ពរជ័យនៃការបន្ដវិវរណចំពោះពួកព្យាការី និងវិវរណផ្ទាល់ខ្លួនដើម្បីដឹកនាំជីវិតរបស់ពួកយើង

សន្និសីទទូទៅ ខែ មេសា ឆ្នាំ ២០២០

ពរជ័យនៃការបន្ដវិវរណចំពោះពួកព្យាការី និងវិវរណផ្ទាល់ខ្លួនដើម្បីដឹកនាំជីវិតរបស់ពួកយើង

ដោយអែលឌើរ ឃ្វីនថិន អិល ឃុក

ក្នុងកូរ៉ុមនៃពួកសាវកដប់ពីរនាក់

វិវរណៈជាបន្ដបន្ទាប់ ត្រូវបានទទួល ហើយត្រូវបានទទួលឲ្យតាមរយៈបណ្ដាញដែលព្រះអម្ចាស់បានស្ថាបនាឡើង ។

ថ្ងៃនេះ ខ្ញុំនឹងនិយាយអំពីការបន្ដវិវរណៈចំពោះពួកព្យាការី និងការបន្ដវិវរណៈផ្ទាល់ខ្លួនដើម្បីដឹកនាំជីវិតរបស់យើង ។

ពេលខ្លះយើងទទួលវិវរណៈទោះជានៅពេលយើងមិនដឹងអំពីគោលបំណងរបស់ព្រះអម្ចាស់ ។ មិនយូរប៉ុន្មានពី មុនអែលឌើរ ជែហ្វ្រី អ័រ ហូឡិន ត្រូវបានហៅឲ្យធ្វើជាសាវកនៅខែមិថុនា ឆ្នាំ ១៩៩៤ ខ្ញុំបានទទួលបទពិសោធន៍ប្រកបដោយវិវរណៈល្អមួយ ដែលលោកនឹងត្រូវបានហៅ ។ ខ្ញុំគឺជាអ្នកតំណាងដើម ហើយមិនអាចមើលឃើញពីមូលហេតុដែលខ្ញុំទទួលបានចំណេះដឹងនេះទេ ។ ប៉ុន្តែយើងគឺ ជាដៃគូនឹងគ្នាកាលជាអ្នកផ្សព្វផ្សាយសាសនាវ័យក្មេងនៅប្រទេសអង់គ្លេសនៅដើមទស្សវត្សរ៍ ១៩៦០ ហើយខ្ញុំមានសេចក្ដីស្រឡាញ់ដ៏មហិមាចំពោះលោក ។ ខ្ញុំបានពិចារណាអំពីបទពិសោធន៍ក្ដីមេត្តាករុណាដ៏ទន់ភ្លន់ចំពោះខ្ញុំ ។ នៅក្នុងឆ្នាំថ្មីៗនេះ ខ្ញុំបានងឿងឆ្ងល់បើព្រះអម្ចាស់កំពុងរៀបចំខ្ញុំឲ្យធ្វើជាសិស្សប្អូននៅក្នុងពួកដប់ពីរនាក់ចំពោះដៃគូអ្នកផ្សព្វផ្សាយសាសនាដ៏អស្ចារ្យម្នាក់ ដែលជាដៃគូសិស្សប្អូនរបស់ខ្ញុំ នៅពេលយើងជាអ្នកផ្សព្វផ្សាយសាសនាវ័យក្មេង ។^១ ពេលខ្លះ ខ្ញុំព្រមានអ្នកផ្សព្វផ្សាយសាសនាវ័យក្មេងឲ្យមានចិត្តល្អចំពោះដៃគូសិស្សប្អូនរបស់ពួកគេ ដោយសារតែពួកគេមិនដឹងថាពេលណាពួកគេអាចធ្វើជាដៃគូរៀមច្បងរបស់ពួកគេទេ ។

ខ្ញុំមានទីបន្ទាល់រឹងមាំមួយថា សាសនាចក្រដែលបានស្ដារឡើងវិញនេះ ត្រូវបានដឹកនាំដោយព្រះអង្គសង្គ្រោះរបស់យើង ព្រះយេស៊ូវគ្រីស្ទ ។ ទ្រង់ស្គាល់អ្នកដែលត្រូវហៅឲ្យធ្វើជាពួកសាវករបស់ទ្រង់ និងតាមលំដាប់ណាដែលត្រូវហៅពួកលោក ។ ទ្រង់ក៏ស្គាល់របៀបដើម្បីរៀបចំសាវករៀមច្បងរបស់ទ្រង់ធ្វើជាព្យាការី និងប្រធានសាសនាចក្រ ។

