Iyang kaugalingon aron nga kamo makahinulsol. Kana kabahin sa plano sa kalipay nga giregalo kanato gikan sa atong mahigugmaong Langitnong Amahan.

Si Jesus mahimong nagpasabot nga ang inyong mga pakigsaad Kaniya—gihimo sa dihang kamo gibunyagan ug gibag-o matag higayon nga kamo moambit sa sakramento—naghatag ninyo og espesyal nga koneksyon ngadto Kaniya. Ang matang sa koneksyon nga gihulagway sa mga kasulatan nga magkahiusa sa pagsangon aron nga, uban sa Iyang tabang, kamo makapas-an sa bisan unsa nga ipapas-an.⁵

Ako nagtuo nga ang Manluluwas nga si Jesukristo gusto nga inyong makita, mabati, ug mahibaloan nga Siya mao ang inyong kalig-on. Nga uban sa Iyang tabang, walay kinutoban ang unsay inyong mahimo. Nga ang inyong potensiyal walay kinutoban. Siya gusto nga kamo makakita sa inyong kaugalingon sa paagi nga Siya nakakita kaninyo. Ug kana lahi kaayo gikan sa paagi sa pagtan-aw sa kalibotan kaninyo.

Ang Manluluwas mopahayag, sa sigurado gayod nga paagi, nga kamo usa ka anak nga babaye o anak nga lalaki sa Makagagahom nga Dios. Ang inyong Langitnong Amahan mao ang labing mahimayaon nga binuhat sa uniberso, puno sa gugma, hingpit nga kalipay, kaputli, kabalaan, kahayag, grasya, ug kamatuoran. Ug moabot ang adlaw nga Siya gusto nga kamo mopanunod sa tanan nga Iyang gipanag-iya.⁶

Mao kini ang rason ngano nga kamo ania sa yuta—aron makat-on, motubo, ug mouswag ug mahimo sa tanan nga butang nga gilalang sa Amahan sa Langit alang kaninyo.

Aron mahimo kining posible, Siya mipadala ni Jesukristo aron mahimo ninyong Manluluwas. Kini ang katuyoan luyo sa Iyang mahinungdanong plano sa kalipay, sa Iyang Simbahan, sa Iyang pagkapari, sa mga kasulatan—tanan niini.

Kana mao ang inyong kapalaran. Kana mao ang inyong umaabot. Kana mao ang inyong pagpili!

Kamatuoran ug mga Pagpili

Ang labing importante sa plano sa Dios alang sa inyong kalipay mao ang inyong gahom sa pagpili.⁷ Dayag lang, ang inyong Langitnong Amahan gusto nga kamo mopili og mahangtorong kalipay uban Kaniya, ug Siya motabang ninyo sa pagkab-ot niini, apan Siya dili gayod mopugos niini nganha kaninyo.

Mao nga Siya nagtugot kaninyo sa pagpili: Kahayag o kangitngit? Maayo o daotan? Hingpit nga kalipay o kaalaot? Kinabuhing dayon o espirituhanong kamatayon?⁸

Ingon og kini sayon nga pagpili, dili ba? Apan bisan pa, dinhi sa yuta, ingon og mas komplikado kay sa gipaabot.

Ang problema mao nga kita dili kanunay makakita sa mga butang nga klaro kay sa atong gusto. Si Apostol Pablo mitandi niini ngadto sa pagtan-aw “sa hanap nga panagway diha sa salamin.”⁹ Adunay daghang kalibog sa kalibotan mahitungod kon unsay matarong ug sayop. Ang kamatuoran matuis aron sa paghimo sa daotan nga maayo ug sa maayo nga daotan.¹⁰

Apan kon kamo matinguhaon sa pagpangita sa kamatuoran—mahangtoron, walay kausaban nga kamatuoran—ang inyong mga pagpili mahimong mas klaro. Oo, kamo sa gihapon adunay tintasyon ug mga pagsulay. Dili maayong mga butang mahitabo gihapon. Makapalibog nga mga butang. Masulub-ong mga butang. Apan kamo makadumala ra kon kamo nakaila kinsa kamo, nganong ania kamo dinhi, ug kon kamo mosalig sa Dios.

Mao nga asa man kamo mangita sa kamatuoran?

Kini anaa sa ebanghelyo ni Jesukristo. Ug ang kahingpitan niana nga ebanghelyo gitudlo sa Ang Simbahan ni Jesukristo sa mga Santos sa Ulahing mga Adlaw.

