Paggahin og Panahon alang sa Ginoo
Ako mohangyo kaninyo karon nga suklan ang kalibotanong pagtintal pinaagi sa paggahin og panahon alang sa Ginoo diha sa inyong kinabuhi––matag adlaw.
Akong minahal nga mga kaigsoonan, sulod sa duha ka adlaw natudloan kita pag-ayo sa mga sulogoon sa Ginoo kinsa makugihon nga nagtinguha nga mahibalo unsa ang Iyang gusto nila nga isulti.
Kita gisultihan sa angay natong buhaton sa mosunod nga unom ka bulan. Karon ang pangutana mao, unsaon nato pagkahimong lahi tungod sa unsay atong nadunggan ug gibati?
Ang pandemya nagpakita kanato unsa ka dali mausab sa atong kinabuhi, sa ubang higayon gikan sa mga sirkumstansiya nga dili nato madumala. Hinuon, adunay daghang butang nga atong madumala. Kita mohan-ay sa atong mga prayoridad ug motino unsaon nato paggamit sa atong kusog, panahon, ug mga kahimtang. Kita mohukom unsaon nato pagtratar sa usa’g usa. Kita mopili kon asa kita modangop alang sa kamatuoran ug giya.
Ang kalibotanon nga mga impluwensiya ug mga pag-aghat miasdang ug daghan kaayo. Apan daghan kaayo sa mga impluwensiya ang malinglahon, matintalon, ug makapalayo kanato sa dalan sa pakigsaad. Aron malikayan ang dili kapugngan nga kasakit nga mosunod, ako mohangyo kaninyo karon nga suklan ang kalibotanong pagtintal pinaagi sa paggahin og panahon alang sa Ginoo diha sa inyong kinabuhi––matag adlaw.
Kon ang kadaghanan sa impormasyon nga inyong madawat gikan sa social o ubang media, ang inyong abilidad sa pagkadungog sa mga paghunghong sa Espiritu mag-anam og kawala. Kon kamo wala magtinguha sa Ginoo pinaagi sa inadlaw-adlaw nga pag-ampo ug pagtuon sa ebanghelyo, inyong gitugotan ang inyong kaugalingon nga madutlan sa mga pilosopiya nga tingali makapadani apan dili tinuod. Bisan ang matinud-anon nga mga Santos mahimong maligas tungod sa kanunay nga pagtugtog sa banda sa Babelonia.
Akong mga kaigsoonan, ako mohangyo kaninyo sa paggahin og panahon alang sa Ginoo! Himoang lig-on ang inyong kaugalingong espirituwal nga pundasyon ug makasugakod sa pagsulay sa taas nga panahon pinaagi sa pagbuhat niadtong mga butang nga magtugot sa Espiritu Santo nga magauban kaninyo kanunay.
Ayaw gayod ipakaubos ang hingpit nga kamatuoran nga “ang Espiritu mamulong … ingon nga sila gay[o]d mao, ug ingon sa mga butang nga sila gay[o]d mahimo unya.”1 “Kini mopakita nganha kaninyo sa tanan nga mga butang nga kinahanglan inyong buhaton.”2
Walay samang paagi sa pagdapit sa Espiritu kay sa inyong makanunayong pagtutok kang Jesukristo. Paghisgot bahin ni Kristo, pagmaya diha kang Kristo, pagbusog sa pulong ni Kristo, ug mopadayon sa unahan uban ang pagkamakanunayon kang Kristo.3 Himoa ang inyong Igpapahulay nga kahimut-an samtang kamo nagsimba Kaniya, moambit sa sakramento, ug mobalaan sa Iyang adlaw.4
Sa ako nang gipahimug-atan ganinang buntag, palihog paggahin og panahon sa Ginoo diha sa Iyang balaan nga balay. Walay lain nga makapalig-on sa inyong espirituwal nga pundasyon sama sa pagserbisyo sa templo ug pagsimba sa templo.
Magpasalamat kami sa tanan kinsa nagtrabaho sa atong bag-o nga mga templo. Gitukod kini sa tibuok kalibotan. Karon ako malipayon nga mopahibalo sa among mga plano sa pagtukod og dugang nga mga templo ngadto sa o duol sa mosunod nga mga dapit: Kaohsiung, Taiwan; Tacloban, Philippines; Monrovia, Liberia; Kananga, Democratic Republic of the Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; ug ang pagpaayo sa Templo sa Provo Utah human sa pagpahinungod sa Templo sa Orem Utah.
Gimahal ko kamo, mga pinalangga nga mga kaigsoonan. Ang Ginoo nakaila kaninyo ug nahigugma kaninyo. Siya mao ang inyong Manluluwas ug ang inyong Manunubos. Siya nangulo ug naggiya sa Iyang Simbahan. Siya ang mangulo ug moggiya kaninyo sa inyong personal nga kinabuhi kon kamo moggahin og panahon alang Kaniya diha sa inyong kinabuhi––matag adlaw.
Hinaot nga ang Dios magauban kaninyo hangtod nga magkita kita pag-usab, ako nag-ampo sa sagrado nga ngalan ni Jesukristo, amen.