យើងត្រូវបានប្រទានពរនាព្រឹកនេះដើម្បីស្ដាប់ឮពីព្យាការីជាទីស្រឡាញ់របស់យើង ប្រធាន រ័សុល អិម ណិលសុន ដែលបានផ្ដល់ការប្រកាសអំពីខួបលើកទី ២០០ ឆ្នាំដ៏អស្ចារ្យទៅកាន់ពិភពលោកដោយគោរពទៅដល់ការស្ដារឡើងវិញនៃភាពពេញលេញនៃ ដំណឹងល្អនៃព្រះយេស៊ូវគ្រីស្ទ ។^២ ការប្រកាសដោយប្រធានណិលសុននេះ បានប្រាប់ច្បាស់ថា សាសនាចក្រនៃព្រះយេស៊ូវគ្រីស្ទមានភាពដើម មានវត្តមាន និងការដឹកនាំសម្រាប់អនាគតចំពោះ គោលការណ៍នៃវិវរណៈជាបន្ដបន្ទាប់ ។ សេចក្ដីប្រកាសថ្មីតំណាងឲ្យទំនាក់ទំនងជាទីស្រឡាញ់របស់ព្រះវរបិតាមានចំពោះកូនចៅរបស់ទ្រង់ ។

នៅជំនាន់ដើម ប្រធាន ស្ពែនស៊ើរ ដបុលយូ ឃឹមបឹល បានបង្ហាញពី អារម្មណ៍ដែលខ្ញុំមាននៅថ្ងៃនេះ ។ លោកបានថ្លែងថា ៖ « នៃអ្វីៗទាំងអស់ ដែលយើងគួរតែមាន អំណរគុណបំផុត [ ចំពោះ ]… គឺថាស្ថានសួគ៌ត្រូវបានបើក ហើយថាសាសនាចក្រដែលបានស្ដារឡើងវិញរបស់ព្រះយេស៊ូវគ្រីស្ទត្រូវបានសង់នៅលើសីលានៃវិវរណៈ ។ វិវរណៈជាបន្ដបន្ទាប់ គឺជាលោហិតជីវិតនៃដំណឹងល្អនៃព្រះអម្ចាស់ និងព្រះអង្គសង្គ្រោះដ៏មានព្រះជន្មរស់ គឺព្រះយេស៊ូវគ្រីស្ទ » ។^៣

ព្យាការី អេណុក បានមើលឃើញជំនាន់ដែលយើងរស់នៅ ។ ព្រះអម្ចាស់បានប្រាប់ទៅអេណុកអំពីសេចក្ដីទុច្ចរិតដ៏ធំ ដែលនឹងយកឈ្នះ ហើយបានព្យាករណ៍អំពី « សេចក្ដីវេទនា » ដែលនឹងកើតមានឡើង ។ ទោះជាយ៉ាងណា ព្រះអម្ចាស់បានសន្យាថា « ប៉ុន្តែរាស្ត្ររបស់យើង យើងនឹងរក្សាទុក » ។^៤ « ឯសេចក្ដីសុចរិត នោះយើងនឹងចាត់ឲ្យចុះមកពីស្ថានសួគ៌ ហើយឯសេចក្ដីពិត នោះយើងនឹងចាត់ឲ្យចេញពីផែនដីទៅ ដើម្បីថ្លែងទីបន្ទាល់អំពីព្រះរាជបុត្រាសំណព្វរបស់យើង » ។^៥

ប្រធាន អ៊ែសរ៉ា ថាហ្វ ប៊ែនសឹន បានបង្រៀនដោយអំណាចដ៏មហិមាថា ព្រះគម្ពីរមរមន ថ្មគ្រឹះនៃសាសនារបស់យើងចេញមកពីក្នុងដីដើម្បីបំពេញការប្រកាសរបស់ព្រះអម្ចាស់ចំពោះអេណុក ។ ព្រះបិតា និងព្រះរាជបុត្រា និងពួកទេវតា និងពួកព្យាការី បានលេចមកឯព្យាការី យ៉ូសែប ស៊្មីធ « ត្រូវបានដឹកនាំដោយស្ថានសួគ៌ដើម្បីស្ដារអំណាចចាំបាច់ដល់នគរ » ។^៦

