Inadlaw nga Pagpahiuli

Ni Elder Dieter F. Uchtdorf

Sa Korum sa Napulog Duha ka Apostoles

Nagkinahanglan kita og padayon, inadlaw nga pagdan-ag sa langitnong kahayag. Nagkinahanglan kita og “mga panahon sa kahayahay.” Mga panahon sa personal nga pagpahiuli.

Nagpundok kita niining matahom nga buntag sa Igpapahulay aron mamulong mahitungod kang Kristo, magmaya sa Iyang ebanghelyo, ug mosuporta ug mopaluyo sa usag usa samtang maglakaw kita diha “[sa] dalan” sa atong Manluluwas.¹

Isip mga miyembro sa Ang Simbahan ni Jesukristo sa mga Santos sa Ulahing mga Adlaw, nagtigom kita alang niini nga katuyoan sa matag adlawng Igpapahulay sa tibuok tuig. Kon kamo dili miyembro sa Simbahan, kami tinud-anay gayod nga moabiabi kaninyo ug mopasalamat kaninyo sa pag-apil kanamo aron sa pagsimba sa Manluluwas ug pagkat-on mahitungod Kaniya. Sama kaninyo, naningkamot kami—bisan dili ingon niana ka hingpit—nga mamahimong mas maayong mga higala, mga silingan, ug mga tawo,² ug naningkamot kami sa paghimo niini pinaagi sa pagsunod sa among Ehemplo, si Jesukristo.

Ang Manluluwas nga si Jesukristo

Nanghinaot kami nga mabati ninyo ang kasinsero sa among pagpamatuod. Si Jesukristo buhi! Siya mao ang Anak sa buhi nga Dios, ug Siya ang naggiya sa mga propeta dinhi sa yuta sa atong panahon karon. Gidapit namo ang tanan nga moduol, maminaw sa pulong sa Dios, ug moambit sa Iyang kaayo! Ako mohatag sa akong personal nga pagsaksi nga ang Dios anaa taliwala kanato ug Siya mopaduol gayod ngadto sa tanan kinsa mopaduol ngadto Kaniya.³

Gikonsiderar namo kini nga usa ka pasidungog nga makig-uban kaninyo diha sa higpit ug pig-ot nga dalan sa Agalon sa pagkadisipulo.

Ang Abilidad sa Diretso nga Paglakaw

Adunay pabalik-balik kanunay nga teyoriya nga ang mga tawo nga nangawala maglakaw nga nagtuyok-tuyok ra. Dili pa lang dugay, ang mga sayantist sa Max Planck Institute for Biological Cybernetics misulay niana nga teyoriya. Gidala nila ang mga partisipante ngadto sa nagdasok nga kakahoyan ug gihatagan sila og yanong mga instruksiyon: “Diretso lang og lakaw.” Walay makita nga mga timailhan. Ang mga gisulayan kinahanglan lang nga mosalig sa ilang gibati kon asa mopadulong.

Sa inyong hunahuna unsa kaha ang ilang gihimo?

Ang mga sayantist mimatuod, “Ang mga tawo magtuyok-tuyok ra diay [gayod] og lakaw kon sila walay masaligan nga mga timaan sa ilang gilaktan.”⁴ Sa dihang gipangutana human niana, ang pipila sa mga partisipante masaligon sa kaugalingon nga miangkon nga wala sila motipas bisan gamay. Bisan pa man sa ilang kamasaligon kaayo, ang datos sa GPS mipakita nga nagtuyok-tuyok ra sila og lakaw mga 20 metros ang gilay-on sa dayametro.

Nganong maglisod man kita sa paglakaw og diretso? Ang pipila ka tigsiksik mipasabot nga ang gamay, daw dili mahinungdanon nga mga pagtipas diha sa giagian makahimo og kalainan. Ang uban misulti sa kamatuoran nga kitang tanan adunay usa ka tiil nga mas lig-on og diyutay kay sa pikas nga tiil. “Kalagmitan,” hinoon, maglisod kita sa paglakaw og diretso “[tungod] sa nagkaanam nga kawalay kasigurohan kon asa ang diretso.”⁵

Bisan unsa pa man ang hinungdan, tawhanon kini nga kinaiya: kon walay makitang kasaligan nga mga timailhan, mahisalaag kita sa dalan.

Pagkahisalaag gikan sa Dalan

Dili ba makapainteresado nga ang gagmay, daw dili mahinungdanon nga mga butang makahimo og dakong kalainan sa atong mga kinabuhi?

