ការរកឃើញសេចក្តីអំណរនៅក្នុងព្រះគ្រីស្ទ
របៀបដ៏ប្រាកដប្រជាបំផុតដើម្បីរកឃើញសេចក្ដីអំណរនៅ ក្នុង ជីវិត គឺត្រូវចូលរួមនឹងព្រះគ្រីស្ទជួយមនុស្សដទៃ ។
ព្រះអម្ចាស់ពុំសុំឲ្យយុវវ័យបព្វជិតភាពអើរ៉ុនរបស់យើងធ្វើអ្វីៗគ្រប់យ៉ាងនោះទេ ប៉ុន្តែអ្វីដែលទ្រង់សុំនោះគឺការបំផុសគំនិតដ៏អស្ចារ្យ ។
ពីរបីឆ្នាំកន្លងទៅ គ្រួសារដ៏តូចយើងបានជួបនឹងអ្វីដែលគ្រួសារជាច្រើនប្រឈម នៅក្នុងពិភពលោកដែលធ្លាក់នេះ ។ កូនប្រុសពៅរបស់យើង ថេននើរ គ្រីស្ទាន លុន បានមានជំងឺមហារីក ។ គាត់ជាមនុស្សដ៏អស្ចារ្យម្នាក់ ដូចក្មេងអាយុប្រាំបួនឆ្នាំទូទៅ ។ គាត់រពឹសខ្លាំង ហើយក្នុងពេលដំណាលគ្នានោះ បានដឹងខាងវិញ្ញាណជាមុនយ៉ាងអស្ចារ្យ ។ ជាកូនអារក្សនិងជាកូនទេវតា ខូចហើយគួរឲ្យស្រឡាញ់ ។ ពេលគាត់នៅតូច បានធ្វើឲ្យយើងហត់ខ្លាំងដោយសារភាពរពឹសរបស់គាត់រាល់ថ្ងៃ នោះយើងឆ្ងល់ថា តើគាត់ធំឡើងធ្វើជាព្យាការី ឬជាចោរប្លន់ធនាគារ ។ មិនថាយ៉ាងណាទេ វាហាក់ដូចជាថាគាត់នឹងបន្សល់ទុកចំណាំនៅក្នុងលោកិយនេះ ។
ហើយបន្ទាប់មក គាត់ធ្លាក់ខ្លួនឈឺយ៉ាងធ្ងន់ ។ បីឆ្នាំបន្ទាប់មាននូវ វិធីព្យាបាលដ៏ខ្លាំង និងពេទ្យដ៏ប៉ិនប្រសប់បានព្យាយាមសង្គ្រោះជីវិតគាត់ រួមមានការប្ដូរខួរឆ្អឹងខ្នងពីរដង ហើយពេលនោះគាត់បានឆ្លងជំងឺសួត ដែលតម្រូវឲ្យគាត់សន្លប់ដកដង្ហើមដោយសារបំពង់ខ្យល់ចំនួន ១០ សប្ដាហ៍ ។ ជាអព្ភូតហេតុ គាត់បានជាសះស្បើយក្នុងពេលដ៏ខ្លី ប៉ុន្តែបន្ទាប់មកជំងឺមហារីករបស់គាត់បានត្រឡប់មកវិញ ។
មុនពេលគាត់ស្លាប់ ជំងឺរបស់គាត់បានវាយលុកឆ្អឹងគាត់ ហើយទោះជាមានថ្នាំបំបាត់ការឈឺចាប់ខ្លាំងៗក្ដី ក៏គាត់នៅតែឈឺចាប់ដដែល ។ គាត់សឹងតែមិនអាចក្រោកចេញពីគ្រែបានឡើយ ។ នៅព្រឹកថ្ងៃអាទិត្យមួយ ភរិយារបស់ខ្ញុំ ខាលីន បានមកមើលគាត់នៅបន្ទប់ មុនពេលយើងទៅព្រះវិហារ ។ នាងភ្ញាក់ផ្អើលពេលឃើញគាត់បានស្លៀកពាក់ជាស្រេច ហើយអង្គុយនៅគែមគ្រែ កំពុងព្យាយាមបិទឡេវអាវទាំងឈឺចាប់ ។ ខេលីន បានអង្គុយក្បែរគាត់ ។ នាងបាននិយាយថា « ថេននើរ តើកូនប្រាកដថា កូនមានកម្លាំងទៅព្រះវិហារមែនឬ ? កូនគួរតែនៅផ្ទះ ហើយសម្រាកថ្ងៃនេះ » ។