ព្យាការី យ៉ូសែប ស៊្មីធ បានទទួលវិវរណៈបន្ដបន្ទាប់ ។ វិវរណៈខ្លះត្រូវបានថ្លែងអំឡុងសន្និសីទនេះ ។ វិវរណៈជាច្រើនបានទទួលដោយព្យាការី យ៉ូសែប ត្រូវបានរក្សាទុកសម្រាប់ពួកយើងនៅក្នុងគម្ពីរគោលលទ្ធិ និងសេចក្ដីសញ្ញា ។ គ្រប់ព្រះគម្ពីរនៃសាសនាចក្រមាននូវព្រះគតិ និងព្រះឆន្ទៈនៃព្រះអម្ចាស់សម្រាប់យើងនៅក្នុងគ្រាកាន់កាប់ត្រួតត្រាចុងក្រោយនេះ ។^៧

បន្ថែមទៅលើបទគម្ពីរគ្រឹះដ៏មហិមាទាំងនេះ យើងត្រូវបានប្រទានពរដោយការបន្ដមានវិវរណៈមកកាន់ពួកព្យាការីនៅរស់ ។ ពួកព្យាការី គឺជា « ភ្នាក់ងាររបស់ព្រះអម្ចាស់ ហើយបានអនុញ្ញាតឲ្យថ្លែងជំនួសទ្រង់ » ។^៨

វិវរណៈមួយចំនួនមានសារៈសំខាន់ក្រៃលែង ហើយអ្នកដទៃពង្រីកការយល់ដឹងអំពីសេចក្ដីពិតនៃព្រះដ៏សំខាន់ ហើយផ្ដល់ការណែនាំសម្រាប់ជំនាន់របស់យើង ។^៩

យើងមានអំណរគុណយ៉ាងខ្លាំងចំពោះវិវរណៈចំពោះប្រធាន ស្ពែនស៊ើរ ដបុលយូ ឃឹមបឹលអំពីការ ផ្ដល់បព្វជិតភាព និងពរជ័យនៃព្រះវិហារបរិសុទ្ធចំពោះអស់សមាជិកបុរសដែលមានភាពសក្ដិសមក្នុងសាសនាចក្រខែមិថុនា ឆ្នាំ ១៩៧៨ ។^១០

ខ្ញុំបានបម្រើជាមួយនឹងពួកសាវកដប់ពីរនាក់ជាច្រើនដែលមានវត្តមាន និងចូលរួម នៅពេលដែលវិវរណៈដ៏មានតម្លៃត្រូវបានទទួល ។ ពួកគេម្នាក់ៗ នៅក្នុងការសន្ទនាផ្ទាល់ខ្លួន បានបញ្ជាក់អំពីការដឹកនាំខាងវិញ្ញាណដ៏មានអានុភាព និងរួបរួមគ្នារបស់ប្រធានឃឹមបឹល ហើយពួកគេមានបទពិសោធន៍នោះ ។ មានមនុស្សជាច្រើនបាននិយាយថាវាជាវិវរណៈដ៏មានអានុភាពបំផុត ដែលពួកគេបានទទួលពីមុន ឬបន្ទាប់ពីគ្រានោះ។^១១

ពួកយើងដែលមានកំពុងបម្រើនៅក្នុងកូរ៉ុមនៃពួកសាវកដប់ពីរនាក់បច្ចុប្បន្ននេះ មានពរនៅក្នុងជំនាន់របស់យើង នៅពេលវិវរណៈសំខាន់បានកើតមានតាមរយៈពួកព្យាការីបច្ចុប្បន្ន ។^១២ ប្រធាន រ័សុល អិម ណិលសុន គឺជាភ្នាក់ងារដែលបានទទួលព្រះបង្គាប់របស់ព្រះអម្ចាស់ ជាពិសេស ជាមួយនឹងវិវរណៈនានាដើម្បីជួយក្រុមគ្រួសារស្ថាបនាទីបរិសុទ្ធនៃសេចក្ដីជំនឿនៅក្នុងផ្ទះរបស់ពួកគេ ប្រមូលផ្ដុំពួកអ៊ីស្រាអែលខ្ចាត់ព្រាត់នៅទាំងសងខាងនៃវាំងនន ហើយប្រទានពរដល់ពួកបរិសុទ្ធដែលទទួលអំណោយទានពិសិដ្ឋនៅក្នុងពិធីបរិសុទ្ធនៃព្រះវិហារបរិសុទ្ធដ៏ពិសិដ្ឋ ។