Nasayod ko niini gikan sa personal nga kasinatian isip usa ka piloto. Matag higayon nga magsingabot ko sa usa ka airport, nasayod ko nga ang kadaghanan sa akong buhaton maglangkob sa paghimo sa padayong ginagmay nga pagsakto sa padulngan aron luwas nga madala ang eroplano ngadto sa among gusto nga tugpahanan.

Tingali kamo adunay susama nga kasinatian kon magdrayb og sakyanan. Ang hangin, problema sa kadalanan, dili maayo nga pagkahimutang sa ligid, wala sa hunahuna—dili na lang hisgotan ang binuhatan sa ubang mga drayber—tanan makapapahawa ninyo sa gitinguha nga dalan. Ayaw paghatag og pagtagad niini nga mga butang ug magkaproblema gyod kamo.⁶

Sakyanan nga anaa sa swimming pool

Magamit kini kanato sa pisikal nga paagi.

Magamit usab kini kanato sa espirituhanon nga paagi.

Kadaghanan sa mga kausaban sa atong espirituhanon nga mga kinabuhi—positibo ug negatibo—mahitabo sa hinay-hinay, anam-anam. Sama sa mga partisipante sa pagtuon didto sa Max Planck, mahimong dili nato mamatikdan nga mitipas na kita sa dalan. Gani tingali masaligon kaayo kita nga diretso ang atong paglakaw. Apan ang tinuod mao nga kon wala ang tabang sa mga timailhan aron mogiya nato, dili nato malikayan nga motipas kita sa dalan ug moabot sa mga dapit nga wala gayod nato hunahunaa nga kita maadto.

Nahitabo kini sa mga indibidwal. Nahitabo usab kini sa mga katilingban ug kanasoran. Ang mga kasulatan napuno sa mga panig-ingnan.

Ang basahon sa Mga Maghuhukom nagrekord nga human sa kamatayon ni Josue, “ang sunod nga kaliwatan … wala makaila sa Ginoo, o sa mga butang nga gibuhat niya alang sa Israel.”⁷

Bisan pa man sa makapahingangha nga langitnong mga pagpanginlabot, mga pagbisita, mga pagluwas, ug milagrosong mga kadaogan nga nasaksihan sa mga anak sa Israel atol sa tibuok kinabuhi ni Moises ug Josue, sulod sa usa ka henerasyon ang mga tawo misalikway sa Dalan ug misugod sa paglakaw sumala sa ilang kaugalingong mga tinguha. Ug, siyempre, wala kadto magdugay ug nag-antos sila sa mga sangpotanan tungod niana nga kinaiya.

Usahay kining pagbiya sa kamatuoran molungtad og pipila ka henerasyon. Usahay mahitabo kini sa pipila lang ka tuig o gani mga bulan.⁸ Apan kitang tanan lagmit nga makasinati niini. Bisan unsa pa kalig-on ang atong miaging espirituhanon nga mga kasinatian, isip mga tawo kita lagmit nga mahisalaag. Mao kana ang pabalikbalik nga hitabo gikan sa panahon ni Adan hangtod karon.

Ania ang Maayong Balita

Apan ang tanan wala mawagtang. Dili sama sa nahisalaag nga mga gisulayan, kita adunay masaligan, makita nga mga timailhan nga mahimo natong gamiton aron pagsusi sa atong dalan.

Ug unsa kini nga mga timailhan?

Sigurado gayod nga naglakip kini sa inadlaw nga pag-ampo ug pamalandong sa mga kasulatan ug paggamit sa dinasig nga mga himan sama sa Dali, Sunod Kanako. Matag adlaw, makaduol kita sa trono sa Dios diha sa kamapaubsanon ug kamatinuoron. Kita makapamalandong sa atong mga binuhatan ug makarebyo sa mga gutlo sa atong adlaw—maghunahuna sa atong kabubut-on ug mga tinguha kon nahisubay ba sa Iyang kabubut-on ug mga tinguha. Kon kita nahisalaag, mangamuyo kita sa Dios nga ipahiuli kita, ug mopasalig nga mohimo og mas maayo.