គាត់សំឡឹងទៅឥដ្ឋ ។ គាត់គឺជាឌីកុនម្នាក់ ។ គាត់មានកូរ៉ុមមួយ ។ ហើយគាត់មានការចាត់តាំងមួយ ។
« ខ្ញុំត្រូវចែកសាក្រាម៉ង់ថ្ងៃនេះ » ។
« ម៉ាក់ដឹងថាមានអ្នកធ្វើជំនួសកូនបាន » ។
រួចហើយ គាត់ បាននិយាយថា ៖ « បាទ ប៉ុន្ដែ … កូនមើលឃើញពីរបៀបដែលសមាជិកមើលមកកូន ពេលកូនចែកសាក្រាម៉ង់ ។ កូនគិតថា វាជួយពួកគេ » ។
ដូច្នេះខាលីន បានជួយគាត់បិទឡេវអាវ ហើយចងក្រវ៉ាត់-កឲ្យគាត់ ហើយពួកគាត់ចេញទៅព្រះវិហារ ។ ច្បាស់ណាស់ មានអ្វីមួយដ៏សំខាន់កំពុងកើតឡើង ។
ខ្ញុំបានមកដល់ព្រះវិហារបន្ទាប់ពីការប្រជុំមួយនាពេលព្រឹកនោះ ដូច្នេះខ្ញុំភ្ញាក់ផ្អើលពេលឃើញថេននើរអង្គុយនៅជួរឌីកុន ។ ខេលីនបានខ្សឹបប្រាប់ខ្ញុំពីមូលហេតុដែលគាត់នៅទីនោះ និងអ្វីដែលគាត់បាននិយាយ ៖ « វាជួយសមាជិក » ។
ដូច្នេះខ្ញុំតាមមើល កាលឌីកុនបានឈានទៅតុសាក្រាម៉ង់ ។ គាត់ផ្អែកខ្លួនថ្នមៗទៅឌីកុនម្នាក់ទៀត ពេលសង្ឃហុចថាសនំប៉័ងឲ្យពួកគេ ។ ហើយបន្ទាប់មកថេននើរបានប្ដូរកន្លែងត្រូវចែករបស់គាត់ ហើយបានចាប់គែមកៅអីដើម្បីឈរខ្លួនឲ្យនឹង ពេលគាត់ចែកសាក្រាម៉ង់ ។
វាហាក់ថា គ្រប់ភ្នែកក្នុងសាលជំនុំមើលទៅគាត់ រំជួលចិត្តដោយការពុះពាររបស់គាត់ ពេលគាត់ធ្វើចំណែកដ៏សាមញ្ញរបស់គាត់ ។ ប៉ុន្ដែថេននើរបានប្រាប់ពីទេសនកថាដ៏ស្ងាត់ស្ងៀមមួយ កាលគាត់ដើរពីជួរមួយទៅជួរមួយដោយម៉ត់ចត់ និងរអាក់រអួល—ក្បាលឥតសក់របស់គាត់ជោគដោយញើស—ដែលតំណាងឲ្យព្រះអង្គសង្គ្រោះតាមរបៀបដែលឌីកុនធ្វើនោះ ។ រាងកាយឌីកុនដែលធ្លាប់តែរពិសបានរងរបួស ខូច និងបាក់ តែស្ម័គ្រចិត្តបម្រើពួកគេទាំងឈឺចាប់ ដោយការកាន់តំណាងដង្វាយធួនរបស់ព្រះអង្គសង្គ្រោះទៅក្នុងជីវិតរបស់យើង ។