នៅពេលការផ្លាស់ប្ដូរសំខាន់ៗប្រទានពរដល់គេហដ្ឋានរបស់យើង ត្រូវបានប្រកាសនៅក្នុងសន្និសីទទូទៅខែតុលា ឆ្នាំ ២០១៨ ខ្ញុំបានថ្លែងទីបន្ទាល់ « ថានៅក្នុងការពិភាក្សារបស់ក្រុមប្រឹក្សានៃគណៈប្រធានទីមួយ និង កូរ៉ុមនៃពួកសាវកដប់ពីរនាក់នៅក្នុងព្រះវិហារបរិសុទ្ធ … បន្ទាប់ពីព្យាការីជាទីស្រឡាញ់របស់យើង ដាក់ញ្ញត្តិថ្វាយព្រះអម្ចាស់សូមវិវរណៈ … នោះការបញ្ជាក់ដ៏មានអានុភាពត្រូវបានប្រគល់ឲ្យពួកយើងទាំងអស់គ្នា » ។^១៣

នៅគ្រានោះ វិវរណៈដទៃទៀត ទាក់ទងនឹងពិធីបរិសុទ្ធក្នុងព្រះវិហារបរិសុទ្ធដ៏ពិសិដ្ឋ ត្រូវបានផ្ដល់ឲ្យ ប៉ុន្តែពុំទាន់បានប្រកាស ឬអនុវត្តនៅឡើយ ។^១៤ ការណែនាំនេះបានចាប់ផ្ដើមជាមួយនឹងវិវរណៈជាព្យាការីចំពោះប្រធាន រ័សុល អិម ណិលសុនផ្ទាល់ និងការបញ្ជាក់ដ៏ទន់ភ្លន់ និងមានអានុភាពចំពោះអស់អ្នកដែលចូលរួមនៅក្នុងដំណើរការ ។ ប្រធាន ណិលសុន ជាពិសេសបានដាក់បញ្ចូលបងប្អូនស្រីដែលធ្វើជាអធិបតីនៅក្នុងសមាគមសង្គ្រោះ អង្គការយុវនារី និង អង្គការបឋមសិក្សា ។ ការណែនាំចុងក្រោយ នៅក្នុងព្រះវិហារបរិសុទ្ធចំពោះគណៈប្រធានទីមួយ និងកូរ៉ុមនៃពួកសាវកដប់ពីរនាក់ គឺខាងវិញ្ញាណ និងប្រកបដោយអានុភាពយ៉ាងខ្លាំង ។ យើងម្នាក់ៗបានដឹងថាយើងបានទទួលព្រះគតិ ព្រះឆន្ទៈ និងសម្លេងរបស់ព្រះអម្ចាស់ ។^១៥

ខ្ញុំសូមប្រកាសដ៏ឧឡារិកថា វិវរណៈជាបន្ដបន្ទាប់ ត្រូវបានទទួល ហើយត្រូវបានប្រគល់ឲ្យតាមរយៈបណ្ដាញដែលព្រះអម្ចាស់បានស្ថាបនាឡើង ។ ខ្ញុំសូមថ្លែងទីបន្ទាល់អំពី ការប្រកាសថ្មី ដែលប្រធាន ណិលសុន បានផ្ដល់ឲ្យនៅព្រឹកនេះ គឺវិវរណៈមួយដើម្បីប្រទានពរដល់មនុស្សទាំងអស់ ។

