M’Asɛmpa ne Fapem
Nkyerɛkyerɛ na Ahyɛmudzi 42:12
Asɛmpa fapem yɛ nyamesom ho kwankyerɛ a yedua do dze hɛn nsanmuyi ɔpɛ dzi dwuma tseneneeyɛ mu.
Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo no ne wiadze mfɛndzanan ehyiadzi wɔ afe 1849 Ɔbɛsɛ mu no, wɔfrɛɛ Elder John Taylor a ɔkã Asomafo Duebien no hɔn Quorum ho no dɛ onkobue ɔman France ma wɔnkã Jesus Christ asɛmpa no wɔ mu. Nna Asɔr no ne dawurbɔ krataa a odzi kan a wɔdze pue gua do ofi mber to mber wɔ ɔman no mu ne nsesɛw mu no kã no som dwuma no ho. Elder Taylor siesiei na otsintsiim asɛm bi wɔ mu wɔ afe 1851 a ɔyɛ mbuae wɔ nsɛmbisa a wɔdze ataa ebisa no afa Asɔr no ho no. Ɔdze ne nkyerɛwee no rokɔ ewiei no, Elder Taylor kãa asɛm yi a osii ho nsɛm:
“Mfe kakra abɛsen kɔ no wɔ Nauvoo no, abrɔba bi a ogyina bea a ɔbɛn me, a ɔyɛ mbrahyɛnyi no, bisaa Joseph Smith mbrɛ otum hwɛ nkorɔfo pii do ara yie, ma wɔyɛ adze esiado esiado; a ɔdze sɔɔw do dɛ, hɔn dze wonnkotum ayɛ dɛm wɔ beebiara. Owura Smith kãa dɛ ɔyɛ mberɛw koraa ma no dɛ ɔbɛyɛ dɛm. Banyin no buaa dɛ, ‘Osi dɛn yɛ? Hɛn dze ɔyɛ dzen papaapa ma hɛn.’ Owura Smith buaa dɛ, ‘Mekyerɛkyerɛ hɔn nokwar fapem, na hɔn ara hwɛ hɔnho do yie.’”1
Mobɔ mpaa dɛ Sunsum Krɔnkrɔn no bɛkyerɛkyerɛ hɛn na ɔama hɛn mu kor biara ntowdo ber a mitsĩ mu kã fapem ho hia a ohia wɔ Jesus Christ asɛmpa a wɔdze asan ananmu aba no mu.
Fapem
Ewuradze yii kyerɛɛ Nkɔnhyɛnyi Joseph Smith dɛ, “asɔr yi mu elderfo, asɔfo na akyerɛkyerɛfo nkyerɛkyerɛ m’asɛmpa ne fapem no, a ɔwɔ Bible na Mormon Nwoma no mu, dza m’asɛmpa ne mãhyɛ wɔ mu no.”2 Ɔpaa mu kãa so dɛ Latter-day Saintfo no ɔsɛ dɛ “wɔbɛkyerɛkyerɛ [hɔn] wɔ emudzi mbordo mu, wɔ adwenkyerɛ nsɛm ho, nye fapem mu, nye asɛmpa ne nkyerɛkyerɛ mu, wɔ ndzɛmba nyinara a ɔfa Nyankopɔn n’ahenman ho a ohia dɛ hom tse ase no mu.”3
Yetwa no sin kã a, asɛmpa fapem yɛ nyamesom ho kwankyerɛ a yedua do dze hɛn nsanmuyi ɔpɛ dzi dwuma tseneneeyɛ mu. Fapem ne farba nye asɛmpa mu nokwar na ɔma akwankyerɛ na esusudze ber a yɛper kɔ kan wɔ ahyɛmu anamɔn kwan no do.
Mfatoho, Gyedzi ho Nsɛmpɔw ebiasa a odzi kan no kyerɛ Jesus Christ asɛmpa a wɔdze asan ananmu no ne fapem: Nyame Tsir no su wɔ gyedzi ho nsɛmpɔw a odzi kan no, Adam na Eve hɔn asehwe no nsunsuando wɔ gyedzi ho nsɛmpɔw a otsĩa ebien, no mu, na nhyira horow a Jesus Christ No Werdambɔ no ma otum ba no wɔ gyedzi ho nsɛmpɔw a otsĩa ebiasa.4 Na gyedzi ho nsɛmpɔw a otsĩa anan no da ahyɛse fapem no—kwankyerɛ a wɔfa do dze gyedzi wɔ Jesus Christ mu na irunu woho dzi dwuma—na asɔfodzi ayɛdze a odzi kan a ɔma Jesus Christ No Werdambɔ no tum dzi dwuma wɔ hɛn abrabɔ mu.5
Enyansasɛm no yɛ fapem a ɔyɛ kwankyerɛ ho mfatoho kor so. Meserɛ hom nhyɛ nyienyim nyiyimu a ɔwɔ Nkyerɛkyerɛ na Ahyɛmudzi ɔfa 89 mu no nsew.