ការឃើញរបៀបដែលគាត់គិតអំពីការធ្វើជាឌីកុន ធ្វើឲ្យយើងគិតខុសពីមុនផងដែរ—អំពីសាក្រាម៉ង់ អំពីព្រះអង្គសង្គ្រោះ និងអំពីឌីកុន និងគ្រូ និងសង្ឃទាំងឡាយ ។
ខ្ញុំស្ងើចនឹងអព្ភូតហេតុដ៏អស្ចារ្យនោះ ដែលបានជម្រុញឲ្យគាត់នៅព្រឹកនោះឲ្យឆ្លើយតបយ៉ាងក្លាហានចំពោះការហៅដ៏តូចរហៀងឲ្យបម្រើ និងកម្លាំង ព្រមទាំងសមត្ថភាពនៃយុវវ័យដែលកំពុងលូតលាស់ទាំងអស់របស់យើង កាលពួកគេទាញខ្លួនគេឲ្យឆ្លើយតបនឹងការហៅរបស់ព្យាការី ដើម្បីចូលជាកងទ័ពរបស់ព្រះ ហើយចូលរួមក្នុងកិច្ចការនៃសេចក្ដីសង្គ្រោះ និងការលើកតម្កើង ។
រាល់ពេលដែលឌីកុនកាន់ថាសសាក្រាម៉ង់ នោះយើងនឹកចាំដល់ដំណើររឿងដ៏ពិសិដ្ឋនៃអាហារពេលល្ងាចចុងក្រោយ សួនច្បារគែតសេម៉ានី កាល់វ៉ារី និងផ្នូរសព ។ ពេលព្រះអង្គសង្គ្រោះមានបន្ទូលទៅសាវករបស់ទ្រង់ថា « ចូរធ្វើបុណ្យនេះ ដើម្បីរំឭកពីខ្ញុំចុះ » ១ នោះទ្រង់ក៏មានបន្ទូលកាត់រាប់ជំនាន់មកកាន់យើងម្នាក់ៗផងដែរ ។ ទ្រង់មានបន្ទូលអំពីអព្ភូតហេតុ មិនចេះចប់ដែលទ្រង់នឹងប្រទាន ពេលឌីកុន គ្រូ និងសង្ឃនាពេលអនាគតហុចនំប៉័ង និងទឹករបស់ទ្រង់ ហើយអញ្ជើញបុត្រាបុត្រីទ្រង់ឲ្យទទួលយកអំណោយទានដ៏ធួនរបស់ទ្រង់ ។
និមិត្តរូបសាក្រាម៉ង់ទាំងអស់ចង្អុលយើងទៅរកអំណោយនោះ ។ យើងគិតដល់នំប៉័ងដែលទ្រង់ធ្លាប់បានកាច់—និងនំប៉័ងដែលសង្ឃកំពុងកាច់នៅចំពោះមុខយើងនាពេលនេះ ។ យើងគិតដល់អត្ថន័យនៃទឹកដែលបានញែកចេញនាពេលនោះ និងពេលនេះ ដូចការអធិស្ឋានសាក្រាម៉ង់ទាំងនោះចេញពីមាត់សង្ឃវ័យក្មេងយ៉ាងមុតមាំ ទៅកាន់ដួងចិត្តរបស់យើង និងស្ថានសួគ៌ ហើយរំឭកដល់សេចក្ដីសញ្ញាដែលភ្ជាប់យើងទៅនឹងព្រះចេស្ដាដ៏ខ្លាំងនៃសេចក្ដីសង្គ្រោះរបស់ព្រះគ្រីស្ទ ។ យើងអាចគិតអំពីអត្ថន័យវា ពេលដែលឌីកុនហុចនំប៉័ង និងទឹកដ៏ពិសិដ្ឋឲ្យយើង ឈរនៅកន្លែងដែលព្រះយេស៊ូវនឹងឈរ បើទ្រង់គង់នៅទីនោះ ហើយចង់សម្រាលបន្ទុក និងការឈឺចាប់យើង ។
សំណាងល្អ យុវជន និងយុវនារីមិនចាំបាច់ឈឺដើម្បីរកឃើញអំណរ និងគោលបំណងក្នុងការបម្រើព្រះអង្គសង្គ្រោះឡើយ ។