យើងសូមផ្ដល់ការអញ្ជើញមួយដល់មនុស្សទាំងអស់ឲ្យទទួលទាននៅតុនៃព្រះអម្ចាស់ ។

យើងក៏ប្រកាសផងដែរពីបំណងប្រាថ្នាដ៏អស់ពីដួងចិត្តយើងដើម្បីរួបរួមជាថ្មីនឹងអស់អ្នកដែលមានបញ្ហានឹងទីបន្ទាល់របស់ពួកគេ ដែលមិនសូវសកម្ម ឬដែលឈ្មោះរបស់ពួកគេត្រូវបានដកចេញពីកំណត់ហេតុសាសនាចក្រ ។ យើងមានបំណងប្រាថ្នាដើម្បីទទួលទានជាមួយនឹងអ្នក « នូវព្រះបន្ទុលនៃព្រះគ្រីស្ទ » នៅឯតុនៃព្រះអម្ចាស់ ដើម្បីរៀននូវអ្វីៗដែលយើងទាំងអស់គ្នាគួរតែធ្វើ ។^១៦ ពួកយើងត្រូវការបងប្អូន ! សាសនាចក្រត្រូវការបងប្អូន ! ព្រះអម្ចាស់ត្រូវការបងប្អូន ! ការអធិស្ឋានដោយអស់ពីដួងចិត្តរបស់យើងគឺសូមឲ្យបងប្អូននឹងចូលរួមនឹងពួកយើងក្នុងការថ្វាយបង្គំព្រះអង្គសង្គ្រោះនៃពិភពលោក ។ យើងដឹងថាបងប្អូនមួយចំនួនអាចទទួលនូវការខកចិត្ត អសណ្ដានចិត្ត ឬទង្វើដទៃទៀតដែលពុំមែនដូចជាព្រះគ្រីស្ទ ។ យើងក៏ដឹងថា អ្នកមួយចំនួនមានឧបសគ្គចំពោះជំនឿរបស់ពួកគេ ដែលពុំអាចមានអំណរគុណ ការយល់ដឹង ឬបានដោះស្រាយដោយពេញលេញ ។

សមាជិកស្មោះត្រង់ និងរឹងមាំបំផុតមួយចំនួនបានរងទុក្ខនឹងបញ្ហាមួយចំពោះសេចក្ដីជំនឿពួកគេដោយមូលហេតុមួយ ។ ខ្ញុំស្រឡាញ់ដំណើររឿងពិតរបស់ W. W. Phelps ដែលបានបោះបង់ព្រះវិហារ ហើយបានថ្លែងទីបន្ទាល់ទាស់នឹងព្យាការី យ៉ូសែប ស៊្មីធ នៅតុលាការមីសសួរី ។ បន្ទាប់ពីការប្រែចិត្ត គាត់បានសរសេរទៅកាន់យ៉ូសែបថា « ខ្ញុំដឹងពីស្ថានភាពរបស់ខ្ញុំ លោកក៏បានដឹង ហើយព្រះដឹង ហើយខ្ញុំចង់បានសង្គ្រោះ បើមិមត្តរបស់ខ្ញុំនឹងជួយខ្ញុំ » ។^១៧ យ៉ូសែប បានអភ័យទោសដល់លោក បានដាក់លោកឲ្យមកធ្វើការវិញ ហើយបានសរសេរជាទីស្រឡាញ់ថា « មិត្តពីដំបូង គឺជាមិត្តម្ដងទៀតនៅទីបផុត » ។^១៨

បងប្អូនប្រុសស្រីទាំងឡាយ មិនថាស្ថានភាពរបស់បងប្អូនយ៉ាងណាទេ សូមដឹងថា សាសនាចក្រ និងសមាជិកនឹងស្វាគមន៍បងប្អូនត្រឡប់មកវិញ !

វិវរណៈផ្ទាល់ខ្លួនដើម្បីដឹកនាំជីវិតរបស់យើង

វិវរណៈផ្ទាល់ខ្លួនគឺមានចំពោះអស់អ្នកដែលស្វែងរកការដឹកនាំមកពីព្រះអម្ចាស់ដោយរាបសារ ។ វាសំខាន់ដូចជាវិវរណៈជាព្យាការីផងដែរ ។ វិវរណៈផ្ទាល់ខ្លួន វិវរណៈខាងវិញ្ញាណមកពីព្រះវិញ្ញាណបរិសុទ្ធ ផ្ដល់លទ្ធផលនៅក្នុងមនុស្សរាប់លានដែលកំពុងទទួលទីបន្ទាល់ចាំបាច់ត្រូវបានទទួលបុណ្យជ្រមុជទឹក និងបានបញ្ជាក់ជាសមាជិកនៃនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។

វិវរណៈផ្ទាល់ខ្លួនគឺជាពរជ័យដ៏អស្ចារ្យដែលបានទទួលបន្ទាប់ពីពិធីបុណ្យជ្រមុជទឹក នៅពេលយើង « បានញែកចេញជាបរិសុទ្ធ ដោយការទទួលនូវព្រះវិញ្ញាណបរិសុទ្ធ » ។^១៩ ខ្ញុំអាចចងចាំអំពីវិវរណៈខាងវិញ្ញាណជាពិសេសមួយ នៅពេលខ្ញុំមានអាយុ ១៥ ឆ្នាំ ។ បងប្រុសដ៏មានតម្លៃរបស់ខ្ញុំស្វែងរកការណែនាំមកពីព្រះអម្ចាស់ដើម្បីដឹងរបៀបឆ្លើយតបទៅនឹងឪពុកជាទីស្រឡាញ់របស់យើង ដែលពុំចង់ឲ្យបងប្រុសខ្ញុំចេញបម្រើបេសកកម្ម ។ ខ្ញុំបានអធិស្ឋានដោយបំណងដ៏ស្មោះផងដែរ ហើយបានទទួលវិវរណៈផ្ទាល់ខ្លួនអំពីសេចក្ដីពិតពេញលេញនៃដំណឹងល្អ ។

តួនាទីរបស់ព្រះវិញ្ញាណបរិសុទ្ធ

វិវរណៈផ្ទាល់ខ្លួនផ្អែកទៅលើសេចក្ដីពិតខាងវិញ្ញាណដែលបានទទួលមកពីព្រះវិញ្ញាណបរិសុទ្ធ ។^២០ ព្រះវិញ្ញាណបរិសុទ្ធគឺជាអង្គបើកសម្ដែង និងអង្គថ្លែងទីបន្ទាល់អំពីសេចក្ដីពិតទាំងអស់ ជាពិសេសអំពីព្រះអង្គសង្គ្រោះ ។ បើគ្មានព្រះវិញ្ញាណបរិសុទ្ធ នោះយើងមិនអាចដឹងពិតថាព្រះយេស៊ូវគឺជាព្រះគ្រីស្ទទេ ។ តួនាទីច្បាស់របស់ទ្រង់គឺថ្លែងជាសាក្សីអំពីព្រះបិតា និងព្រះរាជបុត្រាទ្រង់ និងតំណែង និងសិរីល្អរបស់ពួកទ្រង់ ។

ព្រះវិញ្ញាណបរិសុទ្ធអាចមានឥទ្ធិពលដល់មនុស្សគ្រប់រូបតាមរបៀបដ៏មានអានុភាពមួយ ។^២១ ឥទ្ធិពលនេះនឹងមិនអាចមានជាប់ជានិច្ចទេ លុះត្រាតែមនុស្សម្នាក់ត្រូវបានទទួលបុណ្យជ្រមុជទឹក ហើយទទួលអំណោយទាននៃព្រះវិញ្ញាណបរិសុទ្ធ ។ ព្រះវិញ្ញាណបរិសុទ្ធក៏បម្រើជាភ្នាក់ងារលាងសម្អាតនៅក្នុងដំណើរការនៃការប្រែចិត្ត និងការអភ័យទោសផងដែរ ។

ព្រះវិញ្ញាណទំនាក់ទំនងតាមរបៀបដ៏អស្ចារ្យ ។ ព្រះអម្ចាស់បានប្រើការពិពណ៌នាដ៏ស្រស់ស្អាតនេះថា ៖

« យើងនឹងប្រាប់អ្នកនៅក្នុងគំនិតរបស់អ្នក និង នៅក្នុងចិត្តរបស់អ្នក ដោយព្រះវិញ្ញាណបរិសុទ្ធដែលនឹងសណ្ឋិតមកលើអ្នក ហើយដែលនឹងគង់នៅក្នុងចិត្តរបស់អ្នក » ។

« ឥឡូវនេះ មើលចុះ នេះគឺជាវិញ្ញាណនៃវិរវណៈ » ។^២២

ទោះជាឥទ្ធិពលរបស់ទ្រង់អាចជាអនុភាពដ៏មហិមាក្ដី ក៏ជាញឹកញាប់បំផុត កើតមានដោយស្ងប់ស្ងាត់ ជាសំឡេងតូចរហៀង ។^២៣ បទគម្ពីរបានដាក់បញ្ចូលនូវឧទាហរណ៍ជាច្រើនអំពីរបៀបដែលព្រះវិញ្ញាណមានឥទ្ធិពលមកលើគំនិតរបស់យើង រួមទាំងការនិយាយនូវភាពសុខសាន្ដចំពោះ គំនិតយើង^២៤ ដឹតជាប់គំនិតយើង^២៥ បំភ្លឺគំនិតរបស់យើង^២៦ ហើយជាសំឡេងមួយក្នុងគំនិតយើង ។^២៧