“Ɔyɛ nhyehyɛe a anohoba bata ho a wɔdze ama a wɔadan no ama ahotseweefo a wɔyɛ mberɛw anaa wɔyɛ mberɛw koraa; hɔn a wɔyɛ anaa yebotum afrɛ hɔn ahotseweefo.
“Hwɛ, nokwar, dɛm na Ewuradze se hom: Ɔnam bɔn na nhyehyɛɛ a ɔbɔwɔ nkorɔfo a wosusu bɔn wɔ hɔn akoma mu wɔ nda a odzi ewiei yi mu ntsi, mabɔ hom kɔkɔ, na medze dɛm nyikyerɛ a ɔyɛ enyansasɛm yi rema hom dze abɔ hom kɔkɔ.”6
Nkenyan nkyerɛkyerɛ a odzi nyienyim yi do no ma honandua na sunsum mu kwankyerɛ a otsim na ɔgye nhyira pɔkyee binom ho dase a ogyina hɛn nokwardzi ma fapem no do ba.
Asɛmpa fapem no nsũae, ntseasee, na abrabɔ hyɛ hɛn gyedzi dzen wɔ hɛn Agyenkwa no mu, ɔma yɛsɔr No kɔ bun mu, na ɔtwetwe nhyira horow na sunsum mu akyɛdze horow ba hɛn abraba mu. Tsenenee fapem so boa hɛn ma yɛhwɛ tra hɛn ankorankor ahwehwɛdze na hɛn pɛsɛankonyasu ma yenya onnyiewiei nokwar ho nhumu a ɔsombo, ber a yetwa ɔnnkyebo abrabɔ yi mu gyinabew, nkõdzen, nsanmuyi, nye sũahu ahorow no.
Ndɛ Mber mu Nokwar Fapem Nkyerɛkyerɛ Mfatoho horow
Asɛm a Nkɔnhyɛnyi Joseph Smith kãa faa erekyerɛkyerɛ nokwar fapem no nye ne nkyerɛkyerɛ a wɔtaa serɛ kã. Na yehu nkyerɛkyerɛ ho nkenyan nhwɛdo ndamyɛ mu ho mfatoho pii wɔ ndɛ Ewuradze N’asomfo a wɔama hɔn tumdzi no.
Nnkɛyɛ Nndan Enyi Fapem no
President Dallin H. Oaks kasaa wɔ wiadze mfɛndzanan ehyiadzi mu wɔ afe 1998 faa hɔn a wokitsa Aaron Asɔfodzi hɔn ndwuma dɛ wɔma sacrament no. Ɔkyerɛɛ Nnkɛyɛ Nndan Enyi Fapem mu na ɔkãa dɛ obiara a okitsa Aaron Asɔfodzi no remmpɛ dɛ biribi a ɔwɔ no hwɛbea anaa no su no besiankã Asɔrba biara efi no som na ahyɛmudzi nkenyanee ho da. President Oaks tsĩi mu kãa adzeyɛ esiado esiado, ahotsew, obu, na enyidzi fapem so a ɔnye no nantsew.
Enyigye mu ara, President Oaks amma mberantsɛ no ndzɛmba a wɔakyerɛw no nkorkor tsentsen a wɔbɛyɛ anaa wɔnnkɛyɛ. Mbom, ɔkyerɛkyerɛɛ fapem no mu a ɔwɔ enyida kwan dɛ mberantsɛ no na hɔn awofo na akyerɛkyerɛfo no botum dze hɔnankasa hɔn adwen na nkenyan edzi akwankyerɛ no do.