Si Jesukristo miingon, “Ako mao ang dalan, ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi kanako.”¹¹

Kon kamo adunay importante nga mga pagpili nga himoon, si Jesukristo ug ang Iyang gipahiuli nga ebanghelyo mao ang labing maayong pagpili. Kon kamo adunay mga pangutana, si Jesukristo ug ang Iyang gipahiuli nga ebanghelyo mao ang labing maayong tubag. Kon kamo mobati nga naluya, si Jesukristo ang inyong kalig-on.

Siya nagahatag og gahom ngadto sa naluya; ug ngadto sa walay mahimo, Siya nagdugang og kusog.

Apan kadtong mosalig sa Ginoo makabaton og bag-ong kusog.¹²

Alang sa Kalig-on sa mga Kabatan-onan

Aron matabangan kamo nga makakaplag sa Dalan ug aron matabangan kamo nga mahimo ang doktrina ni Kristo nga giya nga impluwensiya sa inyong kinabuhi, Ang Simbahan ni Jesukristo sa mga Santos sa Ulahing mga Adlaw miandam og bag-ong kapanguhaan, giusab nga bersiyon sa Alang sa Kalig-on sa mga Kabatan-onan.

Ang 2011 nga bersiyon sa Alang sa Kalig-on sa mga Kabatan-onan

Sulod sa sobra sa 50 ka tuig, ang Alang sa Kalig-on sa mga Kabatan-onan nahimong usa ka giya sa mga henerasyon sa Ulahing mga Adlaw nga kabatan-onan. Ako kanunay magtipig og kopya diha sa akong bulsa, ug ako mopaambit niini sa mga tawo kinsa masusihon mahitungod sa atong mga sumbanan. Kini gi-update ug gibag-o aron mas makasagubang sa mga hagit ug mga tintasyon sa atong panahon. Ang bag-ong bersiyon sa Alang sa Kalig-on sa mga Kabatan-onan anaa sa 50 ka lain-laing pinulongan ug anaa usab sa mga giimprinta. Dako kini nga tabang sa paghimo og mga pagpili sa inyong kinabuhi. Palihog dawata kini isip inyong kaugalingon ug ipakigbahin kini sa inyog mga higala.

Ang 2022 nga bersiyon sa Alang sa Kalig-on sa mga Kabatan-onan

Kining bag-ong bersiyon sa Alang sa Kalig-on sa mga Kabatan-onan gibutangan og subtitle nga Usa ka Giya alang sa Paghimo og mga Pagpili.

Aron klaro kaayo, ang labing maayong giya nga posible ninyong maangkon sa paghimo og mga pagpili mao si Jesukristo. Si Jesukristo mao ang kalig-on sa kabatan-onan.

Mao nga ang katuyoan sa Alang sa Kalig-on sa mga Kabatan-onan mao ang pagtudlo ninyo ngadto Kaniya. Kini nagtudlo kaninyo sa mahangtoron nga mga kamatuoran sa Iyang gipahiuli nga ebanghelyo—mga kamatuoran mahitungod kon kinsa kamo, kinsa Siya, ug unsa ang inyong mahimo uban sa Iyang kalig-on. Kini nagtudlo kaninyo unsaon sa paghimo og matarong nga mga pagpili base niadtong mahangtorong mga kamatuoran.¹³

Importante usab nga makahibalo unsa ang dili mahimo sa Alang sa Kalig-on sa mga Kabatan-onan. Kini dili mohimo og mga desisyon alang ninyo. Kini dili mohatag ninyo og “oo” o “dili” mahitungod sa matag pagpili nga mahimo ninyong atubangon. Ang Alang sa Kalig-on sa mga Kabatan-onan nagtutok sa pundasyon alang sa inyong mga pagpili. Kini nagtutok sa mga mithi, mga baroganan, ug doktrina imbis sa matag piho nga kinaiya.

Ang Ginoo, pinaagi sa Iyang mga propeta, kanunay naggiya nato niana nga direksiyon. Siya naghangyo nato sa “pagpalambo [sa atong] espirituhanong kapasidad sa pagdawat og pagpadayag.”¹⁴ Siya nagdapit nato sa “[pag]paminaw Kaniya.”¹⁵ Siya nagtawag nato sa pagsunod Kaniya sa mas taas ug mas balaan nga mga paagi.¹⁶ Ug kita nagkat-on sa susama nga paagi matag semana sa Dali, Sunod Kanako.