គោលការណ៍មួយចំនួនដែលរៀបចំយើងដើម្បីទទួលវិវរណៈរួមមាន ៖

ការអធិស្ឋានសូមការណែនាំខាងវិញ្ញាណ ។ យើងចាំបាច់ត្រូវស្វែងរក និងសូមដោយគោរព និងរាបសារ^២៨ ហើយអត់ធ្មត់ និងចុះចូល ។^២៩
ការរៀបចំខ្លួនសម្រាប់ការបំផុសគំនិត ។ ការណ៍នេះតម្រូវថា យើងត្រូវមានភាពសុខុដុមជាមួយនឹងការបង្រៀនរបស់ព្រះអម្ចាស់ ហើយប្រព្រឹត្តតាមបទបញ្ញត្តិរបស់ទ្រង់ ។
ការទទួលទានសាក្រាម៉ង់ដោយភាពសក្ដិសម ។ នៅពេលយើងធ្វើដូចនេះ នោះយើងធ្វើជាសាក្សី និងចុះសេចក្ដីសញ្ញាជាមួយព្រះថា យើងលើកដាក់មកលើខ្លួនយើងនូវព្រះនាមនៃព្រះរាជបុត្រាដ៏បរិសុទ្ធរបស់ទ្រង់ ហើយថាយើងចងចាំទ្រង់ និងរក្សាបទបញ្ញត្តិរបស់ទ្រង់ ។

គោលការណ៍ទាំងនេះរៀបចំយើងដើម្បីទទួល ទទួលស្គាល់ និងធ្វើតាមការបំផុសគំនិត និងការណែនាំពីព្រះវិញ្ញាណបរិសុទ្ធ ។ នេះរួមមានទាំង « រឿងទាំងឡាយដែលសុខសាន្ដ…អាចឲ្យមានអំណរ[នឹង] …ជីវិតអស់កល្បជានិច្ច »។^៣០

ការរៀបចំខាងវិញ្ញាណរបស់យើង គឺពង្រីកយ៉ាងអស្ចារ្យ នៅពេលយើងសិក្សាបទគម្ពីរ និងសេចក្ដីពិតនៃដំណឹងល្អជាទៀងទាត់ ហើយពិចារណានៅក្នុងគំនិតយើងនូវការណែនាំដែលយើងស្វែងរក ។ ប៉ុន្ដែសូមចងចាំឲ្យមានភាពអត់ធ្មត់ ហើយទុកចិត្តលើកាលកំណត់របស់ព្រះអម្ចាស់ ។ ការណែនាំត្រូវបានផ្ដល់ឲ្យដោយព្រះអម្ចាស់ដ៏មានគ្រប់ព្រះចេស្ដា នៅពេលទ្រង់ « ជ្រើសរើសបង្រៀនយើងដោយព្រះចេតនា » ។^៣១

វិវរណៈនៅក្នុងការហៅ និងការចាត់តាំងរបស់យើង

ព្រះវិញ្ញាណបរិសុទ្ធក៏នឹងផ្ដល់វិវរណៈនៅក្នុងការហៅ និងការចាត់តាំងរបស់យើងផងដែរ ។ តាមបទពិសោធន៍ខ្ញុំ ការណែនាំខាងវិញ្ញាសំខាន់បំផុត ជាញឹកញាប់កើតមាននៅពេលយើងព្យាយាមប្រទានពរដល់អ្នកដទៃនៅក្នុងការបំពេញតាមការទទួលខុសត្រូវរបស់យើង ។