អែលឌើរ ដេវីឌ អេ បែដណា បានបង្រៀនថា ដើម្បីរីកចម្រើន និងក្លាយ ដូចជា អ្នកផ្សព្វផ្សាយសាសនា យើងគួរតែធ្វើអ្វីដែលផ្សព្វផ្សាយសាសនា ធ្វើ រួចហើយ « មួយបន្ទាត់ម្ដងៗ ហើយមួយសិក្ខាបទម្ដងៗ … [ យើង ] អាចក្លាយជាអ្នកផ្សព្វផ្សាយសាសនាម្ដងបន្ដិចៗ … តាមដែលព្រះអង្គសង្គ្រោះរំពឹងនោះ » ។ ២
ដូចគ្នាដែរ បើយើងចង់ « ក្លាយដូចព្រះយេស៊ូវ » ៣ យើងគួរតែធ្វើអ្វីដែលព្រះយេស៊ូវធ្វើ ហើយក្នុងឃ្លាដ៏អស្ចារ្យមួយ ព្រះអម្ចាស់ពន្យល់ពីអ្វីដែលទ្រង់ធ្វើ ៖ « ដ្បិតមើលចុះ នេះហើយជាកិច្ចការរបស់យើង និងសិរីល្អរបស់យើង—គឺដើម្បីនំាឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ។ ៤
បេសកកម្មរបស់ព្រះអង្គសង្គ្រោះគឺដើម្បីបម្រើព្រះវរបិតាទ្រង់ជានិច្ច និងជារៀងរហូតមក តាមរយៈការសង្គ្រោះបុត្រាបុត្រីរបស់ទ្រង់ ។
របៀបដ៏ប្រាកដប្រជាបំផុតដើម្បីរកឃើញសេចក្ដីអំណរនៅក្នុងជីវិត គឺត្រូវចូលរួមនឹងព្រះគ្រីស្ទជួយមនុស្សដទៃ ។
នេះជាសេចក្ដីពិតសាមញ្ញ ដែលបំផុសឲ្យមានកម្មវិធីកុមារ និងយុវវ័យ ។
សកម្មភាព និងការបង្រៀនក្នុងកម្មវិធីកុមារ និងយុវវ័យទាំងអស់គឺអំពីការជួយយុវវ័យឲ្យក្លាយកាន់តែដូចជាព្រះយេស៊ូវ ដោយចូលរួមជាមួយទ្រង់នៅក្នុងកិច្ចការនៃសេចក្ដីសង្គ្រោះ និងការតម្កើងឡើង ។
កម្មវិធីកុមារ និងយុវវ័យគឺជាឧបករណ៍មួយដើម្បីជួយកុមារគ្រប់រូបក្នុងអង្គការបឋមសិក្សា និងយុវវ័យឲ្យធំឡើងក្នុងភាពជាសិស្ស ហើយទទួលបានការយល់ដឹងដែលពេញដោយក្ដីជំនឿមួយថា តើផ្លូវនៃសុភមង្គលមានលក្ខណៈយ៉ាងណា ។ ពួកគេអាចមកចូលរួម និងចង់បានចំណុចចេះដឹង និងការទទួលស្គាល់នៅតាមផ្លូវនៃសេចក្ដីសញ្ញា ជាទីដែលពួកគេបានទទួលបុណ្យជ្រមុជទឹក និងពិធីបញ្ជាក់អំណោយទានព្រះវិញ្ញាណបរិសុទ្ធ ហើយក្នុងពេលឆាប់ៗនឹងចូលរួមក្នុងថ្នាក់កូរ៉ុម និងយុវនារី ជាទីដែលពួកគេនឹងមានអំណរក្នុងការជួយមនុស្សដទៃ តាមរយៈទង្វើនៃការបម្រើដូចជាព្រះគ្រីស្ទ ។ ពួកគេនឹងដាក់គោលដៅ មិនថាធំឬតូច ដែលនឹងផ្ដល់តុល្យភាពដល់ជីវិតរបស់ពួកគេ ហើយជួយពួកគេឲ្យក្លាយកាន់តែដូចជាព្រះអង្គសង្គ្រោះ ។ សន្និសីទ និងទស្សនាវដ្ដីដើម្បីកម្លាំងនៃយុវជន ប្រិយមិត្ត ព្រមទាំងកម្មវិធីការរស់នៅតាមដំណឹងល្អ នឹងជួយពួកគេឲ្យផ្ដោតលើការរកឃើញអំណរនៅក្នុងព្រះគ្រីស្ទ ។ ពួកគេនឹងរីករាយនឹងពរជ័យក្នុងការកាន់បណ្ណចូលព្រះវិហារបរិសុទ្ធដែលមានកំណត់ការប្រើប្រាស់ ហើយទទួលវិញ្ញាណនៃអេលីយ៉ាតាមរយៈព្រះចេស្ដានៃព្រះវិញ្ញាណបរិសុទ្ធ កាលពួកគេដេញតាមពរជ័យនៃកិច្ចការព្រះវិហារបរិសុទ្ធ និងពង្សប្រវត្តិ ។ ពួកគេនឹងត្រូវបានដឹកនាំដោយពរជ័យលោកអយ្យកោ ។ ពួកគេនឹងឃើញដោយខ្លួនឯងពេលចូលក្នុងព្រះវិហារបរិសុទ្ធដើម្បីទទួលអំណោយទានពិសិដ្ឋដោយអំណាច ហើយរកឃើញអំណរនៅទីនោះ កាលពួកគេភ្ជាប់ជាមួយគ្រួសាររបស់ពួកគេក្នុងពេលដ៏អស់កល្ប ទោះមានអ្វីកើតឡើងក្ដី ។
ដោយចាប់ផ្ដើមក្នុងពេលជំងឺរាតត្បាតទូទាំងសកល និងចលាចលនេះ ការនាំសេចក្ដីសន្យាដ៏ពេញលេញពីកម្មវិធីកុមារ និងយុវវ័យថ្មីនេះ នៅតែជាកិច្ចការកំពុងបន្ដ—ហើយវាមានភាពបន្ទាន់ ។ យុវវ័យរបស់យើងមិនអាចរង់ចាំឲ្យពិភពលោកនេះកែតម្រូវខ្លួនវា ពីមុនពួកគេមកស្គាល់ព្រះអង្គសង្គ្រោះឡើយ ។ យុវវ័យមួយចំនួនកំពុងធ្វើការសម្រេចចិត្តនាពេលនេះ ដែលពួកគេនឹងមិនធ្វើទេ បើពួកគេបានស្គាល់ពីអត្តសញ្ញាណពិតរបស់ខ្លួន—និងរបស់ទ្រង់នោះ ។
ដូច្នេះហើយ ការអំពាវនាវយ៉ាងបន្ទាន់មកពីកងពលរបស់ព្រះនៅក្នុងការហ្វឹកហ្វឺនស្លាប់រស់នេះគឺ « ត្រូវការគ្រប់គ្នាដើម្បីសម្រេចកិច្ចការនេះ » ។
អ្នកម្ដាយ និងលោកឪពុក កូនប្រុសរបស់បងប្អូនត្រូវការឲ្យបងប្អូនគាំទ្រពួកគេនាពេលនេះយ៉ាងខ្លាំង ដូចពេលបងប្អូនបានគាំទ្រពួកគេកាលពីមុនក្នុងរឿងមិនសូវសំខាន់ដែរ ។ មាតា និងបិតា ថ្នាក់ដឹកនាំបព្វជិតភាព និងក្រុមយុវនារី ប្រសិនបើយុវវ័យរបស់បងប្អូនកំពុងជួបភាពស្មុគស្មាញ នោះកម្មវិធីកុមារ និងយុវវ័យនឹងជួយនាំពួកគេទៅរកព្រះអង្គសង្គ្រោះ ហើយព្រះអង្គសង្គ្រោះនឹងនាំសេចក្ដីសុខសាន្ដដល់ពួកគេ ។ ៥