Ako nagtuo nga ang giya makahatag ninyo og taas nga mga lista sa mga sinina nga dili ninyo isul-ob, mga pulong nga dili ninyo isulti, ug mga salida nga dili ninyo tan-awon. Apan kana makatabang ba gayod sa usa ka tibuok kalibotan nga simbahan? Ang mao ba nga paagi tinud-anay nga makaandam ninyo alang sa tibuok kinabuhi sa Kristohanong pagpuyo?

Si Joseph Smith miingon, “Ako mitudlo kanila sa husto nga mga baroganan, ug gidumala nila ang ilang mga kaugalingon.”¹⁷

Ug si Hari Benjamin misulti sa iyang katawhan diha sa Basahon ni Mormon, “Ako dili makasulti kaninyo sa tanan nga mga butang diin kamo mahimo nga makabuhat og sala; kay adunay daghan nga mga paagi ug mga hinungdan, gani hilabihan kadaghan nga ako dili makaihap kanila.”¹⁸

Si Hari Benjamin mipadayon sa pagsulti, “Apan kini igo na nga ako makasulti kaninyo, … magbantay sa inyong kaugalingon, ug sa inyong mga hunahuna, ug sa inyong mga pulong, ug sa inyong mga buhat, ug magbantay sa mga sugo sa Dios, ug magpadayon diha sa hugot nga pagtuo sa … atong Ginoo, gani ngadto sa kataposan sa inyong mga kinabuhi.”¹⁹

Ang Manluluwas nga si Jesukristo

Sayop ba nga adunay mga lagda? Sa tinuod dili. Kita nagkinahanglan niini matag adlaw. Apan sayop nga motutok lamang sa mga lagda imbis nga motutok sa Manluluwas. Kamo kinahanglan nga makahibalo sa mga ngano ug sa mga giunsa, ug dayon mohunahuna sa mga sangpotanan sa inyong mga pagpili. Kamo kinahanglan nga mobutang sa inyong pagsalig diha ni Jesukristo. Siya mogiya ninyo sa saktong dalan. Siya ang inyong kalig-on.²⁰

Ang Gahom sa Tinuod nga Doktrina

Ang Alang sa Kalig-on sa mga Kabatan-onan maisogon sa pagpahayag sa doktrina ni Jesukristo. Kini maisogon sa pagdapit ninyo sa paghimo og mga pagpili base sa doktrina ni Kristo. Ug kini maisogon sa paghulagway sa mga panalangin nga gisaad ni Jesukristo niadtong kinsa mosubay sa Iyang Dalan.²¹

Si Presidente Russell M. Nelson mitudlo: “Kon ang inyong labing dakong tinguha mao ang pagpatigbabaw sa Dios labaw sa tanan [diha sa inyong kinabuhi], … daghan kaayo nga mga desisyon ang mahimong mas sayon. … Daghan kaayong mga isyu ang mahimong walay hinungdan! Masayod kamo unsay labing maayong paagi sa pagpresentar sa inyong kaugalingon. Masayod kamo unsay tan-awon ug basahon, asa igahin ang inyong panahon, ug kinsay ikauban. Masayod kamo unsay inyong gustong makab-ot. Masayod kamo unsa nga matang sa tawo ang gusto gayod ninyo nga mamahimo.”²²

Usa ka Mas Taas nga Sumbanan

Si Jesukristo adunay taas kaayo nga mga sumbanan alang sa Iyang mga sumusunod. Ug ang imbitasyon nga kinasingkasing nga magtinguha sa Iyang kabubut-on ug magsunod sa Iyang mga kamatuoran mao ang posible nga labing taas nga sumbanan!

Importante nga ang temporal ug espiritwal nga mga pagpili kinahanglan nga dili lamang ibase sa personal nga kagustohan, o unsay sayon o inila.²³ Ang Ginoo wala mag-ingon, “Buhata bisan unsay inyong gusto.”

Siya nag-ingon, “Ipatigbabaw ang Dios labaw sa tanan.”

Siya nag-ingon, “Dali, sunod kanako.”²⁴

Siya nag-ingon, “Pagpuyo og mas balaan, mas taas, mas hingkod nga paagi.”

Siya nag-ingon, “Paghupot sa akong mga sugo.”

Si Jesukristo mao ang atong hingpit nga ehemplo, ug kita maningkamot uban sa tibuok kusog sa atong kalag sa pagsunod Kaniya.