ខ្ញុំអាចចងចាំកាលជាប៊ីស្សពវ័យក្មេង ទទួលទូរសព្ទដ៏អន្ទះសារមួយមកពីគូស្វាមីភរិយារៀបការមួយគូរក្នុងរយៈពេលដ៏ខ្លីមួយពីមុនខ្ញុំឡើងយន្ដហោះទៅធ្វើកិច្ចការជំនួញ ។ ខ្ញុំបានទូលអង្វរព្រះអម្ចាស់ពីមុនការមកដល់របស់ពួកគេដើម្បីដឹងពីរបៀបដែលខ្ញុំអាចប្រទានពរដល់ពួកគេ ។ ខ្ញុំទទួលការបើកបង្ហាញពីឬសគល់នៃបញ្ហា និងចម្លើយដែលខ្ញុំគួរឆ្លើយ ។ ការណែនាំប្រកបដោយវិវរណៈនោះបានអនុញ្ញាតឲ្យខ្ញុំបំពេញការទទួលខុសត្រូវដ៏ពិសិដ្ឋនៃការហៅរបស់ខ្ញុំ ក្នុងនាមជាប៊ីស្សព មិនថាខ្ញុំមានពេលប្រថុចញ៉ុចយ៉ាងណាក្ដី ។ ប៊ីស្សពនៅទូទាំងពិភពលោកក៏ចែកចាយបទពិសោធន៍ដូចគ្នាទាំងនេះជាមួយនឹងខ្ញុំដែរ ។ ក្នុងនាមជាប្រធានស្ដេកមួយរូប ខ្ញុំមិនគ្រាន់តែទទួលវិវរណៈសំខាន់ប៉ុណ្ណោះទេ ប៉ុន្តែក៏ទទួល ការកែតម្រូវ ផ្ទាល់ខ្លួន ដែលចាំបាច់ដើម្បីសម្រេចព្រះរាជបំណងរបស់ព្រះអម្ចាស់ផងដែរ ។

ខ្ញុំសូម អះអាងនឹងបងប្អូនថា ការណែនាំប្រកបដោយវិវរណៈអាចទទួលបានតាមរយៈយើងម្នានក់ៗ នៅពេលយើងធ្វើកិច្ចការដោយរាបសារនៅក្នុងចម្ការរបស់ព្រះអម្ចាស់ ។ ការណែនាំភាគច្រើនបំផុតរបស់យើងគឺមកពីព្រះវិញ្ញាណបរិសុទ្ធ ។ ពេលខ្លះ និងគោលបំណងខ្លះ វាកើតមកពីព្រះអម្ចាស់ផ្ទាល់ ។ ខ្ញុំសូមថ្លែងទីបន្ទាល់ដោយផ្ទាល់ថា រឿងនេះជាការពិត ។ ការណែនាំសម្រាប់សាសនាចក្រ ទាំងមូល កើតមកពីប្រធាន និងព្យាការីនៃសាសនាចក្រ ។

យើង ជាពួកសាវកសម័យទំនើប បានមានឯកសិទ្ធិក្នុងការធ្វើការ និងធ្វើដំណើរជាមួយព្យាការីបច្ចុប្បន្នរបស់យើង ប្រធាន ណិលសុន ។ ខ្ញុំសូមថាឡើងវិញនូវអ្វីដែល វិលហ្វួឌ វូឌដ្រុព្វ បានថ្លែងអំពីព្យាការី យ៉ូសែប ស៊្មីធ វាពិតដូចជាប្រធាន ណិលសុនផងដែរ ។ ខ្ញុំបានឃើញ « កិច្ចការនៃព្រះវិញ្ញាណរបស់ព្រះជាមួយនឹងលោក និងវិវរណៈនៃព្រះយេស៊ូវគ្រីស្ទមកដល់លោក ព្រមទាំងការបំពេញនូវវិវរណៈទាំងនោះ » ។^៣២

ការអង្វរដ៏រាបសាររបស់ខ្ញុំនាថ្ងៃនេះ គឺថា យើងម្នាក់ៗនឹងស្វែងកវិវរណៈជាបន្ដបន្ទាប់ដើម្បីដឹកនាំជីវិតរបស់យើង ហើយធ្វើតាមព្រះវិញ្ញាណ នៅពេលយើងថ្វាយបង្គំព្រះ ជាព្រះបិតានៅក្នុងព្រះនាមនៃព្រះអង្គសង្គ្រោះយើង ព្រះយេស៊ូវគ្រីស្ទ ជាអង្គដែលខ្ញុំថ្លែងជាសាក្សីនៅក្នុងព្រះនាមនៃព្រះយេស៊ូវគ្រីស្ទ អាម៉ែន ។