Ɔkyerɛkyerɛɛ mu dɛ: “Osiandɛ gyinabew ahorow a ɔwɔ ward na nkorbata ahorow a ɔwɔ hɛn Asɔr a ɔwɔ wiadze nyina mu no yɛ soronko ara ma mbra pɔkyee a wohia wɔ gyinabew bi mu remmfata wɔ beebi ntsi, murunnsusu mbra katsee horow. Mbom, mubosusu fapem a otsim nkyerɛkyerɛ do. Sɛ obiara tse fapem yi ase na odzi dwuma a ɔnye no saa a, onnkehia biara dɛ yɛbɛhyehyɛ mbra horow. Sɛ mbra anaa afotu na wohia wɔ ankorankor gyinabew bi mu a, apaamu banodzifo no botum dze ama, a ɔnye nkyerɛkyerɛ na fapem a ɔfa ho no saa.”7
Ahomgyeda dɛ Asɛnkyerɛdze ho Fapem
Ebɔbira afe 2015 wiadze mfɛndzanan ehyiadzi mu no, President Russell M. Nelson kyerɛkyerɛɛ hɛn dɛ “Ahomgyeda no yɛ enyika.”8 Ɔkyerɛkyerɛɛ mu so mbrɛ ɔno ankasa osii benyaa ntseasee wɔ ahyɛse fapem a ɔfa iridzi Ahomgyeda no nyi no ho:
“Yesi dɛn sie Ahomgyeda no krɔnkrɔn? Ber a nna minnyinii pii no, musũaa dza binom akyerɛw no nkorkor a ɔfa ndzɛmba horow a ibotum bɛyɛ na ma nnkɛyɛ no Ahomgyeda no. Ekyir no koraa na musũaa fii kyerɛwsɛm no mu dɛ me ndzeyɛɛ na mo su wɔ Ahomgyeda no yɛ sɛnkyerɛdze a ɔda emi na mo Ɔsor Egya no ntamu. Minyaa dɛm ntseasee no, nna minnhia dza wɔakyerɛw no nkorkor a wɔyɛ anaa wɔnnyɛ. Sɛ ɔwɔ dɛ mobɔ adwenpɔw anaa biribi ne nyɛe dɛ ɔfata Ahomgyeda no a, mibisa moho sin ara dɛ, ‘Ebɛn sɛnkyerɛdze na mepɛ dɛ medze ma Nyankopɔn?’ Asɛmbisa no maa me nsanmuyi horow a ɔfa Ahomgyeda no ho bɛyɛɛ pefee.”9
President Nelson ne nsɛmbisa tsiabaa a mbom ɔyɛ ndam no otsĩ fapem no a ohwira ntseasee biara a onnyi a, ɔfa dza ɔsɛ dɛ yɛyɛ dze dzi Ahomgyeda no nyi no mu. N’asɛmbisa no twa kwankyerɛ na esusudze no tsia, a obotum ehyira hɛn nyina wɔ hɛn gyinabew ahorow no mu.
Fapem dɛ Yebenya Pɛ Ama Nyankopɔn Edzi Nyim
Abosoom esia a ɔabɛsen no, wɔ wiadze mfɛndzanan ehyiadzi mu no, President Nelson kyerɛɛ enyigye kɛse a onyae ber a wogyaa no ma onyaa ntseasee fofor a ɔfa kasafua Israel n’asekyerɛ. Ɔkãa kyerɛɛ hɛn dɛ n’akoma danee ber a osũaa dɛ “ Israel dzin ankasa no gyina hɔ ma obi a ɔwɔ pɛ dɛ ɔbɛma Nyankopɔn edzi nyim wɔ n’abrabɔ mu.”10 Ekyir no President Nelson daa ndzɛmba a ho hia pii a ofi nhumu yi mu no ba no edzi.
N’asɛm no a ɔfa yerenya pɛ ma Nyankopɔn edzi nyim no yɛ mfatoho nwanwa a ɔfa erekyerɛ fapem pa ama yeetum dze aahwɛ hɛnho do yie. Na tse dɛ mbrɛ ɔyɛe wɔ n’asɛm a ɔfa ereyɛ Ahomgyeda no enyika no, President Nelson bisaa nsɛmbisa horow a otsim fapem do a ɔboa hɛn wɔ akwankyerɛ na nsusuho ma hɛn mu kor biara.
“Ana ipɛ dɛ ima Nyankopɔn dzi nyim wɔ w’abrabɔ mu? Ana ipɛ dɛ ima Nyankopɔn yɛ nhyɛdo tum abɔsõ wɔ w’abrabɔ mu?”
Ɔkɔɔr do kãa dɛ:
“Susu mbrɛ ɔpɛ a ɔtse dɛm botum ehyira wo. Sɛ nnwaree na erohwehwɛ onnyiewiei adamfo a, wo pɛ dɛ ‘ebɛkã Israel ho’ no bɔboa wo ma abɔ adwenpɔw wɔ nyia enye no bopue na mbrɛ wobesi bɔkɔ.
“Sɛ awar hokãfo a ɔatõ n’ahyɛmudzi a, wo pɛ dɛ ibɛma Nyankopɔn edzi nyim wɔ w’abrabɔ mu no bɛma w’ahyɛmudzi no rinnya nkekaa. Agyenkwa no bɛsa w’akoma a ebubu no. Ɔsorsor bobue ber a ihwehwɛ ehu mbrɛ ibesi bɔkɔ kan. Onnhia dɛ ibekyinkyin anaa edwendwen.
“Sɛ ewɔ nokwar asɛmbisa wɔ asɛmpa no ho anaa Asɔr no ho, dɛ mbrɛ asan mu eyi dɛ Nyankopɔn bedzi nyim no, wobegya wo ma ehu na atse nokwar trɔdɔdɔ na onnyiewiei no ase a ɔbɔboa ama w’abrabɔ kwankyerɛ na wɔaboa wo ma etsim wɔ ahyɛmu anamɔn kwan no do.