Minahal kong mga higala, tugoti ko nga mosubli, kon ang Manluluwas nagbarog karon dinhi, Siya mopadayag sa Iyang walay kinutoban nga gugma alang kaninyo, sa Iyang hingpit nga pagsalig kaninyo. Siya mosulti kaninyo nga kamo makahimo niini. Kamo makatukod og makalingaw, malipayon nga kinabuhi tungod kay si Jesukristo mao ang inyong kalig-on. Kamo makakaplag og pagsalig, kalinaw, kasiguroan, kalipay, ug pagkaapil karon ug sa kahangtoran, tungod kay kamo makakaplag niining tanan diha ni Jesukristo, sa Iyang ebanghelyo, sa Iyang Simbahan.

Niini ako mohatag sa akong ligdong nga pagsaksi isip usa ka Apostol ni Ginoong Jesukristo ug mobilin kaninyo sa akong kinasingkasing nga panalangin pinaagi sa pagpasalamat pag-ayo ug sa gugma alang kaninyo, sa ngalan ni Jesukristo, amen.

Mubo nga mga Sulat

1. Lucas 5:10; 8:50; 12:7; Doktrina ug mga Pakigsaad 38:15; 50:41; 98:1.

2. Doktrina ug mga Pakigsaad 6:36.

3. Mateo 14:27; Juan 16:33; Doktrina ug mga Pakigsaad 61:36; 68:6; 78:18.

4. Juan 14:1, 27.

5. Tan-awa sa Mateo 11:28–30.

6. Tan-awa sa Doktrina ug Mga Pakigsaad 84:38.

7. Kamo mahimong moingon nga ang plano sa Amahan gidisenyo aron sa pagtugot ninyo sa pagpadayag sa inyong mga tinguha pinaagi sa inyong mga pagpili, aron nga kamo makadawat sa hingpit nga mga resulta sa unsay inyong gitinguha. Sama sa gitudlo ni Elder Dale G. Renlund, “Ang tumong sa atong Langitnong Amahan sa pagka-ginikanan dili ang pagbuhat sa Iyang mga anak sa unsay matarong; kini ang pagpili sa Iyang mga anak sa pagbuhat sa matarong ug sa kataposan mahimong sama Kaniya” (“Magpili Kamo Niining Adlawa,” Liahona, Nob. 2018, 104).

8. Tan-awa sa 2 Nephi 2:26–27.

9. 1 Mga Taga-Corinto 13:12.

10. Tan-awa sa Isaias 5:20.

11. Juan 14:6.

12. Tan-awa sa Isaias 40:29–31.

13. Isip mga Santos sa Ulahing mga Adlaw, kita sa kasagaran nailhan sa unsay atong buhaton ug dili buhaton—sa atong mga kinaiya. Kini mahimong maayo, apan mas maayo pa gani nga mailhan sa unsay atong nahibaloan (ang mga kamatuoran nga makapahimo sa atong mga kinaiya) ug kinsa ang atong nailhan (ang Manluluwas—ug sa unsa nga paagi nga ang atong gugma alang Kaniya modasig sa atong mga kinaiya).

14. Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96.

15. Tan-awa sa Russell M. Nelson, “Paminaw Kaniya,” Liahona Mayo 2020, 88–92.

16. Ang gibase sa baroganan nga paagi sa bag-ong giya sa Alang sa Kalig-on sa mga Kabatan-onan nagkauyon sa ubang bag-ong mga inisyatibo nga gipaila sa Simbahan sa Manluluwas, lakip sa Isangyaw ang Akong Ebanghelyo, pagpangalagad, sa nakasentro sa panimalay nga Dali, Sunod Kanako nga kurikulom, sa programa sa Kabataan ug Kabatan-onan, Pagtudlo sumala sa Pamaagi sa Manluluwas, ug sa bag-ong Kinatibuk-ang Tamdanan nga Basahon. Klaro, nga ang Ginoo nagpalig-on sa atong espiritwal nga kapasidad. Siya nagpakita og dugang nga pagsalig sa Iyang katawhan sa pakigsaad sa ulahing mga adlaw.

17. Mga Pagtulun-an sa mga Presidente sa Simbahan: Joseph Smith (2007), 343–344.

18. Mosiah 4:29. Sa ingon nga paagi, mao kini ang gipaningkamotan nga buhaton sa mga Pariseo sa panahon ni Jesus. Sa ilang tinguha sa pagpugong sa mga tawo sa pagsupak sa balaod, sila mitigom og gatosan ka mga lagda base sa ilang pagsabot sa sagrado nga mga sinulat. Unsa ang nakasayop sa mga Pariseo mao nga sila nagtuo nga ang ilang mga lagda makaluwas kanila. Dayon, sa dihang nagpakita ang Manluluwas. sila wala makaila Kaniya.