Ang Manluluwas naggiya sa Iyang mga karnero

Kini nga panahon sa pagsusi usa ka oportunidad sa pagtarong pag-usab. Usa kini ka tanaman sa paghinuklog diin kita maglakaw kauban sa Ginoo ug matudloan, malig-on, ug maputli pinaagi sa sinulat ug gipadayag sa Espiritu nga mga pulong sa atong Langitnong Amahan. Usa kini ka sagradong panahon diin kita mohinumdom sa atong ligdong nga mga pakigsaad nga mosunod sa malumo nga Kristo, diin kita mosusi sa atong kalamboan ug ipahimutang ang atong kaugalingon gamit ang espirituhanon nga mga timailhan nga gihatag sa Dios alang sa Iyang mga anak.

Hunahunaa kini isip inyong personal, inadlaw nga pagpahiuli. Sa atong biyahe isip mga magpapanaw diha sa dalan sa kahimayaan, nasayod kita nga dali ra kaayo nga mobiya sa kamaturoan. Apan ingon nga ang ginagmay nga mga pagtipas makapalayo kanato sa Dalan sa Manluluwas, mao usab ang gagmay ug yano nga mga binuhatan sa pagpahimutang pag-usab ang siguradong makapabalik kanato. Kon ang kangitngit mohinay-hinay og sulod sa atong mga kinabuhi, ingon nga kini sagad gayod, ang atong inadlaw nga pagpahiuli mobukas sa atong mga kasingkasing ngadto sa langitnong kahayag, nga modan-ag sa atong mga kalag, mowagtang sa mga kangitngit, mga kahadlok, ug mga pagduhaduha.

Gagmayng mga Timon, Dagkong mga Barko

Kon kita magtinguha niini, sigurado gayod nga ang “Dios mohatag [ngari] [kanato] og kahibalo pinaagi sa iyang Balaan nga Espiritu, oo, pinaagi sa dili mahulagway nga gasa sa Espiritu Santo.”⁹ Kon kanunay kita nga mangamuyo, Siya motudlo kanato sa Dalan ug motabang kanato sa pagsunod niini.

Kini, siyempre, nagkinahanglan og padayong paningkamot sa atong bahin. Dili kita mahimong makontento sa miaging espirituhanon nga mga kasinatian. Nagkinahanglan kita og padayon nga pagdagayday.

Dili kita mahimong magsalig sa mga pagpamatuod sa uban hangtod sa hangtod. Kinahanglan gayod kita nga mag-ugmad og atong kaugalingon.

Nagkinahanglan kita og padayon, inadlaw nga pagdan-ag sa langitnong kahayag.

Nagkinahanglan kita og “mga panahon sa kahayahay.”¹⁰ Mga panahon sa personal nga pagpahiuli.

“Ang tubig nga nagdagan” dili “magpabiling mahugaw.”¹¹ Aron ang atong mga hunahuna ug mga binuhatan magpabiling putli, kita kinahanglang padayon nga magdagan!

Labaw sa tanan, ang Pagpahiuli sa ebanghelyo ug sa Simbahan dili usa ka butang nga kausa lang mahitabo ug human na. Usa kini ka nagpadayon nga proseso—usa ka adlaw sa matag higayon, usa ka kasingkasing sa matag higayon.

Unsay atong gibuhat matag adlaw, maoy motino kon giunsa nato sa pagpakabuhi. Usa ka tagsulat misulti niini: “Ang usa ka adlaw daw sama sa tibuok nga kinabuhi. Magsugod kamo sa pagbuhat og usa ka butang, apan ang resulta nagbuhat kamo og lain, nagplano nga humanon ang buluhaton, apan walay nahuman. … Ug sa kataposan sa inyong kinabuhi, ang inyong tibuok pagpakabuhi adunay ingon ra usab nianang paturagas nga kalidad. Ang inyong tibuok kinabuhi parehas ra og sumbanan sama sa usa ka adlaw.”¹²

Gusto ba ninyong usbon ang sumbanan sa inyong kinabuhi?

Usba ang sumbanan sa inyong adlaw.

Gusto ba ninyong usbon ang inyong adlaw?

Usba kining orasa.

Usba ang unsay inyong gihunahuna, gibati, ug gibuhat niining higayona gayod.

Ang usa ka gamayng timon makakontrolar sa direksyon sa usa ka dakong barko.¹³

Ang gagmayng mga bloke mamahimong maanindot nga mga mansyon.

Ang gagmayng mga liso mamahimong tag-as kaayong mga kahoy nga sequoias.

