Afanafana ewe Kapas Allimen Kinamwe
A wor rech ewe wis mi pin ach sipwe aprousa ewe manaman me kinanmwen Jises Kraist fiti meinisin repwe ausening.
Achengicheng pwi me fefinei, oua ketiwoch ngeni mwichenap! Ua osukusuku ei ran fiti wachemuken pwapwa. Ngang uwa iotek fan itemi iteitan ran. Ua pwan iotek pwe ei mwichenap epwe eu ranin asofosefan non pekin ngun ngeni emon me emon ami meinisin.
Seni ewe mwichenap a no, osukosuken fonufan mi soposopono. Ewe semwen a nom won unusan fonufan mi chok awosukosuka manauach. Me iei ewe fonufan a monoun ren eu maun minne a opungatiw watten nuokus won fite minion mwan, fefin, me semirit ese wor ar mwan.
Soufos ra fen kuna ach kei ran, nupwen epwe wor maun me porausen maun, me nupwen unusan fonufan epwe nom non osukosuk.1 Kich chon tapweno mwirin Jises Kraist, sia tingor ngeni ekkewe chon emwenin ekkewe fonu repwe kutta foforun kinamwein ar kewe sokofesin. Sia kokkori aramas meinisin repwe iotek fan iten ekkewe mi osupwang, me fori met ir mi tongeni ne anisi ekkewe mi riaffou, me kutta an ewe Samon aninis ne awesano ekkewe watten osukosuk.
Pwi me fefinei, ewe kapas allimen Jises Kraist ese mwo fen kon namwot nap seni namwotan ikenai. Anini mi awosukosuka meinisin met ewe Chon Amanau a osukuna me pesei. Ua tongei ewe Samon Jises Kraist me pwarata pwe An kapas allim ina chokmet epwe wisen awora kinamwe. An kapas allim ina ew kapas allimen kinamwe.2
An kapas allim ina chok ewe minen aninnis nupwen chommong me won ewe fonufan ra rukono ren nuokus.3 A affata auchean an ewe Samon tingor pwe Noun kewe chon kuno repwe “feino … non unusan fonufan, me afanafana ewe kapas allim ngeni aramas meinisin.”4 A wor wisach mi pin ach sipwe aprousa ewe manaman me kinamwen Jises Kraist ren meinisin repwe ausening me repwe mut ngeni Kot epwe nonnom non manauer.
Meinisin aramas ra fori pwon mi pin ren Kot a pwon pwe repwe ekieki usun pwan ekkoch me angang ngeni ekkewe mi osupwang. Sia tongeni fori napanapen nuku non Kot me moneta fansoun meinisin ach sipwe ponueni ekana ra eis ussun “ewe epinukunuk non [kich].”5 Emon me emon kich mi wor wisach non ewe ioifengenin Israel.
Ikenai ua apochokuna ne apasa sefani pwe ewe Samon a fen tingorei iteiten anuon mi nimenimoch, me tufich, repwe ammonata pwe repwe fori angangen misineri. Ren anuon non ei Mwichefen, angangen misineri ina wisen ewe pristut. Ami anuon oua iseiseno pwe oupwe feito non ei fansoun nupwen a fis ewe ioifengenin Israel. Nupwen oua fori angangen misineri, oua fori ew auchean wis non ei mettoch ese fifis me akkom.
Ren ami fopun mi tufichin sister misineri, ew misin pwan ew manaman, nge oupwe pusin finata tufichin . Sia tongei sister misineri me etiwa ir ren unusan netipach. Met oua awora aninisin ngeni ei angang amen amwarar. Oupwe iotek pwe oupwe sinei ika ewe Samon a mochen oupwe angang ngeni ew misin, me ewe Ngun mi Fel epwe ponueni ngeni netipemi me ami ekiek.
Achengicheng chienei sarafo,, emon me emon ouwa fokkun auche ngeni ewe Samon. I a isonikemino tori ei fansoun pwe oupwe aninis ne ioifengeni Israel. Om pusin finata ne anganga ew misin, ika ew angangen kutta kewe resemo rong ewe kapas allim ika ew angangen misin, epwe efeiochuk me pwan chommong ekkoch. Sia pwan etiwa pean pupunu chinnap repwe fiti ewe angang ika mi tufich. Ar angang ese wor siwinin.
Meinisin misineri ra afanafan me pwarata usun ewe Chon Amanau. Ewe kiroch non pekin ngun non fonufan a fori an epwe napeno namwotan ewe saramen Jises Kraist iei nap seni fansoun meinisin. Meinisin a auchea ngenir ewe tufich ar repwe sinei ewe kapas allimen Jises Kraist mi niwinsefanito. Aramas meinisin mi auchea ngenir ar repwe sinei ian repwe tongeni kuna me ian ewe apinukunuk me kinamwe minne a “[anapano] wewe meinisin.”6
Amo ei mwichenap epwe eu fansoun kinamwe me kametip non pekin ngun fan itemi. Amo oupwe kutta me angei ami pwisin pwarata non ekkei mwich, ua iotek non ewe it mi pin iten Jises Kraist, amen.