19. Mosiah 4:30.

20. Laing rason nga ang usa ka gibase sa baroganan nga paagi gikinahanglan karon mao ang nagdaghan nga nagkalain-laing kultura sa Simbahan sa Ginoo. Ang mga baroganan mahangtoron ug malukpanon. Ang piho nga mga lagda o mga paggamit niadtong mga baroganan mahimo ra diha sa pipila ka dapit apan dili sa uban. Unsa ang nakapahiusa nato mao si Jesukristo ug ang mahangtorong mga kamatuoran nga Iyang gitudlo, bisan kon ang piho nga mga paggamit magkalahi sa panahon ug sa lain-laing mga kultura. Mao nga ang problema sa paglista sa tanang posible nga buhaton ug dili buhaton dili lang nga kini impraktikal ug dili makalahutay. Ang problema mao nga kini makapasimang sa atong pagtutok gikan sa tinuod nga Tinubdan sa atong kalig-on, sa atong Manluluwas, si Jesukristo.

21. Daghang mga tuig na ang milabay si Presidente Boyd K. Packer namulong niining gamhanan nga mga pulong: “Ang tinuod nga doktrina, unya nasabtan, mopausab sa mga kinaiya ug mga pamatasan. Ang pagtuon sa mga doktrina sa ebanghelyo mas dali nga makapalambo sa pamatasan kay sa pagtuon bahin sa pamatasan aron mapalambo kini” (“Ayaw Kahadlok,” Liahona, Mayo 2004, 79).

    Si Presidente Ezra Taft Benson mitudlo sa susama nga kamatuoran: “Ang Ginoo nag-usab sa mga tawo gikan sa sulod paingon sa gawas. Ang kalibotan nag-usab sa tawo gikan sa gawas paingon sa sulod. … Ang kalibotan moumol sa tawhanong kinaiya, apan si Kristo makausab sa tawhanong kinaiyahan” (“Born of God,” Ensign, Nob. 1985, 6).

    Sa dihang ang propeta sa Basahon ni Mormon nga si Alma nakakita sa kadaotan diha sa kalibotan sa iyang palibot, siya midangop sa pulong sa Dios tungod kay nasayod siya nga kini “adunay labaw nga gamhanan nga sangpotanan diha sa mga hunahuna sa katawhan kay sa espada, o sa bisan unsa pa, diin nahitabo ngadto kanila—busa si Alma naghunahuna nga kini angay nga sila kinahanglan [nga] mosulay sa hiyas sa pulong sa Dios” (Alma 31:5).

22. Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 94. Si Presidente Russell M. Nelson mipasabot niini nga paagi sa diha nga siya mitudlo kanato mahitungod sa pagtahod sa adlaw nga Igpapahulay: “Niadtong mas batan-on pa ko, gitun-an nako ang lista nga gibuhat sa ubang tawo sa mga butang nga buhaton ug mga butang nga dili buhaton sa Igpapahulay. Ulahi na nakong nasayran gikan sa mga kasulatan nga ang akong binuhatan ug kinaiya panahon sa Igpapahulay maoy usa ka timailhan tali kanako ug sa akong Langitnong Amahan. Ubos nianang pagsabot, wala na ko magkinahanglan og listahan sa angay buhaton ug dili buhaton. Kon kinahanglan nakong modesisyon nga ang usa ka kalihokan angay ba o dili angay alang sa Igpapahulay, mangutana lang ko sa akong kaugalingon, ‘Unsa man nga timailhan ang gusto nakong ihatag ngadto sa Dios?’ Kana nga pangutana nakapaklaro kaayo sa akong mga pagpili sa adlaw nga Igpapahulay” (“Ang Igpapahulay usa ka Kahimut-an,” Liahona, Mayo 2015, 130).

23. Si Elder David A. Bednar mitudlo nga ang “mga baroganan sa pagkamatarong … makatabang usab kanato nga motan-aw lapas pa sa atong personal nga mga gusto ug hinakog nga mga tinguha pinaagi sa paghatag og bililhong panglantaw sa mahangturong kamatuoran samtang atong gisinati ang lainlaing mga kahimtang, mga hagit, mga desisyon, ug mga kasinatian sa pagkamortal.” (“Ang mga Baroganan sa Akong Ebanghelyo,” Liahona, Mayo 2021, 123–24).

24. Lucas 18:22.