Ang mga minuto ug mga oras nga maayong pagkagamit mao ang mga bloke nga nagtukod og usa ka kinabuhi nga maayo ang pagpakabuhi. Kini makapadasig og kaayohan, makapabayaw kanato gikan sa pagkaulipon sa pagkadili hingpit, ug makadala kanato pasaka ngadto sa matubsanong dalan sa kapasayloan ug pagkabalaan.

Ang Dios sa Bag-ong mga Sinugdanan

Uban kaninyo, ako mopahayag og pasalamat alang sa talagsaong gasa sa bag-ong oportunidad, bag-ong kinabuhi, bag-ong paglaom.

Atong ibayaw ang atong mga tingog agi og pagdayeg sa atong manggihatagon ug mapasayloon nga Dios. Kay sa pagkatinuod Siya mao ang Dios sa bag-ong mga sinugdanan. Ang halangdon nga katuyoan sa tanan Niyang buluhaton mao ang pagtabang kanato, Iyang mga anak, nga molampos sa atong gitinguha nga pagka-imortal ug kinabuhing dayon.¹⁴

Kita mamahimong bag-o nga mga binuhat diha kang Kristo, kay ang Dios misaad, “Ingon sa kanunay nga ang akong mga katawhan maghinulsol Ako mopasaylo kanila sa ilang mga kalapasan batok kanako”¹⁵ ug “dili na mohinumdom kanila.”¹⁶

Akong minahal nga mga kaigsoonan, pinalanggang mga higala, kitang tanan mahisalaag sa matag karon ug unya.

Apan mahimo kita nga makabalik sa dalan. Kita mahimong maglawig latas diha sa kangitngit ug mga pagsulay niini nga kinabuhi ug makakaplag sa atong dalan balik ngadto sa atong mahigugmaong Langitnong Amahan kon kita magtinguha ug modawat sa espirituhanon nga mga timailhan nga Iyang gihatag, mohangop sa personal nga pagpadayag, ug maningkamot alang sa inadlaw nga pagpahiuli. Kini ang paagi nga kita mamahimong tinuod nga mga disipulo sa atong minahal nga Manluluwas, si Jesukristo.

Kon buhaton nato kini, ang Dios mahimuot kanato. “[Ang] Ginoo … [mo]panalangin ka[ninyo] didto sa yuta nga gihatag Niya kaninyo. Ang Ginoo [mo]himo ka[ninyo] nga iyang balaang katawhan.”¹⁷

Nga kita magtinguha og inadlaw nga pagpahiuli ug magpadayon nga maningkamot sa paglakaw diha sa Dalan ni Jesukristo mao ang akong pag-ampo. Sa ngalan ni Jesukristo, amen.

Mubo nga mga Sulat

1. Si Jesus mitudlo, “Ako ang dalan, ang kamatuoran, ug ang kinabuhi” (Juan 14:6). Ang NIV First-Century Study Bible [NIV Unang Siglo nga Tun-anan nga Biblia] naglangkob niini nga pagpasabot: “Ang imahe sa usa ka dalan o agianan diha sa Hebreo nga Biblia sa kanunay nagpasabot nga pagsunod sa mga sugo o mga pagtulon-an sa Dios [tan-awa sa Salmo 1:1; 16:11; 86:11]. Usa kini ka komon nga karaang pasumbingay sa aktibong partisipasyon diha sa hugpong sa mga gituohan, mga pagtulon-an o mga tulumanon. Ang komunidad nga makita sa Dead Sea Scrolls mitawag sa ilang kaugalingon nga mga sumusunod ‘sa dalan,’ diin nagpasabot nga sila sumusunod sa ilang kaugalingong interpretasyon sa dalan nga nakapahimuot sa Dios. Si Pablo ug ang unang mga Kristiyano mitawag usab sa ilang kaugalingon nga ‘[mga] sumusunod sa Dalan’ [tan-awa sa Mga Buhat 24:14]” (sa “What the Bible Says about the Way, the Truth, and the Life,” Bible Gateway, biblegateway.com/topics/the-way-the-truth-and-the-life).

   Niadtong 1873, ang usa ka karaang libro nga giulohan og Didache nadiskobre didto sa librarya sa patriyarka sa Jerusalem sa Constantinople. Daghang iskolar ang nagtuo nga kini gisulat ug gigamit sa hinapos nga bahin sa unang siglo (AD 80–100). Ang Didache nagsugod niini nga mga pulong: “Adunay duha ka dalan, ang usa dalan sa kinabuhi ug ang usa dalan sa kamatayon, apan adunay dakong kalainan tali sa duha ka dalan. Ang dalan sa kinabuhi, mao kini: Una, higugmaa ang Dios nga milalang kanimo; ikaduha, ang imong isigkatawo sama sa imong kaugalingon” (Teaching of the Twelve Apostles, trans. Roswell D. Hitchcock ug Francis Brown [1884], 3).