“Sɛ ihyia nsɔhwɛ a—sɛ nsɔhwɛ no mpo ba ber a abrɛ anaa ayɛ ankonam anaa wɔnntse wo ase a—dwen akokodur a ibotum enya ber a isan mu ma Nyankopɔn dzi nyim wɔ w’abrabɔ mu ber a itotɔserɛ No ma Ɔhyɛ wo dzen.
“Sɛ w’ahwehwɛdze tsitsir nye ibɛma Nyankopɔn edzi nyim a, akã Israel ho a, adwenpɔwbɔ pii yɛ mberɛw. Nsɛmasɛma pii bɛyɛ kwa! Inyim mbrɛ ibesi esiesie wo ho. Inyim dza ibɔhwɛ na ibɛkenkan, na bea ibɔhwer wo mber, na nyimpa a enye no bedzi nkitaho. Inyim dza irohwehwɛ ayɛ. Inyim nyimpa ban a ipɛ ankasa dɛ ibɛyɛ.”11
Hom nhyɛ no nsew nhyɛdo pa na abrabɔ mu adwenpɔwbɔ a ohia kɛse na abrabɔ mu sũahu ahorow a fapem dɛ ibenya pɛ ma Nyankopɔn edzi nyim no no dze ba: anyɛnkofa nkitahodzi na awar, dza ibɔhwɛ na ibɛkenkan, bea a ibɔhwer wo mber, woananom na enye hɔn benya nkitaho nye dodow pii. President Nelson ne nkenyan nsɛmbisa no da fapem kumabaa bi edzi a ɔma akwankyerɛ wɔ hɛn abrabɔ n’afã nyina mu na ɔboa hɛn ma yɛhwɛ hɛnho do yie.
“Adze Ketseketse bi”
Ber a wɔdze Joseph Smith too Liberty Efiadze no, ɔkyerɛɛw nhyehyɛɛ wɔ krataa do kɛmaa Asɔrmba na banodzifo na ɔkaa hɔn dɛ “ dɛ wusihɛn kakraka no, adze ketseketse bi na ɔboa no ma sɛ ehum rutu a otum fa mframa na asorɔkye mu kɔ tɔɔtsee.”12
“Adze ketseketse bi no yɛ hwiir anaa dua sin bi na mfir a ɔkã ho a wɔdze dandan wusihɛn anaa hɛmba bi. Na “sɛ ehum rutu a otum fa mu” no kyerɛ dɛ ɔdan wusihɛn no ma ɔtae amma woennbutuw wɔ ehum no mu.
Asɛmpa fapem no yɛ ma emi na ɔwo tse dɛ ma adze ketseaba yɛ ma wusihɛn no. Fapem pa boa hɛn ma yehu hɛn kwan na yegyina pintsinn, yetsintsim na yennkehihim da ama yɛampatser na yɛannhwe ase wɔ nda a odzi ekyir sum kebii ehum na basaayɛ mu.
Woehyira hɛn mbordo wɔ wiadze mfɛndzanan ehyiadzi yi mu dɛ yebosũa afa onnyiewiei fapem horow efi Ewuradze asomfo a wɔama hɔn tumdzi no nkyɛn. Afei, hɛn ankorankor asodzi nye dɛ yɛdze nokwar no a wɔagye ho dase no bɔ bra.13
Dasegye
President Ezra Taft Benson kyerɛkyerɛɛ dɛ, “Abosoom esia a odzi do yi no, hom [Liahona] ehyiadzi dze no, wɔdɛ ɔda hom kyerɛwsɛm gyinapɛn no ne nkyɛn na hom taa kenkan.”14
Medze me kra mu ahom nyina no, moto nsa frɛ hɛn nyina dɛ, yɛndɔ tsenenee fapem, yensũa na yɛmfa mbɔ bra. Asɛmpa no nokwar no nko na obotum ama “[yɛafa] enyigye [a]yɛ ndzɛmba nyina a hɛn ahom botum”; mfa mper nkɔ kan wɔ ahyɛmu anamɔn kwan no do na “[yɛahwɛ] Nyame no nkwagye, nye n’abasa a ɔbɛda no edzi akyerɛ no.”15
Minyim dɛ Jesus Christ asɛmpa no ne nkyerɛkyerɛ na fapem no nye hɛn abrabɔ no no kwankyerɛ ne farbaa ankasa no na enyigye a otsim wɔ ɔnnkyebo abrabɔ yi nye daapem. Na Easter Kwesida enyimnyam da yi megye dase enyigye mu dɛ hɛn Agyenkwa tseasefo no nye nsubura no a nokwar yinom pem fi mu no. Megye ho dase wɔ Ewuradze Jesus Christ ne dzin krɔnkrɔn no mu, amen.