គណៈប្រធានកូរ៉ុម និងថ្នាក់ទាំងឡាយ សូមទទួលខុសត្រូវ និងកាន់កាប់តំណែងរបស់បងប្អូននៅក្នុងកិច្ចការរបស់ព្រះអម្ចាស់ ។
ប៊ីស្សពទាំងឡាយ សូមភ្ជាប់កូនសោរបស់បងប្អូនទៅនឹងកូនសោទាំងឡាយរបស់ប្រធានកូរ៉ុម ហើយកូរ៉ុមរបស់បងប្អូន—និងវួដរបស់បងប្អូន—នឹងផ្លាស់ប្ដូរជារៀងរហូត ។
ហើយបងប្អូនក្នុងជំនាន់កំពុងពេញវ័យអើយ ខ្ញុំសូមថ្លែងទីបន្ទាល់ក្នុងនាមជាអ្នកដឹងម្នាក់ថា បងប្អូនគឺជាបុត្រាបុត្រីសំណព្វរបស់ព្រះ ហើយទ្រង់មានកិច្ចការមួយឲ្យបងប្អូនធ្វើ ។
កាលបងប្អូនបំពេញតាមការហៅដ៏សំខាន់នេះឲ្យអស់ពីចិត្ត ពលំ គំនិត និងកម្លាំងរបស់ខ្លួន នោះបងប្អូននឹងស្រឡាញ់ព្រះ ហើយរក្សាសេចក្តីសញ្ញារបស់បងប្អូន ព្រមទាំងទុកចិត្តលើបព្វជិតភាពរបស់ទ្រង់ កាលបងប្អូនធ្វើការដើម្បីផ្ដល់ពរដល់មនុស្សដទៃ ដោយចាប់ផ្តើមពីក្នុងគេហដ្ឋានរបស់ខ្លួនផ្ទាល់ ។
ខ្ញុំអធិស្ឋានថា បងប្អូននឹងខិតខំ ដោយកម្លាំងទ្វេដង ស័ក្ដិសមនឹងពេលវេលានេះដើម្បីបម្រើ អនុវត្តសេចក្តីជំនឿ ប្រែចិត្ត ហើយកែលម្អជារៀងរាល់ថ្ងៃដើម្បីស័ក្ដិសមនឹងទទួលពរជ័យនៃព្រះវិហារបរិសុទ្ធ និងអំណរដ៏ឋិតថេរ ដែលកើតមានតែតាមរយៈដំណឹងល្អនៃព្រះយេស៊ូវគ្រីស្ទប៉ុណ្ណោះ ។ ខ្ញុំអធិស្ឋានថា បងប្អូននឹងរៀបចំខ្លួនដើម្បីក្លាយជាអ្នកផ្សព្វផ្សាយសាសនាដ៏ឧស្សាហ៍ព្យាយាម ជាស្វាមី ឬភរិយាដ៏ស្មោះត្រង់ ជាឪពុក ឬម្ដាយដែលពេញដោយក្ដីស្រឡាញ់ ដែលបងប្អូនបានសន្យាថា បងប្អូនអាចធ្វើបាននៅទីបំផុត តាមរយៈការធ្វើជាសិស្សដ៏ពិតនៃព្រះយេស៊ូវគ្រីស្ទ ។
សូមបងប្អូនជួយរៀបចំពិភពលោកនេះសម្រាប់ការយាងត្រឡប់មកវិញរបស់ព្រះអង្គសង្រ្គោះ តាមរយៈការអញ្ជើញមនុស្សទាំងអស់ឲ្យមករកព្រះគ្រីស្ទ និងទទួលពរជ័យទាំងឡាយនៃដង្វាយធួនរបស់ទ្រង់ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