   Ang ubang mga kapanguhaan, sama sa The Expositor’s Bible Commentary, mipasabot nga “atol sa bag-o pa nga naestablisar ang simbahan, kadtong midawat sa pagka-mesiyas ni Jesus ug kadtong kinsa miangkon kaniya nga ilang Ginoo mitawag sa ilang mga kaugalingon nga kauban niadtong anaa ‘sa Dalan’ [tan-awa sa Mga Buhat 19:9, 23; 22:4; 24:14, 22]” (ed. Frank E. Gaebelein ug uban pa [1981], 9:370).

2. Tan-awa sa Mosiah 2:17.

3. Tan-awa sa Doktrina ug mga Pakigsaad 88:63.

4. “Walking in Circles,” Ago. 20, 2009, Max-Planck-Gesellschaft, mpg.de.

5. “Walking in Circles,” mpg.de. Kini nga imahe nagpakita sa GPS tracking sa upat ka partisipante sa pagtuon. Tulo nila naglakaw sa mapanganoron nga adlaw. Usa nila (SM) misugod sa paglakaw samtang ang adlaw natabonan sa mga panganod, apan human sa 15 minutos ang mga panganod miiway, ug ang partisipante makakita sa mga silaw sa adlaw. Bantayi kon sa unsang paagi, nga sa higayon nga ang adlaw makita, ang naglakaw mas malamposon sa paglakaw og diretso.

6. Alang sa usa ka makalilisang nga panig-ingnan kon sa unsang paagi nga ang sayop nga pagtipas og duha lang ka degree maoy hinungdan nga ang pangpasahero nga eroplano nahagsa sa Mount Erebus sa Antarctica, nga mipatay og 257 ka tawo, tan-awa sa Dieter F. Uchtdorf, “Ang Kalainan sa Gamay nga mga Sayop,” Liahona, Mayo 2008, 57–60.

7. Mga Maghuhukom 2:10.

8. Human sa pagbisita ni Kristo sa Amerika, ang mga tawo tinud-anay nga naghinulsol sa ilang mga sala, nagpabunyag, ug nakadawat sa Espiritu Santo. Diin kanhi sila mga tawo nga hilig sa panagbingkil ug mapagarbohon, karon “walay mga panagbingkil ug mga panaglalis diha kanila, ug matag tawo mitagad nga makiangayon sa usag usa” (4 Nephi 1:2). Kini nga panahon sa pagkamatarong milungtad og mga duha ka siglo sa wala pa ang garbo misugod nga maoy hinungdan nga ang mga tawo mipalayo gikan sa Dalan. Apan, ang espirituhanon nga pagkahisalaag mahimong mas dali usab nga mahitabo. Isip usa ka panig-ingnan, mga dekada sa wala pa kadto, sa ika-50 ka tuig nga pagmando sa mga maghuhukom diha sa Basahon ni Mormon, dihay “nagpadayon nga kalinaw ug hilabihan ka dako nga hingpit nga kalipay” taliwala sa katawhan. Apan tungod sa garbo nga misulod sa mga kasingkasing sa mga miyembro sa Simbahan, human sa mubo nga panahon sa upat ka tuig “dihay daghan nga mga panagsumpaki diha sa simbahan, ug usab dihay mga panagbingkil taliwala sa mga katawhan, hangt[o]d nga dihay daghan nga dugo nga miagas” (tan-awa sa Helaman 3:32–4:1).

9. Doktrina ug mga Pakigsaad 121:26.

10. Mga Buhat 3:19.

11. Doktrina ug mga Pakigsaad 121:33.

12. Michael Crichton, Jurassic Park (2015), 190.

13. “Hunahunaa ang mga barko isip panig-ingnan. Bisan pa sa kadagko niini ug hapakon sa kusog nga hangin, gigiyahan lamang kini sa usa ka gamay kaayong timon nga moadto bisan asa paadtoa sa kapitan” (Santiago 3:4; New International Version).

14. Tan-awa sa Moises 1:39.

15. Mosiah 26:30.

16. Doktrina ug mga Pakigsaad 58:42.

17. Deuteronomio 28:8–9; tan-awa usab sa mga bersikulo 1–7.